Kōkkāļļe ko an Mōņōņō
Ekkal ioon pedped eo an Jisōs Kraist eaorōk n̄an m̧ōņōņō eo ad eļap.
Ke iaar kelo̧k ilo baļuun jen jikin jerbal eo jet iiō remootļo̧k, iaar jijet iturin juon em̧m̧aan jen Netherland. Iaar kijerjer in loļo̧k e jen ke iaar jerbal in mijen ilo Belgium im Netherlands āinwōt juon mijinede em̧m̧an ded.
Ke kōmij jino jeļā kajjien doon, eaar letok n̄an eō kaat in peejņej eo an ippān taitōļ in juon jerbal āinjuon “professor in m̧ōņōņō.” Iaar kajjitōk kōn jerbal eo an em̧m̧an im kar kajjitōkin e ta eo juon professor in m̧ōņōņō ej kōm̧m̧ane. Eaar ba e ej katakin armej kilen bōk juon mour elem̧ōņōņō ilo ejaake jemjerā ko im mejen kajjik ko ewōr meļeļeier. Iaar uwaak, “Em̧m̧an wōt, ak ta eļan̄n̄e komaron̄ in bar katakin kilen an jemjerā ko maron̄ etal wōt eļļā jen lōb im uwaake kajitōk ko jet an ad, einwōt ta wūnin mour in, elemen ad maron̄ in anjo jen m̧ōjņo̧ ko ad, im ia eo jej etal n̄an e ālkin ad mej?” E ekar kile bwe enaaj kar em̧m̧an n̄e ewōr uwaak ko ippam̧ro n̄an kajjitōk ko, Im iaar m̧ōņōņō in jeere ta eo membōr ro rej kōm̧m̧ani.
Rainin, ikōņaan bar etale jet pedped in katak ko raorōk kōn m̧ool in m̧ōņōņō āinwōt n̄an joļo̧k elōn̄ ilo laļ in ekapokpok, ijo elōn̄ men ko rekaitok limo̧mo̧ ijoke jet wōt iaer relukkuun aorōk.
Alma ekar katakin armej ro ilo tōre eo an, “Bwe lo, ij ba n̄an kom̧ enaaj lōn̄ men ko renaaj itok; im lo, e wōr juon e aorōkļo̧k jān aolep—bwe lo, iien eo ej jab ettoļo̧k bwe Ripinmuur e mour im Ej itok ilubwiljin armej ro an.”1
Ennaan in ebarāinwōt aorōk n̄an kōj rainin ilo ad bōk kuņaad im maanjappopo n̄an Itok eo an Kraist kein Karuo!
Kōn menin, lale ļo̧k eo aō jinointata ej bwe ekkal ioon pedped eo an Jisōs Kraist eaorōk n̄an m̧ōņōņō eo ad eļap. En̄in ej pedped eo em̧ool “eļan̄n̄e armej rej ekkal ioon rej jamin bun̄.”2 N̄an kōm̧m̧ane ej kōpooj kōj n̄an apan̄ ko an mour in, jekdo̧o̧n ta ej waļo̧k.
Elōn̄ iiō ko remootļo̧k, ikar etal n̄an juon jōm̧ar jiko̧ut ippān likao eo nejum̧ Justin. Ilo an m̧akūtkūt ko wōnmaanļo̧k wōt, ekar itok limo̧in im ba ke e im ro jeran raar kōņaan bōk juon archery merit badge. N̄an kōm̧m̧ane menin ekar menin aikuj bwe ļaddik ro ren pāāj e juon teej ilo jeje im kar ka lel juon kein kowāeleel kōn made ko aer.
Būruwō eaar buruōmōj. Ilo iien eo, Justin eaar kanooj uub kōn wōt an jorrāān aeran, juon nan̄inmij etto an tariņaeiki jen ke kar ļotak. Ij kōļmenļo̧kijen n̄e e emaron̄ kar kanek liktak lippo̧ņ eo n̄an an nej kar joļo̧ke made eo n̄an kein kowāeleel eo.
