2023
Anij Ejeļā im Ej Iakwe Eok
Nobōm̧ba 2023
12:36

Anij Ejeļā im Ej Iakwe Eok

Elder Alan T. Phillips

Jān Jiljilimjuonn̄oul eo

Karōk in m̧ōņōņō eo an Anij ej kōn kwe. Kwoj ajri eo nejin eaorōk im eļap tokjen.

Jiljino iiō remootļo̧k baam̧le eo am eaar jam̧bo ioon juon highway ilo bon̄ ijo inabōj in jikin kweilo̧k Oxford. Āinwōt kijon̄ waļo̧k n̄an ajri ro reddik, kōmij aikuj bōjrak, kōm kar lo juon m̧ōn ettein̄ kiaj ippān elōn̄ kain m̧ōn wia ko im m̧ōn m̧ōn̄ā ko. Kōn an jejjet, kōm ekar kōkmanman am diwōj jen wa eo, loļo̧k jikin jipan̄, im kar kattar ijen, bar jino iaļ eo am.

Jon̄oul ļalem minit tokālik ļaddik eo nejum̧ erūttotata ekar kajjitōk juon kajjitōk emman: “Ewi Jasper?” Jasper ej iien otemjej jijjet ippān make likin wōt wa eo. Kōm ar ļōmņak ekar mejur akō kitileek akō ikkure in m̧oņ e kōm.

Ke Jasper ej lukkuun in etale ļo̧kan wa eo, kōmij loe bwe laddik eo nejim ļale-iiō rūttoon eaar jako. Būruwōm wōj rekar lukkuun obrak kōn inepata. Ke kōmij ro̧o̧l ļo̧k kōn wa eo n̄an m̧ōn ettein̄ kiaj eo, kōm eaar kajjitōk ippān Jemedwōj Ilan̄ oņake Jasper. Kōm ekar kōjjeļā bwilijmāān im karon̄ er kōn jekjek eo ear waļo̧k.

Ke kōmij jikrōk, emootļo̧k 40 minit, kōmij loe ruo waan bwilijmāān ilo jikin paak eo an wa, tōma ko an rej kabōlbōl. Ilowan juon iaer epād Jasper, ej ikkure kōn batin. Ij jamin nej meļo̧kļo̧k lan̄lōn̄ eo kōm ekar en̄jake āinwōt bar koba ippān

Elōn̄ wāween katak ko ilo būrabōļ an Rilo̧mo̧o̧r eo rej kōn aiintok, bar kōrool, ak wōnmaanļo̧k im kapukōt ta eo eaar ajjeeded ak jako. Ilubwiljin men kein rej būrabōļ eo an sip eo ejebwābwe, jāān eo ejako, im likao e ejerwaan.1

Kōn wōt iien in im ekar waļo̧k n̄an Jasper pād ilo ļōmņak e aō ilo iiō ko maantak, Ikar kōļmānļo̧kjeņ kōn kwojarjar in kadkad eo im aorōk in ajri ro nejin Anij, kajoor in pinmuur eo an Jisōs Kraist, im iakwe eweepān juon Jemed ilo Lan̄, eo ejeļā kwe im n̄a. Ij kōjātdikdik in kwaļo̧k kam̧ool kōn m̧ool kein rainin.

I. Ajri ro Nejin Anij

Mour in epen. Elōn̄ armej rej ebbweer, ajimakeke, ettoļo̧k, ak m̧ōk. N̄e men ko reppen, jemaron̄ en̄jaake ad jebwābwe ak makunļo̧k. Jen jeļā bwe jej aolep ajri ro nejin Anij im membōr in baam̧le eo An indeeo eo enaaj kōjepļaak tok juon en̄jaake in wōjān im kōttōpar.2

Būreejtōn M. Russell Ballard ekar kwaļo̧k: “Ewōr juon kadkad eaorōk jej aolep kwaļo̧k kiiō im n̄an indeeo. … En̄in ej bwe iien otemjej kwoj juon ļaddik ak leddik nejin Anij.… Meļeļe m̧ool in—lukkuun meļeļe menin im kaorōke—ej ukōt-mour.”3

En jab pok am̧ meļeļe ak jab kaorōk aorōk eo am̧ ippān Jememi Ilan̄. Kwar jab jidiklo̧k im waļo̧k tok ilo menin kōmanman, jen ro raar ejaake laļ in, kōmanman armej ilo ialan iien ko aer. Ijo ewōr kōmman, ijo ewōr rikōmanman ie.

