“Riit Jidik Jidik: Lo Rilo̧mo̧o̧r ilo Jeje ko Rekwojarjar,” Liaona, Jān. 2024.
Riit Jidik Jidik: Lo Rilo̧mo̧o̧r ilo Jeje ko Rekwojarjar
Kōjerbal jekjek in jān juon pija emaron̄ jipan̄ kōj lo Jisōs Kraist ilo Bok in Mormon.
La Pietà, jān Michelangelo
Ekar bōk juon iiō in an Michelango jerbale La Pietà, juon annan̄in Meri an jibwe ānbwinin Jisōs ālkin debwāāl. Leonardo da Vinci eaar joļo̧k eļap iien, emaron̄ jilu iiō, n̄an unoik pijain Kōjota eo Āliktata.
N̄e kwon kar kajjidedeiki, ewi tooin am̧ naaj kar ba an juon rilotok joļo̧k iien ilo museum eo—kōn jon̄an—lali kajjojo jerbal in jin̄a ko?
Uwaak eo ej 17 jekōn, ekkar n̄an juon ekkatak.1
Ļōmņake m̧ōk 17 jekōn lale jerbal in jin̄a eo rijin̄a eo eaar maron̄ joļo̧k iiō n̄an jerbale.
Jemeļeļe. Ewōr bukwi jin̄a ko im annan̄ ko ilo juon museum, im bwe kōj armej poub. Kōn menin jej ekairiirļo̧k im lali jon̄an wōt am̧ maron̄. Ilo m̧ool, ettōr ilo mijak kōn jet men ko jeban loi, jej jerwane lukkuun jibadbad eo an pija eo—en̄jake ko im ļōmņak ko kōn pija ko jaar kōņan en̄jake. Jekar torre mejad ilo aolep m̧ōttan pija ko ilo museum eo, ak ilo m̧ool kōj jej loe ejeļo̧k iaer. Innām jej etal jān musem eo ilo m̧ōk im jaje. Jemaron̄ ļōm̧ņak ta ko armij rej loi ilo pija eo—tōmak, bolen, ke pija ko rej n̄an ro remāletlet, ejjab n̄an aolep.
Lale Jidik Jidik
N̄an mijaļ būrabōļōm̧ in, museum ko ipeļakin laļ in rej kōketak rilotok ro bwe ren kōm̧m̧ane juon men rej ņaetan “jidik jidik lale.”2 Rej karuwaineneik armej ro n̄an kāālet juon jerbal in pija ilo museum eo, pojak, im lukkuun etale—5 n̄an 10 minit. Lale jān kajjojo kona. Wōnm̧aantak n̄an lale kōmeļeļe ko. Bōjrak jidik im lale aolepen pija eo. Jet iien, kar jiron̄ rilotok ro n̄an jab riiti kōkaļļein kōmeļeļein pijain museum eo—ļo̧k wōt n̄an jidik, jab m̧ae iien ewōr jidik aer meļeļe n̄an kōm̧m̧ani make ekkatak ko aer.
Lale jidik jidik ekar ukōt pija eo ilo museum eo n̄an elōn̄ armej. Ro jet rekar jab em̧m̧an pija ippāer raar jino itok limoier kōn pija. Rej bōk lōke ke remaron̄ lo meļeļein ilo jabdewōt jerbal in pija, im rej lo m̧ōņōņō kōn ta eo rej loe. Rej jeļā bwe ejjab aikuj wōr aer college degree kōn bwebwenato in pija n̄an im̧weiir kōn pija; rej aikuj jidik kōn jidik im leļo̧k n̄an pija eo jidik iien n̄an kōm̧m̧ane ta eo kar kōm̧m̧anm̧ane n̄an kōm̧m̧ane.
Pedped kein remaron̄ ke bar jerbal n̄an riiti jeje ko rekwojarjar—n̄an waanjon̄ak, n̄an ekkatak Itok, Ļoor Eō ilo Bok in Mormon iiō in?
Jej jeļā bwe Bok in Mormon, āinwōt bar juon kallim̧ur kōn Jisōs Kraist, kar jeje kōn jibadbad n̄an kōkajoorļo̧k tōmak eo ad ilo Rilo̧mo̧o̧r (lale 1 Nipai 6:4). Jej jeļā bwe rikanaan ro reim̧we jān Anij rekar je, eļaptata n̄an tōre in ad, (lale, n̄an waanjon̄ak, Mormon 8:35). Jej jeļā bwe rikanaan ro etto ro raar je Bok in Mormon raar en̄taan eļap. Bun̄ten ko n̄an jeje ioon pileij metal ko ekar kametak im ļap jerbale (lale Jekab 4:1). Im jet iaer raar kōjekdo̧o̧n mour ko aer n̄an kōjparok rekoot ko bwe en maron̄ waļo̧k n̄an kōj rainin (lale Mormon 6:6; Moronai 1).
