“Bōk im Leļo̧k Tūriam̧o̧,” Liaona, Jept. 2023.
Rūm̧m̧an Ded ro
Bōk im Leļo̧k Tūriam̧o̧
Waanjo̧n̄ak eo eweppān an Rilo̧mo̧o̧r ej katakin kōj kōn kajoor in leļo̧k tūriam̧o̧ n̄an kōjeram̧m̧an ro jet.
Ta eo ej waļo̧k n̄e kwoj kobaik juon baluun jidikdik ippān juon jinen eo em̧ōk im juon ļaddik jidikdik eo ekūtōtō. Juon jekjek eo e kainepata. Jān jikin jijōt ko ilokan, ij alooje an jekjek eo waļo̧k. Ej waļo̧k āinwōt in:
Ļaddik jidikdik eo: Ikwōle!
Jinen: Ekwe, jen lale loan iep e aō ewōr ta.
Ļaddik jidikdik eo: Jaaaaab!
Jinen: Ak kwoj jab kwole ke?
Ļaddik jidikdik eo: Letok men ne!
Jinen: Lewaj ta?
Ļaddik jidikdik eo: Men neee!
Jinen: Honey, koban bōk m̧arm̧ar e aō.
Ļaddik jidikdik eo: Ikōņaan!
Kōm̧eļeļe. Iumin minit ko 20 tokālik, eo jinen ekar kōjerbal elōn̄ jekjek ko n̄an kajjieon̄ kaenōm̧m̧an e Ļaddik eo:wiaik buruōn, kōm̧m̧an kōjak, im bar juon ak ruo kamijak ko redik. Ejeļo̧k men ekar jerbal. “Ej juon iaal eo ekadu,” ikar kakeememej n̄a make. “Liin enaaj em̧m̧an an pād.”
Bōtaab ekar jab em̧m̧an. Inepata eo an ekar ļapļo̧k, im ekar jino irļo̧k kemjaļaaļ jān mejen. Mekarta ikar jab jeļā kajeen liin, ikar en̄jake n̄an jipan̄ e. Oktaktok, ikar jino jar kōn erro jimo̧r.
Kar jab n̄a wōt menin ekar jelōt eō. Ke m̧ōjno in en̄jake eo an ej ļap, juon bar ri uwe ekar itok n̄an jipan̄ e. E kar juon kōrā eo eritto, kar jijōt wōt ilo jait eo rājet. Kōn meram̧ in jouj, liin ekar jitļo̧k n̄an jinen eo em̧m̧an ded, kar kōņōņō jejjo naan in kaenōm̧m̧an ilo unoojdikdik, im kar jibwe pein. Kar men eo de eo. Im ekar ļap jo̧n̄an.
Kōrā rein ruo rekar jibwe pein doon jān jea ko aer turin doon ilo aolepen tūreep in baluun eo. Jekdoon n̄e ļaddik jidikdik eo ekar wōnm̧aanļo̧k im kōkeroro ilo an kōļapļap, jinen ekar ineem̧m̧an. Ekar juon menin bwilōn̄.
Tūriamo im Iakwe: Ruo Jinōkjeej in Rikaļo̧o̧r
Ilo kajin kein ad raan kein, kabwilōn̄lōn̄ in ewōr etan: tūriamo Tūriamo, m̧eļeļe in, ej jerbal eo ejouj in en̄jake an bar juon armij ļōmņak, en̄jake ko, im men ko rej pād ie. Tūriamo juon naan in raan kein, koban loe ilo jeje ko rekwojarjar. Bōtaab ro retimjemļo̧k ilo naan rekar je bwe tūriamo epaak ekejel eo an ippān iakwe. Im āinwōt tōōm̧ eo ilo jeje ko rekwojarjar, iakwe eļap.
Tūriamo ej maron̄ eo n̄an ekejel ilo metak an bar juon armij, im iakwe ej juon jerbal in jouj eo ej waļo̧k jān maron̄ in. Jisōs Kraist ekar kwaļo̧k jimor tūriamo im iakwe ilo An kar jerbal in karejar, kōjeram̧m̧an, kemour, im pinmuur. Āinwōt rikaļoor ro an Kraist, jej aikuj ekkatak n̄an en̄jake im leļo̧k iakwe. Men ko kein rej kalikkar juon rikaļo̧o̧r.
