Armej eo Eaorōktata ilo Bok in Mormon

Elōn̄ iiō remootļo̧k, rikarejar jeiū im jatū em̧m̧aan ro raar karuwaineneik eō n̄an lukkuun ekkatak kōn Bok in Mormon. Ke raar letok kūr in, iaar kile bwe, men̄e iaar riit jidik kajjojo raan jān Bok in Mormon, ak iaar jab m̧ool ilo aō lukkuun ekkatak kake.

Raar kwaļo̧k juon kallim̧ur ippa bwe eaar pedped ioon naan ko jān Būreejtōn Ezra Taft Benson: “Ewōr juon kajoor ilo [Bok in Mormon] eo enaaj jino ibweebtok ilo mour ko ami ilo iien eo kwom̧wij jino lukkuun m̧oolin ekkatak kōn Bok in Mormon. Kwonaaj lo eļapļo̧k kajoor n̄an jum̧ae kapo … n̄an bōbrae m̧ōņ … n̄an pād ilo iaļ eo erānin̄ im eaidik” (Teachings of Presidents of the Church: Ezra Taft Benson [2014], 141).

Iaar bōk kūr in, im ilo allōn̄ ko tok iaar lo bwe kallim̧ur eo aer eaar kūrm̧ool. Ekar ukōt mour eo aō.

Juon un eļap ilo an Bok in Mormon letok n̄an kōj jetōbin kajoor ej bwe en kepaakļo̧k kōj n̄an Jisōs Kraist. Ilo ennaan eo an Būreejtōn Henry B. Eyring ilo peij 4, eaar je, “Ro rej lukkuun riiti Bok in Mormon, mour kōn katak ko ie, im jar kōn m̧ool eo enaaj en̄jake jetōb Kwojarjar n̄an kōļapļo̧k aer tōmak ilo, im naan in kam̧ool kōn, Rilo̧mo̧o̧r.”

Jisōs Kraist ej E eo eaorōktata ilo Bok in Mormon. Ke rijeje rijipan̄ eo aō, Madison Sinclair, im n̄a kar kwaļo̧k ilo ennaan eo am̧ro, “Jesus Christ in the Book of Mormon” (peij 10), ewōr elōn̄ļo̧k jen 7,000 jeje ko kake Rilo̧mo̧o̧r ilo Bok in Mormon.

Ijeļā bwe ilo ad ekkatak kōn Bok in Mormon iiō in kōn Itok, Ļoor Eō, jenaaj epakeļo̧k Jisōs Kraist.

Kōn Iakwe,

John Hilton III

Rūkaki in Kaļōj eo etijemļo̧k kōn Jeje ko Rekwojarjar, Brigham Young University