“Ko ʻEku Tetí Koe?,” Liahona, Tīsema 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ʻEku Tetí Koe?
Naʻe talamai ʻe Nalesoni kiate au, “ʻOku ʻikai ha fiefia ʻe maʻongoʻonga ange ka ko hono tokoniʻi ʻo e niʻihi kehé.”
Tā fakatātaaʻi ʻe Anastasia Suvorova
ʻI he ngaahi taʻu lahi kuohilí, naʻe telefoni mai hoku foha ko Nalesoní kiate au ʻi he efiafi kimuʻa ʻi he Kilisimasí. ʻI he uike kimuʻá, naʻe kole ange ʻe ha loea naʻe ʻikai lea faka-Sipeini ke ne hoko ko ha taha fakatonulea. Naʻe kole ʻe ha taha ʻo e kau kole faleʻi ki he loeá, ko ha tangata matuʻotuʻa ange naʻe ʻikai poto ʻi he lea faka-Pilitāniá, ke ne maʻu ʻa e ngofua fakalao ke tokangaʻi hono makapuná.
Hili ʻa e hopó, naʻe pōpoaki Faka-Kilisimasi atu ʻa Nalesoni ki he tangata matuʻotuʻá. Naʻe tali ange ʻe he tangatá ʻe hoko ʻa e Kilisimasi ʻo e taʻu ko iá ko ha taimi fakamamahi. Naʻá ne faingataʻaʻia fakapaʻanga ke tauhi hono fāmilí. ʻIkai ngata aí, naʻe toki mālōlō siʻono ʻofefine taʻu 29, kae tuku mai ha kiʻi fānau iiki ʻe toko nima, ʻa ia ko e siʻisiʻi tahá ko e taʻu ua. Naʻe ʻi he fale fakapōpulá ʻenau tangataʻeikí, pea ʻe ʻave leva ʻe he tangatá mo hono uaifí ʻa hona makapuná.
ʻI he ongo kia Nalesoni mo e loeá ʻa e tūkunga ʻo e tangatá, naʻá na fakatou fakakaukau ai ke ʻoua naʻá na ʻeke ha totongi ki heʻena ngāué. Naʻe kole leva ʻe Nalesoni ʻa e ngaahi hingoa mo e taʻu motuʻa ʻo e fānaú pea mo e tuʻasila ʻo e tangatá.
ʻI he pō ko iá, naʻe ʻikai lava ʻa Nalesoni ʻo mohe ʻi heʻene fakakaukau pe ko e hā ha founga te ne lava ai ʻo tokoniʻi ʻa e fāmilí. ʻI heʻene tūʻulutui ʻo lotua kinautolú, naʻá ne ongoʻi naʻe ueʻi ia ke ne fai ha tohi, ʻo fakamatalaʻi ʻa e tūkunga ʻo e fāmilí, vahevahe ʻa e hingoa mo e taʻu motuʻa ʻo e fānaú, mo kole ha ngaahi meʻaʻofa ke foaki mai. ʻI he ʻaho hono hokó naʻá ne tufaki ha ngaahi tatau ʻo e tohí ki he kau fakamāú, kau loeá, mo e kau ngāue kehe ʻi he fale fakamaauʻangá.
Naʻe lahi fau ʻa e tokoní ʻo ʻikai fuoloa kuo fonu ʻa e puti mo e ngaahi nofoʻanga ʻene kaá ʻi ha ngaahi meʻaʻofa. Naʻe foaki ʻe kinautolu naʻe ʻikai hanau taimi ke fakatau mai ha ngaahi meʻaʻofá ha paʻanga maʻá e fāmilí.
Naʻe pehē ʻe Nalesoni, “Mama, ʻoku tokolahi ha kakai lelei ʻi he māmaní. Kapau pē naʻá ke lava ʻo sio ki heʻenau tokoní! Naʻá ku kole ha meʻaʻofa pē ʻe taha maʻá e fānau takitaha, ka naʻe foaki mai ha ngaahi meʻa lahi.”
Naʻe aʻu atu ʻa Nalesoni ki he ʻapi ʻo e fāmilí ʻi he Efiafi Kimuʻa ʻi he Kilisimasí. Naʻe vēkeveke mo fiefia ʻa e fānaú ʻi heʻenau tokoni ke fakahifo ʻa e ngaahi meʻaʻofá mei heʻene kaá. Naʻe kalokalo pē ʻenau kui tangatá mo e kui fefiné ʻi heʻena ʻohovalé.
ʻI he taimi naʻe tangutu hifo ai ʻa Nalesoni ʻo mālōlō ʻi ha kiʻi miniti siʻi kimuʻa peá ne mavahé, naʻe lue atu ʻa e kiʻi tamasiʻi taʻu uá kiate ia ʻo kaka hake ki hono fungá. Pea ʻi heʻene ala atu ki he fofonga ʻo Nalesoní, naʻá ne fehuʻi ange, “Ko ʻeku tetí koe?”
Naʻe tangi ʻa Nalesoni, ʻo fakamālō kiate kinautolu ne nau tokoni ke fakafiefiaʻi ʻa e Kilisimasi ʻo e fāmilí.
Naʻá ne pehē, “Mama, ʻoku ʻikai ha fiefia ʻe toe mahulu ange ʻi he tokoni ki he niʻihi kehé. ʻOku ou houngaʻia ʻi heʻeku hoko ko ha meʻangāue ʻi he toʻukupu ʻo e ʻOtuá ke faitāpuekina ʻa e fāmili lelei ko ʻení.”
Naʻe hoko ʻa e fiefia ʻa Nalesoní ko hano fakahaaʻi ia ʻo e akonaki ʻa e Fakamoʻuí “ʻoku monūʻia lahi hake ʻa e foaki atú ʻi he maʻu ʻa e foaki maí” (Ngāue 20:35).