Katak ko Rekwojarjar Ikkijeen Kōkaajriri
Ro jined im jemen rej deļo̧n̄e juon jemjerā ippān Jemedwōj Ilan̄ n̄an tōl ajri ro raorōk n̄an bar jepļaak n̄an lan̄.
Kwonan̄in ke jōbjōb nin̄nin̄ rot en ej kab ļotak tok? Elōn̄ meram rej waļo̧k jān nin̄nin̄ ko rej kab ļotak, rej boktok juon en̄jake in iakwe ikōtaad me ej kobrak būruōd kōn lan̄lōn̄.1 Juon rijeje in Mexico eaar je naan kein, “Iaar ekkatak bwe n̄e juon nin̄nin̄ rot en ej kab ļotak ej jibwe addin pein jemān kōn addi jiddik ko pein, ekajju m̧ōj an bōk būruōn n̄an indeeo.”2
Kōkaajriri ej juon iaan eddo ko eļap an aorōk im kabwilōñlōñ. Ro jined im jemed rej deļo̧n̄e juon jemjerā ippān Jemed Ilañ ñan tōl ajri ro raorōk n̄an bar jepļaak n̄an lan̄.3 Rainin ikōņaan kōnono kōn katak ko kōn kilen kōkaajriri im rej pād ilo jeje ko rekwojarjar im rikanaan ro remour rej katakin kōj bwe jen kwaļo̧k jeļā kein ad.
Wanlōn̄ļo̧k n̄an ijo Eutiejļo̧k ilo Mantin Gospel In
Jej aikuj wanlōn̄ļo̧k n̄an ijo eutiej ļo̧k ilo mantin gospel in ippān baam̧le ko ad. Būreejtōn Russell M. Nelson ekar kwaļo̧k: “Baam̧le ko rej aikuj jipañ jān lañ. Ro jined im jemen eban bwe aer kapilōk ajri ro kōn en̄jake ko aer make, mijak, ak buromōj.”4
Bōtaab kōn imminene in manit ko ad, ilo kilen kōkaajriri, im imminene ko an juon make emaron̄ aorōk n̄an kōkaajriri, maron̄ kein rejjab bwe n̄an jipan̄ ajri ro jepļaak n̄an lan̄. Jej aikuj lelōn̄ļo̧k “un ko raorōk im … kōm̧m̧ani,”5 juon manit in iakwe im kōtmene jimor, eo me jej jerbal ippān ajri ro nejid “ilo em̧m̧anļo̧k, im ekwojarjar.”6 Būreejtōn Dallin H. Oaks ej kōmeļeļe kōn m̧antin gospel in bwe ej “juon wāween mour eo ejeņoļo̧k me elōn̄ karōk raorōk im kōtmene ko im imminene ko. … Mantin gospel in ej itok jen karōk in lo̧mo̧o̧r, kien ko an Anij, im katak ko an … rikanaan ro remour. Ej jipañ kōj ilo kilen ad kaddōkļo̧k baam̧le ko ad im kilen ad mour mour ko ad make.”7
Jisōs Kraist ej pedped in m̧antin gospel in. N̄an mour kake m̧antin gospel in ilo baam̧le ko ad ej juon men eaorōk n̄an ejaake juon mejatoto eo ijo enaaj kōļapļo̧k tōmak. N̄an tōpar ijo ilōn̄, Būreejtōn Oaks ej kūr kōj “n̄an joļo̧k jabdewōt imminene ko ilo baam̧le ko ad me jej kōm̧m̧ani ilo mour ko ad me ejjab ekkar n̄an Kabun̄ in an Jisōs Kraist.”8 Ro jined im jemen, ej aer eddo n̄an ejaake m̧antin gospel im kōmman bwe en jab pidodo an dreloñ menin kapo ilo m̧ōko m̧ōd, ak nana, ilo buruōn ajri ro nejid.
Ilo ad kōm̧m̧an bwe m̧antin gospel in en imminene ko ad ilo baam̧le ko ad, im kōn kajoor in im̧we eo an Jetōb Kwojarjar,9 wāween ad kaajriri kiiō, imminene ko ad, im men ko jej kōm̧m̧ani renaaj oktak, jenaaj ippān doon, em̧m̧anļo̧k, im wājepdik.
