Unoojdikdik ko an Jetōb
M̧ōttan Jetōb Kwojarjar ej juon mennin letok eo eļaptata me Armij ro Rekwojarjar rej m̧ōņōņō kake.
Kadkad In
Ejjab to, mejen rialooj ikkure ro ioon lal rekar mije 2023 FIFA Women’s World Cup, eo Australia im New Zealand kar bōk eddoon. Rikkure ro rem̧ōkade tata an laļ kar itok jān elōn̄ļo̧k jān 200 tiim ko jān peļaakin laļin rekar kwaļo̧k kajoor, kijenmij, jeļā, im ikkure ke rej jiāe n̄an nebar eo eutiejtata ilo soccer aolep laļin.
Jej bwilōn̄ ilo an aolep rikkure ro ilo elōn̄ ikkure ko im bar jet katak tōpar jon̄an eo eutiejtata ilo ikkure ko aer. Jej kōnono kōn jeļā ak mennin letok ko ad letok in Anij. Menin ekoba ro kar kōjeram̧m̧an er ilo eb, gymnastic, kōjan̄jan̄, jin̄a, arin ro jet, bōnbōn, science, im elōn̄ļo̧k. Kajjojo armij rein rej kwāļo̧k mennin letok ko aer jān Anij me rej kio em̧m̧anļo̧k im jejjōtļo̧k kōn kijejeto in jerbal im ekkatak. Mennin letok jān Anij rej ejaak armij ro rekōjeraam̧m̧an.
Jerbale Menin Letok ko an Jetōb
Ilo erreilo̧k ilo mejān gospel, Anij ej kōkwojarjar ajri ro Nejin kōn elōn̄ mennin letok an jetōb, kōm̧m̧an bwe ren armij ro rejeraam̧m̧an ilo jetōb. Membōr ro an Kabun̄ rej kōjpārok bujen kar leļo̧k mennin letok an Jetōb, ekoba mennin letok eo an juon kamool kōn Jisōs Kraist āinwōt Rilo̧mo̧o̧r eo ad, mennin letok an Jetōb Kwojarjar, mennin letok an tōmak n̄an kemour, mennin letok an jeļā, mennin letok an bōk kabwilōn̄lōn̄ ko, im mennin letok an māletlet im jeļāļo̧kjen.1 Irooj ek karuwaineneik kōj n̄an kappukōt mennin letok ko rem̧m̧antata, mennin letok ko an jetōb. Ej letok mennin letok ko an jetōb n̄an kōjeraam̧m̧an im n̄an kōjerbali n̄an kōjeraam̧m̧an ro jet.2
Bar rool n̄an wanjo̧n̄ak eo ad kōn rikkure ro rejeraam̧m̧an, eaorōk n̄an jeļā bwe mennin letok kein make iaar rejjab kōm̧m̧an juon eo etijem̧ļo̧k. Mekarta to̧ļan ko aer reļļap, ej ilo metak im jerbal in ekkatak im kijejeto me rikkure rein rej em̧m̧anļo̧k im jejjōtļo̧k kōl kein aer n̄an tōpar eutiejtata in ikkure ko aer. Jekdoon menin letok ko kar bōki im kwāļo̧ki emakijkij aer itok ippān kajin in “emenin aikuj kōkm̧anmanļo̧k.”
Ejja āinwōt, Ikar loe bwe juon pen in katak ej itok ippān mennin letok ko an jetōb. Jerbale mennin letok an jetōb ebōk jerbal ko an jetōb. “Ebōk jerbal ilo jetōb n̄an wōr ippam̧ tōl eo an Jetōb Kwojarjar. Jerbal in ekoba mool ilo jar im makijkij katak jeje ko rekwojarjar. Ej bar koba kōjpārok bujen ko am̧ im kien ko an Anij. … Ekoba erreo ilo bōk m̧ōttan kwojkwoj eo kajjojo wiik.”3
Ta ko rej leen menin n̄e jej kōmourruri menin letok ko an jetōb? Rej kobaik unoojdikdik ko jān Jetōb me rej jipan̄ kōj jelm̧ae aikuj ko ad kajjor raan im kwaļo̧k n̄an kōj ta eo jen kōm̧m̧ane im ba im kōjeram̧m̧an ko kōn aeņōm̧m̧an im kaeņōm̧m̧an. Ilo ad ron̄jake im em̧akūt ioon unoojdikdik in jetōb ko, Jetōb Kwojarjar ej kakilepļo̧k maron̄ ko ad bween ļapļo̧k jān ta eo jemaron̄ make kōm̧m̧ane, Mennin letok kein an jetōb raorōk renaaj jipan̄ kōj ilo aolep jekjek ilo mour ko ad.4
M̧ōttan Jetōb Kwojarjar ej juon mennin letok eo eļaptata me Armij ro Rekwojarjar rej m̧ōņōņō kake.
