“Anjo̧ ioon Jetōbin Jōbwābwe—Ta eo Ij Kōm̧m̧ane Kiiō?,” Liaona, Jān. 2024.
Rūm̧m̧an Ded ro
Anjo̧ ioon Jetōbin Jōbwābwe—Ta eo Ij Kōm̧m̧ane Kiiō?
N̄e jej jibadōk Jisōs Kraist, jeban jōbwābwe.
Rūttotak āinwōt juon rūm̧m̧an ded ekar kam̧ōņōņōik eō. Ikar pojak n̄an jino kalōk mour eo eto ao kar kōņaan. Iaar jerbale juon mijen ilo Brazil innām pād ilo university ke iaar ro̧o̧l. Ikar bōk juon aō degree, bōk juon jerbal em̧m̧an, im kar kajjieon̄ mour āinwōt juon rikaļooraņ Kraist.
Im n̄aij pād wōt ilo jekjek in mour in. Baj kōm̧m̧ane ijo aō em̧m̧antata n̄an ļoor E.
Iaar m̧ōņōņō kōn iien ko rem̧m̧an im kōjeraam̧m̧an ko ikar būki. Aaet ke ij reilikļo̧k im loi ke iaar kōm̧m̧ani aolep bujen ko imaron̄ n̄an menin (ijelokin m̧are) n̄an tōpar kōttōpar eo aolep iien iaar ļōmņake, jet iien ij en̄jake an bar pōjrak jidik—jab jeļā kile tōpare, eļaptata mour in jetōb.
Iaar lo an rūm̧m̧an ded ro ipelaakin bar apan̄ barāinwōt. Em̧ool jet raar etal jen Kabun̄ in kōn aer en̄jake jōbwābwe ak ioon men ko rejjab kōņaan. Kōm̧m̧an ko aer raar aolep iien pād ilo laajrak in kajjitōk ko aō kōn mour in.
Ijoke, kiiō, kajjitōk ko aō reļļap n̄an Jemedwōj Ilan̄ rej erkein: Elmen aō maron̄ anjo̧ ioon en̄jake in kōn jetōbin jōbwābwe? Ta eo inaaj kōmm̧ane kiiō?
Iaar pukot mejļan kajjitōk kein, iaar jeļā jet m̧ool ko raorōk me raar jipan̄ eō dipuk tōre in jab jeļā kake.
Jab Kōtļo̧k bwe M̧ad Ko Ren Bōk Eok Jen Iaļ In
Ilo tōre in kar jab jeļā ia eo in etal n̄an e kiiō im jeļā ta eo enaaj waļo̧k, iaar jeļā elmen an menin kōm̧ad ko an laļin maron̄ pidodo aer jino aer anjo̧ ioon men ko an jetōb. Sister Rebecca L. Craven, Rikakpilōklōk eo Kein Karuo ilo Būreejtōnji eo Eutiej an Doulul eo an Jiron̄ ro, ekar ba, “Laļ in ej eddo kōn kein kōm̧ad ko me rej barāinwōt m̧ōņe ro kāālet er, kōm̧m̧an bwe ren kōwaan aer mour kōn bujen ko aer.”1
Em̧ōj aō lo rūm̧m̧an ded ro jet rej apan̄ kōn naan in kam̧ool ko aer ālkin aer ro̧o̧ltok jen mijen ko aer. Iaar bar lo ro jet rej tōpar kōttōpar ko āinwōt kadiwōjļo̧k jān university ak m̧are im etal im ello̧k jān men ko raorōktata ilo aer jab kōm̧m̧an jikin gospel eo an Jisōs Kraist ilo kōm̧m̧an ko aer rekāāl.
Iaar dipuk mour in jetōb ilo iien ko rem̧m̧an im nana. Epen jet iien n̄an jerbal im jewan n̄e ej itok n̄an men ko an jetōb, eļaptata n̄e kōjeraam̧m̧an ko rejjab itok ilo iien eo wōt ij kōtmeni. Aolep iien ikōņaan bwe in eddōkļo̧k im em̧m̧anļo̧k—ijjab kōņaan bwe jetōbin pād bajjōk. Ak jet iien ij en̄jake āinwōt n̄e ij baj peto-petak kōn ejjeļo̧k kōttōpar.
Ijoke, n̄e ij kōm̧m̧an iien n̄an Jemedwōj Ilan̄ im Jisōs Kraist kajjojo raan, eļaptata ilo men ko reddik im wāween ko rekkar (lale Alma 37:6), Ij en̄jake aenōm̧m̧an im kajoor ilo gospel in An ej bōktok n̄an eō, men̄e laļin ejjab jejjet.
Būreejtōn Russell M. Nelson ekar ba: “Ij akweļap ippemi bwe kom̧in kaanjo̧ik Anij ilo mour ko ami. Leļo̧k n̄an E juon ajej eo ejim̧we an iien eo ami. N̄e kom̧ naaj kōm̧m̧ane, jeļā ta eo ej waļo̧k n̄an kajoor in jetōb eo em̧m̧an ej im̧we jerbal eo ami.”2 N̄e ij lukkuun kāālet n̄an bōk tōmak ilo Jisōs Kraist aolep raan im kōm̧m̧an iien n̄an men ko an jetōb me rej ekkeijel eō n̄an E, ij keememej m̧ōņōņō eo aō ilo mour in jetōb im en̄jake eo ej kōkāāle kōttōpar eo, kōjatdikdik kōn ilju im jekļaj, im tōmak.
