“Katak ko n̄an Un̄n̄are Peid Make: Ekkeijeli Jāān ko n̄an M̧ool ko an Gospel in,” Liaona, Jān. 2024.
Katak ko n̄an Un̄n̄are Peid Make: Ekkeijeli Jāān ko n̄an M̧ool ko an Gospel in
Katak ko n̄an un̄n̄are peid make ej jipan̄ n̄an bōk kuņaad n̄an bōktok men ko an jetōb rem̧m̧an n̄an aikuj ko aer ilo jāān.
Jet iaan kōmeļeļe ko m̧okta an Irooj n̄an ro Nejin ej kōn jerbal im un̄n̄are peid make. Ilo Kallim̧ur M̧okta, Eaar jiron̄ Adam im Iv, “Kōn menokadu in mejōṃ kwōnaaj ṃōn̄ā ekkan” (Jenesis 3:19). Im n̄an riIsrael ro, Eaar ba, “Ium̧win jiljino raan kwōn jerbal” (Exodus 20:9).
Rainin, kurup in ro rej kōm̧m̧ane un̄n̄are peid make an Kabun̄ in ilo peļaakin laļin rej jipan̄ ro nejin Anij kōkm̧anm̧anļo̧k jeļāļo̧kjeņ eo aer, jino ekkeke, pukōt jerbal ko rem̧m̧anļo̧k, jino peejnej ko, im—ilo an imminene ko em̧m̧anļo̧k—emm̧anļo̧k aer kōjeparok jāān ko aer.
Kōļļā juon M̧ōttan Jon̄oul ilo an Jabwe Jāān
Ilo m̧are eo an, Deborah, jan Michigan, USA, ekar ejjeļo̧k an inepata kōn jāān ko an. Ak ālkin aerro ļeo ippān jepel, m̧uri ko raar jino pen n̄an kōļļāiki. Men̄e Deborah eaar emakijkij an etal n̄an tampeļ, eaar jino pen an kōļļā an juon m̧ōttan jon̄oul im eaar bōjrak an etal n̄an tampeļ.
Eaar pukōt jipan̄ jān bisop eo an, eo ekar ba n̄an e kōn juon kūlaaj in un̄n̄are peid make kōn kilen kōjparok jāān ko an juon make, eo ej kōm̧m̧an ilo stake eo an. Deborah eaar errā n̄an kobaļo̧k, ak ilo jinoin eaar jab lo unin n̄an kobaļo̧k: “N̄an kwaļo̧k m̧ool, iaar ba n̄an n̄a make, ‘ijjab jeļā etke ij pād ijin. Ijeļā kilen bajete jāān ke aō. Iaar bajeti ilo aolepen mour eo aō.’”
Deborah eaar ioon kurup eo im rikaki eo. Ruo awa kajjojo wiik, rej ekkatak jim̧or kōn aikuj ko an ānbwin ikijeen kōjparok jāān (āinwōt kilen ejaake juon bajet) im aikuj ko an jetōb ikijeen kōjparok jāān (āinwōt tiljek n̄an kōjparok deļo̧n̄tok in jāān). “Ijjan̄in kar keidi kein ruo ilo wāween an kūlaaj in keidi,” Deborah eaar ba.
Deborah eaar en̄jake bwe bujen eo an ippān Jemedwōj Ilan̄ ekar jipan̄ e jeļā kobaik E ilo kāālet ko an kōn jāān “Jemedwōj Ilan̄ eaar pād aolep iien n̄an eō. … Ij aikuj kobaik E ilo men otemjej.”
Ke Deborah ekar im̧we kōn jetōb im kar bōk tōl jān kurup in un̄n̄are peid make, eaar maron̄ in kōjenoļo̧k jāān n̄an kōļļā juon m̧ōttan jon̄oul, kōļļā an m̧uri, im aaet kakoņ jidik jāān, ilo an jab ļapļo̧k deļo̧n̄tok in jāān.