Ke e im ro jeran raar diwōj jen kilaaj in ekatak lippo̧ņ eo, iaar unoojdikdik im jar bwe e en jab maron̄ jook jen an ekatak. Jejjo awa ko tok ālik in an kijerjer, I kar loe an itok n̄an ippa kōn juon mejen ettōn̄ eļap. “Baba!” ekar ba. Em̧ōj aō bōke merit badge eo! Ikar kalel ioļāpen; ioon kein kowāeleel eo tok iturin eo aō, ijo I ikar kalel ioļāpen!” E ekar kanek liktak lippo̧ņ eo kōn aolep an maron̄ im kar kōtļo̧ke, ak ejjab maron̄ in dāpdep kooj eo an. Ewi jon̄an aō kam̧m̧oolol kōn meļeļe eo an rikaki in lippo̧ņ eo, eo im ejjan̄in ba “Joļo̧k bōd, ebōd jikin kowāeleel eo!” Ijjelo̧kin, kalimjek jon̄an maron̄ eo an Justin ealikkar im an kōm̧m̧an, ej uwaak ilo an jouj, “Juon jerbal em̧m̧an!”
En̄ne ej wāween n̄an kōj eļan̄n̄e jej kōm̧m̧ane ijo em̧m̧antata n̄an ļoor rikanaan ro An jon̄an wōt ad maron̄. Eļan̄n̄e jej itok n̄an E ilo ad kōjeparok bujen ko im ukweļo̧k jen jerawiwi ko ad, jenaaj lan̄lōn̄ in ron̄jake ennaan eo an adwōj Rilo̧mo̧o̧r: “Em̧m̧an am̧ kōm̧m̧an kwō karijera em̧m̧an im tiljek.”3
Ij kwaļo̧k n̄an kom aō naan in kam̧ool kōn kwojarjar eo an Rilo̧mo̧o̧r eo an laļ im kōn iakwe in pinmuur eo An im kajoor n̄an kemour, kakajoorļo̧k, n̄an lōn̄aj kōj eļan̄n̄e jej kajjieon̄ in itok n̄an E. Ilo bar juon wāween, ejjeļo̧k bar iaļ jej maron̄ in emmakūt ippān jarlepju in barāinwōt ļo̧k n̄an Jisōs. Rilo̧mo̧o̧r eo ekar anjo̧ ioon mej, nan̄inmej, im jerawiwi im kōmmane juon iaļ n̄an m̧ool in weepān eļan̄n̄e jenaaj ļoor E kōn aolepen būruwōd.4
Erreilo̧k eo aō kein karuo ej bwe emenin aorōk n̄an m̧ōņōņō eo ad bwe jen kemeemej bwe kōj jej ļaddik im leddik ro nejin juon Jemedwōj Ilan̄ eo ej iakwe. Jeļā im lōke m̧ool in ej ukōt aolep men.
Jejjo iiō remootļo̧k, ilo juon kar iien ekkāke ilo baļuun jen juon kar kūr an Kabun̄, Sister Sabin im n̄a kar jijjet kajjeen likin juon em̧m̧aan ekilep, kapin bōran ej juon eo̧ in mejen kakūtōtō barāinwōt ņōmba eo 439.
Ke kōm ar jok, ikar ba, “joļo̧k aō bōd ļe. Ewōr ke bōd n̄e ij kajjitōk ta aorōkin eo̧ in ņōm̧ba eo kapin bōram̧?” Ikar jab kōņaan kajjitōk kōn mej kakūtōtō eo.
Ekar ba,“n̄a ņe. En̄in ej wōn n̄a. Aō jikin ņe: 219!”
Ābukwi jiln̄uuļ ratimjuon lukkuun ņōmba eo ioon bōran, kōn menin iaar ļo̧kjen aō ke e ekar bōd an ba ak aorōk n̄an e.
