Kōjparok Ainikien Armej in Bujen ro ilo Diktak in Epepen eo
Juon iaan eddo ko relukkun aorōk ej n̄an jipan̄ ajri ro nejid itok n̄an jeļā eļapļo̧k im alikkar bwe Jisōs ej Kraist eo.
Juon iaan iien katakin ko reim̧we ilo Bok in Mormon ej loļo̧k eo an Rilo̧mo̧o̧r n̄an armej ro ilo tampeļ eo ilo ānen Bun̄-peļo̧k. Ālkin juon raan in katakin, kemour, im kalōk tōmak, Jisōs ekar ba n̄an armej ro kōn diktak in epepen eo: “Eaar jiron̄ bwe ro nejier reddik ren bōktok.”1 Eaar jar kōn er im kōjeraam̧m̧an er juon ilo̧k juon. En̄jake in ekar kanooj in kōm̧weir jon̄an Rilo̧mo̧o̧r E make ekar jar elōn̄ alen.
Innem, kōnono n̄an jarlepju eo, Jisōs ekar ba:
“Kom̧in lale ro reddik nejimi.
“Im ke raar reilo̧k … , raar lo bwe lan̄ ko repeļļo̧k, im raar lo enjeļ raņ rej wanlaļtak jān ilo ilan̄” jerbal in karejar n̄an ajri ro nejier.2
Ekōn emakijkij aō ļōmņak kōn en̄jake in. Emaron̄ in kar kobrak aolep būruōn armej kōn meanwōd! Raar lo Rilo̧mo̧o̧r. Raar en̄jake E. Raar jeļā E. Ekar katakin er. Ekar kōjeraam̧m̧an er. Im Ekar iakwe er. Ebaj porā ke ālkin iien in ekwojarjar, ajri rein raar rūttoļo̧k n̄an jipan̄ kajutak juon jukjukin pād in aenōm̧m̧an, jeraam̧m̧an, im iakwe āinwōt an Kraist me ekar pād n̄an epepen ko.3
En kar ke em̧m̧an eļan̄n̄e ajri ro nejid remaron̄ kar bōk en̄jake ko āinwōt in ippān Jisōs Kraist—juon men eo me enaaj kar kōkajoorļo̧k jemerā ko aer Ippān! Ej kajjitōk ippād, āinwōt An kar kajjitōk ippān m̧am̧a im baba rein ilo Bok in Mormon, n̄an bōkļo̧k ro reddik nejier n̄an E. Jemaron̄ jipan̄ er jeļā kōn aer Rilo̧mo̧o̧r im Ripinmuur wāween eo ajri rein rekar kōm̧m̧ane. Jemaron̄ kwaļo̧k n̄an er ekōjkan n̄an kappukōt Rilo̧mo̧o̧r ilo jeje ko rekwojarjar im kalōk pedped eo aer ioon E.4
Kiiō epaak, juon m̧ōtta eo em̧m̧an ekar katakin eō juon men ijjan̄in kar kile m̧okta kōn būrabōļ eo kōn em̧m̧aan eo emelōtlōt me ekar kalōk m̧weo im̧ōn ioon juon ejm̧aan. Ekkar n̄an bwebwenato eo ilo Luk, ke em̧maan eo emelōtlōt ekar door pedped eo n̄an m̧weo im̧ōn, ekar “kūbwij e m̧wilaļ.”5 Ekar jab juon jerbal pata bajjōk ak ļam waan—ekar bōk kijejeto!
N̄an kalōk mour ko ad ioon Ejm̧aan in an ad Rilo̧mo̧o̧r, Jisōs Kraist, ej aikuj m̧wilaļ ad kōb. Jej kōm̧akūtļo̧k aolep men me ejjab pen im ejjeļo̧k kōjatdikdik ie ilo mour ko ad. Ejjab bōjrak ad kūbwiji m̧ae iien jej loe E. Im ilo ad katakin ajri ro nejid n̄an lukwōj er make n̄an E kōn kain̄i ko im bujen ko rekwojarjar, bwe n̄e lan̄ in jum̧ae ko im ibwijleplep ko rej itok, āinwōt aer ilo m̧ool naaj itok, enaaj dik kilaer ilo er “kōnke ejm̧aan eo [raar] ekkal ioon.”6
Kain kōkajoorļo̧k in ejjab baj waļo̧k. Ejjab leļo̧k e jān juon epepen n̄an eo tok juon āinwōt juon jolet ilo jetōb. Kajjojo armej ej aikuj m̧wilaļ an kōb n̄an lo Ejm̧aan eo.