Mour in ewōr jabdewōt meļeļe in im an jibadbad. Jeplaaktok in ej wōnm̧aanļo̧k wōt kōn gospel eo an Jisōs Kraist, ej bōktok meram im meļeļe kōn wōt kadkad eo am ekwojarjar. Kwoj juon ajri eaorōk im jitōnbōro nejin Jemedwōj Ilan̄. Kwoj juon eo ej menin kōnono eaorōk ilo būrabōļ ko im katak ko. Anij ej lukkuun iakwe eok jon̄an Ekar jilkintok eo Nejin n̄an kemour, lo̧mo̧o̧ren, im pinmuur kōn kwe.4

Jisōs Kraist ekar kile paotok eo ekwojarjar im aorōk indeeo eo an kajjojo armej.5 Ekar kōmeļeļeik ruo kien ko n̄an iakwe Anij im iakwe ro rituriid rej unjen aolep kien ko an Anij.6 Juon iaan eddo ko ad rekwojarjar ej n̄an kea kōn aikuj ko an ro jet.7 Ej en̄in etke āinwōt rikaļo̧o̧r ro an Jisōs Kraist jej “ineek eddo ko an ro jet, … jān ippān ro rej jān …, im kaenōm̧m̧an ro rej pād ilo aikuj in aenōm̧m̧an.”8

Kabun̄ ejjab jemjerā eo wōt ad ippān Anij; ej bareinwōt kōn kadkad ko ad ippān doon. Elder Jeffrey R. Holland ekar kōmeļeļeik bwe naan eo kajin In̄lij kabun̄ ej itok jen Latin religare, meļeļein “n̄an likwōje” ak, lukkuun, “n̄an bar likwōje.” Āindein, “m̧ool in kabun̄ ej korak eo ej likwōje kōj n̄an Anij im n̄an ro jet.”9

Ewi wāween ad kōm̧m̧an n̄an doon elukkuun aorōk. Būreejtōn Russell M. Nelson ej katakin, “ealikkar ennaan eo an Rilo̧mo̧o̧r: rikaļoor ro An rem̧ool rej kalōk, kotak, kōketak, kareel, im im̧we.”10 Menin ebareinwōt aorōk n̄e ro mōttar rej itoitak rej jebwābwe, ajimakeke, kowaane er, ak kōmakūt.

Jej jab aikuj in kapukōt ettoļo̧k n̄an pukōt armej ro rej en̄taan. Jej maron̄ bar jinoe jen ad jipan̄ juon armej ilo baam̧le eo ad make, ilo mon jar, ak ilo jukjukinpād eo kwoj jokwe ie. Jej maron̄ bareinwōt kapukōt n̄an jipan̄ en̄taan eo an 700 milien armej rej jokwe ilo lukkuun jerata11 ak 100 milien armej ro im rej kipel er tok jen kaje, aetwerōk, im irre.12 Jisōs Kraist ej waanjon̄ak eo eweepān in tōarōke ro rej pād ilo aikuj—ro rej kwōle, ro ruwaemejet, ro rinan̄inmej, ro rejerata, ro rej kalibuuj. Jerbal eo An ej jerbal eo ad.

