“Talitali Lelei Ia ki Hotau ʻApí,” Liahona, Tīsema 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Talitali Lelei Ia ki Hotau ʻApí
Naʻe fakamanatu mai ʻe hoku mokopuna fefiné ʻoku mahuʻinga ke foaki kia Sīsū Kalaisi ha potu makehe ʻi heʻetau moʻui fakaʻahó.
Tā fakatātaaʻi ʻe Anastasia Suvorova
Lolotonga ha faʻahitaʻu Kilisimasi kimuí ni mai, naʻá ku tokangaʻi hoku mokopuna fefine taʻu faá ʻi ʻapi. ʻOku ʻikai mālohi ʻene ongomātuʻá ʻi he Siasí.
Naʻá ku fakaʻaongaʻi lelei homa taimí ke teuteuʻi fakataha mo ia ʻeku fuʻu ʻakau Kilisimasí. ʻI heʻene sio ki heʻeku ngāue fakameaʻa ʻo e ʻAloʻí, ʻa ia ne u ʻosi fokotuʻutuʻú, naʻe hā mei hono fofongá naʻá ne puputuʻu. Naʻá ku kamata leva ke fakamatalaʻi ange ʻi ha founga faingofua ʻa e talanoa ki he ʻaloʻi ʻo Sīsū Kalaisí. Naʻá ku fakamatalaʻi ange ki ai ʻe hoko ʻa e pēpē ko Sīsuú ko e tangata lelei taha ʻi he māmaní, te Ne hoko ko ha Tuʻi maʻongoʻonga, pea te Ne tokoniʻi maʻu pē kitautolu.
Naʻá ku talaange koeʻuhí naʻe ʻikai maʻu ʻe Mele mo Siosefa ha feituʻu ke na mohe ai, naʻe pau ai ke na nofo ʻi ha fale tauhiʻanga ʻo e fanga monumanú pea naʻe ofi atu pē ʻa e fanga monumanú kiate kinaua. Naʻá ne toe puputuʻu ange.
ʻI heʻema feohi ʻi he ʻaho ko iá, naʻá ne toutou haʻu pē ki he ngāue fakameaʻa ʻo e ʻAloʻí mo ʻunuakiʻi holo honau ngaahi tuʻuʻangá. ʻI he taimi naʻe ʻikai ke ne fakatokangaʻi aí, naʻá ku vakaiʻi pe naʻá ne ʻunuakiʻi kinautolú ki fē. ʻI he taimi takitaha, naʻá ne toʻo ʻa e pēpē ko Sīsuú mei he ʻaiʻangakai ʻo e manú pea ʻunuakiʻi ʻa e fanga moa pelesitikí mo e fanga monumanu kehé mei he ʻaloʻiʻanga ʻo Sīsuú. Naʻá ku fakafoki kinautolu ki honau tuʻuʻangá, ka naʻá ne toe foki mai pē ʻo ʻunuakiʻi kinautolu.
ʻI he efiafi ko iá, hili ʻa e mohe hoku mokopuna fefiné, naʻá ku fakatokangaʻi hono fakaʻefihiaʻi ʻo e fanga kiʻi motuʻa moá ʻi loto ʻi ha fanga kiʻi fale pepa ʻi he tafaʻakí, naʻe tuku ʻa e fanga monumanu kehé ki tuʻa ke nau kaikai, pea toe toʻo ʻa e pēpē ko Sīsuú mei he ʻaiʻangakai ʻo e manú. Naʻe toki mahino kiate au.
Hili ʻa e fanongo hoku mokopuna fefiné ki he talanoa ʻo hono ʻaloʻi ʻo Sīsuú, naʻá ne fakakaukau ʻoku ʻikai totonu ke nofo ha kiʻi tamasiʻi mahuʻinga pehē ʻi ha feituʻu ʻoku ʻikai ke fakafiemālie mo ʻikai fakatupu moʻui lelei. Kuó u fakahīkihikiʻi lahi ʻa e Fakamoʻuí ʻo ʻikai ke ne lava ʻo tuku Ia ʻi he ʻaiʻangakai ʻo e manú ke takatakaiʻi ʻe he fanga monumanú.
Naʻe fakamanatu mai ʻe hoku mokopuna fefiné ʻoku mahuʻinga ke foaki ki hotau Fakamoʻuí ha potu makehe ʻi heʻetau moʻui fakaʻahó. Naʻá ne toe fakamanatu mai foki kuo pau ke ʻoua naʻa tau hangē ko e kau tauhi fale tali-fonongá naʻe ʻikai fakaʻatā ha potu moʻó e fāmili ʻo Sīsuú. Ka ʻoku fiemaʻu ke tau talitali lelei ʻa Sīsū ki hotau ngaahi ʻapí mo hotau lotó ʻi heʻene hoko ko e Pilinisi ʻo e Melinó.