Jej katak katak in jān bar juon bwebwenato ilo Bok in Mormon. Ke Kiin̄ Benjamin ekar kwaļo̧k ennaan eo an āliktata n̄an armej ro doon, raar ain doon āinwōt baam̧le ko n̄an ron̄jake naan ko an.7 Kiin̄ Benjamin ekar kwaļo̧k kam̧ool eo ekajoor kōn Jisōs Kraist, im ekar m̧wilaļ an armej ro m̧weir kōn naan in kam̧ool eo an. Raar kwaļo̧k:
“Jetōb eo … eaar jerbale juon oktak ekajoor ilo kōm, ak ilo būruōm̧. …
“Im jej m̧ōņōņō n̄an deļo̧n̄ļo̧k ilo juon bujen ippān ad Anij n̄an kōm̧m̧an ankilaann … aolep bwe in raan ko ad.”8
Juon emaron̄ kōtmene bwe ajri ro reddik me ro jineer im jemeer rekar m̧ool in oktak renaaj juon raan oktak im kōm̧m̧ani bujen ko kōn er make. Im n̄an kiiō, kōn jet un kar jab kōnono kaki ilo ļo̧o̧k eo, bujen eo kar kōm̧m̧ane jān ro jinen im jemen kar jab ļap kilaan ippān jet iaan ajri ro nejier. Jejjo iiō ko tokālik, “eaar wōr elōn̄ iaan ro rej epepen tokālik ro raar jab maron̄ meļeļe naan ko an kiin̄ Benjamin, kōnke raar ajri ilo iien eo eaar kōnono n̄an armej ro an; im raar jab tōmak ilo imminene ko an ro jemāer.
“Raar jab tōmak ta eo kar ba kōn jerkakpeje an ro remej, im raar barāinwōt jab tōmak kōn itok eo an Kraist. …
“Im raar jab kōņaan peptaij; im barāinwōt jab kobaļo̧k ilo kabun̄ eo. Im raar juon armej ejenolo̧k āinwōt kōn tōmak eo aer.”9
Ta eo ekar kōm̧m̧an bwe ren kūtarre! N̄an diktak in epepen eo, ejjab bwe n̄an tōmak ilo Jisōs Kraist n̄an “tōmak ilo imminene ko an ro jemāer.” Ej aikuj wōr aer make tōmak ilo Jisōs Kraist. Āinwōt armej in bujen ro an Anij, ekōjkan ad maron̄ katōk ilo būruōn ajri ro nejid juon ikdeelel n̄an kōm̧m̧an im kōjparok bujen ko Ippān?
Jemaron̄ jino kōn ļoor waanjon̄ak eo an Nipai: “Im jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, jej kanaan kōn Kraist, im jej jeje ekkar n̄an kanaan ko ad, bwe ro nejid ren maron̄ jeļā n̄an ia rej maron̄ reilo̧k n̄an jeorļo̧k jero̧wiwi ko aer.”10 Naan ko an Nipai rej kwaļo̧k juon kijejeto ejjab m̧ūjkōk n̄an katakin ajri ro nejid kōn Kraist. Jemaron̄ lale bwe ainikien armej in bujen ro en jab ikōn̄ ilo lo̧jiln̄in diktak in epepen eo im bwe Jisōs en jab juon unin kōnono eo ilo Jabōt wōt.11
Ainikein armej in bujen ro en loe ilo naan in kam̧ool ko ad make. En loe ilo naan ko an rikanaan ro remour. Im ej kajoor kōjparoke ilo jeje ko rekwojarjar. En pād ijo bwe ajri ro nejid renaaj jeļā Jisōs im lo uwaak ko n̄an kajjitōk ko aer. En pād ijo bwe renaaj katak kōn er make katak eo an Kraist. En pād ijo bwe renaaj lo kōjatdikdik. Menin enaaj kōpooj er n̄an kappukōt tōmak to̧o̧n wōt aer mour im mour ioon iaļan bujen eo.
Ij iakwe kapilōk in jān rikanaan eo ad Būreejtōn Russell M. Nelson:
“Ia eo jemaron̄ etal n̄an e n̄an ron̄jake E?
“Jemaron̄ ālōkļo̧k n̄an jeje ko rekwojarjar. Rej katakin kōj kōn Jisōs Kraist im gospel eo An, jon̄an depakpak in Pinmuur eo An, im karōk in lo̧mo̧o̧r eo ekam̧ōņōņō an Jemed Ilan̄. Lin̄ūri naan ko an Anij aolep raan eaorōk n̄an mour ilo jetōb, eļaptata ilo raan kein me eļapļo̧k jorrāān ko. Ilo ad kwojkwoj ioon naan an Kraist aolep raan, naan ko an Kraist enaaj ba n̄an kōj wāween jelm̧ae iien ko reppen n̄e jej ļōmņak jeban kar ioone.”12
Kōn menin ekōjkan n̄an kwojkwoj ioon naan ko an Kraist im ron̄jake E? Ekwe, jabdewōt men eo em̧m̧an tata an jerbal n̄an kwe! Emaron̄ in koba ippān baam̧le eo am̧ n̄an kōnono kōn men ko Jetōb Kwojarjar ekar katakin eok ilo ekkatak jeje ko rekwojarjar am̧ kōjerbal Itok, Ļoor Eō. Emaron̄ in koba kajjojo raan ippān ajri ro nejūm̧ n̄an riiti jejjo eoon ko jān jeje ko rekwojarjar innām kappukōt iien ko rem̧m̧an n̄an ekōnono ta eo kwar katak ilo am̧ joļo̧k iien ippān doon. Baj pukōt ta eo ej jerbal n̄an kwe im baam̧le eo am̧ innām kajjieon̄ in kōm̧m̧ane jidik em̧m̧anļo̧k kajjojo raan.
