Kwon Rikaļoor ro an Kraist Reineem̧m̧an
Ij kam̧ool bwe “rikaļoor ro an Kraist reineem̧m̧an” renaaj lo aenōm̧m̧an an juon make ilo mour in im juon bar koba in lan̄ aiboojoj.
Jej mour ilo juon tōre n̄e “rikaļoor ro an Kraist reineem̧m̧an”1 rej iooni kapan̄pan̄ ko rejej uwaer. Ro me rej tōmak ilo, kabun̄jar ilo ettā, im kam̧ool kōn Jisōs Kraist aolep iien rej ioon mālijjon̄ ko, inepata, im apan̄ ko.2 Lio pāleō, Mary, im n̄a kōmij jab oktak. Ilo iiō ko ļo̧k, kōm kar lo elōn̄ ro m̧ōttam jān high school, mijenede kōmpānien ro m̧ōttam̧, jet iaan ro ippeer, im rijerbal ro m̧ōttam̧ em̧ōj aer mootļo̧k, ak, āinwōt an Būreejtōn Russell M. Nelson kar ba, kadiwōjļo̧k n̄an turejet eo juon an rōn̄ōl eo. Kōm kar lo jet ro me raar rūttoļo̧k ilo Kabun̄ in kiiō ejako aer pād ilo iaļ in bujen in.
Ejerata, ekar jako ļaddik eo jibūm̧ eo ej 23 an iiō eo ekar mej ilo juon itaak in wa. Ro jet jeram̧ im m̧ōttam̧, ro uwaan baam̧le, im ro m̧ōttam̧ rekar bar ioon apan̄ ko an mour in.
Jabdewōt iien mālijjon̄ ej waļo̧k, jej būrom̧ōj im kajjieon̄ ineek an doon eddo.3 Jej liaajļoļ kōn men ko me rejjamin naaj tōprak im al ko me rejjamin naaj al kaki.4 Men ko renana rej waļo̧k n̄an armej ro rem̧m̧an ilo iaļ in an m̧our wabanban. Kijeek ko rekar kakkure ioon Maui ilo Hawaii, southern Chile, im Canada rej waanjon̄ak ko an iien ko relukkun jab em̧m̧an armej ro rem̧m̧an jet iien rej jelm̧ai.
Jej riit ilo Bōōr Eo Eļap Wōņāān bwe Irooj ekar kwaļo̧k n̄an Ebream paotok indeeo eo an jetōb ko. Ebream ekar katak kōn mour eo ad m̧okta, ijjitōn̄ eo m̧okta jan ļotak, Kōm̧anm̧an eo, kāālet juon Ripinmuur, im mour wabanban in, eo ej pād eo kein karuo an armej.5 Ripinmuur eo ekar kean̄:
“Jenaaj kōm̧m̧an juon laļ eo ioon rein remaron̄ jokwe;
“Im jenaaj mālejjon̄e er kake, n̄an lale eļan̄n̄e renaaj kōm̧m̧ani aolep men ko jabdewōt Irooj aer Anij enaaj jiron̄ er.”6
Kiiō kōjwōj aolep ej pād ijin ilo pād eo kein karuo an iaļ in eddōkļo̧k eo ad n̄an juon aiboojoj in aelōn̄ kiin̄ āinwōt m̧ōttan karōk in lo̧mo̧o̧r eo eļap an Anij im eutiejtata. Jej jeraam̧m̧an kōn anemkwoj in kāālet im jedmatmat n̄an mālijjon̄ an mour wabanban. En̄in ej iien eo kar letok n̄an kōj n̄an m̧aanjabpopo n̄an iion Anij.7 Jej jeraam̧m̧an n̄an jeļā kōn Jisōs Kraist im jerbal eo An ilo karōk eo. Ewōr ippād jim̧we eo n̄an erom membōr ro an Kabun̄ eo An kōjepļaaktok—Kabun̄ e an Jisōs Kraist im Armej ro Rekwojarjar ilo Raan-ko Ālitkata. Āinwōt rikaļoor ro an Kraist reineem̧m̧an, jej kajjieon̄ n̄an mour kōn kien ko An. Ejjan̄in kar pidodo n̄an rikaļoor ro An. Ak ekar pidodo n̄an Rilo̧mo̧o̧r eo n̄an tiljek ilo kakūrm̧ool mijen eo An ilo mour in.