Ewi jo̧n̄an aorōk in mennin letok in? Būreejtōn Russell M. Nelson ekar uaake kajjitōin in ke ekar ba bwe “ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”5
Ekōjkan Karuaineneik im Kile Unoojdikdik ko an Jetōb
Ilo aolepen iien jerbal in karejear in aō, ikar loe juon ikdeelel ippan aolep ilo laļin n̄an jeļā ekōjkan karuwaineneik im kile unoojdikdik ko an Jetōb Kwojarjar. Unoojdikdik ko an Jetōb rej an juon make im rej itok ilo wāween ko reoktak. Ijoke, kōj jej jeraam̧m̧an bwe naan ko an rikanaan, jimor jān etto im ro raan kein, rej letok melele ko raorōk kōn wāween bōk tōl jān Jetōb.
N̄ain lewaj emen pedped in tōl me remaron̄ jipan̄ eok n̄an karuwaineneik im kile unoojdikik ko an Jetōb.
Jutak ilo Jikin ko Rekwojarjar
Moktata ej jutak ilo ijoko rekwojarjar.6 Ej kab m̧ōj aō bōk koņaaō ilo kōpeļļo̧k eo an Tokyo Japan Tampeļ. N̄an uwaake kūr ko reļļap kar jilkinļo̧k n̄an mitia im rilo̧tok ro raorōk ekar ļapļo̧k jān kōtmene. Bukwi rekar kobatok ilo tōl in kalojooj ko an tampeļ. Aibojooj an tampeļ eo eaar un̄ur rilotok ro, ekoba jon̄o̧k ko rej ekkeijel ilo m̧anit ko an Rijapan ro. Menin bwilōn̄ bōtaap kautiej ekar itok jān rilotok ro ke kain̄i ko jān etto kar kōmelele kaki ilo ruum̧ ko me renaaj kar waļo̧k ie. Bōtaap men ko rej un̄ūr bōro ej an Jetōb em̧m̧akūt.
Juon iien rōt in ippān juon iaan rijerbal ko an kien eddāp ilo ļōm̧ņak e aō. Ālkin juon iien lur ilo celestial room eo, ilo en̄jake im un̄ur em̧wilaļ, ļein ekar enoojdikdik ilo lojiln̄u, “Bar kōto in ij menonoiki loan ruum̧ in āinwōt eoktak.” Ikar kile bwe ļein ekar kajjieon̄ kōmļeļeik an Jetōb Kwojarjar pād, eo, emool, ej pād ilo jikin ko rekwojarjar. N̄e kwoj kōjatdikdik in en̄jake Jetōb, pād ilo ijoko epidodo an Jetōb pād ie.
Tampeļ im m̧oko m̧ōd rej ijoke rekwojarjar tata. Ilo er epidodo aer kūr im kile Jetōb eo. Bar jet jikin rekwojarjar ekoba m̧ōn jar ko, ekkal ko an jemenere im institute, jikin ko an bwebwebnato in Kabun̄ im visitor center ko. Jutak ijoko rekwojarjar.
Jutak ippān Armij ro Rekwojarjar
Kein karuo, jutak ippān armij ro rekwojarjar. Inaaj kōmeleleik pedped in tōl eo kein karuo kōn juon emeemļo̧kjen.
Ijjamin meļo̧kļo̧k bōk koņaō ilo juon nukwon kar kōm̧m̧ane ilo juon jikin ikkure eļap. Ekutkut an jikin ikkure in obrak kōn ro rej kan̄in̄i n̄an tiim ko an bukwon ko aer im bōlen bar kan̄iik rijum̧ae ro. Ak bon̄in eo, mejatoto eo eaar oktak. Jikin ikkure eo eaar obrak kōn taujin rum̧m̧an ded kar kobatok n̄an kautiej im kakeememeje mour eo an Rikanaan Josep Smith. Buruon aer kautiej, to̧ņ in aer unoojdikdik; kam̧m̧oolol; im jar ekobrak jikin ikkure eo kōn Jetōb Kwojarjar. Ikar lukkun lo ilo mejāer. Ekar jerbal Jetōb Kwojarjar eo, kamool kōn naan in kamool ko kar kwaļo̧ki kōn Josep Smith im Jepļaaktok eo an gospel in.
