Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní

ʻUfiʻufi ʻi he Lalo ʻAkau Kilisimasi ʻa Seiloní

Fai ʻe Tammy C. Wood, Nevata, ʻIunaiteti Siteiti ʻo ʻAmeliká

Naʻe hoko kiate au ʻa e meʻaʻofa hoku tokoua-ʻi he-fonó ko ha fakataipe ʻo e Fakalelei ʻa Sīsū Kalaisí.

Tā fakatātaaʻi ʻe Anastasia Suvorova

Lolotonga ʻeku ʻi he kolisí mo hoku husepānití pea hili mo ha ngaahi taʻu lahi mei ai, naʻá ma tōnounou fakapaʻanga maʻu pē. Naʻe ʻikai te u kumi ha ngaahi meʻaʻofa, ka naʻá ku ngaohi pē kinautolu. Naʻá ku ngaohi ʻi ha taʻu ʻe taha ha ngaahi ʻufiʻufi ki he lalo ʻakau Kilisimasí ke foaki maʻa hoku ngaahi tokouá mo e tokoua-ʻi he-fonó.

Naʻá ku tānaki fakataha ha ngaahi naunau mo ha ngaahi toetoenga tupenu lanu mata, kulokula mo hinehina pe fakataha ai ʻa e ngaahi lanu ko iá. Ko e lahi taha ʻo e ngaahi tupenú naʻe ʻikai ke paaki faka-Kilisimasi ia. Naʻá ku kosi kinautolu ki ha fanga kiʻi tapafā pea tuitui fakataha kinautolu ke ngaohi ;a e ngaahi ʻufiʻufi ki he lalo ʻakaú. Naʻe ʻi he ʻufiʻufi takitaha ha ngaahi tupenu kehekehe.

Naʻa mau ʻalu ʻi he Kilisimasi ʻo e taʻu ko iá ki he ʻapi hoku fāmili-ʻi he-fonó. Naʻe nofo ofi mai pē ʻa Seiloni, ko hoku tokoua-ʻi he-fonó, ko ia naʻa mau ō ke ʻaʻahi ki hono fāmilí mo ʻave ʻemau ngaahi meʻaʻofá.

Naʻá ku kiʻi loto-mamahi ʻi heʻeku sio atu ki heʻene lalo ʻakaú ki ha foʻi ʻufiʻufi fakaʻofoʻofa kuo hokohoko mo tuitui lelei naʻe ngaohi ʻaki ha ngaahi tupenu faka-Kilisimasi pea teuteu mo e ngaahi tafatafaʻakí. Naʻe mohu talēniti ʻa Seiloni ʻi he tuituí, ngaahi monomonó, teuteu meʻá, niti teuteú, lālangá mo ha ngaahi pōtoʻi ngāue kehe. Naʻá ne ngaohi ʻa e ʻufiʻufí ʻi he konga kimuʻa ʻo e taʻu ko iá.

Naʻe ʻikai ke u toe lava ka ne u fakahoa ʻene foʻi ʻufiʻufi fakaʻofoʻofá ki heʻeku kiʻi ʻufiʻufí. Naʻá ku mā ke foaki ia kiate ia. Naʻá ku talaange ʻe mahino kiate au kapau naʻe ʻikai ke ne fie fakaʻaongaʻi ia.

ʻI he taimi naʻá ma fakaava ai ʻema meʻaʻofa meia Seiloni ʻi he taʻu hono hokó, naʻá ma ʻohovale ʻi heʻene foaki mai kiate kimaua ʻa e ʻufiʻufi naʻá ku fakaʻofoʻofaʻia ai ʻi he taʻu kimuʻá. Naʻá ne tali lelei ʻeku kiʻi meʻaʻofa faingofuá peá ne ʻomi kiate kimaua ha meʻaʻofa lelei ange.

Hili ha fefaʻuhi ʻa Seiloni mo ha mahaki fakaesino ʻi ha taʻu ʻe 12, naʻá ne mālōlō ʻi hono taʻu 38 pē. ʻI he ngaahi taʻu siʻi kuohilí, ʻi heʻeku fofola takatakai ʻene ʻufiʻufi ʻakau Kilisimasí ʻi heʻemau fuʻu ʻakaú mo fakakaukau kiate iá, naʻe hoko ʻa e ʻufiʻufí ko ha fakataipe ʻo e meʻaʻofa ʻo e Fakaleleí ʻoku foaki mai ʻe he Fakamoʻuí maʻatautolú. Neongo pe ko e hā ʻa e lelei ʻoku tau fakaʻamu ki aí, ka ʻoku tau matelie kotoa pē, ʻo ʻi ai ʻetau ngaahi tōnounou mo e vaivaiʻanga. ʻOku ʻikai ke tau haohaoa, ʻo hangē ko e ʻufiʻufi faingofua ki he lalo ʻakaú naʻá ku foaki kia Seiloní.

ʻI hono fakafehoanaki ki he maʻongoʻonga ʻo e moʻui ʻa e Fakamoʻuí, te tau tōnounou maʻu pē. Ka ʻo kapau te tau fai hotau lelei tahá ke foaki ki he Fakamoʻuí ha loto-mafesifesi mo ha laumālie fakatomala, te Ne foaki mai leva ʻa e ngaahi tāpuaki ʻo ʻEne Fakalelei fakaʻofoʻofá. ʻOku tau maʻu ha meʻa ʻoku maʻongoʻonga ange ia ʻi heʻetau meʻaʻofa kiate Iá.

ʻOku ou houngaʻia ʻi he fakamanatu makehe ʻoku ʻomi ʻe he ʻufiʻufi ki he lalo ʻakaú kiate au fekauʻaki mo ʻEne Fakaleleí.