Būreejtōn Heber J. Grant (1856–1945) eaar kam̧ool bwe eļōn̄ļo̧k men rej dedeļo̧k kōn bwe in jāān ko rej itok ālkin kōļļā juon m̧ōttan jon̄oul jān likio in jāān eo m̧okta jān kōļļā m̧ōttan jon̄o̧ul: “Ij kam̧ool … bwe em̧m̧aan ro im kōrā ro me rej lukkuun m̧ool n̄an Anij, ro rej kōļļā aer juon m̧ōttan jon̄oul … rej kam̧ool … bwe Anij eaar leļo̧k n̄an er māletlet me rej maron̄ jeļā kilen dāpij juon m̧ōttan jon̄oul ko, im ej juon men eļap n̄an er, im raar kōm̧m̧ane eļapļo̧k jān n̄e rejjab kōm̧m̧ane ilo m̧ool n̄an Irooj.”1
Deborah eaar bōk kōjeraam̧m̧an ko “jim̧or ilo kanniōk im jetōb” (Mosaia 2:41) ilo an kōjparok kien juon m̧ōttan jon̄oul im mour kake pedped ko an gospel in n̄an an bajet. Tōl jān kurup in un̄n̄are peid make eo an im im̧we jān Jetōb Kwojarjar eaar leļo̧k juon wāween n̄an an bōk juon peba in mālim an tampeļ im jepļaak n̄an tampeļ. Eaar kamool im ba, “aolep men ko ikar ba iban kōm̧m̧ani, Eaar kwaļo̧k n̄an eō ke imaron̄ in kōm̧m̧ani im men ko jet.” “Ta eo kwoj kōm̧m̧ane rainin ej ļam ilju im jekļaj eo am̧, im ij kōņaan bwe ilju im jekļaj eo aō in maron̄ etetalļo̧k n̄an Detroit Temple im bar jino kōm̧m̧an jerbal kōn ro jibu im jim̧m̧aō.”
Pija in jān Berry im Light Chu
Roļo̧k jān M̧uri
Berry Chu jen Middle Taipei Stake ilo Taiwan ekar aikuj māletlet ilōn̄ in jeļā eo an ālkin an kar kōm̧m̧ane juon orļo̧k in jāān me ekar jab em̧m̧an, ekōm̧m̧an bwe en pād ilo m̧uri eļap. Jekjek in ekar kōm̧m̧an bwe Berry en lokjak n̄an wōnm̧aanļo̧k. Ak Berry eaar kōttāik e make im kar pukot Jemedwōj Ilan̄ ilo jar. Jān jar in, eaar bōk peran n̄an kwaļo̧k n̄an ļeo pāleen ta eo ekar waļo̧k. Kōn jouj im ettā, ļeo pāleen Berry, Light Tsai, eaar ba n̄an e ke renaaj pukot kilen n̄an anjo̧ jen m̧uri. Ippān doon, Light im Berry rekar jar n̄an pukot tōl an Irooj.
Berry im Light raar en̄jake ke renaaj jeraam̧m̧an jān katak ko an un̄n̄are peid make an Kabun̄ in kōn jāān ko an juon make. Kōjekdoon m̧uri ko reļļap, raar ejaake juon karōk in kōļļā m̧uri. Berry eaar ba, jen jipan̄ eo an katak in, raar jeļā n̄an “kōm̧akaj juon m̧ōttan jon̄oul im … n̄an kōjparok jāān ilo wāween eo etiljek.” “Kōm eaar bar jeļā n̄an bajete im wiaiki wōt aikuj ko am̧ remennin aikuj.”
Berry im Light raar jab jeļā wōt n̄an bajete deļo̧n̄tok in jeraam̧m̧an ko aer, ak kurup eo aer raar bar im̧we Berry n̄an ukōt an jikin jerbal. Oktak in ekar tōlļo̧k n̄an onāān eo em̧m̧an, eo me emaron̄ kōļļāik m̧uri ko an.