Ikar ļōmņak kōn jon̄an kabūrom̧ōm̧ōj an em̧m̧aan in pedped ioon won e im maron̄ eo an ion juon ņōmba ekkeijel ļo̧k ippen juon jikin kāān̄. Ikar ļōmņak ippa make:,Em̧m̧aan in eo erreitokin in juon em̧m̧aan edipen ekar ilo juon tore juon laddik jidikdik eo ekar aikujin en̄jake aorōk im ia n̄an pād. Eļan̄n̄e e en kar wōt jeļā wōn lukkuun e im ia eo ej aikūj pād ie, bwe kōj wōj aolep m̧ōj “wiaik kōn juon oņān.”5
Ewōr juon ļain ejejjet ilo al eo jen pija eo The Prince of Egypt ej ba, “Kalimjeke mour eo am kōn mejen lan̄.”6 N̄e jej meļeļe kōn bwij eo ad ekwojarjar im aorōk eo indeeo kōn aolepen ad, jenaaj maron̄ lo jibadbad eo an mour in, an jab eerļo̧k karōk eo n̄an ekatak im eddōkļo̧k, men̄e “jej loe ilo juon class im e tab”7 n̄an juon iien ekadu.
Mōņōņō eo eļap kein kajilu n̄an m̧ōņōņō ej n̄an aolep iien keememej aorōk eo an juon jetōb. Jej kōm̧m̧ane menin ilo ad ļoor katak eo an Rilo̧mo̧o̧r “Yokwe doon, āinwōt Iar yokwe kom̧.”8
E ekar bar katakin, “Ilo ami kōm̧anm̧an jabdewōt n̄an juon iaan rein ro jatū ediktata, kom̧ ar kōm̧anm̧an n̄an eō.”9
Bok in Jabōn kōnnaan Ko ej kapilōk “Kwōn jab dāpij em̧m̧an jān ro rej aikuj, n̄e ej ilo maron̄ in peim̧ bwe kwōn kōm̧m̧ane.”10
Jej jāmin ajļo̧k kōn ad jouj. Ilo mejen Anij, jouj ej kōkkaļļein em̧m̧an. Mōttan eo an āinwōt jouj ej āinwōt jeorļo̧k bōd im jab ekajet.
Elōn̄ iiō ko remootļo̧k baam̧le eo am ekar etal im alooje juon pija ilo juon ņokin in jota an baam̧le. Kōm kar aolep pād ilo van eo ijjelo̧kin wōt juon iaan ļaddik ro nejim im eo pāleeō, Valerie. Ekar marok nabōj, im ļaddik ro nejim ekar kōppeļo̧k kōjem eo im ettōr ļo̧k n̄an wa eo, e ejidilo̧k an juuri kuuj eo nejim ioon jikin deļo̧n̄ tok eo. Ejerata ļaddik eo nejim im kōrā eo pāleeō, eo me eaar pād ālkin ļeo, ekar jab kuuj eo nejim ak eaar juon skunk eo ellu, eo ekar kwaļo̧k an illu! Kōm kar aolep jepļaak n̄an m̧weo, ijo er wōj kar tutu im kwaļ koļan bōrāer kōn tōmato juuj, eo kar ba wōt en kar joļo̧k bwiin skunk eo. Jen iien in rekar karreok im ukōt nuknuk ko aer, kōm ekar aolep erreo n̄an jabdewōt nām, kōnmenin kōm ar ļōmņak bwe kōm ar jejjet n̄an etal in alo̧o̧j ālkin aolep men.
Ālkin am kar jijjet ijo lik in m̧ōn alooj eo, juon ilok juon armej ipeļaakūm ejjab etto rekar ļōmņak in etal im ebbōk popcorn. Ke rej jepļaak tok, mekarta, ejjeļo̧k juon ekar jepļaak tok n̄an bar jikin jijjet eo aer.