Jeje ko rekwojarjar rej alikkar: elōn̄ renaaj likjab n̄an “m̧ōn̄ā, idaak, im lan̄lōn̄, bwe ilju jenaaj mej” jekjek eo.8 Ro rejjab tōmak jet renaaj jenlik jān ro kōļmenļo̧kjeņ ko aer rej kōmakeiļo̧k ak kaorōk er make me rej jojomar kōn “men ko rekāāl”9 im katak ko an armej.10 Rejjab jeļā ia eo n̄an pukōt m̧ool eo.11
Rikaļoor ro an Kraist reineem̧m̧an rejjab ļoor iaļ kein jim̧or. Jej ro uwaan jukjuk in pād ko rejouj, ijo jej jokwe ie. Jej iakwe, kwaļo̧k, im karuwaineneik aolep ajri ro nejin Anij n̄an ļoor katak ko an Kraist.12 Jej ļoor kapilōk eo an rikanaan eo ad ejitōnbōro, Būreejtōn Nelson; jej kāālet jerbal eo an juon “rikōm̧m̧an aenōm̧m̧an, kiiō im iien otemjej.”13 Jekjek in eim̧we ej jokkun wōt juon ippān jim̧or jeje ko rekwojarjar im tōl in kanaan eo.
Ilo 1829 eo, Kabun̄ eo kōjepļaaktok ekar jan̄in de ejake, ak Bok in Mormon ejjan̄in kar jeje. Juon kumi edik in armej ro raar kakkōt, kar m̧weiur jān Jetōb eo an Anij, kar ļoor Rikanaan Josep Smith. Irooj ekar kwaļo̧k n̄an Josep Smith kapilōk eo n̄an iien ko reppen: “Jab mijak, bwij jidikdik in sip; kōm̧m̧an em̧m̧an; laļ im hell ren koba ņae kom̧, bwe eļan̄n̄e kom̧ij ekkal ioon Aō ejm̧aan, rej jamin anjo̧.”14 Ej barāinwōt ba n̄an er:
“Reitok n̄an Eō ilo ļōmņak otemjeļo̧k; jab pere, jab mijak.
“… Kom̧in tiljek, kōjparok kien ko aō, im kom̧ naaj jolōte aelōn̄ in lan̄.”15
Ealikkar, mejān kajjiōk eo ad ilan̄ ejjab oktak n̄e jej en̄taan kōn apan̄. Ilo Hibru kar kapilōk kōj bwe “jen peran im kepaak n̄an tūroon in jouj, bwe jen bōk tūriam̧okake, im lo jouj im jipan̄ ilo iien aikuj.”16 Jisōs Kraist ej “Ri Lo̧mo̧o̧r indeeo.”17
Em̧m̧an ippa naan ko an Mormon, kar kouti jān ļeo nejin Moronai, kean̄ “rikaļoor ro an Kraist reineem̧m̧an … kōn ami etetal eaenōm̧m̧an ippān ro nejin armej.”18
N̄an kōj ro ilo Kabun̄ in rej kajjieon̄ in erom rikaļoor ro an Kraist reineem̧m̧anjuon, juon raan em̧m̧anļo̧k ej kōttar kōj ilo ad kalimjōk wōt ad Irooj im Rilo̧mo̧o̧r, Jisōs Kraist. Mālijjon̄ ko rej m̧ōttan mour wabanban im rej waļo̧k ilo mour an aolep ilo aolepān laļ in. Menin ekitbuuj aitwerōk ko reļlap ikōtaan laļ ko im kajjojo armej.
Emakijkij an ritōl ro an Kabun̄ in kajjitōk, “Etke juon Anij eo ejim̧we ej kōtļo̧k an men ko renana waļo̧k, eļap tata n̄an armej ro rem̧m̧an?” im “Etke ro me rejim̧we im rej pād ilo jerbal in jipan̄ eo an Irooj rejjab deeor jān kain jorrāān kein?”
Jejjab jeļā aolep uwaak ko; ijowōt ke, jejeļā pedped in katak ko raorōk me rej kōm̧m̧an bwe jen jelm̧ae mālijjon̄ ko, inepata, im apan̄ ko kōn tōmak im lōke ilo juon jekļaj eo emeram me ej kōttar kōj kajjojo. Ejjeļo̧k juon waanjon̄ak em̧m̧anļo̧k ej pād ilo jeje ko rekwojarjar kōn kautiej n̄an dibuk inepata jān naan eo an Irooj n̄an Josep Smith, Rikanaan eo, ke ekar juon rikalbuuj ilo Liberty Jail.
Ilo jidik in Irooj ekar kean̄:
“Eļan̄n̄e atlaļ im atlōn̄ ko in hell rej kanooj eļļan̄ ilokam̧, kwōn jeļā, nejū m̧aan, bwe aolep men kein otemjeļo̧k renaaj lewōj n̄an eok imminene, im naaj n̄an em̧m̧anļo̧k eo am.
