Ewi Ļap In Am̧ Naaj Lan̄lōn̄
Ij kajjitōk ippāmi bwe komin bōk jeļā-kilen, kobaik ippān iien im jeļā kautiej naan in kam̧ool ko ami, innām etal im mijen.
Ro jeiū im jatū rejitōnbōro, aō ļōmņak rainin ej kōn aiintok eo an m̧weo im̧ōn Israel, eo Būreejtōn Russel M. Nelson ej ņa etan “jerbal eo ej make wōt aorōk ej bōk jikin rainin. Ejjeļo̧k bar jabdewōt maron̄ keidi kōn jon̄an kajoor eo an, ejjeļo̧k jabdewōt maron̄ keidi kōn jon̄an aorōk in, ejjeļo̧k jabdewōt maron̄ keidi kōn jon̄an ļap in.”1
Aiintok in ej kijejeto eo eļaptata me “aorōk in jetōb ko ekanooj ļap ilo mejān Anij.”2 Pidodo in de in. Jej aiintok ajri ro nejin Anij ilo raan kein āliktata bwe ren maron̄ amene “jeram̧m̧an ko lutōkleplep ioon bōraer”3 im kōjeram̧m̧an ko im “m̧weiie ko an indeeo”4 Ej bar kalikkar bwe n̄an aiintok Israel jej aikuj mijinede ro—en ļapļo̧k jon̄an eo kiiō.5 Rainin ij kōnono n̄an elōn̄ ro rerūtto ilo Kabun̄ in ro remaron̄ jerbal āinwōt mijinede ro. Irooj ej aikuji kom̧. Jej aikuji kom̧ ilo New York im Chicago, Australia im Africa, Thailand im Mexico, im ijoko otemjej ļo̧k.
In bōk liklo̧k eok n̄an iiō eo 2015. Ij kab erom̧ juon iaan membōr ro rekāāl ilo Doulul eo an Jon̄oulruo Rijilōk ro. Juon iaan eddo eo aō aiboojoj jej eddoiki āinwōt Rijilok ro ej kūr mijinede ro n̄an mijen ko aer. Iaar bōk koņaaō āinwōt Jiljilmjuonn̄oul ilo jerbal eo,6 ak kiiō āinwōt juon Rijilōk, iaar en̄jake eddo eo an jerbal in. Ikar jinoe ilo aō kar jar im likūt elōn̄ oran elder im sister ro rem̧m̧an dettaer, juon ilo̧k juon, ilo mijen ko ipeļaakin laļ in. Innām ij oktakļo̧k n̄an ripālele ro rerūtto. Ekar wōr 10 āt ko ilo listing eo! Ejab lukkuun lōn̄. Kabūlōn̄lōn̄ eo, iaar kajjitōk ippān eo m̧ōtta jān Tipaatment eo an Mijinede, “Jete eo jej aikuji wiik in n̄an kōm̧m̧ani ijjitōn kein?”
Ekar uwaak, “300.”
Tōre in me eaiboojoj ellakar pād ilo buruō: 10 ripālele n̄an kōm̧m̧ane ijjitōn̄ kein.
Būrejteen Russell M. Nelson ekar rojan̄ ripālele ro n̄an “bukwelōlō im kajjitōk ippān Jemedwōj Ilan̄ eļan̄n̄e etōrāān aer etal im mijen.”7 Ilubwiljin aolep men ko renej aikuji, eaar ba, “juon ikdelele n̄an mijen emaron̄ men eo eaorōk tata.”8
Āinwōt an jeje ko rekwojarjar ba, “eļan̄n̄e ewōr ami ikdeelel n̄an jerbal n̄an Anij ej kūr kom̧ n̄an jerbal in.”9 Jerbal in ej ikkijen kien madmōd. Jej riit ilo Jon, “Bwe eo ej kallib im eo ej madmōd ren jimor lan̄lōn.”10
Iaar lo an kien madmōd kūrm̧ool ilo baam̧le eo aō make.
Jet iiō ko remootļo̧k iaar loļo̧k juon baam̧le, ke bisop eaar kajjitōk ippa n̄an kōjjemļo̧k iien kwojkwoj eo kōn jar.11 Ke ij wanlaļtak jān ijo im̧aan mejen, juon kōrā eaar wōnm̧aeiki eō ippān ajri ro jimjuon nejin im kwaļo̧k kadkadin ke e ej Sister Rebecca Guzman.