Ļōmņak kōn kōļmenļo̧kjeņ in jān Teaching in the Savior’s Way: “Bōk jān kajjojo, juon nokon in jota m̧weo, m̧wen̄an ekkatak jeje ko rekwojarjar, ak bwebwenato kōn gospel eo emaron̄ jab āinwōt n̄e eļap tōprak. Bōtaab men dikdik ko, kijejeto ko reļem waan, āliji eo ejjab bōjrak ilo iien ko, emaron̄ in erom kajoor im kijin̄en̄e jān iien in ekanooj ļap ej waļo̧k jejjo iien ak juon katak eo ekanooj ļap. … Kōn menin jab ebweer, im jab inepata kōn kōttōparake juon men eļap aolep iien. Ej jab jokod kijejeto ko am̧.”13
Juon iaan eddo ko rekwojarjar tata ej n̄an jipan̄ ajri ro nejid n̄an jeļā em̧wilaļ im eļap tata bwe Jisōs ej RiKraist eo, Nejin Anij Emour, aer make Rilo̧mo̧o̧r im Ripinmuur, eo ej jutak ilo Jabōn Kabun̄ eo An! Jejjab maron̄ kōtļo̧k bwe ainikien bujen eo ad en ikōn̄ ak jab kōnono n̄e ej itok n̄an E.
Kwomaron̄ en̄jake jidik likjab ilo eddo in, bōtaab kwojjab aikuj en̄jake makeļo̧k. N̄an waanjon̄ak, ward ko̧o̧njeļ ko rej kōmālim n̄an ejaaki kweilo̧k in ko̧o̧njeļ ko an rūkaki. Ilo kweilo̧k kein kuwōta otemjeļo̧k, ro jinen im jemen remaron̄ koba n̄an katak jān en̄jake ko an doon, ekōnono kōn ekōjkan aer kōkajoorļo̧k baam̧le ko aer, im katak pedped in katak ko raorōk kōn wāween katakin āinwōt Kraist. Kweilo̧k in aikuj in kōm̧m̧an ilo awa eo kein karuo in jar.14 Ej tōl jān juon membōr in ward eo kar kāālete jān bisop eo im ej ļoor jon̄ak in kweilo̧k in ko̧o̧njeļ ko an rūkaki, kōjerbal Teaching in the Savior’s Way āinwōt kein jipan̄ eo eļap tata.15 Bisop ro, eļan̄n̄e ward eo ami ejjab kōm̧m̧ani kweilo̧k in ko̧o̧njeļ ko an rūkaki kiiō n̄an pāreen ro, jerbal ippān būreejtōn eo an Jabōt Jikuuļ im ward ko̧o̧njeļ eo n̄an ejaake kom̧ make.16
Ro m̧ōtta jitōnbōro ilo Kraist, eļap an em̧m̧an ami kōm̧m̧ane, kom̧ em̧ool. En jab jemļo̧k ami kōm̧m̧ane ijo em̧m̧an. Ajri ro nejimi rej lale, ron̄jake, im katak. Ilo ami katakin er, ko̧m naaj jeļā paotok eo em̧ool aer āinwōt ļaddik ro im leddik jitōnbōro ro nejin Anij. Remaron̄ meļo̧kļo̧k Rilo̧mo̧o̧r ium̧win jidik iien, bōtaab ij kallim̧uri kom̧, E ejjamin meļo̧kļo̧k er! Iien ko n̄e Jetōb Kwojarjar eo ej kōnono n̄an er naaj dim wōt ilo būruier im aer lōmņak. Im juon raan ajri ro nejimi naaj āliji naan in kam̧ool eo an Inōs: “Ijeļā bwe ro jinō im jema rejim̧we, “bwe raar katakin eō ilo kōkaajriri im katak ko an Irooj—im en jeraam̧m̧an etan aō Anij kōn menin.”17
Jen bōk kūr eo an Rilo̧mo̧o̧r im bōktok ajri ro nejid n̄an E. Ilo ad kōm̧m̧ane menin, renaaj lo E. Renaaj en̄jake E. Renaaj jeļā E. E enaaj katakin er. E enaaj kōjeraam̧m̧an er. Im o ewi jon̄an An naaj iakwe er. O, ewi jon̄an aō iakwe E. Ilo āt Kwojarjar eo etan Jisōs Kraist, amen.