Jetōb eban jako jān aindoon ko an armij ro rekwojarjar. N̄e kwoj kōjatdikdik in en̄jake Jetōb, pād ippan armij ro me rej Jetōb emaron̄ epidodo an pād ippāer. Rilo̧mo̧o̧r eaar ba endein: “Bwe ijo ruo ak jilu rej kweilọklọk ilo Eta, Ij pād eoḷōpaer.”7 N̄an rum̧m̧an ded ro, ļōm̧ņak kōn am aintok armij kwojarjar, doulul im kūlaaj ko, FSY im jemenere, m̧akūtkūt ko an—ward im stake, im jar in al an ward. Kāālet n̄an pād ippan armij im etal n̄an ijoko me epād ie jim̧we. Pukōt kajoor eo am̧ ilo namba. Pukōt ro m̧ōttam̧ rem̧m̧an. Erom̧ juon eo em̧m̧an n̄an m̧ōttan. Jipan̄ doon ijoko kwoj pād ie. Jutak ippān amrij ro rekwojarjar.
Kamool kōn Mook ko Rekwojarjar
Kein kajilu, ikutkut am kamool kōn mool ko rekwojarjar. Rikaenōm̧m̧an eo aolep iien an kwaļo̧k Ainikien n̄e jej kamool kōn ainikied. Jetōb ej kwaļo̧k kamool n̄an rikōnono eo im eo ej ron̄jake barāinwōt.
Ij keememej iaar etal ilo juon taxi n̄an New York City 45 minit aetokin. Kar kōm̧m̧ao ippān rittōr eo kōn gospel iumin iien eo ej uweļo̧k n̄an airport, ikar kōļļaik liin im tōn to jān taxi eo. Innem ikar kile ke ijjan̄in kar kwaļo̧k aō naan in kam̧ool kōn ta eo ikar jeere. Ikar bōjrak, ikar kwaļo̧k jidik aō naan in kamool, kar karuwaineneik Jetōb, im boktok kemjaļaaļ n̄an mejam̧ro jimor.
Ilo am̧ kappukōt iien em̧m̧an kein n̄an kwāļo̧k am̧ naan in kamool ippan ro jet, kwoj ejaaki iien ko n̄an kile Jetōb ippam make.
Ron̄jake Jetōb Kwojarjar
Pedped eo āliktata ej n̄an lukkuun ron̄jake Jetōb Kwojarjar. Emaron̄ juon ad companion aolep iien, bōtaab E ej kōnono ilo ainikien unoojdikdik im ittino. Rikanaan eo Elijah eaar lo bwe ainikien Irooj eaar jab ilo kōto, m̧akutkut in lan̄ ak kijeek ak ilo “juon ainikien e dik im e mera.”8 Ejjab “juon ainikien jourur” bōtaap “juon aainikien emera in lur eweeppān, āinwōt n̄e eaar juon unoojdikdik,” ijoke emaron̄ “kabijļo̧k em̧ool n̄an lukkuun bōro.”9
Būreejtōn Boyd K. Packer ekar ba: “Jetōb ejjab kūr kōj ilo an lam̧ōj ak kōm̧akutkut kōj kōn pā eddo. Ijelo̧kin, ej unoojdikdk. Ej eoeoik ilo mera ke n̄e jej m̧ad, jemaron̄ jab en̄jake.”10 Ikar lale jet jet iien Ainikien edu, ak im̧ad, ke juon eo ij iakwe ej loe n̄an n̄a. Elōn̄ iien unoojdikdik ko an Jetōb Kwojajar rej itok n̄an n̄a jān lio pāleō, Lesa. Pāren im ritōl ro rejim̧we remaron̄ bar bōk tōl ko reim̧we n̄an eok.
Kōwaron̄ron̄ ko, kōkeroro, im iakwaleel ko ekkā ilo laļ in remaron̄ anjo jān im̧we ko relur an Jetōb. Pukōt juon jikin elur, juon jikin ekwojarjar me komaron̄ bōk tōl jān Jetōb.
Jet Naan in Kakkōl
Ilo am̧ ļōm̧ņak kōn pedped kein n̄an karuwaineneik im kile Jetōb, ļōm̧ņan kōn naan in kakkōl kein.11
Kamool imwe in jetōb ko am̧. N̄an waanjon̄ak, im̧we ko jān Jetōb rej jokkin wōt juon ippan jeje ko rekwojarjar im katak ko an rikanaan ro remour.
Lukkun jeļā bwe en̄jake ko kwoj boke rej kobaļo̧k ippān jerbal eo am̧. N̄an n̄e kar kūr eok kōn maron̄ eo ekkar, im̧we ko jān Jetōb rejjab liwaj bwe kwon kapilōk im kajjim̧we ro jet.
