“Kwon Kōņaan ke Jeļā Eļapļo̧k?,” Liaona, Jeptōm̧ba 2023.
Ainikien ko an Armej ro Rekwojarjar ilo Raan Ko Āliktata
Kwon Kōņaan ke Jeļā Eļapļo̧k?
Juon iaan ro m̧ōttan ilo em̧ nuknuk eo ekar oktak jān ritariņae ro jet, innem iaar kajjitōk ippān etke.
Rijeje eo Thomas Salisbury ej peptaij i ilo Sông Bé Lake, Vietnam.
Pija ko litok jān rijeje eo
Ikar kobaļo̧k n̄an m̧ōttan United States Army n̄an jilu-iiō tōōm̧ im kar tōparļo̧k ilo South Vietnam ilo raan in lotak eo aō n̄an 20 aō iiō. Ālkin ruawlitōk allōn̄, kar kūr eō n̄an juon unit ilōn̄ irilik in Saigon. Ke ikar pād ijo, ikar m̧ōkaj aō kile ke juon iaan ro m̧ōtta ilo em̧ nuknuk eo, Thomas Salisbury, ekar oktak jān aolep.
Oktak eo ekar kōpalpal jon̄an ikar kajjitō ippān, “Tom, etke kolukun oktak jān aolep?”
“Kōnke n̄aij juon Rikwojarjar ilo Raan Ko Āliktata,” ekar uwaak.
“Ta in juon Rikwojarjar ilo Raan Kko Āliktata?” Iaar kajjitōk.
Ekar karōk n̄a bwe in iioon e im Harold Lewis, juon kar mijinede eo ekar jerbal āinwōt juon rijipan̄ ri lale jar eo ilo unit eo. Ilo kweilo̧k eo jinointata ilo em̧ nuknuk eo me jekar kōjerbale n̄an m̧ōn jar, ikar errā ke eļan̄n̄e ij tōm̧ak men ko rej ba n̄an eō, imaron̄ nej peptaij. Ikar bar bōk juon Bok in Mormon, eo me ikar likut ilo bōjo eo itulal in jedojij eo aō im riiti jabdewōt iien ekar peļļo̧k n̄an n̄a.
Jet kōmeļeļe rekar m̧ōjļo̧k, im ikar lo bwe kajjojo katak rekar uwaaki kajjitok ko ekar wōr ippā ilo kappukōt m̧ool eo. Bōtaab ke Tom im Harold rekar kajjitōk eļan̄n̄e ikōņaan peptaij, ikar ba jaab. Ikar jab jeļā ekōjkan aō nej kōjpārok aolep kien ko rekar katak eō kaki.
Ālkin kar pād ilo juon kweilok an district ilo Saigon, Ikar etal n̄an Australia iumin juon wiik n̄an kakije im bōk aō iien. Ke iaar pād ijo, iar jino kile jon̄an aorōk in katak in gospel ko n̄an n̄a. Ke ij tōprakļo̧k Vietnam, ikar kair im kōjeļļā n̄an Tom ke ikar kōņaan peptaij.
Ejjab to, Tom ekar peptaij eō ilo Sông Bé Lake, Harold ekar kapen eō juon uwaan Kabun̄ eo, im Timothy Hill, ritōl eo an kurup in Kabun̄ eo am, ekar kapit eō juon tiikōn.
Ke iaar rool n̄an ijo jikū ilo United States jiljino wiik tokālik, ikar kwaļo̧k kajeen gospel eo n̄an lio jera, eo ekar erom̧ lio pāleō. E kar bar atbakwoj ennaan in kōjatdikdik eo an gospel eo.
Inaaj kam̧m̧oolol indeeo bwe Tom ekar kajjitōk ippa eļan̄n̄e iaar kōņaan jeļā eļapļo̧k. Waanjo̧n̄ak eo an im karuwainene eo an rekar uwaake kōņaan eo aō n̄an jeļā m̧ool eo im m̧ōņōņō ilo kōjeram̧m̧an ko an.