Eaar kajjitōk, “Elder Rasband, kwojeļā ke kajjeen Rulon im Verda Rasband?”
Ikar kalimjōke im uwaak, “Rej jinō im jema.”
Kwomaron̄ ke loe ia menin ej jitōn̄ļo̧k. Kōn mālim eo jān Rebecca, eo ej pād ippān baam̧le eo an ilo Conference Center in, ij kwalo̧k bwebwenato in an baam̧le eo an.12
Jinō im jema, Elder Rulon im Sister Verda Rasband, rekar jerbal āinwōt mijinede ripālele ro rūtto ilo Florida Fort Lauderdale Mijen.13 Rekar etetal im kwaļo̧k naan im kōn im̧we in tōl rekar kōlaļlaļ ilo kōjām in m̧weo m̧ōn Rebecca. Ekar jodikdik wōt im ekar itok limoin n̄an ron̄jake al ko an Osmonds, ilo m̧ool eo m̧ōttam Donny—eo ej pād ijin rainin.14 Eaar ron̄jake bwebwenato ko aer ilo mejatoto im jeļā ke rej uwaan Kabun̄ eo an Jisōs Kraist im Armej ro Rekwojarjar ilo Raan ko Āliktata. Ekar en̄jake ke ewōr juon men eoktak ippāer, im ļōmņak bwe emaron̄ kabun̄ eo aer, Rebecca eaar jolļo̧k ruo iiō in an etale tōmak eo an Kabun̄ eo ilo librāri eo an jikuuļ eo. Kōn menin, ke ruo ripālele rej kōlaļlaļ ilo kōjem̧ eo an baam̧le eo an im kwaļo̧k kajjeer ke rej mijinede ro an Armej ro Rekwojarjar ilo Raan ko Āliktata, ekememej tok.
“Jinō eaar ba in jab elļo̧k n̄an er,” Rebecca ekar jeje tokālik, “ak buruō ekar ba ‘Jab.’ Iaar kalimjōk mejeer, im ikar en̄jake okmenen im iakwe. Ememļo̧kjeņ kein rej wōt bōktok kōmjalaaļ ilo meja im en̄jake em̧ūlaļ ekar un̄ūr buruō.15
Rebecca ekar kadelon̄ļo̧k er, im mijinede ro jinō im jema raar kwaļo̧k juon ennaan n̄ane, leddik ro ruo jatin, im, jekdo̧o̧n an m̧akoko, jinen.
Rebecca ekar kōmeļeļeiki eō: “Jimor jinōm im jemam rekar lukkuun kōmeļeļeik jabdewōt am kajjitōk. Ij maron̄ wōt lo turin mejeer āinwōt n̄e eaar wōr meram ej kabool er. Kōm kijon̄ atbokwōj jinōm aolep iien n̄e ej ro̧o̧l, im aolep iien ej kwaļo̧k juon meļeļe kōn kilen jipan̄ jinō en̄jake aeņōm̧m̧an im kautiej. Ekijon̄ ebbōl mejān n̄e ej katakin kōm kōn Jisōs Kraist. Eaar kajjeon̄ kakobaik jema ilo katak ko im āliktata eaar maron̄ wini tok. Jema ekar juon chef ilo juon m̧ōn m̧ōn̄ā im eaar jino kōmat kijen jinōm im jemam kejota, barāinwōt iiōk kijen jemōm key lime pie, eo enno tata ippān.”16
Ke Elder im Sister Rasband raar kajjitōk ippān Rebecca im baam̧le eo an bwe ren riiti Bok in Mormon ippān doon, Rebecca eaar riiti ilowaan wōt lalem raan. Eaar kōņaan peptaij iien eo wōt, ak ro jet uwaan baam̧le eo raar jan̄in pojak. Ālkin emen allōn̄, Rebecca ekar akweļap bwe en peptaij im koba tok ilo Kabun̄ in. Eaar kememej, “Aolep aō ikar jeļā ke em̧ool.”17 Ilo Eprōļ 5, 1979 mijinede ro raar peptaij i Rebecca ke ej 19 an iiō, jinen, im ruo jatin. Jema ekar witness e peptaij eo.
