M̧ōttan ko Rem̧m̧an jān M̧ōttan eo Kein Karuo an 193th Kweilo̧k eo Eļap

Jea eo an Būreejtōn Russell M. Nelson ekar pād wōt ilo an ejjeļo̧k kobban ilo kweilo̧k eo eļap, bōtaab membōr ro an Kabun̄ in raar lem̧ōņōņō n̄an bōk kapilōk im naan in kam̧ool jān rikanaan eo 99 iiō-dettan ilo jem̧ļo̧kin m̧wen̄an eo āliktata kōn juon ennaan eo kar rekoote im̧aanļo̧k.

Būreejtōn Nelson ekar ba metak eo ekar ippān jān juon jorrāān ilo likūn kiiō ekar kōļapļo̧k an “kam̧m̧oolol kōn Jisōs Kraist im mennin letok eo an ban meļeļe Pinmuur eo An.” Ilo kōketak membōr ro n̄an “ļōmņak kōn selestial,” ekar kwaļo̧k men ko ekar katak kōn “karōk eo eweppān” an Jemedwōj Ilan̄:

“Men ko renaaj kōm̧m̧an bwe mour eo am̧ ioon laļ in en lukkuun em̧m̧an emaron̄ in lukkuun ejja ko renaaj kōm̧m̧an bwe mour eo am̧ ilo indeeo en lukkuun maron̄ em̧m̧an!”
“Kālet ko ami rainin renaaj ņamejļan jilu men ko: ijo kwonaaj jokwe ie ilo aolepān mour indeeo, kain ānbwin eo kwonaaj jerkakpeje kake, im wōn ro kom̧ naaj mour ippāer n̄an indeeo” (peij 117).

Būreejtōn Dallin H. Oaks ekar kwaļo̧k kam̧ool eo kōn mour ijo eutiej tata im ej kōttar Rikwojarjar ro retiljek (lale peij 26). Būreejtōn Henry B. Eyring ekar kam̧ool kōn tōl eo jān Jetōb Kwojarjar kar kallim̧ur kake n̄an Rikwojarjar ro rerreo (lale peij 92; lale bar Elder Stevenson, peij 42). Im Būreejtōn M. Russell Ballard ekar kwaļo̧k juon naan in kam̧ool ekajoor kōn “eddo eo aiboojoj ilo erom rikanaan eo an … tarlep in tōre in bōk eddo eo iien ko” eo an Josep Smith (lale 74).

Rikōnono ro an kweilo̧k eo raar katakin bwe kāālet ko ad raorōk tata ilo mour in rej pedped ioon Irooj Jisōs Kraist im n̄an pokake kien ko An, ekoba kien juon m̧ōttan jon̄oul (lale Būreejtōn Nelson im Elder Andersen, peij 117, im 32). Raar barāinwōt katakin bwe jej lo m̧ōņōņō, kemour, im kōjatdikdik kōn Rilo̧mo̧o̧r eo ilo ad bun̄ m̧aanļo̧k ioon iaļ in bujen eo (lale Elders Bednar, Godoy, Choi, im Cook, peij 6, 16, 46, im 82; Brother Newman, peij 36; im Sister ro Wright, Freeman, im Runia, peij 9, 76, im 62) im “kwaļo̧k kallim̧ur eo ad ilo bujen kwojkwoj eo n̄an Jisōs Kraist im kajjojo kōn kūr ko ad ilo Kabun̄ in, jemjera, ikitōltōl, im jerbal in jipan̄” (Elder Gong, peij 111).

Ritōl ro an Kabun̄ in raar kōketak membōr ro n̄an kautiej “menin letok eo an ukweļo̧k” (Elder Renlund, peij 96; lale bar Būreejtōn Eyring im Elder Uchtdorf, peij 92 im 86). Raar katakin bwe Jepļaaktok eo ej kwaļo̧k meram ioon ad “paotok kwojarjar, jolet, im kōjatdikdik” (Elder Soares, peij 70; lale bar Elders Phillips, Giraud-Carrier, im Sabin, peij 49, 114, im 56). Im raar kakeememej Armej ro Rekwojarjar ilo Raan Ko Āliktata “bwe n̄an aintok Israel jej aikuji mijenede ro—elōn̄ļo̧k jān ro rej jerbal,” eļaptata rūtto ripālele ro (Elder Rasband, peij 52; lale bar Elder Parrella, peij 80).

Ilo kōjjeļā kōn karōk ko n̄an kalōk 20 tampeļ kāāl ko, Būreejtōn Nelson ekar ba, “Jerbal in jipan̄ eo ami im kabun̄ jar eo ilo tampeļ eo enaaj jipan̄ kom̧ lōmņak kōn selsetial” (peij 117; lale bar Elders Christofferson im Esplin, peij 19 im 108).