N̄e tūriamo ej jerbal ilo aolepen an aiboojoj, ej jipan̄ kōj melele innem uwaak n̄an an doon metak, aikuj, mijak, im būrom̧ōj. Ilo jekjek eo an jinen eo edik, juon kōrā eritto eo kar rittō jet epepen ko in en̄jake in lale ajri ro nejin im jibun emaron̄ leļo̧k ineem̧m̧an kōnke ekar en̄taan ilo ejja men pen ippan make. Kōn erreo in en̄jake eo an make, e kar karbōb n̄an āinwōt juon rikaenōm̧m̧an.
Ta eo ej karbob Jisōs Kraist n̄an kaenōm̧m̧an kōj? Elder Neal A. Maxwell (1926–2004) jān Doulul eo an Jon̄oulruo Rijilōk ro ekar katakin: “Jisōs ejeļā ekōjkan n̄an kaenōm̧m̧an kōj ilo būromōj im nan̄inmij ko ad kōnke Jisōs em̧ōj an bōk kadede burom̧ōj im nan̄inmij ko ad [lale Alma 7:11–12]. E jeļā kaki moktata; lo, tūriamo eo an kar bōk.”1
Christ in the Land Bountiful, jān Simon Dewey
Bōk Tūriamo im Jipan̄ Ro jet
Ta men ko reppen em̧ōj am̧ kar iooni ijo kwaar “bōk” maron̄ eo n̄an tūriamo ippān ro jet im leļo̧k iakwe n̄an er. Em̧ōj ke am en̄taan kōn men ko waļo̧k jān jeramōl, kakure, nan̄inmij, kōjekdoon, jerawiwi, ak jabdewōt kain aban̄? N̄e emōj am̧, bōlen kwar walōn̄tak jān en̄taan ko am̧ ilo am māletletļo̧k, kajoorļo̧k, im ļapļo̧k am̧ meoeo in armij.
Ilo kadu in, em̧ōj am̧ bōk tūriamo. Kopojak in kōm̧m̧an oktak ilo mour ko an ro jet rej en̄taan. Ijjino ia? Ewōr ruo aō ļōmņak:
Kein kajuon, kajjieon̄ erom̧ kile eļapļo̧k en̄taan ko an ro jet. Ekabūrom̧ōjm̧ōj, epidodo n̄an pād iturin juon armij eo ej metak im mekarta jejjab jeļā kōn en̄taan ko aer. Ekōjkan ad maron̄ ļapļo̧k ad kile? Waanjon̄ak eo an Jisōs Kraist emaron̄ katakin kōj.
Ālkin Jerkakpeje eo An, ke Jisōs ej loļo̧k RiNipai ro, E ekar kōm̧eļeļe katak ko an im katakin er gospel eo An. Inne E kar bōjrak, E kar kalimjōkļo̧k armij ro im ba, “Ij kile bwe kom̧ij m̧ōjņo̧, bwe kom̧ij jab maron̄ meļeļe aolep naan ko Aō” (3 Nipai 17:2). Innem Jisōs ekar karuwaineneik er n̄an rool n̄an m̧ōko m̧wer, kakije, lin̄ūri katak ko An, im bar roltok raan eo juon kāāl im pojak n̄an eļapļo̧k (lale 3 Nipai 173).
Jem̧ļo̧kin bwebwenato in, ejim̧we ke? Ejjab lukkun. An Jisōs kile ekar m̧wilaļ ļo̧k ke E ej lale mejen ro rej ļo̧o̧re:
“Im ālikin men kein ke ar m̧ōj an Jisōs kōnono āindein, Eaar bōk mejān ipeļaakin ijo bar juon alen ioon jarlepju eo, im lo raar jan̄, im kar mejōk wōt E āinwōt n̄e raar kajjitōk ippān n̄an pād wōt aetokļo̧k ippāer.
“Im Eaar ba n̄an er: Lo, en̄jake ko Aō reobrak kōn tūriam̧okake kom̧” (3 Nephi 17:5–6). Ilo an buul kalimjōk er, ekar lukkun kio lo er. Im menin ekar kōm̧m̧an an iakwe eo An em̧akūt.
Ilo juon laļ eo eobrak kōn armij ro rewōtļo̧k, jejab aikuj buul kalimjōk mokta jān ad lo kemjaļaaļ ilo mejen ajri ro nejin Anij. Bōtaab jej aikuj in kalimjōk. Āinwōt Rilo̧mo̧o̧r, jemaron̄ kālet n̄an kalimjōk armij ilo mejen aikuj ko aer. Im n̄e jenaaj loe, jenaaj jipan̄.