Aaet jet iien, kōn ad boub, jej ekairiir ad riiti Bok in Mormon. Bōlen jej lale wōt jejjo̧ eoon ilo iien m̧ōn̄ā in jibbon̄ ak lo̧k n̄an jikin jerbal. Mejed emaron̄ riiti juon jebta, ak eban aetok kitien riit. Ejjab aolep iien, ak jet iien, jej kiil bok eo ak app eo me ejjeļo̧k oktak jen ke jej bar jinoin.
Jidik jidik Riit
N̄e m̧ōttan jerbal in jin̄a eo eaikuj em̧m̧an ilo jidik jidik lale, bōlen Bok in Mormon eaikuj em̧m̧an ilo ad “jidik jidik riit.” Ejjab meļeļein bwe ad ekkatak jeje ko rekwojarjar eaikuj aetokļo̧k, ak jen maron̄ jeraam̧m̧an kōn juon oktak in bun̄ton. Ijjelo̧kin kōkairiir n̄an kam̧ōj juon jebta, bōlen ekkatak eo an rainin ej pedped ioon jilu wōt ak emān eoon. Bwe jen leļo̧k kōj make n̄an eoon ko. Jej kile kōmeļeļe ko, naan ko, im eoon ko. Jej kōļmenļo̧kjeņ etke kajjojo iaer raorōk—ej ke katakin eō jet men kōn Rilo̧mo̧o̧r? Ej ke kam̧wilaļ aō iakwe n̄an E im aō tōmak ilo E? Ewōr ke jet men Ej kōņaan bwe in jeļā?
Jidik jidik riit ej kōm̧m̧an bwe jen jeļā men ko ilo Bok in Mormon me jeban kar jeļā. Men eo eaorōktata, emaron̄ jipan̄ kōj makijkij lo Rilo̧mo̧o̧r ilo bok in me ekar jeje n̄an kam̧ool kōn E. Riit jidik jidik ej juon wāween n̄an kōpeļļo̧k mejed, kōļmenļo̧kjeņ ko, im būruwōd kōn kam̧ool eo ekajoor an Bok in Mormon kōn Jisōs Kraist. Em̧m̧an eo an juon jerbal in jin̄a, n̄e jej bōk iien n̄an lale, emaron̄ ukōt mour. Ilo juon wāween em̧m̧anļo̧k, lo Rilo̧mo̧o̧r ilo jeje ko rekwojarjar emaron̄ kapen ļōmņak im en̄jake ko ad—im, aaet, mour ko ad.
N̄an waanjon̄ak, jen ba kwoj riiti 1 Nipai jebta 1. Kom̧ad ilo eoon 6, kiiō kwoj jidik jidik laļ waj im kojoļo̧k jidik am̧ iien ilo eoon eo. Kwomaron̄ m̧ad ilo naan in “jurōn kijeek” me Liai eaar loe me eaar “pād ioon juon dekā.” Kijeek rōtein rejeja. Ta meļeļe in men jab in? Ļōmņak ko am̧ remaron̄ iokļo̧k bar jet jurōn kijeek kar kwaļo̧ki ilo jeje ko rekwojarjar (footnote ko remaron̄ jipan̄ eok). Kwomaron̄ bōlen ļōmņak etke im̧aan mejen Anij emakijkij keidi āinwōt juon kijeek. Ta eo ej ba kōn E? Eaar ke āinwōt juon jurōn kijeek ilo mour eo am̧?
Ej juon men eļap n̄an ļōmņake. Ak kwojjan̄in kam̧ōj eoon eo.
Em̧ool, ewōr, aorōk eo n̄an m̧ōkajin riiti Bok in Mormon. Emaron̄ jipan̄ kōj jeļā aolep bwebwenato im meļeļe ta eo ioon bo̧o̧t eo, bar āliji naan eo. Ak ewōr menin ekkatak kōn Jisōs Kraist ilo kōmeļeļe ko ilo Bok in Mormon, im jet iien wāween eo em̧m̧antata n̄an lo kōmeļeļe kein ej n̄an lukkuun lale jidik jidik.
Nipai eaar ba bwe naan ko eaar je ilo Bok in Mormon, “naan kein … rej naan ko an Kraist, im Eaar litok n̄an eō; bwe… Kraist Enaaj kwaļo̧k n̄an kom̧, kōn kajoor im aiboojoj eļap, bwe rej naan ko An” (2 Nipai 33:10–11). Kwojjab aikuj in juon eo ejeļā riit n̄an loi naan ko an Rilo̧mo̧o̧r ilo Bok in Mormon. Kwoj aikuj kadikdik im kōtļo̧k jidik iien an Bok in Mormon kōm̧m̧ane ta eo kar kōm̧m̧ane bwe en kōm̧m̧ane—kōļapļo̧k tōmak eo an ilo Jisōs Kraist.