N̄an Jeram̧m̧an eo an Ro Ineem̧
Jab erom̧ juon kein loklok eo em̧ōjņo̧ ilo to in tōmak in aiboojoj kwar ijjino kake, ak kwar bōk, āinwōt juon jem̧ļo̧k. Kwon erom̧ eo ekajoor.
Jejjo iiō ko remootļo̧k, ikar jerbal ilo South America Northwest Area im amnak ilo Peru, ekar wōr juon men aiboojoj ekar waļo̧k ikōņaan jeere ippemi.
Ekar waļo̧k ke ij ro̧o̧l n̄an m̧weo ālkin jem̧ļo̧kin juon wiik eboub kōn kūr in jerbal ko. Āliktata ālkin aō kadedeļo̧k pepa in immigration ko aō ilo airport eo, ikar loe juon taxi driver eo ejouj ej kattōr n̄a. Ekar bokļo̧k eō n̄an wa eo waan, im ikar jijōt ilo jea eo lik, pojak in kakkije im lem̧ōņōņō ilo juon tūreep ejjej ekeroro ie n̄an m̧weo. Ālkin jejjo em̧ jekar eļļā jāni, supervisor eo an taxi driver eo ekar ko̧o̧l e im ba n̄ane ke ebōd taxi eo ibōke. Juon wa eoktak em̧ōj kar kepooje n̄an n̄a, im supervisor eo ekar kajjitōk ippen n̄an bar kōro̧o̧le n̄a n̄an airport eo n̄e ikōņaan jenij wa. Ikar ba n̄ane bwe ekar jab menin aikuj, im bwe jemaron̄ etal wōt. Ālkin jejjo minit in ejjeļo̧k ekeroro, ekar kalimjōk eō ilo kilaaj eo im̧aan im kajjitōk ippa, “Kwe juon Mormon, ejim̧we k?”
Ekwe, ālkin kajjitōk in em̧m̧an, ikar jeļā ke ijjab aikuj bar ikōn̄. Ikar jab maron̄ dāpij kōņaan jeļā eo aō kōn ia eo kajjitōk eo an enaaj tōl kom̧ro n̄ane.
Ikar ekkatak bwe etan em̧m̧aan in ej Omar, eo pāleen etan in Maria Teresa, im ewōr ruo nejierro ajri— Carolina, 14 an iiō, im Rodrigo, 10 an iiō. Omar ekar juon membōr in Kabun̄ in jān ke ekar juon ajri. Baam̧le eo an rekar active, bōtaan juon iien, ro jinen im jemen rekar bōjrak aer etal im jar. Omar ekar jino lukkuun bōjrak an kobatok ke ekar 15 an iiō. Kiiō ekar 40 an iiō.
Ilo iien eo ikar kile ippa ke ekar jab bōd taxi eo ikar iuwe ie. Ekar jab jide. Ikar kwaļo̧k wōn n̄a im ikar ped ilo taxi eo waan kōnke Irooj Ej bar kūrļo̧k e n̄an oror eo An.
Kōmro kar kiiō ekōnono kōn iien eo e im baam̧le eo an rekar kajoor ilo Kabun̄ in. Ekar wōr an emeemļo̧kijeņ ko rem̧m̧an kōn iien nokon ko an baam̧le im jet al in Būraimere. Innem ekar mera ainikien an al jet iaan naan ko jān al eo “N̄a Nejin Anij.”1
Ālkin aō kar bōk atōreej eo an, nōm̧ba eo an, im mālim n̄an leļo̧k n̄an bisop eo an, ikar ba n̄ane bwe inaaj pukot iaļan aō ped ilo m̧ōn jar eo ilo raan eo jinointata in an nej bar ro̧o̧l n̄an jikin jar. Kom̧ro ekar kajem̧ļo̧k tūreep eo am̧ro jān airport n̄an m̧wem̧ō, barāinwōt tūreep jidikdik ilo am̧ro bwebwenato kōn kar mour eo an, im kom̧ro ekar jepelļo̧k jān doon.
Jejjo wiik tokālik bisop eo an ekar kūrtok eō, jiron̄ eō bwe Omar ekar būļāāne an kobaļo̧k n̄an jar ilo jejjōt in juon jabōt. Ikar ba n̄ane bwe inaaj kar ped. Ilo Jabōt eo, Omar ekar ped ippān ļaddik eo nejin. Kōrā eo pāleen im leddik eo nejin rejjan̄in de kar kōņaan jar. Jejjo allōn̄ tokālik, bisop eo an ekar bar kūrtok eō, ak kiiō n̄an jiron̄ eō bwe Omar enaaj kar tōn peptaiji kōrā eo pāleen im ajri ro ruo nejin, im ekar kūr eō bwe in ped ijo. En̄in ej pija in Jabōt eo ke rekar kapen er āinwōt jet membōr ro an Kabun̄ in.
