“Jisōs Kraist ilo Bok in Mormon,” Liaona, Jān. 2024.
Jisōs Kraist ilo Bok in Mormon
Ewōr jete alen an waļo̧k etan Irooj ilo Bok in Mormon?
Wōn eo kwomaron̄ ba eaorōktata ilo Bok in Mormon? Ilo an jet maron̄ ba Nipai, Alma, ak Mormon, eo eaorōktata ej Jisōs Kraist. Nipai eaar je:
“Kōmij niknik jerbal n̄an jeje, n̄an karreel būruōn ro nejim … n̄an tōmak ilo Kraist. …
“Im jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, jej kanaan kōņ Kraist” (2 Nipai 25:23, 26).
Ilo 1978, Susan Ward Easton eaar je juon bok, ej kōmeļeļeik bwe Jisōs Kraist ej eo eaorōktata ilo Bok in Mormon. Liin ekar kwaļo̧k taitōļ ko roktak an Jisōs Kraist im kar kwaļo̧k bwe Etan ak taitōļ ekar waļo̧k 3,925 alen ilo Bok in Mormon, eo ej jon̄an 1.7 aolep eoon ko.1
Ekkatak in eaorōk ej kwaļo̧k aorōk eo an Rilo̧mo̧o̧r ilo Bok in Mormon, ijoke, eļap likjab in bōnbōn in ikutkut eo me ej waļo̧k etan Kraist ilo aer kōjenelo̧k naan ko me rej iokļo̧k E.
Ilo m̧ool, eoon in jipan̄ ko rej kwaļo̧k kōn Jisōs Kraist ejjab lukkuun aorōk eo n̄an ekkatak kōn Bok in Mormon; ijoke, kajjojo eoon in jipan̄ kōn E emaron̄ katakin kōj kōn kwojarjar im mijen eo An. Kōm kar lukkuun lin̄ur Bok in Mormon, pukot aolep men rej kwaļo̧k kōn Jisōs Kraist, ekitbuuj taitōļ ko im naan ko. Kōm kar loe 7,452 oraņ eoon in jipan̄ ko—elōn̄ļo̧k oraņ jen juon eoon in jipan̄.2 Taitōļ in bwebwenato in Kraist enan̄in 50 bōjjāān in eoon in jipan̄ ko kōn Kraist ilo Bok in Mormon, ippān tok naan in kakeememej ko rej waļo̧k.
Pukot Jisōs Kraist ej letok juon wāween eo ejenoļo̧k n̄an jeļā kōn E. Ļōmņake elmen an eoon in kwaļo̧k kōn E: “jino tōmak ilo Nejin Anij, bwe Enaaj itok n̄an lo̧mo̧o̧ren armej ro an, im bwe Enaaj en̄taan im mej n̄an pinmuur kōn jeo̧rawiwi ko aer; im bwe Enaaj bar jerkak jān ro remej, eo enaaj kakūrm̧ool jerkakpeje, bwe aolep armej renaaj jutak Im̧aan, n̄an ekatak ilo raan eo āliktata ilo raan in ekajet, ekkar n̄an jerbal ko aer” (Alma 33:22; kakkobabain katak).
Ilo ekkatak eo an Sister Easton, eoon in ekar juon iaan eoon in jipan̄ ko kōn Kraist jān taitōļ eo “Nejin Anij.” Ijoke, etan Rilo̧mo̧o̧r ej waļo̧k 5 alen. Eoon in ej ejjab kwaļo̧k wōt bwe Jisōs Kraist ej Nejin Anij ak ej barāinwōt E eo eaar lo̧mo̧o̧ren kōj kōn Pinmuur eo An indeeo im Jerkakpeje im enaaj ad riekajet.
Bōlen ekajoor, etan Make Kraist ej waļo̧k ilo Bok in Mormon N̄an waanjon̄ak, jej riit an Rilo̧mo̧o̧r ba “Eļan̄n̄e armej rej itok n̄an Eō I naaj kwaļo̧k n̄an er m̧ōjņo̧. Ij leļo̧k n̄an armej m̧ōjņo̧ bwe ren maron̄ ettā bōro; im Aō jouj ebwe n̄an aolep armej ro rej kōttāik er Im̧āō; bwe eļan̄n̄e rej kōttāik er Im̧āō, im wōr tōmak ilo N̄a, innām Inaaj kōm̧m̧an mennin m̧ōjņo̧ ko ren eorm kajoor n̄an er” (Ether 12:27; kakkobaba in katak). Men̄e etan Kraist ejjab waļo̧k ilo eoon in, ak etan Rilo̧mo̧o̧r Make ej waļo̧k ralitōk alen. An jerbal ej alikkar ilo ad lale Rilo̧mo̧o̧r ilo eoon in.
Eoon kein ilaļ rej kwaļo̧k en̄jake eo an make Rilo̧mo̧o̧r n̄an kajjojo armej im ta aer en̄jake kōn E.
“Kom̧in jutak im wōnm̧aantak n̄an Ippa, bwe kom̧in maron̄ karum̧ļo̧k peimi ilo katū, im barāinwōt kom̧in maron̄ en̄jake jenkwan dila ko ilo peiū im ilo neō, bwe kom̧in maron̄ jeļā bwe N̄a Ij Anij an Israel, im Anij an aolepān laļ, im kar m̧ane Eō kōn jero̧wiwi ko an laļ.
“… Jarlepju eo ar wōnm̧aanļo̧k, im karum̧ļo̧k peier ilo katin, im kar en̄jake jenkwan dila ko ilo pein, im ilo neen” (3 Nipai 11:14–15; kakkobaba in katak).
Men̄e jeban en̄jake ilo kanniōk jenkwan dila ko ilo pein im neen, ak kōn Bok in Mormon jemaron̄ kam̧wilaļļo̧k kam̧ool eo ad make kōn Jisōs Kraist.
Emakijkij in an waļo̧k etan Irooj ilo Bok in Mormon ej jipan̄ kōj lo aorōk eo An ilo jerbal in ekwojarjar. Kalikkar etan Rilo̧mo̧o̧r ilo Bok in Mormon: Bar juon Kallim̧ur Kōn Jisōs Kraist ej juon wāween ekajoor n̄an kepaakeļo̧k kōj n̄an E.