Kwaļo̧k Kam̧ool kōn Jisōs Kraist ilo Naan im ilo Kōm̧m̧an
Ilo ad kajjeon̄ n̄an mour mour ko ad ilo jokne ippān gospel eo an Jisōs Kraist, m̧wilid enaaj juon kam̧ool emour kōn ad Ripinmuur.
Ilo iien peptaij juon iaan kallim̧ur ko me jej kōm̧m̧ane ej bwe jenaaj m̧ōņōņō in bōk iood etan Jisōs Kraist. Jibadbad eo aō rainin ej n̄an kakeememej kōj bwe jemaron̄ kwaļok n̄an Anij bwe jej bōk Etan Nejin iood make ilo ad kwaļok kam̧ool ilo naan im ilo kōm̧m̧an, emakijkij in wōt ad maron̄, bwe Jisōs ej RiKraist eo.
Ke kar jerbal in karejar im katakin armej ro ilo Amedka kaņ ālkin Jerkakpeje eo An, Rilo̧mo̧o̧r ekar ba:
“Raar jab kōnono ke jān jeje ko rekwojarjar, ko rej ba kom̧ij aikuj bōk ioomi etan Kraist, eo ej Eta? Bwe jān āt in naaj kūr kom̧ ilo raan eo āliktata;
“Im jabdewōt eo ej bōk ioon Eta, im niknik n̄an jem̧ļo̧kin, ejja in wōt naaj mour ilo raan eo āliktata.”1
Būreejtōn Russell M. Nelson ekar katakin kōj bwe “Bōk etan Rilo̧mo̧o̧r eo iood ekitbuuj kwaļo̧k im kam̧ool n̄an ro jet—jān m̧akūtkūt ko ad im naan ko ad—bwe Jisōs ej RiKraist eo.”2
Āinwōt ro uwaan Kabun̄ eo an Jisōs Kraist im Armej ro Rekwojarjar ilo Raan ko Āliktata, ewōr ipped kōjeram̧m̧an eo im maron̄ eo n̄an jutak āinwōt rikam̧ool ro an Anij im Etan aolep jikin jej ped ie.3 Ilo ad kajjeon̄ n̄an mour mour ko ad ilo jokne ippān gospel eo an Jisōs Kraist, m̧wilid enaaj juon kam̧ool emour kōn ad Rilo̧mo̧o̧r im Etan. Eļapļo̧k, jenaaj rikam̧ool ro an Kraist ilo naan ilo ad kwaļo̧k ippān ro jet ta eo jej tōmak, en̄jake, ak jeļā kōn Jisōs Kraist.
N̄e jej ettā ilo ad kwaļok naan in kam̧ool eo ad kōn Irooj ilo naan ko ad im kōm̧m̧an ko ad, Jetōb Kwojarjar ej kalikkar4 n̄an ro ewōr ippāer lukkuun kōttōpar, bōro em̧ool, im ļōmņak em̧ōņōņō bwe Jisōs ej lukuun ilo m̧ool RiKraist eo.5
Ikōņaan kwaļok ruo waanjon̄o̧k ko rekāāl im reim̧we kōn membōr ro rej kwaļok n̄an Anij bwe rej bōk etan Jisōs Kraist iooer make ilo aer ekōnono kake E im kwaļok kam̧ool erreo kōn Irooj ilo kweilo̧k ko an Kabun̄ in.