Ejja ilo Jabōt eo wōt, ikar ba n̄an Omar im baam̧le eo an bwe eļan̄n̄e renaaj pojak, ilowaan juon iiō inaaj uteej n̄an kōm̧m̧ane liāp eo aer ilo Lima Peru Tampeļ. En̄in ej pijaan iien eo jeban meļo̧kļo̧ke, pija in juon iiō tokālik.
Etke ij kwaļo̧k en̄jake in ippemi? Ij kwaļo̧ke kōn ruo un ko.
Kein kajuon, n̄an kwaļo̧k kōn membōr ro rem̧m̧an me jet iien rej elļo̧k jān gospel in an Jisōs Kraist me em̧ōj an jepļaaktok. Kein karuo, n̄an barāinwōt kwaļo̧k kōn membōr ro rej bōk koņaer rainin im rej bōlen jab lukkuun m̧ool n̄an bujen ko aer āinwōt aer kar aikuj bwe ren. Ilo jekjek kein jim̧ōr, epepen ko rej itok wōt rejelōt er, im kōjeram̧m̧an ko im kallim̧ur ko me em̧ōj kepooji n̄an ineer rej ped ilo kauwōtata.
Jen jinoe kōn waanjon̄o̧k eo jinointata, membōr ro rem̧m̧an ro rekar etal jān iaļan bujen eo, āinwōt an kar waļo̧k n̄an eo m̧ōtta jān Peru, Omar. Ke ikar kajjitōk ippān etke ekar kālet n̄an jepļaaktok, ekar ba kōnke e im eo pāleen rekar en̄jake bwe ajri ro nejier renej kar ļapļo̧k aer m̧ōņōņō ilo mour in kōn gospel eo an Jisōs Kraist. Ekar en̄jake bwe ekar iien n̄an ro̧o̧l im jar n̄an jeram̧m̧an eo an ajri ro nejin.
Ej menin būrom̧ōj n̄e jej ioon membōr ro ejako aer kobatok ak ro rejjab membōr in Kabun̄ in ro ilo juon iien ekar ped gospel in ilowaan baam̧le ko aer im kar luuji kōn wōt kāālet eo an ro jineer im jemeer ak ro jibwier im jim̧m̧aer n̄an bōjrak jān Kabun̄ in. Kāālet eo emaron̄ jelōt ro ineer n̄an indeeo!
Ajri ro nejier im jibwier emōj bōbraeik er jān kōjparok eo im kōjeram̧m̧an ko an gospel eo an Jisōs Kraist ilo mour ko aer. Eļapļo̧k an kabūrom̧ōjm̧ōj, em̧ōj aer luuji kallim̧ur ko in baam̧le indeeo eo ekar ped ilo juon iien. Kāālet eo an juon em̧ōj an jelōt juon to in bwij ko. Juon jolet in tōmak em̧ōj an rūb.
Ijowōtke, āinwōt ad jeļā, jabdewōt men rej rūb remaron̄ bar jako aer rub ilo Jisōs Kraist. Kōn un in, jouj im ļōmņak kōn kūr eo jān Būreejtōn Russell M. Nelson: “Kiiō, eļan̄n̄e em̧ōj am̧ etal jān iaļ in, ij karuwaineneik eok kōn aolep kōjatdikdik ilo būruō jouj im ro̧o̧ltok. Jekdo̧o̧n ta inepata ko ami, jekdo̧o̧n ta apan̄ ko ami, ewōr juon jikin n̄an kom̧ ilo menin, Kabun̄ eo an Irooj. Kom̧ im epepen ko rejjan̄in de ļotak naaj jeraam̧m̧an jān m̧akūtkūt ko ami kiiō n̄an bar ro̧o̧ltok n̄an iaļan bujen eo.”1
Kiiō, jen kwaļo̧k kōn waanjon̄o̧k eo kein karuo, membōr ro rainin rej kobatok ro bōlen rejjab tiljek āinwōt aer kar aikujin. Ejjeļo̧k oktak jān an kāālet ko an inne jelōt mour ko rainin, kāālet ko an rainin renaaj jelōt ilju im jakļaj eo ad im ilju im jakļaj eo an ro uwaan baam̧le ko ad.
Būreejtōn Dallin H. Oaks ekar katakin kōj:
Jepļaaktok in gospel eo an Jisōs Kraist ej rōjan̄ kōj n̄an ļōmņak kōn ilju jekļaj. … Ej katakin kōj kōn jet ļōmņak ko rem̧m̧an kōn ilju im jekļaj n̄an tōl kōm̧m̧an ko ad rainin.
