“Ko Hoku Fakamoʻuí ʻa e Meʻa Mahuʻinga Taha Kiate Aú,” Liahona, Tīsema 2023.
Ngaahi ʻAta ʻo e Tuí
Ko Hoku Fakamoʻuí ʻa e Meʻa Mahuʻinga Taha Kiate Aú
ʻOku ʻomi ʻe Sīsū Kalaisi ʻEne ongoongoleleí kiate kitautolu ʻi ha founga faingofua. ʻOkú Ne tokoniʻi kitautolu ʻi he halá. Kapau te tau muimui kiate Ia, ʻe lelei ʻa e meʻa kotoa pē.
ʻŪ faitā ʻa Leslie Nilsson
Naʻá ku faʻa sio ki he ongo faifekau taimi kakató ʻi Siela Lione, ka naʻe ʻikai ke u vāofi mo kinaua koeʻuhí naʻe kehe ʻeku tuí. Kimui ange ʻi haʻaku fetaulaki mo kinaua ʻi ha tauʻanga pasi ʻi Uāsingatoni D.C., naʻe kamata ke na fakamatala mai kau ki he Fakamoʻuí mo ʻEne ʻofa ʻiate aú. Naʻá na fakaafeʻi au ki he lotú, ko ia naʻá ku ʻalu.
Ko e ʻuluaki meʻa naʻá ne ʻai ke u ʻiloʻi ko e feituʻu ʻeni ʻoku totonu ke u ʻi aí ko e talitali lelei mei he kāingalotu ʻo e Siasí. Naʻe fāʻofua mai ha fefine kiate au peá u ongoʻi ʻi heʻeku fakakaukaú, “ʻOku talitali lelei koe heni. ʻE lava ke ke toe foki mai.” Ne u pehē, “SAI.”
ʻOku haʻu ʻa e Laumālié mo e kau faifekaú ʻi he taimi ʻoku nau hū ai ki homou falé, pea nau tuku ia mo koe. ʻOku ngāue ʻa e Laumālié mo koe pea liliu koe. Naʻe tupu ʻeku liliú mei he moʻoni ʻo e meʻa naʻe talamai ʻe he ongo faifekaú mo e ʻofa naʻá ku ongoʻí.
Naʻe akoʻi ʻe he ongo faifekaú ʻoku ʻofa ʻa e Tamai Hēvaní ʻiate au, ko Hono ʻofefine au, pea ʻokú Ne finangalo ke fakataha ʻa e ngaahi fāmilí kotoa ʻo taʻengata. Naʻá ku faʻa tui ko e taimi ʻokú te mate aí, ʻoku tau ʻalu ʻi ha ngaahi hala kehekehe pea ʻoku māvahevahe ʻa e tokotaha kotoa pē. Ka ʻi he Siasí, ʻoku tau tui ʻokú te lava ʻo toe sio ki hoto fāmilí. Naʻe ongo ia ki hoku lotó. Naʻá ku fiemaʻu ia maʻaku, pea naʻá ku fiemaʻu ia maʻa hoku fāmilí.
Naʻe pau ke u telefoni ki heʻeku fānau ʻe toko tolú ʻo talaange kiate kinautolu. Naʻá ku fie vahevahe ʻa e ʻofa naʻe fakahaaʻi mai ʻe Kalaisi kiate aú.
Naʻá ku talaange kiate kinautolu, “Naʻá ku fetaulaki heni mo ha ongo faifekau. Naʻá na akoʻi mai ʻa e meʻa ko ʻení. Naʻá na akoʻi mai ʻa e meʻa ko ʻeé.” Naʻá ku talaange ke na ʻalu ʻo vakaiʻi ʻa e Siasí.
ʻOku kau kotoa ʻeku fānaú ki he Siasí ʻi he taimí ni, naʻa nau papitaiso ʻi Siela Leone. ʻOku fie ʻalu foki hanau taha ʻo ngāue fakafaifekau. Ko e lelei ia ʻo Kalaisí. ʻOku kau mai foki mo ha kau mēmipa kehe ʻo e fāmilí ki he Siasí, ka ʻoku momou ha niʻihi. ʻOku ou kei fakahā pē ʻa Kalaisi kiate kinautolu.
Ko Ho Fāmili Foʻoú
ʻOku ou taʻelata ʻi he ʻofa ki heʻeku fānaú, pea ʻoku nau taʻelata ʻi he ʻofa mai kiate aú. Ka naʻá ku talaange, “ʻOku ʻikai ke u ʻi Siela Leone, ka ʻoku ʻi ai ʻa e Siasí. Ko e Siasí homou fāmili foʻoú.” ʻOku tupulaki ai ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI heʻeku fanongo ʻe langa homau temipale ʻi Siela Leoné, naʻá ku tuʻu hake ʻo punopuna. ʻOku nonga ʻaupito ʻa e temipalé. ʻE hoko ia ko e fale fakaʻofoʻofa taha ʻi he fonuá kotoa.