Kōm̧m̧an bwe M̧weo en Jikin Ekkatak Gospel in
Būreejtōn Russell M. Nelson ekar katakin bwe m̧weo ej aikuj “juon jikin ekkatak gospel in.”10 Jibadbad eo an ekkatak gospel in ej n̄an “kamūlalļo̧k oktak eo ad ñan Jemedwōj Ilañ im Jisōs Kraist im jipañ kōj erom̧ āinwōt Er.”11 Jen ļōmņak kōn eddo ko jilu raorōk an ro jinen im jemen n̄an kōkaajriri āinwōt kar kōmeļeļe jen rikanaan ro im rijilōk ro me emaron̄ jipan̄ kōj ejaake juon m̧antin gospel eo eutiejļo̧k ilo m̧oko im̧ōd.
Juon: Katakin ilo Anemkwoj
Jemedwōj Ilañ eaar katakin Adam kōn Jisōs Kraist im katak ko An. Ekar katakin e “kilen katakin er men kein ilo anemkwoj n̄an [ro] nejin.”12 Ilo bar juon wāween, Jemedwōj Ilan̄ eaar katakin Adam kilen katakin men kein ilo anemkwoj, jouj, im jab depiji.13 Jeje ko rekwojarjar rej jiron̄ kōj bwe “Adam im Iv raar wūjtake etan Anij, im rekar kwaļo̧k aolep men kein n̄an m̧aan im kōrā ro nejier.”14
Jej wūjleplok katak ko ad n̄an ajri ro nejid n̄e jej bōk ad iien ippāer. Jej aikuj katakin im kajju ñan er im jab kōnnaan ilo iien alooj, kōjerbali kein jipan̄ ko me em̧ōj an Kabun̄ in kōpooji.15 Jej lukkuun katakin er ñe jej katak jeje ko rekwojarjar ippān ajri ro nejid im kōjerbale Itok, Loor Eō im kōtļo̧k bwe Jetōb en aer rūkaki.
Kein Karuo: Waanjoñok in Rikaļoor
Ilo bok in Jon, jej riiti ke jet iaan riJu ro raar kajjitōkin Rilo̧mo̧o̧r kōn m̧wil ko An, Jisōs eear reilo̧k n̄an waanjon̄ak eo An, Jemen. Ekkar katakin, “Nejin e jab make maroñ kōm̧anm̧an jabrewōt, a men eo Ej lo Jemān kōmmane: bwe men ko jabrewōt Ej kōmmani, men kein barāinwōt Nejin ej kōmmani āindein.”16 Ro jined im jemen, ta eo jej aikuj kōm̧m̧ane n̄an kōm̧m̧an waanjoñok ñan ro nejid? Mour in Rikaļoor.
Āinwōt ro jined im jemen, jemaroñ katakin kōn aorōkin likūt Anij m̧oktata ñe jej kōnono kōn kien eo kein kajuon, ak jemaron̄ kōm̧m̧an waajon̄ak kake ilo ad kajjieon̄ kōjekdo̧o̧n men ko an laļ in im kōjparok raan in Jabōt im kokwojarjare aolep wiik. Jemaroñ katakin aorōk in bujen ko an tampeļ n̄e jej kōnono kōn katak ko kōn m̧are indeeo, bōtaab jenaaj waanjon̄ak ilo ad kōjparok bujen ko ad, im en em̧m̧an ad kōm̧m̧an n̄an ro pāleed ilo iakwe.
Kein Kajilu: Kūr ñan Jerbal
Tōmak ilo Jisōs Kraist ej aikuj pedped in kam̧ool ko an ajri ro nejid, im naan in kam̧ool kein renaaj itok ippān kajjojo ajri kōn revelesōn ko an make kajjojo armej.17 Ñan jipañ ajri ro nejid kōļapļo̧k naan in kam̧ool ko aer, jej kakpilōklōk er bwe ren kōjerbal anemkwōj in kāālet n̄an kāālet jim̧we18 im kōpoje er n̄an aolepen mour eo ad ilo iaļan bujen eo an Anij.19
Enaaj jim̧we n̄an kapilōk kajjojo iaan ajri ro nejid n̄an eo̧ron̄ kūr eo an Būreejtōn Nelson n̄an eddo iki naan in kamool ko aer make kin Jisōs Kraist im gospel in An, ñan make jerbal e, ñan tāāpe bwe en eddōk, tioñ e m̧ool eo, im jab kakkure kōn riab in katak ko jān ro rejjab tōmak m̧aan im kōrā jimor.20
Kōkaajriri, ilo Wāppen im Kōņaan
Ilo weppen in an Jemedwōj Ilañ ñan kar āinwōt ro juon jemed ekar waļo̧k ilo juon revelesōn kar leļo̧k ñan Moses: “Bwe lo, en̄in ej jerbal eo Aō im aibojooj eo Aō—n̄an kakūrm̧ool jab wabanban im mour indeeo an armej.”21 Būreejtōn Nelson ekar kobaiki im ba, “Anij emaroñ kōm̧m̧an aolep men Emaroñ, āinwōt ñan kejo̧ne anemkwoj eo an, ñan jipañ eok bwe maroñ bōke kōjeram̧m̧an ko ejjeļo̧k jemļo̧kier.”22
Āinwōt ro jinen im jemen, jej rijipan̄ ro an Anij ñan kōjparok ajri ro nejid.23 Jej aikuj kōm̧m̧an jabdewōt men jemaron̄e n̄an kōm̧m̧an juon jikin me ajri ro remaron̄ en̄jake kajoor eo ekwojarjar an Anij.