Ke ikar iion Rebecca im baam̧le eo an ilo m̧ōn jar eo, ikar pija ippān baam̧le eo an. Iaar bōk pija eo ippa n̄an m̧weo n̄an ippān jinō eo ebwijwōļā, im ekar jiburlepe tok ņai ioon ubōn. Innām ekar jiron̄ tok eō, “Ronnie, en̄in juon iaan raan ko rekar lukkuun kam̧ōņōņō ilo mour eo aō.”
Uwaak eo an jinō euwaake kajjitōk eo an rūtto rein wōj: “Ta eo kwoj madjake ilo tōre jab in ilo mour eo am̧?” Ekanooj lōn̄ wāween ko mijinede ro rerūtto remaron̄ kōm̧m̧ane me ro jet reban. Kwōj juon jeram̧m̧an eļap tokjen, jipan̄ ilo Kabun̄ in, im kajoor n̄an rōjan̄ im lo̧mo̧o̧ren ajri ro nejin Anij.
Jet iaami remaron̄, “Ak ajri ra jibum kōmij etal jen er? Kōm naaj jako jen iien ko raorōk an baam̧le, birthday ko, ro m̧ōttami, im barāinwōt menin mour ko nejim.” Eļan̄n̄e inaaj kar kajjitōk ippān jinō etke erro kar jema etal im mijen, ijeļā enaaj kar ba menin, “Ewōr jibū. Ikōņaan bwe ren jeļā bwe jemōm̧ im n̄a kom̧ro kar etal im mijen, kōm kar kōņaan bwe kōm en juon waanjon̄ak n̄an ro ineem, im kōmij jeram̧m̧an, lukkuun jeram̧m̧an.
Ilo aō loļo̧k mijen kane wōj ipeļaakin laļin, em̧ōj aō lo kabwilōņlōņ in jerbal kein an mijinede rein rūtto im rōm̧m̧an. Ealikkar aer em̧ōņōņō in “kōm̧anm̧an ankilaan Irooj” im pād kōn “jerbal eo an Irooj.”18
N̄an jet, im jej kōjatdikdik bwe taujin iaami, jerbal in mijinede ilo turājet in laļin enaaj ijo ejejjet.19 N̄an jet, mijen ilo mijen ko ilo jikum̧ emaron̄ juon men n̄e kwoj kōņaan. Kōn un ko rejelet ājmour im bar wāween ko jet, elōn̄ ro rejjab maron̄ etal im mijen. Jej meļeļe kōn jekjek kein, im enaaj aō kōjatdikdik kōm naaj bukōt jet wāween ko n̄an jipan̄ ro rej mijen. Ļoor naan in kapilōk an rikanaan eo im jar n̄an jeļā ta eo Irooj en kar kōņaan bwe kwon kōm̧m̧ane.
Mijen ko an ipeļaakin laļin rej akweļap n̄an jipan̄ eo am̧. Būreejtōn Nelson eaar ba kōn mijinede ro rerūtto, “Reddik ilo jetōb, meletlet, im m̧ōņōņō in jerbal.”20
Ilo mijen ko, ewōr iien em̧m̧an n̄an kalimomo: komaron̄ jerbal ilo opiij ak tampeļ, kōkajoor ļo̧k mijinede ro reddik, jipan̄ kōkajoorļo̧k branch jiddik ko, jerbal ilo FamilySearch jentōr ko, ak ilo historic site ko, rūkaki n̄an institute, jipan̄ humanitarian service, jerbal ippān rūm̧m̧an ded ro, jipan̄ employment jentōr ko ak jikin kallib ko an Kabun̄ in. Wāween ko n̄an mijen, ta eo ekkar tata n̄an kwe, ijo rej aikuji eok n̄ane, im wāween am̧ m̧ōņōņō in etal rej waļo̧k ilo wesite eo an “Mijinede ro Rerūtto.”21 Komaron̄ barāinwōt kōnono ippān bisop ak branch būreejtōn eo am̧.
Em̧ōj aō kūr elōn̄ rūtto ripālele ro n̄an etal im mijen im lale an Meram in Kraist kobrak paaktokier.22 Ālkin aer ro̧o̧l tok rej kōmeļeļeik wāween aer epaake ļo̧k Irooj im ro jet, en̄jake Jetōb eo an Irooj ej lutok leplep ioer, im jeļā ke rej kōm̧m̧an juon oktak.23 Wōn eo eban kar kōņaan menin?
