“Ko e Teuteu ke ʻAlu ki he Temipalé,” Liahona, Tīsema 2023.
Ngaahi Tefitoʻi Meʻa Mahuʻinga ʻo e Ongoongoleleí
Ko e Teuteu ke ʻAlu ki he Temipalé
Tā ʻo e Temipale Ogden Utah naʻe faitaaʻi ʻe Mark Brunson
ʻE lava ke tau maʻu ʻi he ʻū temipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha ngaahi fuakava mo ha ngaahi ouau toputapu maʻatautolu mo ʻetau ngaahi kuí. ʻOku tau ō ki he temipalé ke fakahaaʻi ʻetau ʻofa mo e houngaʻia ʻi he Tamai Hēvaní mo Sīsū Kalaisí. Te tau lava ʻo teuteu ke ʻalu ki he temipalé ʻaki ʻetau ako mo moʻui ʻaki ʻa e ongoongolelei ʻo Sīsū Kalaisí. Ke maʻu ha fakamatala lahi ange fekauʻaki mo e ngaahi temipalé, vakai ki he fakamatala ki he Ngaahi Tefitoʻi Meʻa Mahuʻinga ʻo e Ongoongoleleí “Ngāue Fakatemipalé” ʻi he makasini Liahona ʻo ʻOkatopa 2021.
Tā ʻo e Temipale Durban South Africa, faitaaʻi ʻe Matthew Reier
Ko e Fale ʻo e ʻEikí
ʻOku ui ʻa e ngaahi temipalé ko e “fale ʻo e ʻEikí.” Ko ha ngaahi feituʻu toputapu ia ʻe lava ke tau ongoʻi ai ʻa e Laumālie ʻo e ʻOtuá mo ʻEne ʻofa kiate kitautolú. Ko ha ngaahi feituʻu foki ia te tau lava ʻo fakahoko ai ha ngaahi fuakava mo maʻu ha ngaahi ouau makehe te nau teuteuʻi kitautolu ke tau maʻu ʻa e moʻui taʻengatá. (Ngaahi fuakava mo e ngaahi aleapau toputapu ʻi he vahaʻa ʻo e ʻOtuá mo ʻEne fānaú.) ʻOku tokoniʻi kitautolu ʻe he tauhi faivelenga ki heʻetau ngaahi fuakavá mo hono maʻu ʻo e ngaahi ouau ko ʻení ke tau maʻu ha vā fetuʻutaki makehe mo e Tamai Hēvaní mo Sīsū Kalaisi.
Tā ʻo e Temipale Guayaquil Ecuador, faitaaʻi ʻe Janae Bingham
Ko Hai ʻe Lava ʻo ʻAlu ki he Temipalé?
ʻE lava ke fakahoko ʻe he kāingalotu ʻo e Siasí ʻa e papitaiso maʻá e kau pekiá ʻo kamata ʻi he taʻu ʻoku hoko ai honau taʻu 12. ʻE lava ke maʻu ʻe ha mēmipa hono ʻenitaumení kapau kuo ʻosi taʻu 18, kuo ʻosi ha taʻu ʻe taha ʻene hoko ko ha mēmipa ʻo e Siasí, pea ʻokú ne maʻu ʻa e loto-holi ke fakahoko mo tauhi ʻa e ngaahi fuakava fakatemipalé (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 27.2.2, ChurchofJesusChrist.org). ʻE lava ke silaʻi (mali) ha tangata mo ha fefine kuo ʻosi maʻu hona ʻenitaumeni temipalé, ke taʻengata ʻi he temipalé.
