“Te u Ikunaʻi Fēfē Nai ʻa e Māmaní?,” Liahona, Sune 2023.
Haʻu, ʻo Muimui ʻIate Au
Te u Ikunaʻi Fēfē Nai ʻa e Māmaní?
Naʻe tohi ʻe Sione ʻe maʻu ʻe he kāingalotu ʻo e Siasí ʻoku nau ikunaʻi ʻa e māmaní ha ngaahi tāpuaki maʻongoʻonga (vakai, Fakahā 2–3). Neongo ʻe hoko mai ha niʻihi ʻo e ngaahi tāpuaki ko ʻení hili ʻetau aʻusia fakamatelié, ka naʻe ʻomi ʻe Palesiteni Lāsolo M. Nalesoni ha ngaahi sīpinga ʻo e ngaahi tāpuaki kehe te tau lava ʻo maʻu ʻi he taimí ni ʻi heʻetau fili ke muimui fakaʻaho ki he Fakamoʻuí. ʻOku fakamatalaʻi fakanounou ha niʻihi ʻo e ngaahi tāpuaki ko iá ʻi lalo.
Ngaahi Tāpuaki ʻOku Maʻu ʻi he Taimi Ní
-
Fakafepakiʻi mālohi ange ʻa e angahalá
-
Fakatupulaki ʻa e tui mo e ʻofa ki he Tamai Hēvaní mo Sīsū Kalaisí
-
Nonga moʻoni ʻi ha faʻahinga tūkunga pē1
Ngaahi Fehuʻi ke ʻEke Kiate Koe Pē
ʻOku faʻa fiemaʻu ʻi he ngaahi tāpuaki ko ʻení ke tau feilaulau. ʻI hoʻo fekumi ki ha fakahā fakataautaha ki he founga te ke lava ai ʻo ikunaʻi ʻa e māmaní, fakakaukau ke ʻeke kiate koe ʻa e ngaahi fehuʻi ko ʻení:
-
Ko e hā ha ngaahi tāpuaki ʻoku ou fiemaʻu mei he ʻEikí?
-
Ko e hā ʻokú ne taʻofi au mei hono maʻu kinautolú?
-
Ko e hā ha fanga kiʻi liliu iiki te u lava ʻo fai ʻi heʻeku moʻuí ke maʻu ai kinautolu?
Manatuʻi, hangē ko e akonaki ʻa Palesiteni Nalesoní, “ʻoku hōifua ʻa e ʻEikí ki he feingá.”2 ʻOku ʻafioʻi ʻe he Fakamoʻuí hoʻo ngaahi feingá (vakai, Fakahā 2:2) pea te Ne poupouʻi koe ʻi ha founga pē te Ne lava ai, ʻi hoʻo feinga ke ofi ange kiate Iá.