Elder Gerritt W. Gong ej katakin bwe “iaļ eo ad n̄an Anij emakijkij loe ippān doon.”13 Āinwōt, ward ko ad aikuj in juon jikin kone n̄an aolep ro nejin Anij. Jej ke pād wōt im mōj ilo ad etal n̄an jar ke jej emourur im kōmman jukjukinpād ko me kōtōpar ko ie ej n̄an kabun̄ jar, kememej Kraist, im jerbal in karejar n̄an doon?14 Jej maron̄ ron̄jake kapilōk eo an Būreejtōn Nelson n̄an kadik ļo̧k ekajet, kaļapļo̧k iakwe, im leļo̧k iakwe eo erreo an Jisōs Kraist ilo naan in jerbal ko ad.15

II. Kajoor in Lo̧mo̧o̧r an Jisōs Kraist

Pinmuur eo an Jisōs Kraist ej juon kwaļo̧k eo eļap kōn iakwe eo an Jemed Ilan̄ n̄an ro nejin.16 Naan eo pinmuur ej kōmeļeļeiki (ruo jenolo̧k) men ko rej koba ippān doon ilo juon kōn ro im rekar kōttoļo̧k er ak kōjenolo̧k.

Mijen eo an adwōj Rilo̧mo̧o̧r ej n̄an letok jimor juon wāween n̄an bar jepļaakļo̧k n̄an ippān Jemedwōj Ilan̄ im kakkūje ilo iaļ in. Rilo̧mo̧o̧r eo ejeļā kōn An jeļā wāween n̄an jipan̄ kōj ilo apan̄ ko an mour.17 Jab kōmman bōd: Kraist ej ad rilo̧mo̧o̧r im ej aō rikōmour ilo jetōb.

Ilo ad kōjerbal tōmak, E ej jipan̄ kōj iuun maanļo̧k ilo iien ko reppen. Ej wōnm̧aanļo̧k wōt n̄an letok An iakwe im turiamo im karuwainene.

‟Koṃwin itok ñan Ippa, koṃ otemjej rej jerbal im ban, im Inaaj kakkijeik koṃ.

‟Bōk Aō ine, im katak Ippa; … im kom̧ naaj lo ami kakkije.”18

Juon bwebwenato ekadu im em̧wilaļ kōn eo e kajoor. Ke Būreejtōn Howard W. Hunter ekar kōmeļeļeik: “Ine in ear juon kein jerbal … eo bōktok kajoor in menin eo kein karuo bwe en ekkeijel im pea ippen kijejeto an juon menin mour, jeere im kadikļo̧k [jerbal in eddo eo an jerbal in pā]. Juon dedo eo eļap ak bōlen jab maron̄e n̄an an juon tin kotake emaron̄ in bwe im emman n̄e ruo rej ippen doon im kotake kon juon wōt ine.”19

Būreejtōn Russell M. Nelson ekar katakin: “Kom̧win itok n̄an Kraist koba Ippān im ippān kajoor eo An, bwe kom̧win jab bwilli eddo eo an mour make. Ami bwilli eddo eo an mour ippān Rilo̧mo̧o̧r im Ripinmuur eo an laļin.”20

Ewi wāween ad koba ak likwōj kōj make n̄an ippān Rilo̧mo̧o̧r eo? Elder David A. Bednar ekar kōmeļeļeiki:

“Kōm̧m̧an im kōjparok bujen ko rekwojarjar rej kakobaik kōj n̄an im likoj kōj ippān Irooj Jisōs Kraist. Ilo jinoin, Rilo̧mo̧o̧r ej kajjitōkin kōj n̄an pedped ioon im dāpdep wōt ilo E. …

“Kōj jejjab im jejjamin aikuj make iaad.”21

N̄an jabdewōt eo ej eddodo, jabwābwe, pok: Kwojjab makeļo̧k iam̧ ilo menin.22 Kōn Pinmuur eo an Jisōs Kraist im kain̄i ko An, kwomaron̄ in koba ak popo n̄an Ippān. E enaaj iakwe im lewaj kajoor im kemour eok n̄an jelmae ial in imaan. E eo ej jikin ko jen ļan̄ ko.23

III. Iakwe eo An Jemedwōj Ilan̄

N̄an kam̧oole, Jasper e emālōtlōt, jeļā kea, ekapeel, im kolab. Ijoke m̧ōttan eo eaorōktata ilo bwebwenato in ej nejū Ļein ej nejū, im eļap aō iakwe e eļap jen an naaj jeļā. Eļan̄n̄e juon ejjab weepān, jemān ilo mour in ej en̄jake wāween in kōn ajri eo nejin, kwomaron̄ ke ļōmņak wāween an juon eo eweepān, eaiboojoj, āinwōt Jemedwōj Ilan̄ eo ej kea kake eok?