“N̄an keidi, jej jeļā kajjien armej ro me rej ļōmņak wōt kōn kiiō: kōmaate wōt rainin, m̧ōņōņō wōt rainin, im jab ļōm̧ņak kōn ilju im jeklaj.
“… Ilo ad kōm̧m̧ani jokālet ko kiiō, jej aikuj kajjitōk iien otemjej, ‘Menin ej tōl n̄an ia?’”3 Kāālet ko ad kiiō renaaj ke tōl kōj n̄an lan̄lōn̄ kiiō im indeeo, ak renaaj ke tōl kōj n̄an būrom̧ōj im drenin kemjaaļaļ?
Jet remaron̄ ļōmņak, “Jejjab aikuj n̄an etal n̄an jar aolep Jabōt,” ak “Jenaaj kōļļā juon m̧ōttan jon̄oul n̄e em̧m̧anļo̧k aolep men,” ak “Iban rie ritōl ro an Kabun̄ in ilo unin kōnono in.”
“Bōtaab,” rej ba, “jejeļā bwe Kabun̄ in ej m̧ool, im jejjāmin ilo̧k jān gospel eo an Jisōs Kraist.”
Ro ewōr ippāer kain ļōmņak rōt in rejjab kile ke kain “m̧ōjņo̧” in ilo membōr enaaj jelōt mour ko aer im mour an ro ineer. Ro jineer im jemeer remaron̄ kajoor im niknik wōt, ak kauwōtata eo n̄an luuji ajri ro nejier eļap—ilo mour in im indeeo.
Ro reban bōk aiboojoj ijo eutiejtata ippān baam̧le ko aer, Irooj ej ba, “Errein ro rej jab kajoor ilo naan in kam̧ool kōn Jisōs; kōn menin, rej jab bōk kūrawūn eo ioon aelōn̄ eo an ad Anij.”4 Men eo in ke jekōņaan n̄an kōj make ak ajri ro nejid? Jen ke aikuj kōļapļo̧k ad kajoor im kadikļo̧k m̧ōjņo̧ n̄an jeram̧m̧an eo ad make im n̄an jeram̧m̧an eo an ro ineed?
Būreejtōn M. Russell Ballard ej barāinwōt kwaļo̧k ejja menin kōnono in wōt:
“N̄an jet, kūr eo an Kraist n̄an tōmak im ej wōnm̧aanļo̧k wōt im pād ilo an pen—ak pen n̄an bōke. … Jet rikaļoor rej kakkōt wōt n̄an meļeļe juon kakien ak katak an Kabun̄ in. Jet rej lo n̄ūrbōktak ilo bwebwenato eo ad ak ilo jab wānōk an jet membōr ak ritōl ro, jem̧aan im kiiō. …
“… Jokālet eo n̄an ‘jab bar etetal’ ippān ro uwaan Kabun̄ in im ritōl ro kar kālet in Irooj naaj wōr juon kilaan aitok kitien me jejjab maron̄ loe kiiō.”5
Ej juon jem̧ļo̧k eo ekabūrom̧ōjm̧ōj n̄an tilmaake—im kōn un ta? Jekdo̧o̧n ta eo, ejjab bwe n̄an eļļo̧k wōt jān men ko renana ilo jetōb me enaaj jelet epenpen ko rej itok wōt.
Ro jeiū im jatū rejitōnbōro, eļan̄n̄e kwoj ioon juon iaan jekjek kein ikar kōnono kaki ilo ekōnono in aō, jouj im bar ļōmņake iaļan kālet eo am̧. Kwojeļā bwe ewōr juon karōk n̄an kōj ilo mour in. Kwojeļā bwe baam̧le ko remaron̄ n̄an indeeo. Etke kwoj likūt eok ilo kauwōtata? Jab erom̧ juon kein loklok eo em̧ōjņo̧ ilo to in tōmak in aiboojoj kwar ijjino kake, ak kwar bōk, āinwōt juon jem̧ļo̧k. Kwon erom̧ eo ekajoor. Ej am̧ iien n̄an kōm̧m̧ane, im Irooj enaaj jipan̄ eok.
Jān tum̧ilaļ in būruō, ij karuwaineneik eok n̄an ļōmņak kake, n̄an lale m̧aan im etale, “ia eo menin enaaj tōl [eok] n̄ane,” im, n̄e emenin aikuj, n̄an erom̧ kajoor n̄an bar ļōme iaļ eo am̧ n̄an jeram̧m̧an eo an ro ineem̧. Ilo etan Jisōs Kraist, amen.