Jab maron̄ booji men ko an Jetōb. Komaro̧n̄ kadekļo̧k juon m̧wil im peļaak eo ej karuwaineneik Jetōb, im komaron̄ kepooj eok make, bōtaap kwojjab maron̄ booje wāween ak n̄eet im̧we ko rej itok. Kijenmij im lōke bwe konaaj boke ta eo kwoj aikuji ilo iien eo ejim̧we.
Kōjerbale ekajet eo am̧ make. Jet iien jekonan bōl tōl an Jetōb ilo aolep men. Ijoke, ekutkut an Irooj kōnaan bwe jen kōjerbal jeļāļo̧kjen eo an letok in Anij im em̧akut ilo wāween ko me rekoba ilo meļeļe eo ad em̧m̧antata. Būreejtōn Dallin H. Oaks ekar katakin:
“Juon ikdeleel n̄an tōl jān Irooj ej juon kajoor, ak ej aikuj itok ippān tok jeļā eo bwe Jemedwōj Ilan̄ ej kōjekdoon elōn̄ jokālet ko kōn wōt jokālet ko ad make. … Armej ro me rej kajjieon̄ leļo̧k aolep jokālet n̄an Irooj im akweļap kōn revelesōn ilo aolep kālet ejjab to enaaj lo jekjek ko me rej jar n̄an bōk tōl im rejjab bōke. …
Jej aikuj ekkatak men ko ilo ļōm̧ņak ko ad. … Innem jej aikuj jar n̄an bōk tōl im jerbal ekkar n̄an e eļan̄n̄e jej bōke. … Eļan̄n̄e jej jab bōk tōl, jej aikuj m̧akūtkūt ekkar n̄an jokālet eo ad rejjejet.”12
Jem̧ļo̧kin ippān juon Kūr
N̄an kōjemļo̧ke, Armij ro Rekwojarjar Raan ko Eliktata rej armij in kōjpārok bujen. Ijoke, ej pād wōt bwe kajjojo iaan en kappukōt n̄an jerbale mennin letok ko an ilo jetōb innem karuwainene im ekkatak kile unoojdikdik ko an Jetōb. Emen pedped in tōl ko n̄an jipan̄ kōj ilo kōttōpar ko an ilo Jetōb rej:
-
Jutak ilo jikin ko rekwojarjar.
-
Jutak ippān amrij ro rekwojarjar.
-
Kamool kōn Mool ko Rekwojarjar.
-
Ron̄jake Jetōb Kwojarjar.
Maron̄ eo am̧ n̄an karuwaieneik im kile unoojdikdik ko an Jetōb renaaj eddōkļo̧k juon bun̄ten ilo juon iien. “Kileļo̧k kajin eo an Jetōb ej āinwōt ekkatak juon bar kajin. Ej juon jekjek eo ej jidik kōn jidik me ebōk kijetoto eo etiljek im kijenmij.”13
Rooļļo̧k n̄an ijo jaar ijjino ie, jouj im keememej bwe āinwōt juon iaan Armij ro Rekwojarjar kwoj jeraam̧m̧an Pijaik Jabōt in jitlo̧k in kar komeleleik eō kake. Juon ajri edik, ej jutak ilo jikin uwe, idik ad loe ilo jikin kōnaan eo. Jemen ej jutak turin im leļo̧k kōkajoor im jipan̄e ilo an unoojdikdik n̄an lojiln̄in ke ledrik in ej m̧ōņōņō ilo an kwaļo̧k, “N̄a juon nejin Anij.”
Naan in kamool eo tok juon ej itok jān juon rum̧m̧an ded eo ej jino kōn ikumkum: “Iakwe bwe en kar wōr juon eo ej unoojdikdik n̄an n̄a rōt eo.” Innem liin ekar wōr an imwe im kamool, Ewōr juon en unooojdikdik n̄a lojiln̄ū—Jetōb Kwojarjar!”
Ij kilōke kōn juon kūr eo an eļaptata n̄an aolep jodikdik! Elōn̄ iaami komij ijjino raan ko ami ilo ami jutak imaan juon kūlaaj. Ilju, wiik in, iiō in, aolep iien, bōjrak ilo am̧ kalimjōk eok make ilo kūlaaj. Ļōm̧ņak ippam make, ak ba ilo ainiken eļaaj n̄e koknaan, “Wow, lale n̄a! Ikabwilōn̄lōn̄! N̄a nejin Anij! Ejeļā kajjeō! Ej iakwe eō! Ijeram̧m̧an—jeraam̧m̧an kōn Jetōb Kwojarjar āinwōt juon aō companino!”
Ij kobaik naan in kamool eo aō n̄an kom, Armij ro Rekwojarjar rejeraam̧m̧an, an Anij eo Jemad, Jisōs Kraist, im Jetōb Kwojarjar, eo ej kamool kōn Er. Ilo etan Jisōs Kraist, amen.