Ro jera raorōk ilo diktak in epepen in, Epepen Z im Epepen Jinoin: Jouj keememej bwe tōmak ebōk jerbal.24 Jej mour ilo juon tōre n̄e, elōn̄ wōt ro rej “loe im tōmak.” Tōmak emaron̄ in menin idajon̄jon̄ im nej aikuj jokālet ko. Ijoke jar ko rej uwaak.25 Uwaak ko emaron̄ ilo en̄jake.26 Jet iaan m̧ool in men ko ilo mour in jej jab maron̄ loi; jej en̄jaki, jeļā, im ekatak. Rebar m̧ool.

Jisōs Kraist ej kōņaan bwe kwon jelā im bōk juon jemjerā ippān Jemami Ilan̄.27 E ekar katakin, “Wōn ilubwijimi, ear wōr juon nejin ļaddik, e jutak nabōj ba, Jema, kōppeļļo̧k im̧wiin m̧ōm bwe In maron̄ deļo̧n̄ im kejota ippam, ban ba, Itok im deļo̧n̄ nejū; bwe ijo aō, ijo am ej aō?”28 Kwomaron̄ ke ļōmņak kōn juon men eo ej am wōt, iakwe nememein Anij eo Jemān Indeeo?

Kwe eo Nejin. Elan̄n̄e kwoj en̄jaake am jebwābwe, n̄e ewōr am kajitōk ak aikuj māletlet, n̄e kwoj kakkōt kōn ta ko rej waļo̧k ak kakkōt kōn pedpedin katak ko rejjab jokun wōt juon, oktak n̄an E. Jar n̄an E kōn aenōmman, iakwe, uwaak, im tōl. Jabdewōt aikuj eo im jekdoon kwoj pād ia, leļo̧k aolepān būruwōm̧ n̄an Jemedwōj Ilan̄. N̄an juon, kwomaron̄ kōņaan ļoor karuwainene eo an Būreejtōn Nelson im “kajjitōk “eļan̄n̄e E ej lukkuun pād ijeņ—eļan̄n̄e Ejeļā kajjeem̧. Kajjitōk Ippān ewi wāween an en̄jake kōn eok. Innām ron̄jake.”29

Ro jeiū im jatū rejitenbōro:

  • Jeļā kajjien Jememi Ilan̄. E eweepān im iakwe.

  • Jeļā wōn eo Jisōs Kraist.30 E ej ad Rilo̧mo̧o̧r im Ripinmuur. Likwōje eok make im ro kwoj iakwe er n̄an E.

  • Im ejeļā wōn kwe. Eeļā kōn kadkad eo am em̧ool ekwojarjar. Karōk in m̧ōņōņō eo an Anij ej kōn kwe. Kwoj ajri eo nejin eaorōk im eļap tokjen. Ejeļā wōn kwe im ej iakwe kwe.

Kōn m̧ool kein raalikar ijoke rej pedped in m̧ool ko ij kam̧ool ilo etan Jisōs Kraist, amen.

Kakeememej ko

  1. Lale Luk 15:4–32.

  2. Lale Kwaļo̧k Gospel Aō: Juon Unin Tōl n̄an Kajeeded Gospel eo an Jisōs Kraist (2023), 1.

  3. M. Russell Ballard, “Children of Heavenly Father” (Brigham Young University devotional, Mar. 3, 2020), speeches.byu.edu.

  4. Lale Jon 3:16; Mosaia 15:1; 3 Nipai 17:6–10.

  5. Lale Kwaļo̧k Gospel eo Aō, jebta 3.

  6. Lale Matu 22:36–40.

  7. Lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar, 1.2, Gospel Library.

  8. Mosaia 18:8–9.

  9. Jeffrey R. Holland, “Religion: Bound by Loving Ties” (Brigham Young University devotional, Aug. 16, 2016), speeches.byu.edu.

