“Ko e Meʻaʻofa Fakaofo ʻa Sīsū Kalaisí,” Liahona, Tīsema 2023.
Maʻá e Ngaahi Mātuʻá
Ko e Meʻaʻofa Fakaofo ʻa Sīsū Kalaisí
Faitā ʻa Scott Law
Siʻi Ngaahi Mātuʻa,
ʻOku poupouʻi ʻe he makasini ʻo e māhina ní hono akoʻi hoʻo fānaú fekauʻaki mo e founga ke fakatupulaki mo fakamālohia ai honau ngaahi vā fetuʻutaki mo e Fakamoʻuí pea mo e fānau kotoa ʻa e ʻOtuá. Te ke lava ʻo fakaʻaongaʻi e ngaahi fakakaukau ʻi hení ke fakatupulaki ha fealēleaʻaki ʻi he founga ke teuteu ai ke fakahoko ha ngaahi fuakava mo e ʻOtuá mo e founga ke fakaleleiʻi ai hotau ngaahi vā fetuʻutaki mo Ia mo e niʻihi kehé.
Ngaahi Fealēleaʻaki ʻi he Ongoongoleleí
Ko e ʻAmanaki Lelei ʻi he Fakamoʻuí
ʻI he fakamatala ʻa ʻEletā Keuli E. Sitīvenisoni ʻi he peesi 4, lau fekauʻaki mo e founga naʻe falala ai ha kiʻi taʻahine ko hono hingoá ko Houpi mo hono fāmilí ki he ʻEikí lolotonga honau ngaahi faingataʻaʻiá, pea aleaʻi ʻa e founga kuo “ʻōʻōfaki ai koe” ʻe Sīsū Kalaisi ʻi hoʻo ngaahi faingataʻaʻiá.
Ko e Ngaahi Meʻaʻofa Lelei Tahá
Vahevahe ha ngaahi fakakaukau mei he fakamatala ʻa ʻEletā Pelenite H. Nilasoni fekauʻaki mo e ngaahi mana mo e ngaahi meʻaʻofa lahi ʻo e Kilisimasí (peesi 40). Aleaʻi mo ho fāmilí ʻa e meʻaʻofa ʻe tolu ʻo e Kilisimasí ʻoku lave ki ai ʻa ʻEletā Nilasoni ʻi he fakaʻosinga ʻo ʻene fakamatalá. Fakakaukau pe ko e hā ha “ngaahi meʻaʻofa” ʻe ala kole atu ʻe he Tamai Hēvaní mo Sīsū Kalaisi ʻi he faʻahitaʻu Kilisimasi ko ʻení.
Ngaahi Tefitoʻi Meʻa Mahuʻinga ʻo e Ongoongoleleí
ʻOku hokohoko atu hono fakahoko ʻo e ngaahi fuakava ʻi he temipalé ko ha vā fetuʻutaki toputapu, ʻa ia ʻoku kamata ʻi he papitaisó, mo e Tamai Hēvaní. Toe vakaiʻi ʻa e “Ko e Teuteu ke ʻAlu ki he Temipalé” ʻi he peesi 22 ke ako lahi ange fekauʻaki mo e meʻa te ke lava pe ko kinautolu ʻokú ke ʻofa aí ʻo fakahoko ke mateuteu ai ke maʻu e ngaahi ouau ʻo e temipalé pea fakamālohia hoʻo fuakava mo e ʻOtuá.
Fiefia Fakafāmili ʻi he Haʻu, ʻo Muimui ʻIate Aú
Ko Hono Ikunaʻi ʻo e Filí ʻo fakafou ʻia Sīsū Kalaisí
Fakahā
“Pea naʻa nau ikuna [ʻa Sētane] ʻaki ʻa e taʻataʻa ʻo e Lamí, mo e lea ʻo ʻenau fakamoʻoní” (Fakahā 12:11).
-
Fehuʻi ki he kau mēmipa ʻo e fāmilí pe ʻoku anga fēfē nai ʻa e feinga ʻa Sētane ke fakamamahiʻi, ʻahiʻahiʻi, pe kākaaʻi kinautolú. Hiki ʻeni ʻi ha laʻipepa.
-
ʻOange ki he tokotaha kotoa pē ha laʻipepa lanu kulokula ke ne fakafofongaʻi ʻa e Fakalelei ʻa Kalaisí, pe “taʻataʻa ʻo e Lamí.”
-
Fakaafeʻi ʻa e tokotaha takitaha ke fili ha potufolofola manako fekauʻaki mo e Fakalelei ʻa Kalaisí pe fakaʻaongaʻi ha taha ʻo e ngaahi meʻá ni: Mātiu 26:26–28; ʻEfesō 1:7; Hepelū 9:14, 22; 1 Sione 1:7; Fakahā 5:9; Mōsaia 3:11, 15, 18; ʻEta 13:10–11.
-
ʻAi ke hiki ʻe he tokotaha takitaha ha ngaahi kupuʻi lea mei heʻenau potufolofola kuo filí ʻi heʻenau laʻipepa kulokulá. ʻE lava ke hiki ʻe he tokotaha takitaha ʻenau fakamoʻoní ʻi lalo ʻi he veesi folofolá.
-
Vahevahe ʻa e ngaahi potufolofolá mo e ngaahi fakamoʻoní. Fakapipiki ʻa e ʻū laʻipepa kulokulá ʻi ʻolunga ʻi he laʻipepa mei he sitepu 1.
Fealēleaʻakí: Ko e hā ha ngaahi founga ʻoku tokoniʻi ai kitautolu ʻe Sīsū Kalaisi ke tau ikunaʻi ʻa Sētané?