Waanjon̄o̧k eo m̧oktata: Ke kōrā eo pāleeō, Elaine, kom̧ro ekar etal n̄an Spain ilo 2022, kom̧ro ekar kobaļo̧k ilo kweilo̧k ko ilo Jabōt ilo juon kurup edik an Kabun̄ in ijo. Ilo aō kar jijōt ilo ijo im̧aan im kōrā eo ippa ej jijet ippen rijar ro, ikar kile bwe ekar jijōt tūrin juon leļļap. Ke ekar jem̧ļo̧k kweilo̧k in kwojkwoj eo, ikar etetalļo̧k n̄an ippān Elaine im kajjitōk ippān n̄an kwaļo̧k kajjieō n̄an eo m̧ōttan. Ekar kwaļo̧k kajjeeō im kwaļok ke kōrā in, eo ekar jab membōr in Kabun̄ in, enan̄in ruo de iiō in an lotok Kabun̄ in. Ke ikar ron̄ men eo, ikar kajjitōk ippen kōrā in me ej kauteej Anij ta eo ekar kōm̧m̧an bwe en bar ro̧o̧ltok im kobatok ilo kweilo̧k ko ilo juon iien aitok kitien. Kōrā eo ekar m̧ōņōņō ilo an uwaak, “Em̧m̧an ippa itok n̄an ijin kōnke kom̧wij ekōnono kōn Jisōs Kraist ilo kweilo̧k ko ami.”
Ealikkar, ro uwaan Kabun̄ in ilo kurup eo ilo Spain rej ekōnono, katakin, im kam̧ool kōn Jisōs Kraist ilo kweilo̧k ko aer.
Waanjon̄o̧k eo kein karuo: Ālkin jerbal ilo Brazil Area, ikar bōk juon kūr ekāāl n̄an jerbal ilo headquarter ko an Kabun̄ in. Ke ikar em̧m̧akūtļo̧k n̄an Salt Lake City ilo jem̧ļo̧kin Juļae ilo iiō in, kōm ekar ped ilo iien jar ko ilo Jabōt ilo ward eo am ekāāl im em̧m̧an. Juon iaan kweilo̧k ko ekar jabōt in jitlo̧k im kwaļo̧k naan in kam̧ool. Ālkin bōk kwojkwoj eo ilo kauteej, membōr ro rekar jutak im kwaļok naan in kam̧ool ko aer kōn Rilo̧mo̧o̧r juon ilo̧k juon. Kweilo̧k eo ekar pedped ioon Jisōs Kraist, im ealikkar ad kar en̄jake Jetōb. Kar lin̄ūr kōm, im tōmak eo amim ekar kajoorļo̧k. Eļan̄n̄e ro m̧ōttad ilo Kabun̄ in, rej m̧ool ilo aer kappukot, renkar ped ilo kweilo̧k eo, renkar kile bwe en̄in ej Kabun̄ eo an Jisōs Kraist.
Ej juon kōjeram̧m̧an n̄an loe bwe kweilo̧k ko an Kabun̄ in rej iien ko rem̧m̧an n̄an kāālet n̄an kam̧ool kōn Kraist im kwaļo̧k n̄an Anij bwe jej bōk Etan Nejin iood make ilo m̧ōņōņō.
Kiiō, kōtļo̧k bwe in kwaļok juon waanjon̄o̧k ekajoor kōn bōk iood etan Jisōs Kraist ilo ad kwaļo̧k kam̧ool kōn E ilo kōm̧m̧an ko ad.
Okwoj eo ļo̧k, ikar etal ippānļo̧k Elder Jonathan S. Schmitt n̄an kōppeļo̧k eo an Feather River California Tampeļ ilo Yuba City. Ijo ikar bōk jeram̧m̧an eo n̄an tōl kurup ko ilo iien alooje tampeļ eo. Juon iaan kurup ko ewōr ie juon membōr in Kabun̄ in, Virgil Atkinson, im jiljilimjuon m̧ōttan jān bar jet tōmak. Tūrinļo̧k jem̧ļo̧kin iien loļo̧k eo, ilo juon ruum̧ in liāp ilo tampeļ eo, Brother Atkinson ekar im̧we ilo an kar kwaļo̧k iakwe eo an n̄an ro m̧ōttan ro rekar itok n̄an tampeļ eo raan eo. Elukkun m̧ōkaj ālkin an dedeļo̧k an kwaļok, juon kōrā ilo kurup eo ekar jutak im ba, “Kōmij aolep iakwe Virgil. Ejjan̄in kar booje kōm kōn tōmak eo an. Bōtaab ejjab jook kake barāinwōt. Ej mour wōt kōn ta eo ej tōmak.”