“Eo Nejin Armej eaar wanlaļļo̧k ium̧wier aolep. Kwe kwo ļapļo̧k jān e ke?
“… Jab mijak ta armej emaron̄ kōm̧m̧an, bwe Anij enaaj pād ippam̧ indeeo im indeeo.19
Ej alikkar ewōr juon Jemed ilo Lan̄ me ejeļā im ej iakwe kōj kajjojo im ej eweppān an meļeļe en̄taan eo ad. Nejin, Jisōs Kraist, ej ad Rilo̧mo̧o̧r im Ripinmuur.
Būreejtōn M. Russell Ballar ekar kajoor an kōmejajaik aorōk eo an bok eo ekāāl an Preach My Gospel.20 In kwaļo̧k ļōmņak eo aer. Bok in ekāāl, ej kōkajoorļo̧k im rie kam̧ool eo an jeje ko rekwojarjar, ekajoor an kean̄:
“Ilo en̄taan in pinmuur eo An, Jisōs Kraist ekar bōk Ioon make metak ko im nan̄nmej ko, im m̧ōjņo ko. Kōnke kōn menin. E ejeļā ‘ekkar n̄an kanniōk ekōjkan jipan̄ armej ro an ekkar n̄an m̧ōjņo̧ ko aer.’ (Alma 7:12; bar lale eoon 11). Ej kūr, ‘Itok n̄an ippa,’ ilo ad kōm̧m̧ane, E ej letok n̄an kōj kakkūje, kōjatdikdik, kajoor, erreim̧anļo̧k, im kemour (Matu 11:28; bar lale eoon ko 29–30).
“Ilo ad pedped ioon Jisōs Kraist im Pinmuur eo An, E emaron̄ jipan̄ kōj niknik ilo mālijjon̄ ko ad, nan̄inmej ko, im metak. Jenaaj obrak kōn lan̄lōn̄, aenōm̧m̧anim, im jokne. Aolep ko rekalijōkļo̧k kōn mour maron̄ in kajim̧wi kōn Pinmuur eo an Jisōs Kraist.”21
Jemaron̄ lan̄lōn̄ n̄an erom rikaļoor ro an Kraist reineem̧m̧an.
Karōk in m̧ōņōņō eo an Jemed n̄an ajri ro Nejin ekitbuuj ejjab wōt mour eo m̧okta im mour in ak barāinwōt juon kōjatdikdik n̄an mour indeeo, ekitbuuj juon bar koba eļap im aiboojoj ippān ro rekar jako jān kōj. Aolep bōd ko naaj kajim̧wi, im jenaaj lo kōn alikkar eweppān im erreiļo̧k im meļeļe eo ejjab bōd.
Ritōl ro an Kabun̄ in raar keidi erreilo̧k in ippān juon eo ej etetal ļo̧k n̄an ioļapen juon tieta jilu m̧ōttan.22 Ro ejjeļo̧k jeļā eo kōn karōk eo an Jemed rejjab meļeļe ta eo ekar waļo̧k ilo jerbal eo m̧okta (ak mour eo m̧okta) im jibadbad ko kar ejaki ijōņ; ak rejjab meļeļe kalikkar eo im jibadbad eo me ej itok ilo tieta eo kein kajilu, eo ej kakūrm̧ool eo aiboojoj an karōk eo an Jemed.