Mijen emaron̄ men eo eļap tata ilo juon tōreen mour an ripālele ro. Juon taitōļ emaron̄ kar em̧m̧an ej “Irooj eo Aō Enaaj Wōr An Aikuj n̄an Eō.”24 Komaron̄ pād ilo juon jikin eo kworuwamejet ie; bōtaab, kajoor eo an Jetōb enaaj kōm̧m̧an am̧ en̄jake am̧ jab ruwamājet.
Jinō im jema im jon̄n̄oul taujin mijinede rūtto ro em̧ōj aer ro̧o̧l tok im raar kwaļo̧k naan in kam̧ool ko aer kōn lan̄lōn̄ eo rekar loe ilo jerbal in mijinede. Irooj eaar ba ilo jeje ko rekwojarjar ilo raan ko āliktata, “Im eļan̄n̄e āindein bwe kom̧ro en aikuj jerbal aolepān raan ko amiro ilo kwaļo̧k ukeļo̧k n̄an armej rein, im bōktok, juon wōt armej n̄an Eō, ewi jon̄an an ļap naaj amiro m̧ōņōņō ippān ilo aelōn̄ eo an Jema!”25
Aisea eaar letok n̄an kōj ilo meļeļe ko rem̧ūlaļ ta meļeļein mijen ilo juon jikin “kallib.” Jeje ko rekwōjarjar rej jiron̄ kōj “jikin kallib eo ej laļ in.”26 Rikaanan ro rōbun̄bun̄ etto raar jeje bwe, “Bwe koṃnaaj diwōjḷọk kōn ṃōṇōṇō, im naaj āñinḷọk koṃ kōn aenōṃṃan; toḷ ko re ḷap im ko re dik renaaj deblọk iṃami ilo al, im wōjke otemjej in meḷaaj renaaj kabbokbok.”27 Toļ ko reļļap, toļ ko reddik, jikin kallib ko, im wōjke ko maron̄ keidi āinwōt mijen būreejtōn ro, bisop ro, ritōl ro ilo district ko, membōr ro, im ro rej pukōt m̧ool eo ak “jab jeļā ia eo ren pukote ie,”28 renaaj kam̧ool bwe mijinede ro rerūtto rej ukōt mour kōn wōt naan in kam̧ool ko aer kōn Rilo̧mo̧o̧r im Ripinmuur eo aer, Jisōs Kraist.
Āinwōt Rijilōk an Irooj Jisos Kraist, ij kajjitōk ippāmi n̄an kōm̧m̧an jerbal in mijinede ilo aiintok Israel im bōlen naaj bar etal im mijen. Jej aikuji eok— jej aikuji eok. Jej kam̧m̧oolol kōn rūtto rein ad kōn mour eo kom̧ ej tōl im waanjon̄ak ko ami ilo m̧ōko m̧ōmi, ilo ward ko, im ilo stake ko. Ij kajjitōk ippāmi bwe komin bōk jeļā-kilen, kobaik ippān iien im jeļā kautiej naan in kam̧ool ko ami, innām etal im mijen. Ij jar bwe tokālik ij jijet n̄an kōm̧m̧ani ijjitōn̄ ko n̄an ripālele ro rerūtto, enaaj wōr buki iaami rej kijooror in bōk kūr ko ami.
Ij barāinwōt kallim̧ur bwe ilo am̧ mijen kwonaaj en̄jake iakwe eo an Irooj ilo mour eo am̧, kwonaaj jeļā E, Enaaj jeļā kōn kwe, im “enaaj kanooj ļap lan̄lōn̄ eo am̧,”29 Ilo am̧ wūjlepļo̧k ilo jerbal n̄an Jisōs Kraist enaaj im̧we eok im kōjeram̧m̧an baam̧le eo am̧, ajri ro jibum, im ro jibun jibum. Aenōm̧m̧an, im iakwe [naaj] wōrļo̧k”30 ilo mour ko aer iumwin elōn̄ iiō ko rej pedo tok. Ij kallim̧ur. Ilo etan Jisōs Kraist, amen.