“Ko e Meʻaʻofa He ʻIkai Teitei Ngalo ʻIate Aú,” Liahona, Tīsema 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Meʻaʻofa He ʻIkai Teitei Ngalo ʻIate Aú
Naʻá ku ongoʻi ha ueʻi taʻeueʻia ko e fāmili ʻeni naʻe fiemaʻu ke mau tokoniʻí.
Tā fakatātaaʻi ʻe Anastasia Suvorova
ʻI ha taʻu ʻe taha ʻi he Kilisimasí, naʻe fakakaukau ai hoku fāmilí ke foaki ʻa e paʻanga naʻa mau mei fakaʻaongaʻi ʻi ha ngaahi meʻaʻofa maʻamautolú ki ha fāmili te nau fiemaʻu ʻa e tokoní. Naʻa mau lotua ke ʻilo pe ko hai te mau tokoniʻí. Naʻá ku faʻo ʻa e paʻangá ʻi ha sila ʻi heʻeku pēsí koeʻuhí ke u mateuteu ʻi he taimi ʻe hoko mai ai ʻa e ueʻi ko iá.
ʻI ha ngaahi ʻaho siʻi kimuʻa ʻi he Kilisimasí, naʻe ʻalu ʻeku fānaú ʻo fakapaheke. ʻI heʻeku aʻu atu ki he tafungofungá ke ʻomi kinautolú, naʻá ku siofi ʻenau toe fakapaheke fiefia fakaʻosi hifo ʻi he foʻi tafungofungá.
Naʻe ʻikai fuoloa kuó u fakatokangaʻi ha ongo kiʻi tamaiki fefine naʻe ʻikai ke na tui ha vala māfana ki he momokó. Naʻá na tui ha puti fakaʻuha, talausese ʻoku ʻi ai ha ngaahi avaava ʻi he tuí, sāketi ki he faʻahitaʻu failaú, mo ha kofunima taki taha mei ha hoa kofunima tatau. Naʻá na fiefia ʻi heʻena heheke hifo ʻi he foʻi tafungofungá ʻi ha laʻipuha pepa.
ʻI heʻeku mamata ki heʻena lele hake ʻi he tafungofungá ki heʻena faʻeé, naʻá ku ongoʻi pau ko e fāmili ʻeni naʻe fiemaʻu ke mau tokoniʻí. Naʻá ku lue atu ke talanoa ki he faʻeé. ʻI heʻene tafoki maí, naʻá ku ʻohovale ʻi heʻeku sio atu ʻoku ou ʻiloʻi iá.
Naʻá ku hoko ʻi he taʻu ʻe hongofulu kimuʻá, ko e faiako ʻaʻahi ki he fefine ko ʻení. ʻI he taimi ko iá, naʻá ku taʻo mā ʻi ha ʻaho ʻe taha peá u ongoʻi ʻoku totonu ke u ʻave ha foʻi mā maʻana. Ka ʻi heʻeku fakaʻuli atu ki hono ʻapí, ne u fakatokangaʻi ha kā foʻou ʻi heʻene tauʻanga meʻalelé. Naʻá ku fakakaukau mahalo ʻoku ʻi ai ha kakai ʻi hono ʻapí, pea naʻe ʻikai ke u loto ke fakahohaʻasi ia. Ko ia, ne u tafoki ʻo foki ki ʻapi.
Hili ha haafe houa mei ai, naʻe telefoni mai ʻa e palesiteni Fineʻofá ʻo kole pe ʻe lava ke u ʻalu ki he ʻapi ʻo e fefine ko ʻení ʻo tokangaʻi ʻene fānaú. Naʻá ne ʻi falemahaki, pea naʻe haʻu ʻene faʻeé ke nofo mo e fānaú ka naʻá ne loto ke ʻalu ʻo tokangaʻi hono ʻofefiné. Naʻá ku fakavavevave atu ka naʻá ku ongoʻi mā ʻi he ʻikai ke u muimui ki he ueʻi ne u maʻu kimuʻá. Talu mei he ʻaho ko iá, mo ʻeku feinga hoku lelei tahá ke muimui ki he ngaahi ueʻi mei he Laumālié, ka naʻe kei ongo pē kiate au ʻa e aʻusia ko ʻení.
ʻOku ou houngaʻia ʻi heʻeku toe fetuʻutaki mo e fefine ʻofeiná ni. ʻI he ʻaho ko iá, naʻe ʻikai ngata pē ʻi hono tali ʻe he Tamai Hēvaní ʻa e ngaahi lotu naʻe fai ʻe hoku fāmilí ke maʻu ha fāmili ke tokoni ki aí, ka naʻá Ne toe tāpuakiʻi foki au ʻaki ha faingamālie ke u fakamolemoleʻi ai au ʻi ha fehalaaki kimuʻa. Naʻe ʻikai ke u ʻamanaki ki he meʻaʻofa ko ʻení, ka ko ha meʻaʻofa he ʻikai toe ngalo ʻiate au.