Jemedwōj Ilañ ar jab baj tin kōtļo̧k bwe jen jijet bajjōk alooj ta ko rej waļo̧k, alooje an jab waļo̧k mour in jetōb ko an ajri ro nejid. Kōtļo̧k bwe in kōmeļeļeik menin me kar baj kōņaan wōt kōkaajriri jān juon aō make en̄jake. Ke iaar pād ilo Būraimere ilo juon branch jidikdik ilo Guatemala, ro jinō im jema rekar jinoe aer katakin eō kōn aorōkin kōjeraam̧m̧an ko an petriak. Jinō ekar bōk an iien n̄an kwaļo̧k en̄jake eo an ke ekar bōk kōjeraam̧m̧an eo an petriak me eļap an kaorōke. Eaar katakin eō katak ko rej ekkeijelļo̧k ippān kōjeraam̧m̧an ko an petriak, im eaar kam̧ool kōjeraam̧m̧an ko kar kallim̧ur kaki. Baj kōņaan eo an n̄an kōkaajriri ekar im̧we eō bwe in kōņaan bōk kōjeraam̧m̧an ko an petriak.
Ke ekar 12 aō iiō, jinō im jema raar kajineete n̄a n̄an pukōt n̄an bōk juon aō petriak. Ad aikuj āindein bwe ejjeļo̧k petriak ijo kōm kar jokwe ie. Iaar etal ippān juon petriak me ekar pād ilo stake 156 kilomita (97 m̧ail) jān ijo jikim. Eļap wōt aō keememej iien eo petriak eo am ekar likūt pein ņai ioon bōra n̄an an kōjeram̧m̧an eō. Ijeļā bwe kōn kajoor eo an jetōb n̄an kapene, ilo ejjeļo̧k pere, bwe Jemed Ilan̄ ekar jeļā wōn n̄a.
Ñan laddik eo me 12 wōt an iiō jen juon jikin jidikdik, ekar ļap menin ippa. Būruō ekar oktakļo̧k n̄an Jema Ilañ raan eo kōn kōņaan eo an jinō im jema n̄an kōkaajriri, im eban jem̧ļo̧k aō kam̧m̧oolol er.
Sister Joy D. Jones, kar Būreejtōn eo Eutijetata an Būraimere, ekar ba: “Jejjab maron̄ kōttar an ajri ro jide im make oktaktok. Oktak ilo jide ejjab juon pedped in katak an gospel eo an Jisōs Kraist.”24 Iakwe in ad im kūr in em̧ool emaron̄ kōm̧m̧ane juon oktak ilo būruwōn ajri ro nejid ilo aer kōjerbale anemkwoj in kālet ko aer. Bureejtōn Nelson ej ba, “Ejjeļo̧k bar jerbal eaorōk ļo̧k jān in ekwojarjar, eddo eo an ro jinen im jemen!”25
Jem̧ļo̧k in
Ro jinen im jemen, laļ in eobrak kōn jelāļo̧kjeņ, m̧anit, im ļōmņak ko me rej jelm̧ae n̄an kōm̧m̧an bwe ajri ro nejid ren po. Juon em̧ ekilep im ļap ej kareleel kōn ro uwaer kajjojo raan ilo aer kōjerbal jānōļ in alooj ko raan kein. “A ilo mennin letok eo kōn Nejin,” rikannaan Moronai eaar katakin, “Anij eaar kōpooj juon ial em̧m̧anlok.”26
Ilo jerbal ippān Anij kōn bujen ko im erom̧ juon an ri jerbal ilo ad kōjparok ajri ro nejid, E enaaj kōjeraam̧m̧an kōņaan ko ad, im̧we katak ko ad, im kemeneene kūr ko ad bwe “ro nejid ren maroñ jeļā ta eo ren bukōte ñan aer maroñ jeorļo̧k jerawiwi ko aer.”27 Ilo etan Jisōs Kraist, Amen.