“Peptaij an Bon̄in Bōļaide,” Liaona, Jept. 2023.
Ainikien ko an Armej ro Rekwojarjar ilo Raan Ko Āliktata
Peptaij an Bon̄in Bōļaide
Ikdeelel eo aō n̄an ukwelo̧k ekar jipan̄ eō loe Rilo̧mo̧o̧r eo im Kabun̄ in An.
Kōm̧eļeļe jān Katy Dockrill
Ālkin en̄jake mōņōņō eo an itok n̄an United States jān China n̄an bōk PhD eo aō, ikar obrak kōn bujin pepa in jikuuļ ij aikuj kar riit im jeje. Ikar bar jab lukkun jeļā ekōjkan aō kōnono ippān rikapilōklōk eo aō ilo jikuuļ, eo ekar kobaiktok aō inepata. Ikar en̄jake jōbwābwe im ajjimakeke, im ikar jab jeļā ta in kōm̧m̧ane.
Ikar kapene bwe bwōd ko aō moktaļo̧k rekar kōm̧m̧an aō en̄taan im ij aikuj ukweļo̧k. Ekar jota, kio iaar kappokōt “m̧ōn jar” online. Ikar loe bwe Kabun̄ eo an Jisōs Kraist im Armij ro Rekwojarjar ilo Raan Kko Āliktata ekar kabun̄ eo de eo ej peļļo̧k m̧ae 9:00 awa jota. Ikar kajet ilo ļōmņak eo aō n̄an ukweļo̧k ilo m̧ōn jar eo, iaar mootļo̧k im etetal uimin juon awa.
Ke ij tōpar ļo̧k m̧ōn jar eo ilo 6:00 awa jota, iaar elolo meram̧ im ron̄ ainikien ettōn̄ im al rej itok jān lowa. Ikar kappok ipeļaakin mōn jar eo ak iaar jab loe kōjem̧ eo. Ilo juon wūntō, Iar lo juon jemen ej ikkure ippān ļaddik eo nejin ilo juon iaan ruum̧ ko. Iar kōļaļļaļ ilo wūntō eo im ekar reitok. Ļein ekar tōl eō n̄an kōjem̧ eo, karuaineneik eō, im ba n̄an n̄a ke ewōr juon ej peptaij.
Ikar ļo̧o̧r tōl eo an im etal n̄an juon ruum̧ ijo juon em̧m̧aan ej leļo̧k kōjeram̧m̧an n̄an juon ļaddik eo ejkap m̧ōj an peptaij. Jutak iturin kōjem̧ eo, ron̄jake kōjeram̧m̧an eo, ikar en̄jake ke Anij ekar bar unoojdikdik kōjeram̧m̧an ko n̄an n̄a. Buruō ekar meņeen, im ikar en̄jake ta eo ikar ekkatak tokelik ke ej Jetōb Kwojarjar. Ikar bar ron̄ juon ainikien ejba bwe em̧ōj jeorļo̧k aō bwōd.
M̧ōjin peptaij eo, ikar koba ippān ro jet im jeļā kajeen elōn̄ armij ro rem̧m̧an. Iar jab ajjimakeke. Juon em̧m̧aan ekar kwaļo̧k kajeen e make āinwōt kar “branch būreejtōn” m̧okta ekar ba emaron̄ ettōr kake eō n̄an m̧weo imō. Jet allōn̄ remootļo̧k, ālkin aō kar bōk katak ko an mijinede, iaar peptaij.
Ilo raan in peptaij eo aō ilo 2018 ilo Cambridge, Massachusetts, juon būratōr ekar kōnono kōn an Jemedwōj Ilan̄ kar kepooj peptaij in Bōļaide eo. Ekar kōm̧eļeļe bwe peptaij ko renkar kōm̧m̧an ilo Jabōt eo tok bōtaab kōn an bōk iien, kar maron̄ jikejuuļi n̄an bon̄in Bōļaide. N̄e enkar jab oktak in, inkar jamin itok im jeļā Kabun̄ in, Rilo̧mo̧o̧r eo ad im Jemedwōj Ilan̄, im ro jeiū im jatū ilo gospel in.