Kushiriki Nakala 72 za Kitabu cha Mormoni, Liahona, 2023.
Sauti za Watakatifu wa Siku za Mwisho
Kushiriki Nakala 72 za Kitabu cha Mormoni
Kila mara nilipofungua mdomo wangu kuzungumza kuhusu Kitabu cha Mormoni, Roho Mtakatifu alikuwapo pamoja nami.
Kielelezo na Allen Garns
Wakati wa janga la UVIKO-19, tulibarikiwa kupata nafasi ya kutoa huduma kwa ajili ya mume wangu, Claude, katika nyumba yetu. Hapo, mimi na watoto wetu kwa upendo tulisaidia katika kumhudumia mpaka pale aliposonga polepole hadi nyumbani kwetu mbinguni.
Kabla, mimi na Claude tulikuwa tumesali kuhusu ikiwa turekebishe baraza letu kuwa chumba cha utunzaji wa wagonjwa mahututi, ambapo tungeweza kuweka kila kitu ambacho angehitaji ili kupata faraja. Tulipokea uthibitisho kwamba tulipaswa kusonga mbele na wazo hilo.
Ili kurekebisha baraza, wafanyakazi kadhaa walihitaji kuingia katika nyumba yetu. Kwa bahati nzuri, baraza lilikuwa na mlango wa nyuma, kwa hiyo wafanyakazi wangeweza kuingia na kutoka bila kupitia nyumba kuu. Hiyo ilikuwa baraka kuu wakati wa vizuizi vya UVIKO-19.
Baada ya chumba cha Claude kukamilika, wauguzi walikuja kila siku. Walikuwa wakarimu, wenye upendo, na weledi kuhusu kile tulichohitaji ili kumweka Claude katika faraja.
Wakati nilipojiunga na Kanisa, nilifundishwa kwamba kila muumini wa Kanisa ni mmisionari.1 Kwa sababu ninapenda kushiriki injili, niliagiza makasha matatu ya Vitabu vya Mormoni, vitabu 24 katika kila kasha. Niliweka nadhiri kumpa kitabu kila mtu aliyeingia katika nyumba yetu.
Nilitia alama sehemu muhimu za kila kitabu kwa kadi ya kibiashara iliyosanifiwa kwamba iwe na picha ya Hekalu la Salt Lake. Pia niligundisha ushuhuda wangu kwenye ukurasa tupu mbele ya kila kitabu. Kisha, kabla ya kumpa kitabu mfanyakazi au muuguzi, niliwaeleza Kitabu cha Mormoni ni nini.
Nilishangazwa kwa furaha na mijibizo yao. Ni mtu mmoja tu aliyekataa kupokea kitabu. Wengine wote walikuwa na hamu ya kusikia kukihusu. Wengine walinishukuru sana, wakisema kwamba walijua kuhusu Kitabu cha Mormoni na walitaka kukipata. Watu kadhaa walifurahi sana kiasi kwamba walinikumbatia.
Nilishawishika kwamba hii ilitokea kwa sababu kila mara nilipofungua mdomo wangu kuzungumza kuhusu Kitabu cha Mormoni, Roho Mtakatifu alikuwapo pamoja nami. Ninaamini kwamba wafanyakazi na wauguzi waliweza kumhisi Roho. Niligawa vitabu vyote 72 , na hivi karibuni niliagiza 24 zaidi.