Kōm ar ettōn̄ ke kōm ar bar kōņoņo kōn ta ar waļo̧k, ijoke ta eo n̄e aolepen jerawiwi ko ad raar wōr nāmeer? Ta eo n̄e jej maron̄ in āt riab, ļōn̄, m̧ōm̧, ak utiej bōro? Kōn m̧ōjņo ko ad make rej waļo̧k, jej maron̄ kōjādikdik jiddik ļōmņak eļapļo̧k im kōjeparok ro jet im, ejja āinwōt, er n̄an kōj ilo ad kōmman oktak ko re menin aikuj ilo mour ko ad. Elukuun em̧m̧an ippa bwin tobacco ilo im̧ōn jar eo, kōnke ej kwaļo̧k ke juon armej ej kajjieon̄ in oktak. Er rej aikuji pein kaurwainene ko ad ipeļaaki er.
Būreejtōn Russell M. Nelson eaar ba, “Juon iaan wāween ko repidodo tata n̄an kile juon rikaļoor em̧ool an Jisōs Kraist ej ewi jon̄an an armej eo meanwōd ilo kōm̧m̧an n̄an armej ro jet.”11
Paul eaar jeje n̄an ri Epesōs, “Im kom̧win jouj n̄an doon, en em̧m̧an būruemi, joļo̧k nana jān doon, āinwōt Anij ilo Kraist Ear joļo̧k ami nana.”12
Āinwōt rikaļoor ro an Jisōs Kraist, kar kajitūki kōj n̄an lōke Jemed Ilan̄ im ad Rilo̧mo̧o̧r im jab kajjieon̄ in bar pinej Er. Jisōs Kraist eweepān an jeļā jab wānōk eo an kajjojo im enaaj ekajet er.
Aō mōņōņō eļap kein kemen ej n̄an kōjparok juōn jetn̄ake eo ejjeļo̧k jem̧ļo̧kin. Karōk eo an Jemed ej eļļo̧k n̄an indeeo ko; epidodo menin n̄an kalimjek wōt ijin im kiō im meļo̧kļo̧k ālikin ijin.
Kar katakin iō katak in ekajoor jejjo iiō ko remootļo̧k jān leddik eo nejim eo im ekar 16 an iiō iien eo, Jennifer. Liin eaar tin bōk ruo an ār leļo̧k n̄an e ilo juon wot iien, ijo nan̄inmej ko ļalem ilo lobe ārin ko an renaaj maron̄ in kar joļo̧k im bar likūt ruo lobe jiddik kāāl, kar jipan̄ letok jen ruo jeran armej rej mour einwōt Kraist im remman. Ekar juon jerbal eaar kanooj ļap an kauwōtata, mokta jen bon̄ōn m̧wijm̧wij eo an liin, Jennifer ear kwaļo̧k n̄an eō kōn aolepen 90 baun eo an, im ba, “Jab inepata, Baba! Ilju inaaj ruj tok kōn ār kāāl ak I naaj ruj tok ilo juon jikin emman ļo̧k. Juon wōt iaer enaaj emman.” Ej en̄in tōmak: en̄in ej erreilo̧k eo ej n̄an indeeo! Mijek mour jen juon jikin eo indeeo ej kalikkare, kaeņōmman, ka peran, im kōjatdikdik.
Ālkin mwijmwij eo, ke raan eo etto kar kōttare eaar itok n̄an kōmmakūti tuub eo im kune ventilator eo ekar baj jipan̄ Jennifer emeņoņo, jej kijerjer in kar kōttare im lale eļan̄n̄e lobe jiddik ko an ren kar maron̄ jerbal. Ke liin eaar bōk meņowan eo an moktata, liin ekar jino mōkaj im jan̄. Kalimjeki abōņōņō kein ad, liin eaar ba, “Elukkuun emman n̄an emeņoņo.”
Jen raan eo n̄an kiō, Ij kam̧m̧oolol Jemedwōj Ilan̄ aolep jibbon̄ im jota kōn aō maron̄ in emeņoņo. Jej jepooļ kōn kōjeramman ko jeban būni me repidodo ad jab kawōr tokjen eļan̄n̄e jejjab ļōmņak. Ilo bar juon wāween ba, n̄e ejjeļo̧k menin kōtmāne im aolep men rej kammoolol kaki, mour in ej erōm aiboojoj.
