Misingi ya Injili

Kuwatunza Wale Walio na Mahitaji

Aliponya Magonjwa Mengi ya Kila Aina, na J. Kirk Richards, isinakiliwe

Kama waumini wa Kanisa la Yesu Kristo la Watakatifu wa Siku za Mwisho, tunafuata mafundisho ya Bwana ya kuwajali wale wenye uhitaji. Tunawajali wengine kwa kuwatumikia, kuwasaidia wajitegemee, na kushiriki kile tulichonacho.

Mfano wa Yesu Kristo

Yesu Kristo aliwapenda, aliwafariji, na kuwaombea wale walio karibu Naye. Yeye “alizunguka huko na huko, akitenda kazi njema ” (Matendo ya Mitume 10:38). Tunaweza kufuata mfano Wake kwa kuwapenda, kuwatumikia, na kuwaombea wale walio karibu nasi. Sisi daima tunaweza kutafuta njia za kuwasaidia wengine.

Uhudumiaji

Neno uhudumiaji limetumika katika maandiko na katika Kanisa la Bwana kuelezea: jinsi tunavyoweza kujaliana mmoja na mwingine. Wenye ukuhani wanapangiwa kama akina kaka wahudumiaji kwa kila mtu au familia katika kata au tawi. Akina dada wahudumiaji wanapangiwa kwa kila mwanamke mtu mzima. Akina kaka na akina dada wahudumiaji wanahakikisha kwamba waumini wote wa Kanisa wanakumbukwa na kutunzwa.

Kuwasaidia Wengine Kuwa Wenye Kujitegemea

Tunaweza kuwasaidia wanafamilia na marafiki kuwa wenye kujitegemea kwa kuwahimiza wao kupata masuluhisho ya muda mrefu kwenye shida zao. Tunaweza kisha kuwasaidia wafanyie kazi malengo yao. Tafuta maelezo zaidi kuhusu kujitegemea katika Liahona ya Agosti 2023 Makala ya Misingi ya Injili.

Kuwahudumia Wengine

Kuna njia nyingi tunazoweza kuwatumikia wale walio karibu nasi na kuwasaidia kukidhi mahitaji yao kimwili, kiroho, na kihisia. Kujifunza kuhusu wengine kunaweza kutusaidia kujua jinsi tunavyoweza kuwatumikia vyema. Tunaweza pia kusali kwa ajili ya mwongozo ili kujua kile tunachoweza kufanya ili kusaidia.

Kushiriki Kile Tulichonacho

Tunaweza kuwasaidia wengine kwa kushiriki kile ambacho Mungu ametubariki nacho. Kwa mfano, tunaweza kutoa matoleo ya mfungo au kuchangia mfuko wa Msaada wa Kibinadamu wa Kanisa. Tunaweza pia kutumikia katika jamii yetu na miito yetu ya Kanisa.

Wajibu wa Viongozi wa Kanisa

Askofu husimamia kuwatunza wale walio na uhitaji katika kata. Anaweza kutumia hela kutoka kwenye matoleo ya mfungo kuwasaidia waumini walio na mahitaji. Viongozi wengine, ikijumuisha washauri wake na urais wa Muungano wa Usaidizi na urais wa akidi ya wazee, wanawasaidia waumini kupata nyenzo wanazoweza kutumia kukidhi mahitaji yao.

Juhudi za Msaada wa Kibinadamu wa Kanisa

Kanisa husaidia watu kote ulimwenguni katika dharura, miradi ya jamii, na mipango mingine kama vile maji safi na chanjo. Ili kujifunza zaidi, ona Dallin H. Oaks, “Kuwasaidia Masikini na Walio na Dhiki,” Liahona, Mei 2022, 6–8.

Kutoka kwenye Maandiko

“Mungu humpenda yeye atoaye kwa moyo wa ukunjufu” (2 Wakorintho 9:7).

Tunawafundisha watoto wetu kuwatumikia wale walio na uhitaji (ona Mosia 4:15–16).

Tunawafariji wengine na kuwasaidia wao kubeba mizigo yao (ona Mosia 18:8–9).

Maneno ya Kukumbuka

Wito: jukumu mahususi la kutumikia katika Kanisa. Viongozi wa Kanisa hutafuta mwongozo wa kiungu ili kujua ni nani Bwana angetaka wao wamwite katika wito.

Matoleo ya mfungo: hela tunazotoa kwa Kanisa tunapofunga, angalau kiasi sawa na kile ambacho tungetumia kwenye milo wakati wa mfungo.

Kujitegemea: kuweza kukidhi mahitaji yetu wenyewe na ya familia yetu.

Gundua Zaidi

Ikiwa una maswali kuhusu kuwatunza wale walio na uhitaji, unaweza kuzungumza na akina kaka au akina dada zako wahudumiaji, viongozi wa kata au tawi lako au wamisionari. Unaweza pia kupata hotuba za mkutano mkuu juu ya mada hii na nyenzo zingine katika Maktaba ya Injili (katika ChurchofJesusChrist.org au katika programu rununu).