Elder Ulisses Soares jen Doulul eo an Jon̄oulruo Rijilōk ro ekar je “ilo ad kajjieon̄ kwaļo̧k mour in tūriam̧o ilo mour in ad, āinwōt waanjon̄ak eo jen Rilo̧mo̧o̧r, jenaaj jino ļōmņak kōn aikuj ko an armej ro. Kōn ļōmņak in, en̄jake ko an itok-limo im iakwe renaaj im̧we aolep men ko jej kōm̧m̧ani.”2
Kein karuo, leļo̧k kain jipan̄ rōt eo kwoj oktak in karbōb n̄an leļo̧k. Ālkin an Jisōs kar kile aikuj ko an Rinipai ro ilo Bountiful, E kar kūr er n̄an epaaktok. Innem E kar kemour rinan̄inmij ro aer im kōjerām̧m̧an ajri ro nejier. E kar kōm̧m̧ani menko Rilo̧mo̧o̧r an Laļ in wōt emaron̄ kōm̧m̧an.
Kwe im n̄a jemaron̄ bar kōm̧m̧an bwe en̄jake ko ad im maron̄ ko ren pedped ioon aikuj ko an ro jet. Jejjab maron̄ kajim̧we joreen ko an aolep, ak jemaron̄ kadikļo̧k eddo ko an ro en̄taan ko aer jej jejeļā kaki. Jemaron̄ jab maron̄ kemour juon rilepe, bōtaab jemaron̄ kaenōm̧m̧an rinan̄inmij. Jemaron̄ jab maron̄ lelōn̄tak juon jān jeram̧ōl, bōtaab jemaron̄ kwaļo̧k pedped in tiljek ilo mour, jeer e juon m̧ōn̄a, im joujļo̧k ilo leļo̧k menin jortak ko an jitlok. Jemaron̄ jab maron̄ jeorļo̧k bwōd, bōtaab jemaron̄ jeorļo̧k bwod an ro rekar nana ņae kōj.
Likūt Tūriamo n̄an Jerbal
Ta eo ej waļo̧k n̄e kwoj kobaik juon baluun jidikdik ippān juon jinen eo em̧ōk im juon ļaddik jidikdik eo ekūtōtō. Juon iien n̄a kwaļo̧k tūriamo im iakwe.
Baluun eo waam ekar jok im kōrā in jinen em̧m̧an ded ekar moot, carry-on ilo juon pā, ļaddik jidikdik ilo pā eo juon. Ewaļo̧k ke ekar bar wōr juon baluun ej aikuj kaiki im ekar tōn rum̧wiji. Ikar lale an ikumkum ilo jikin mweiek eo ke nien nuknuk eo an ej diwōjtok. Ikar bōk elap iaan me ko mweien, stroller, car seat, suitcase, carry-on, bag in kaļ. Liin ekar aikuj jipan̄. Tūriamo eo aō ekar oktak n̄an iakwe.
Ijelokin aō bōjrak im kwaļo̧k kajjeō, iaar leļo̧k peiu im jibwe tok men ko mweien im ba, “Ij bō men kein. Kwon bōke ļaddik ne. Ettōr n̄an kōjem̧ eo am̧. N̄aij ļo̧o̧re kwe” Ekar kam̧m̧oolol im erre, im kem kar ettōr loan airport eo. Ke kemij tōpar kōjem̧ eo, bar juon kōra ej akweļap n̄an rijerbal in baluun eo bwe en dāpij wōt baluun eo laļ bar jejjo minit. Kem kar tōpar im ikijeļo̧k bōtaab tōprak. Jinen eo em̧m̧an ded im kōrā in rekar atbakwoj doon kōn kemjaļaaļ in m̧ōņōņō im anemkwoj mokta jen aer delo̧n̄.
Jerbal in jipan̄ in edik ekar jab ukōt laļin, bōtaab ekar m̧ool kōjeram̧m̧an mour eo an juon nejin Anij ej aikuj. Āinwōt an jipan̄ eo m̧ōtta ekāāl wōnm̧aanļo̧k imaan mejen kajik eo an ilo kanniōk, ekar jipan̄ eo wōnm̧anļo̧k imaan mejen kajik eo aō ilo jetōb. Kālet tūriamo im iakwe ekar jipan̄ eō erom̧ļo̧k āinwōt Jisōs Kraist. Im menin ekar kōm̧m̧an aō mōņōņō.
Mekarta ia eo jej pād ie—ilo jerbal ak jikin jikuuļ, ilo jikin jar ak ioon juon baluun—jemaron̄ ro ritūriamo ripinej jenkwan Rilo̧mo̧o̧r eo. Wōn eo Rilo̧mo̧o̧r eo ekoņaan bwe kwon leļo̧k iakwe n̄an e rainin?