Elōn̄ rejjab kam̧m̧oolol bwe ium̧win karōk eo An, em̧m̧an im meļeļe rej ro me watōk rejjab jeraam̧m̧an, kōn ejjeļo̧k aer bōd make, āliktata rejjab jelet er.23
Jeje ko rekwojarjar ralikkar: rikaļoor ro an Kraist reineem̧m̧anme rej jim̧we, ļoor Rilo̧mo̧o̧r eo, im kōjparok kien ko An naaj jeraam̧m̧an. Juon iaan eoon ko raorōk tata n̄an ro me rejim̧we, jekdo̧o̧n ta jekjek eo aer ilo mour, ej m̧ōttan ennaan eo an Kiin̄ Benjamin n̄an armej ro an. Ej kallim̧ur bwe ro me rej tiljek kōjparok kien ko rej jeraam̧m̧an ilo aolep men ko ilo mour in n̄n “bōk er ilo lan̄ … [im] jokwe ippān Anij ilo wāween m̧ōņōņō eo ejjeļo̧k jem̧ļo̧kin.”24
Jej kile bwe enan̄in aoleped wōj kar ioon lan̄ ko an kanniōk im jetōb ilo mour ko ad, jet renanaļo̧k. Juon Jemed ilo Lan̄ eo ej iakwe im Nejin, Jisōs Kraist, eo ej jabōn Kabun̄ eo An kōjepļaaktok, kar letok n̄an kōj jeje ko rekwojarjar im rikanaan ro n̄an kōpooj kōj, kakkōl kōj kōn kauwōtata ko, im letok n̄an kōj tōl n̄an kōpooj im kōjparok kōj. Jet tōl ko rej aikuji kōm̧m̧an ilo iien eo em̧ōkaj tata, im jet rej letok kōjparok n̄an elōn̄ iiō ko ilo ilju jekļaj. Kōmeļeļe eo an Irooj n̄an Katak im Bujen ko, jekjōn 1ej kobōl kōj n̄an “eo̧ron̄ naan ko an rikanaan ro.”25
Jekjōn 1 ej barāinwōt kakkōl kōj, “Kom̧in pojak, kom̧in pojak n̄an men eo ej itok.”26 Irooj ej leļo̧k n̄an armej ro An juon iien n̄an m̧aanjabpopo n̄an apan̄ ko renaaj jelmae.
Irooj ekar lelo̧k juon revelesōn ekajoor n̄an Būreejtōn Brigham Young ilo Jānwōde 14,1847 eo, ilo Winter Quarters.27 Revelesōn in ej juon waanjon̄ak em̧m̧an kōn an Irooj kōpooj armej ro n̄an ta eo me ej itok. Rikwojarjar ro retiljek raar jino diwōjļo̧k eo aer n̄an jikin ko aer ilo toļ eo ilo Salt Lake Valley. Ekar wejepedik aer kalōk Nauvoo Tampeļ eo im kar bōk kain̄i in lo̧mo̧o̧r ko rekwojarjar. Kar kadiwōjļo̧k eer jān Missouri, im rikakkure ro aer raar kadiwōjļo̧k er jān Nauvoo ilo juon winter season elukkuun in nana. Revelesōn eo n̄an Brigham kar kapilōk in jerbal eo kōn ekōjkan m̧aanjabpopo n̄an diwōjļo̧k eo. Irooj ekar likūt kōmejaja eo āinjuon kōn lale rijeram̧ōl ro, lim̧aro emej pāleer, ro ejjeļo̧k jemeer, im baam̧le ko an ro me rej jerbal ilo Mormon Battalion eo ilo an jarlepju in Rikwojarjar ro etal ilo iaļ eo aer ekauwōtata.
Ilo kakkobaba n̄an leļo̧k kapilōk ko jet n̄an mour jimwe, Irooj ekar kōmejajaik ruo pedped in katak ko me rej wōnm̧aanļo̧k wōt in jerbal rainin.
Juon, E ekar rōjan̄ er n̄an “nebare Irooj kōn al, kōn kōjan̄jan̄, kōn eb, im kōn juon jar in nebar im kam̧m̧oolol.”28
Ruo, Irooj ekar kapilōk eļan̄n̄e raar “būrom̧ōj, kūr ioon Irooj am Anij kōn owar, bwe jetōb eo am en maron̄ lem̧ōņōņō.”29
Kauwe kein ruo rej kapilōk ko raorōk n̄an tōre in ad make. Mour obrak kōn nebar, al, im kam̧m̧oolol ejej uwaan aer kōjeraam̧m̧an. Lan̄lōn̄ im pedped ioon jipan̄ in lan̄ kōn jar ej juon wāween ekajoor n̄an erom rikaļoor ro an Kraist reinem̧m̧an. Kajjieon̄ iien otemjej n̄an m̧ōņōņō ilo jipan̄ im joļo̧k kōļmenļo̧kjeņ ko renana.
Ļain eo em̧m̧an ilo al in ej letok uwaak eo em̧m̧antata: “Earth has no sorrow that heav’n cannot heal.”30
Āinwōt juon Rijilōk an Irooj Jisōs Kraist, ij kam̧ool bwe “rikaļoor ro an Kraist reineem̧m̧an” renaaj lo aenōm̧m̧an an juon make ilo mour in im juon bar koba in lan̄ aiboojoj. Ij kwaļo̧k juon kam̧ool em̧ool kōn kwojarjar eo an Rilo̧mo̧o̧r eo im m̧ool eo an Pinmuur eo An. E ej ad Rilo̧mo̧o̧r im Ripinmuur. Ilo etan Jisōs Kraist, amen.