Būreejtōn Nelson ear ba: “Kajjojo jibbon̄ ekāāl ej juon menin letok jān Anij. Barāinwōt mejatoto in jej emenono kake ej juon iakwe jān E. E ej kōjeparok kōj jen raan n̄an raan im rie kōj jen iien n̄an iien. Kōn menin, jerbal eo ad m̧oktata in jibbon̄ ej aikuj in juon jar in kam̧m̧oolol ettā.”13
Ebōk tok n̄an eō lale ļo̧k eo aō kein ka ļalem im āliktata, eo me kwōnaaj jamin maron̄ m̧ōņōņō kake eļapļo̧k jen am kam̧m̧oolol.
Irooj eaar ba, “Im e eo ej bōk aolep men ko otemjeļo̧k kōn kam̧m̧oolol naaj kōm̧m̧an bwe en wōj.”14 Bōlen en̄in ej kōnke kammoolol ej letok ta eo ej waļo̧k n̄an jarlepju in wānōk ko jet.
Wāween ad jeļā enaaj oktak eļan̄n̄e aolep jibbon̄ jej ruj kōn wōt kōjeramman ko jej kammoolol kaki bon̄ōn eok mokta. Likjab in kam̧m̧oolol kōn kōjeramman ko ad emaron̄ in waļo̧k ilo juon wāween ad jab m̧ōņōņō, emaron̄ ko̧o̧t e kōj jen lan̄lōn̄ im m̧ōņōņō eo eļap im kam̧m̧olol ej bōktok. Ro ilo m̧weo eļap im kajōjō rej kareel kōj n̄an reilo̧k jān kakōļļe eo, kōn menin rekar jerwaane ta eo eaorōktata.
Ilo m̧ool, m̧ōņōņō eo eļap im kōjeraman an mour in naaj waļo̧k ippen ro jenaaj erom āinwot er kōn jouj an Anij ilo ad kōm̧m̧ani im kōjeparoki bujen ko ippen E. Ad Rilo̧mo̧o̧r enaj kō kejatōtōl im karreo kōj kōn em̧m̧an ko an katok in pinmuur eo An im ke ekar ba n̄an ro rej m̧ōņōņō in ļoor E. “Renaaj aō ilo raan n̄e Inaaj itok n̄an jokāāleti dekā ko raorōk aō.”15
Ij kallim̧uri eok bwe n̄e jej kalōk mour ko ad ioon pedped an Jisōs Kraist; kaorōk kadkad eo ad em̧ool āinwōt ļaddik im leddik ro nejin Anij; kemeemej aorōk eo an juon jetob; lale juon ļōmņak ej n̄an indeeo; im kautiej im kam̧oolol kōn kōjeram̧m̧an ko ad relōn̄, eļaptata karuwainene eo an Kraist n̄an itok n̄an E, jej maron̄ loe m̧ōņōņō eo em̧ool jej kapukōte ilo iaļ in an mour in. Mour enaaj apan̄, ijoke jej naaj maron̄ in em̧m̧an ļo̧k jelmae kajojo iaer kōn juon en̄jaake in kōtōpar im aenōm̧m̧an kōnke kōn m̧ool ko indeeo jej meļeļe im mour jene.
Ij kwaļo̧k aō kam̧ool m̧ool an Anij, Jemād eo ej iakwe, im Nejin Jitōnbōro, Jisōs Kraist. Ij bareinwōt kam̧ool kōn rikanaan ro remour, rilolo, im rikwaļo̧k revelesōn. Ej juon kōjeraam̧m̧an n̄an bōk kapilōk jen lan̄ kōn er. Āinwōt an kar Rilo̧mo̧o̧r eo kar ba “Mekarta jān Ainikiō make ak jān ainikien ro rikarejera, ej āinwōt juon.”16 Ilo āt eo ekwojarjar etan Jisōs Kraist, amen.