Juon wōt ilo kōttōpar eo aerro, Berry im Light raar kōjerbal aolep bonej ko aer, o̧rļo̧k ko, im deļo̧n̄tok in jāān ko jet jān lukkuun im bajjōk jerbal ko aer n̄an kōļļāik m̧uri ko an Berry. Kōn jipan̄ eo an Irooj, raar kōļļāik kōļļā ko aer, men eo eaorōktata, raar kōļļā juon m̧ōttan jon̄oul im leļo̧k menin joortak ko jet.
Irooj eaar kean̄: “ej Aō kōttōpar n̄an ņa an ro rekwōjarjar Aō. … Ak eaikuj in kōm̧m̧an ilo wāween eo Aō” (Katak im Bujen Ko 104:15–16). Kajjojo armej im baam̧le ko ipeļaakin laļin rej loe An jipan̄ er ilo aer likūt pedped in katak ko ilo imminene ilo mour in jetōb im un̄n̄are peid make ilo jāān.
Katakin kōn “Elmen,” Ejjab n̄an “Ta” wōt
Curtis im Pshaunda Scott, jān Texas, USA, erro jim̧or rekōņaan bwe ren jeļā kōjparok jāān ko aer, ak rejjab errā elmen kōm̧m̧ane. Pshaunda eaar jeļā ke raikuj injuren n̄an taktō, ak Curtis eaar jeļā bwe reban maron̄e. Men̄e erro kar iakwe doon, oktak in kilen aerro kōjerbal jāān ekar kōm̧m̧an poktak ilo m̧are eo aerro. “N̄e ej itok n̄an jāān,” Pshaunda ej keememej, “ijjab jeļā n̄e kom̧ro ej pād ilo juon wōt ļōm̧ņak.”
Curtis ekar errā. “Jāān eaar aolep iien menin keroro, im ewōr kenono ko me raorōk me kom̧ro ejjab kōnono kaki.”
Bisop eo aer eaar ba bwe Pshaunda im Curtis ren jino pād ilo katak ko an un̄n̄are peid make kōn jāān eo ej kōm̧m̧an ilo stake eo aer.
Curtis eaar bwilōn̄ kōn jon̄an em̧m̧an in kōnono eo aer ilo kūlaaj ekar em̧m̧an n̄an e. Ekar maron̄ in kōmeļeļeik ļōmņak eo an im bōk ļōmņak ko jān ro jet me remeļeļe jekjek ko an baam̧le eo an. Kōnono ko ilo kurup eo raar jipan̄ Curtis loe ejjab wōt pedped in katak ko an gospel in ak bar wāween ko n̄an mour kaki. Ilowaan jiljino iiō ko ālkin peptiaj eo an, emakijkij an Curtis ron̄ bwe ej aikuj kōļapļo̧k an tōmak, kōkm̧anm̧anļo̧k kilen an jar, im epaakeļo̧k Rilo̧mo̧o̧r, ak ekar en̄jake bwe katak ko an un̄n̄are peid make ekar katakin e kilen kōm̧m̧an em̧m̧anļo̧k.
Ilo an Curtis kar jeļā n̄an mour kake pedped in katak ko an gospel in kōn jāān ko an ilo m̧weo im ilo peejnej eo an, eaar lukkuun lo an Irooj iakwe e. “Eaar lukkuun kōkajoor tōmak eo aō im aō meļeļe n̄an kōjparok im ļōmņakeo ewōr ippān Jemedwōj Ilan̄ n̄an kōj,” eaar ba.
Pshaunda eaar en̄jake bwe men ko an jetōb kōn katak ko an un̄n̄are peid make ekar jipan̄ meļeļe ewi jon̄an an aorōk jāān n̄an karōk eo an Anij. “Eaar kōkajoor naan in kam̧ool eo aō … jidik kōn jidik, ļain im bar ļain.”
Ekitbuuj katak ko an Irooj ilo jāān ko aer ekar kōm̧m̧an bwe Curtis im Pshaunda ren pād wōt ilo juon wōt peij. “Kom̧ro eaar pād ilo juon wōt tiim,” Pshaunda eaar ba “Iban ba kom̧ro kar jeraam̧m̧an ak ekar ļapļo̧k jāān ippamro, ak em̧ool kom̧ro kar pād ilo iaļ eo ejim̧we.”