“Ko e Ngāue Fakaetauhi Mateakí,” Liahona, Tīsema 2023.
Ngaahi Tefitoʻi Moʻoni ʻo e Ngāue Fakaetauhí
Ko e Ngāue Fakaetauhi Mateakí
Te tau lava ʻo fakahoko ha liliu lahi ʻi heʻetau ngāue fakaetauhi mateakí.
Laʻitā ʻa Kay Lynn Hodges
Ko e moʻui ʻa e ʻAposetolo ko Pitá ko ha sīpinga fakalaumālie ia ʻo e mateaki mo e tukupā ki he Fakamoʻuí. Ka naʻe pau ke ako mo tupulaki ʻa Pita ʻi he ngaahi ʻulungaanga ko ʻení, ʻo hangē pē ko kitautolu kotoá. Neongo naʻá ne ʻosi fakahā kimuʻa ko Sīsū ʻa e Mīsaiá (vakai, Mātiu 16:16) pea naʻá ne loto-fiemālie foki ke pekia Maʻana (vakai, Luke 22:33), ka naʻá ne fakaʻikaiʻi ʻokú ne ʻiloʻi ʻa Sīsū ʻi hono fakafehuʻiá (vakai, Mātiu 26:69–74). Hili ʻa e lavakiʻi ko ʻení, naʻe “tangi mamahi” ʻa Pita (vakai, Mātiu 26:75). Naʻe fakamolemoleʻi ʻe Sīsū ʻa Pita, pea kimui ange ʻi heʻene hoko ko e ʻAposetolo pulé, naʻe tataki ʻe Pita ʻa e Siasi ʻo Sīsū Kalaisi ʻi he kuonga muʻá.
ʻOku akoʻi kitautolu ʻe he fakamatala ko ʻení neongo ʻetau tōnounoú, ʻe lava ke fakamolemoleʻi kitautolu ʻo fakafou ʻi he Fakalelei ʻa Sīsū Kalaisí kapau te tau fakatomala moʻoni mo mateakiʻi Ia. Naʻe hoko ʻa Pita ko ha sīpinga fakaofo ʻo e moʻui mateakí ʻi he toenga ʻo ʻene moʻuí, neongo ʻa e fakatangá mo e faingataʻá ʻi heʻene ngāue maʻá e ʻEikí. Naʻe iku pē ʻo ne foaki ʻene moʻuí.
Naʻe akoʻi ʻe Pita ʻe tāpuekina kitautolu kapau te tau mateakiʻi ʻa e Fakamoʻuí neongo ʻa e ngaahi ʻahiʻahí mo e fakatangá:
“Kapau ʻoku manukia ʻakimoutolu koeʻuhi ko e huafa ʻo Kalaisí, ʻoku mou monūʻia; he ʻoku nofo kiate kimoutolu ʻa e laumālie ʻo e ongoongo lelei mo e ʻOtuá: ʻoku lauʻikovi ia ʻe kinautolu, kae ongoongo lelei ia ʻiate kimoutolu. …
Ka ʻo ka tautea ha taha koeʻuhí ko ʻene anga faka-Kalisitiané, ke ʻoua naʻa mā ai ia; kae tuku muʻa ʻa e fakaongoongoleleí ki he ʻOtuá koeʻuhí ko ia” (1 Pita 4:14, 16).
Te tau lava ʻo fakahaaʻi ha mateaki taʻeueʻia ki he Fakamoʻuí ʻaki ʻetau fakahoko ʻa e meʻa kuó Ne kole maí, pea ʻe lava ke tau fakahaaʻi ʻetau mateakiʻi ʻa kinautolu ʻoku tau ngāue fakaetauhi ki aí ʻaki ʻetau ngāue ke langa hake ha feohi fakakaungāmeʻa moʻoni mo fakamātoato.
Ko Hono Fakatupulaki ʻo e Mateakí
Ko e mateakí ko ha ʻulungaanga faka-Kalaisi ia te tau lava ʻo ako lahi ange ki ai mo fakatupulaki ʻiate kitautolu. Ko ha ngaahi fakakaukau ʻeni:
-
Fetuʻutaki lelei: ʻI hono fakahoko mahino mo tauʻatāina hoʻo fetuʻutakí mo fakafanongo fakamātoato ki he ngaahi fakakaukau ʻa e niʻihi kehé, te ke lava ai ʻo fakatupulaki ha mahino mo ha falala ʻoku loloto angé, ʻo tokoniʻi koe ke langaki mo pukepuke ʻa e ngaahi vā fetuʻutaki mateakí.
-
Feinga ke tatau maʻu pē: ʻI he taimi ʻe fakafalala atu ai ʻa e kakaí kiate koe ke ke ʻi ai mo muimuiʻi hoʻo ngaahi tukupaá, te nau falala mo fakafalala kiate koe, ʻo iku ai ki ha ngaahi vā fetuʻutaki mālohi mo mateaki.
-
Lotu: ʻI hoʻo lotua ʻa kinautolu ʻokú ke ngāue fakaetauhi ki aí, ʻe fakanatula pē ʻa e tupulaki ʻa e ongoʻi mateakí ʻiate kinautolú.
Faitaaʻi ʻe Shirlene Stoddard
Ko e Ngāue Fakaetauhi Mateakí
-
Ke falalaʻanga: Muimuiʻi hoʻo ngaahi tukupaá pea poupou ʻi he taimi ʻoku fiemaʻu ai ʻe kinautolu ʻokú ke ngāue fakaetauhi ki aí ha fakalotolahí.
-
Fakafanongo tokanga: ʻI hoʻo fakafanongo moʻoni, maʻu ha mahino, mo ʻi ai maʻá e kakai ʻokú ke ngāue fakaetauhi ki aí, te ke lava ʻo fokotuʻu ha ngaahi vā fetuʻutaki ʻoku mālohi angé mo fakahaaʻi ʻokú ke tokanga ki honau tuʻunga leleí.
-
Maʻu ʻa e loto-falalá ʻOku maʻu ʻe ha kaungāmeʻa mateaki ʻa e loto-falalá ʻi he taimi ʻoku ngāue fakaetauhi aí—pea ʻi he taimi kotoa pē. (ʻI he ngaahi tūkunga makehé, hangē ko e ngaahi tūkunga ngaohikoviá, kole ha ngofua pea tokoni ke nau fekumi ki he tokoni totonú.)
-
Fakahaaʻi ʻa e ʻofá mo e manavaʻofá: ʻI he taimi ʻokú ke tokanga moʻoni ai kiate kinautolu ʻokú ke ngāue fakaetauhi ki aí, te nau ongoʻi ʻoku fakamahuʻingaʻi mo fakahoungaʻi kinautolu, ʻo fokotuʻu ai ha vā fetuʻutaki ʻe lava ke tupulaki ai ʻa e mateakí.
-
Ngāue Tokoni: ʻI heʻetau fetokoniʻaki ʻi he ʻofá, ʻoku tau fakahaaʻi ai ʻetau mateakiʻi ʻa e Fakamoʻuí mo ʻetau loto-fiemālie ke fafanga ʻEne fanga sipí (vakai, Sione 21:15–17).