Talu ʻeku kau ki he Siasí mo hono tāpuekina lahi au. ʻOku ou lava ʻo fai ha ngaahi meʻa ʻi he taimí ni naʻe ʻikai ke u teitei ʻilo te u lava ʻo fai. ʻOku ou lava ʻo tā hiva. ʻOku ou lava ʻo akoʻi ʻa e fānau ʻi he Palaimelí. ʻOku ou ʻofa ʻiate kinautolu, pea ʻoku nau ʻofa foki ʻiate au. ʻOku ou lava ʻo hiva ʻi he kuaeá. Naʻá ku hiva foki ʻi he kuaeá ʻi he fakatahaʻanga ʻo e pongipongi Sāpaté ʻi hono fakatapui ʻo e Temipale Washington D.C. ʻi ʻAokosi 2022. Naʻe ʻikai ke u teitei fakakaukau te u ʻi he temipalé mo Palesiteni Lāsolo M. Nalesoni, ʻo hiva maʻana. Ka naʻe hoko ia. Naʻe hoko ia ko ha tāpuaki fakaʻofoʻofa ke ʻi he ʻao ʻo e palōfitá.
Ko e taha hoku ngaahi veesi folofola manakó ʻa e 2 Nīfai 28:30: “Te u foaki ki he fānau ʻa e tangatá ʻa e ʻotu lea ki he ʻotu lea, ʻa e akonaki ki he akonaki, ko e siʻi ʻi heni pea siʻi ʻi hena.” Ko e founga ia ne ʻomi māmālie ai au ʻe he ʻOtuá.
ʻOku ʻikai mahino kiate au ʻa e meʻa kotoa pē, ka ʻoku ou ako ʻi he ʻaho kotoa pē. ʻOku ʻomi ʻe he polokalama Gospel Library ʻa e Siasí ʻi he ʻaho kotoa pē ha potufolofola kiate au. ʻOku ou lau ia mo fakalaulauloto ki ai kimuʻa peá u toki ʻalú. ʻOku ou lotu leva ki he Tamai Hēvaní. Ko e founga ia ʻoku ou moʻui aí, ʻo ako ha kiʻi meʻa lahi ange ʻi he taimi kotoa pē. Ko ha tāpuaki ia ke ʻiloʻi ʻa e founga ʻoku totonu ke tau moʻui aí, tatau ai pē pe ko e hā hotau tuʻungá, tatau ai pē pe ʻoku tau tuʻumālie pe masiva.
ʻE Lava Ke Liliu Koe ʻe Sīsū
ʻI heʻetau hoko ko e tangatá, ʻoku tau faʻa fakahehema ke hē, ka ʻo kapau te tau fakaʻatā ʻa Sīsū, te Ne fakafoki kitautolu ki heʻetau Tamai Hēvaní. ʻOkú Ne foaki mai ʻEne ongoongoleleí ʻi ha founga faingofua. ʻOkú Ne tokoniʻi kitautolu ʻi he halá. Kapau te tau muimui kiate Ia, ʻe lelei ʻa e meʻa kotoa pē.
ʻOku maʻongoʻonga ʻa Sīsū. Ko Ia ʻa e meʻa mahuʻinga taha kiate aú. ʻOku ou ʻofa ʻiate Ia. ʻOkú Ne ngaohi au ke u ongoʻi ʻoku ʻofaʻi mo fakamahuʻingaʻi au, ʻo hangē ha fānau ʻa e Tamai Hēvaní. ʻE lava ke liliu koe ʻe Sīsū ʻi he taimi ʻokú ke ofi ai kiate Iá—ʻa e anga hoʻo talanoá, founga hoʻo fai ʻa e ngaahi meʻá, naʻa mo ho anga fakafonuá.
Naʻe ʻilo au ʻe he ongo faifekaú, pea naʻá ku tali ʻa Sīsū ki heʻeku moʻuí. ʻOku ou fiefia ʻi heʻeku ʻilo Iá. Kuó Ne ngaohi au ko ha tokotaha foʻou. Kuo mole atu ʻa e ngaahi meʻa motuʻá. (Vakai, 2 Kolinitō 5:17.)
ʻOku ʻikai ke u ʻilo pe ko e hā ʻe hoko kiate au ʻi he kahaʻú. ʻOku ʻafioʻi ia ʻe he Tamai Hēvaní. Ko ʻeku palaní ke maʻu ha ako lahi ange pea fokotuʻu ha ngaahi taumuʻa ʻi he ʻEikí—ke hangē pē ko Iá, ʻaʻeva hangē ko Iá, talanoa hangē ko Iá, pea toe ofi ange kiate Ia. Ko Hono finangaló ia maʻatautolu.
ʻOku ou ʻamanaki lelei atu ke toe feʻiloaki mo Ia.