Ngaahi Fuakavá mo e Ngaahi Ouaú
Te ke fakahoko ha ngaahi fuakava mo maʻu ha ngaahi ouau ʻi he temipalé. “ʻOku hanga ʻe heʻetau fakahoko ha vā fetuʻutaki fakafuakava mo e ʻOtuá ʻo haʻi kitautolu kiate Ia ʻi ha founga te ne ʻai ke faingofua ange e meʻa kotoa ʻo e moʻuí” (Russell M. Nelson, “Ikuʻi ʻa Māmani mo Maʻu ha Fiemālie,” Liahona, Nōvema 2022, 97). Ko e ouaú ko ha ngāue toputapu ʻoku fakahoko ʻaki ʻa e mafai ʻo e lakanga fakataulaʻeikí. ʻOku ʻi ai ha ʻuhinga fakalaumālie loloto ʻo e ngaahi ouaú. Hangē ko ʻení, ʻi he taimi ʻokú ke kau ai ʻi ha ouau, ʻokú ke fakahaaʻi ai ki he ʻOtuá ʻokú ke loto-fiemālie ke maʻu mo tauhi ʻEne ngaahi fuakavá.
Teuteu Fakatāutahá
Teuteu fakalaumālie ʻaki haʻo muimui ki he ngaahi akonaki ʻa Sīsū Kalaisí mo tauhi ʻa e ngaahi fuakava naʻá ke fakahoko mo e ʻOtuá ʻi he papitaisó. Te ke lava foki ʻo ako ʻa e ngaahi maʻuʻanga tokoni ʻa e Siasí, hangē ko e ngaahi folofolá mo e ngaahi lea ʻo e konifelenisi lahí. ʻOku ʻomi ʻe he Temples.ChurchofJesusChrist.org ha fakamatala fekauʻaki mo e meʻa ke ke ʻamanaki ki ai ʻi hoʻo ʻalu ki he temipalé. ʻOku kau foki ai ha ngaahi fakaikiiki lahi ange fekauʻaki mo e ngaahi fuakava, ngaahi ouau, mo e fakataipe ʻo e temipalé.
Laʻitā ʻo e Temipale Nauvoo Illinois, faitaaʻi ʻe Eve Tuft
Fakataipe
ʻOku faʻa akonaki ʻa e ʻEikí ʻo fakaʻaongaʻi ha ngaahi fakataipe. Hangē ko ʻení, ko e papitaisó—ko ha ʻalu hifo ia ki lalo ʻi he vaí pea toe tuʻu haké—ʻoku hangē ia ko hoʻo mate pea mo hono fanauʻi foʻou koe ʻi hoʻo moʻui foʻoú (vakai, Loma 6:3–6). ʻOku ʻuhinga ʻa e ngaahi ouau fakatemipalé kia Sīsū Kalaisi mo ʻEne Fakaleleí. Mahalo ʻe faingataʻa ke mahino ʻa e fakataipe kotoa pē ʻi he fuofua taimi te ke ʻalu ai ki he temipalé, ka ʻe lava ke hokohoko atu hoʻo akó ʻi hoʻo toutou ʻalu ki he temipalé ʻi he kotoa hoʻo moʻuí.
Lekomeni Temipalé
Ke hū ki he temipalé, ʻoku fiemaʻu ke ke mateuteu mo taau. Te ke lava ʻo maʻu ha lekomeni ke hū ki he temipalé hili haʻo ʻinitaviu mo hoʻo pīsopé pe palesiteni fakakoló pea mo e palesiteni fakasiteikí pe fakamisioná. ʻE fakahoko ʻe he kau taki ko ʻení ha ngaahi fehuʻi ke fakapapauʻi ʻokú ke moʻui ʻaki ʻa e ongoongolelei ʻo Sīsū Kalaisí. ʻE lava ke tomuʻa talanoa atu hoʻo kau takí fekauʻaki mo e ngaahi fehuʻi ko ʻení.
Ko e Foki ki he Temipalé maʻa Hoʻo Ngaahi Kuí
ʻOku finangalo ʻa e Tamai Hēvaní ke fakahoko ʻe Heʻene fānaú kotoa ha ngaahi fuakava mo Ia pea maʻu ʻa e ngaahi ouau toputapú. Kuo pau ke fakahoko ʻa e ngaahi ouau ko ʻení, hangē ko e papitaisó mo e ʻenitaumení, ʻi he ngaahi temipalé maʻanautolu kuo pekia teʻeki ke nau maʻu ʻa e ongoongoleleí. ʻE lava ke ke foki ki he temipalé ke fakahoko ha ngaahi ouau maʻá e kau mēmipa ho fāmili kuo pekiá.