Ilo iiō ko, wāween an Brother Atkinson mour āinwōt Kraist ekar jerbal āinwōt juon naan in kam̧ool ekajoor n̄an ro m̧ōttan. Waanjon̄o̧k eo an ekar juon kam̧ool ekajoor bwe ekar bōk ioon make etan Kraist.
N̄an kajem̧ļo̧ke, kōtļo̧k bwe in kwaļok juon katak ikar ekkatak kōn wāween bōk iood etan Kraist im kam̧ool kōn E ilo ad kōjerbal et eo ejim̧we etan Kabun̄ in.
Būreejtōn Nelson, rikanaan eo emour an Anij, ilo juon katak ilo kweilo̧k eo eļap ilo 2018 we in Etan Kabun̄ in,” ekar ba: “Ej juon kajim̧we. E ej kean̄ eo an Irooj. Josep Smith ekar jab ņaetan Kabun̄ in ekar jepļaaktok jān e, barāinwōt Mormon. Rilo̧mo̧o̧r eo Make eo ekar ba, ‘Bwe āindein naaj etan Kabun̄ eo Aō ilo raan ko āliktata, em̧ool Kabun̄ eo an Jisōs Kraist im Armej ro Rekwojarjar ilo Raan Ko Āliktata’ [Katak im Bujen Ko 115:4].”6
Kōm ekar aolep jepļaak jān kweilo̧k eo eļap raan eo pojak im peran n̄an ļoor rikanaan eo im n̄an kwaļo̧k etan Kabun̄ in kiiō m̧aanļo̧k. Ikar lukkuun lale eō make bwe in kōjerbal et eo ejim̧we etan Kabun̄ in. Iien ko jinoin m̧oktata, ikar lukkuun kōkm̧anm̧an im jab kōtļo̧k aō bar ro̧o̧l n̄an m̧okta. Ālkin kajjeon̄ ko m̧oktata, ikar en̄jake aō koņ ilo kōjerbal et eo em̧ōj kwaļo̧k etan Kabun̄ in. Ij kwaļok m̧ool bwe elōn̄ katten, ikōn ekairir aō ba etan Kabun̄ in. Ikar inepata bwe armej reban kar lukkuun ļōmņake likio in etan Kabun̄ in im bwe remaron̄ ļōmņak bwe aitok.
Ijowōtke, ikar kile tokālik bwe ba etan likio in etan Kabun̄ in kōn iktōltōl em̧ool ekar letok n̄an eō iien ko rem̧m̧an raorōk n̄an ekōnono kōn etan Jisōs Kraist im ilo m̧ool kwaļok naan in kam̧ool kōn Rilo̧mo̧o̧r ilo ad kwaļo̧k Etan ilo etan Kabun̄ eo An. Ikar barāinwōt kile bwe n̄e ij ba et eo ejim̧we etan Kabun̄ in ippān ro jet, eļapļo̧k an ikutkutļo̧k aō kemeemej Jisōs Kraist im en̄jake im̧we eo An ilo mour eo aō.
Jān ļoor rikanaan eo, jemaron̄ aolep ekkatak n̄an kam̧ool eļapļo̧k kōn Jisōs Kraist ilo ad kōjerbale et eo ejim̧we etan Kabun̄ in, innem kōļapļo̧k ad bōk iood etan Irooj.
Jibbon̄nin Jabōt in, ij m̧ōņōņō in kam̧ool bwe Būreejtōn Nelson ej rikanaan eo an Anij emour im bwe Kabun̄ eo an Jisōs Kraist im Armej ro Rekwojarjar ilo Raan ko Āliktata ej Kabun̄ eo an Kraist em̧ōj an jepļaaktok. Ij kam̧ool kōn Nejin Anij im An kwojarjar. E ej Maanje Nejin Anij, im Nejin Jitōnbōro Emake Wōt, ad Rilo̧mo̧o̧r im Ripinmuur, Emmanuel eo.7 Ilo etan Jisōs Kraist, amen.