  10. Lale Russell M. Nelson, “Rikaenōm̧m̧an ro Jej Aikuji,” Liaona, Māe 2023, 99.

  11. “The number of people in extreme poverty rose by 70 million to more than 700 million people” (“Poverty,” Nov. 30, 2022, World Bank, worldbank.org).

  12. “More than 100 million people are forcibly displaced” (“Refugee Data Finder,” May 23, 2022, United Nations High Commissioner for Refugees, unhcr.org).

  13. Gerrit W. Gong, “Ruum̧ in Im̧ōn Ruwamāejet,” Liaona, Māe 2021, 25.

  14. Lale Bok in Bōk Meļeļe, 1.3.7, Gospel Library.

  15. Lale Russell M. Nelson, “Rikaenōm̧m̧an ro Jej Aikuji,” 98–101.

  16. Lale Jon 3:16.

  17. Lale Alma 7:11-12; Katak im Bujen Ko 122:8.

  18. Matu 11:28–29.

  19. Howard W. Hunter, “Come unto Me,” Ensign, Nov. 1990, 18.

  20. “The Mission and Ministry of the Savior: A Discussion with Elder Russell M. Nelson,” Ensign, June 2005, 18.

  21. David A. Bednar, “Kotak Eddo ko Aer ilo Ejjeļo̧k Pen,” Liaona, Māe 2014, 88.

  22. Būreejtōn Camille N. Johnson eaar ba: “Ro jeiū im jatū, iban makeļo̧k iaaō, im ijjab aikuj, im iban. Kāālet in n̄an etetal ippān Rilo̧mo̧o̧r in aō, Jisōs Kraist, kōn bujen ko ikar kōmmane ippān Anij, “I maron̄ in kōṃṃan men otemjej ilo Kraist eo ej kakajoor eō.”(“Jisōs Kraist Ej Unjen Mour’ [Pilipai 4:13]” (“Jesus Christ Is Relief,” Liaona, Māe 2023, 82).

  23. Lale Sam Ko 62: 6– 8.

  24. Lale Jemes 2:17.

  25. Lale Matu 7:7–8; Jemes 1:5.

  26. “Jetōb Kwojarjar ej Rikaenōm̧m̧an eo (Jon 14:26). Āinwōt juon anikien eo edik an juon jemen im jinen emaron̄ kōmman an juon ajri jan̄, unoojdikdik ko an Jetōb remaron̄ kalur mijak ko ad, kakiki inepata ko an mour ko ad, im kaenōmman kōj n̄e jej būrom̧ōj. Jetōb Kwojarjar emaron̄ kobrak kōj ‘kōn kōjātdikdik im iakwe eweeppān’ im katakin kōj men ko an aelon eo’ (Moronai 8:26; Katak im Bujen Ko 36:2)” (Topics and Questions, “Holy Ghost,” Gospel Library).

    Jetōb Kwojarjar “ej kam̧ool kōn Jemān im Nejin” (2 Nipai 31:18). En̄in ej kōn wōt kajoor eo an Jetōb Kwojarjar bwe jej maron̄ bōk juon naan in kam̧ool epen kōn Anij Jemed im Nejin, Jisōs Kraist.

    “Jetōb Kwojarjar ej kam̧ool kōn m̧ool eo, jān kajoor eo an Jetōb Kwōjarjar kom̧ ‘maron̄ jeļā m̧ool eo an men ko otemjeļo̧k’ (Moronai 10:5)” (“The Holy Ghost Testifies of Truth,” Liaaona, Maj. 2010, 14, 15).

    “Ak n̄e Ri Kaaeņōm̧m̧an ej itok, Eo I naaj jilkinwōj n̄an kom̧ jān Jema, E Jetōb in m̧ool, Eo ej itok jān Jema, Enaaj kōnnaan kōn Eō” (Jon 15:26).

  27. Lale Jon 14:6–7; 17:3.

  28. Ukook eo an Josep Smith, Matu 6:38 (ilo Bible appendix).

  29. Russell M. Nelson, “Itok, Ļoor Eō,” Liaona, Māe 2019, 90.

  30. Lale Mark 8:27–29.