“Pukot Kemour ilo Jisōs Kraist,” Liaona, Jān. 2024.
Rūttoļo̧k ilo Tiljek
Pukot Kemour ilo Jisōs Kraist
Kōn kāāl in anemkwoj, iien ko rem̧m̧an, im iien m̧akūtkūt ko me rej waļo̧k itok wōt an ejjeļo̧k kobban m̧weo, etke iaar jab en̄jake m̧ōņōņō? Ta eo ejako?
Kōmeļeļe jān Dilleen Marsh
Iaar dānin kōmjaaļaļ ke iaar jar kōn aenōm̧m̧an ke ļaddik eo neju ediktata eaar kanne peba in mijen eo an. Ikar kōņaan bwe en etal n̄an mijen. Ikar. Iaar kajjieon̄ in kam̧ool menin ippa make.
Ij iakwe aō Rilo̧mo̧o̧r im kar mool in m̧ōņōņō kōn iien em̧m̧an eo an ļaddik eo neju n̄an kwaļo̧k gospel in bwe jen maron̄ lo lan̄lōn̄ ilo Jisōs Kraist. Ijoke en̄jake eo aō iaar mijak in kōtļo̧k e. Iaar jeļā ke emaron̄ jab nej lukkuun ro̧o̧ltok n̄an m̧weo jān mijen eo an. Men̄e ekar jokwe m̧weo, ak eban āinwōt mokta.
Ro m̧ōtta raar ba n̄an eō ke em̧m̧an an ejjeļo̧k kobban m̧weo. Kom̧ro kar ļeo ippa m̧ōņōņō im reim̧aanļo̧k n̄an iien eo emeļak im iien ko rem̧m̧an kom̧ro kar jab kōm̧m̧ane jen ke kom̧ro kar kōkaajririik ro nejumro.
Kōn anemkwoj in ekāāl, iaar kemaatļo̧k aō n̄an elōn̄ kain m̧akūtkūt ko. Iaar ito-itak ippān ļeo ippa, katak kilen kōjan̄jan̄ o̧kwōn n̄an kūr eo aō, ikkure ippān ajri ro jibu, im kar kōm̧m̧an jerbal ilo tampeļ im menmenbwij an baam̧le.
Iaar lo m̧ōņōōņō ilo ito-itak ko. Ikar lo em̧m̧anļo̧k ippa make. Ikar lo men ko rem̧m̧an.
Ak ekar wōr wōt men eo ejako. Juon men eo ekar jab pād. Ke ļaddik eo neju ekar em̧akūt, ear bōk jimettan in buruō me iaar jab maron̄ kane.
Emaron̄ juon iiō ālkin an ļaddik eo neju em̧akūt, ekar wōr jidik m̧utō āinwōt m̧utōn ko ajri ro nejū rej kijōr kōm̧m̧ane ke rej dik. Ļeo karejera eaar reitok n̄an n̄a im ba, “Michelle, kwoj aikuj kōm̧m̧ane juon jerbal in jipan̄.” Iaar je eta n̄an ebbōk jerbal in jipan̄.
Ak, iaar būrom̧ōj wōt. Iaar kajjieon̄ in kemaatļo̧k aō make n̄an jerbal in jipan̄ ak jabdewōt jerbal eo ej bōk jikin. Ilo an ajri ro aolep jako jen m̧weo, iaar en̄jake bwe mour eo eban āinwōt m̧okta.
Juon bon̄ iaar jar kōn jipan̄, Jetōb eaar jiron̄ eō ke iaar iion ajimakeke me ej itok jān jako—jako in jipadpad. Iaar ļōmņak in kōm̧ad aō jen būrom̧ōj n̄an kobrak mour eo aō kōn elōn̄ m̧akūtkūt ko rem̧m̧an.
Pukot Uwaak ko
Ke iaar pukot uwaak ko, iaar lo enaan in jān bwebwenato eo an Rikanaan Josep Smith: “N̄e jej luuj [juon men ak juon armej] me jaar kemaatļo̧k būruōd n̄an ej aikuj menin kakkōl n̄an kōj. … Iakwe ko ad raikuj pedped ilo Anij im jerbal eo an en ļapļo̧k ilubwiljin armej ro ad.”1
Juon meram̧ ekar dōplo̧ke tok marok eo ilo buruō. Iaar kajjieon̄ kobrak ron̄ in burom̧ōj eo aō kōn menko, m̧akutkut ko, im en̄jake ko—jerbal in jipan̄, iakwe, bōk tōļan ko. Aolep men otemjeļo̧k rem̧m̧an, ak raar jab pinejļo̧k būrom̧ōj eo aō. Raar jab letok kōmour eo iaar aikuji.
Iaar kile bwe kain aenōm̧m̧an im m̧ōņōņō in maron̄ itok wōt jān ad Rilo̧mo̧o̧r, Jisōs Kraist. Jisōs ekar katakin: “N̄a iaļ, im m̧ool, im mour,” (Jon 14:6). Kōn wōt E jemaron̄ lo lan̄lōn̄ im juon wōt im aenōm̧m̧an im m̧ōņōņō. Sam Ko 16:11 ej ba, “Kwōnaaj ba kajjien n̄an eō iaļ in mour: Ippam̧ lan̄lōn̄ eļaptata.”
Ekōjkan Aō kar Oktak
Mour ekar jab m̧ōkaj an oktak. Būruō eaar jab m̧ōkaj an lur. Ak iaar jeļā ia eo ij aikuj pedped ioon bwe en waļo̧k.
Aō jar rekar oktak. Iaar jino kajjitōk ippān Jemedwōj Ilan̄ n̄an jipan̄ eō kalōk juon jemdoon eo ekajoor ippān aō Rilo̧mo̧o̧r. N̄e ij ebbweer, ij kakeememej eō bwe Jisōs Kraist ej pād ijeņ n̄an eō, im kōn jouj in en̄taan eo An ekajoor, E enaaj jipan̄ eō. Aō ekkatak jān jeje ko rekwojarjar ekar jino pedped ioon jemdo̧o̧n eo aō Ippān. Ebōk iien, ak iaar wōnm̧aanļo̧k wōt n̄an leļo̧k en̄jake ko aō, aō kajoor, im aō ļōmņak n̄an Jisōs Kraist.
Ke ij kōm̧m̧ane, marok ear jakoļo̧k. Ikar lo eļap m̧ōņōņō ilo jerbal in jipan̄ ko reddik im iakwe kajjojo raan. Meram im kōjatdikdik rekar kōmeram aō iaļ im kobrak būrom̧ōj ko ilo būruō. Likūt Rilo̧mo̧o̧r m̧oktata ekar letok eļap meļeļe im lan̄lōn̄ n̄an aolep jekjek ko ilo mour eo aō, jān jerbal in jipan̄ n̄an joļo̧k iien ippān baam̧le eo, jān ito-itak n̄an kōļapļo̧k taļōn ko aō. Aolep men raar ļapļo̧k ilo an Kraist pād ioļap.
Ejenoļo̧k an kajjojo ito-itak ilo anjiwiwi ko an mour in. Ijoke, uwaak eo n̄an būrom̧ōj ko ad ej n̄an uwaake kūr eo an Kraist ke Eaar ba, “itok n̄an Eō kōn aolepān kōttōpar in bōro, im Inaaj kōmour [eok]” (3 Nipai 18:32). Kōn wōt E jemaron̄ lo kōmour, aenōm̧m̧an, iakwe, im m̧ōņōņō.
Rijeje eo ej jokwe ilo Utah, USA.