Pukot Im̧we ko Rem̧m̧an
Bar juon iien ikar en̄jake jōbwābwe ej ilo iiō eo aō āliktata ilo university. Mour in epen. Ilo iien kar nan̄inmej eo, iaar lukkuun inepata ke iaar pād wōt m̧weo n̄an kadedeļo̧k kilaaj ko aō. Eaar ejjeļo̧k tōl im ekkeijel ilo mour eo aō.
Ilo iien in iaar bar apan̄ ilo m̧ōnjar eo. Ekkā aō kōm̧m̧an bwe in jerkak jān peet eo aō ilo aō nuknuk in kiki wot n̄an ron̄jaki kweilo̧k in kwojkwoj ko ilo online bwe kōnke jon̄an aolepen maron̄ eo aō eo imaron̄.
Ilo tōre in epen, iaar tōpar baam̧le eo aō im ro m̧ōtta im kōmeļeļeik er kōn aō en̄jake jōbwābwe im inepata. Iaar en̄jake āinwōt n̄e ejjeļo̧k aō kōjatdikdik kōn ilju im jekļaj im jab jeļā elmen mijaļ men kein. Im iien eo rekar ba n̄an n̄a bwe rekar jar kake n̄a im bwe rej jipan̄ n̄an men̄e rej pād ettoļo̧k.
Ke iaar tōpar ro rejitenbōro ro em̧wilaļ aer tōmak im ilo aō jar n̄an Jemedwōj Ilan̄ kōn juon jetōbin jerbal, iaar en̄jake jipan̄ im iakwe.
Iaar kile bwe ilo aō make mije bōklōkōt ko aō, pere ko aō, ak apan̄ ko aō, tōmak eo aō ej m̧ōjņo̧ļo̧k. Iaar jerwani kōjeraam̧m̧an ko ilo mour eo aō. Ak ilo aō jepooļ eō kōn em̧m̧an ilo aō riiti kōjeraam̧m̧an in petriak eo aō, ron̄jaki ennaan ko jen kweilo̧k eo eļap, im joļo̧k iien ippān ro rejitenbōro ro rej im̧we eō n̄an em̧m̧anļo̧k, ij bar mije ioon kabwilōn̄lōn̄ ko roktak gospel in an Jisōs Kraist ej kōm̧m̧ane ilo mour eo aō.
Men̄e ejjab alikkar iaļ eo im̧aan ilo tōre in ak men ko rejjab waļo̧k āinwōt kar karōki, ej ewōr wōt men ko rem̧m̧an ilo mour eo am̧ im elōn̄ iien ko rem̧m̧an rej pād n̄an kwe n̄an jipan̄ eo eddōkļo̧k ilo iaļen bujen in. Aolep iien ewōr men n̄an ekkatak im eļap ruum̧ n̄an eddōkļo̧k, eļaptata ilo mour in jetōb. Kajjitōk ippān Jemedwōj Ilan̄ kōn tōl. E enaaj jipan̄ eok kappukot n̄an lo im̧we ko rem̧m̧an im iien ko rem̧m̧an n̄an eddōkļo̧k im ekkatak (lale Laajrak in Tōmak Ko 1:13).
Kajjieon̄ Wōt
Mour in jetōb eo ad make emaron̄ jet iien—kajoor ak m̧ōjņo̧. Jet iien jemaron̄ pen ilo tōmak eo ad im m̧ōņōņō kōņ gospel in. Ak jet iien, emaron̄ pen ad jeļā ia n̄an bar etal ie ļo̧k. Jemaron̄ ioon men ko reppen n̄e ej waļo̧k apan̄ ko, kajjitōk ko rej waļo̧k, ak kōjeraam̧m̧an ko rej rum̧wij, eļaptata n̄e jej kōm̧m̧ane ijo kuņaad em̧m̧antata n̄an mour kake gospel in. Ilo iien ko reppen, emakijkij aō lo an armej ro bōk juon iaan iaļ ko: juon ej n̄ān bōk jipan̄ an Rilo̧mo̧o̧r, im eo juon ej rej jab.
Ij jet iien keidi iien kein n̄an bwebwenato in Moses im jedpānit jān bronze eo (lale Bōnbōn 21:8–9). Ke ri Israel ro raar m̧akoko in mour ālkin an kar jedpānit eo kiji er, Moses eaar leļo̧k n̄an er juon wāween epidodo n̄an lo̧mo̧o̧ren er: kalimjōke jedpānit eo me ej bōk jikin Jeova. En̄in men eo rej aikuj kōm̧m̧ane. Baj kalimjōke wōt im renaaj mour. Ak elōn̄ raar m̧akoko im raar jako. (Lale 1 Nipai 17:41.)
Bwebwenato in ekōm̧m̧an bwe in kōļmenļo̧kjeņ elmen ad ineeik eddo ko an inepata im illu jen men ko jab kōtmeni ilo tōre in, n̄e kōmour eo ej pād im̧aad!
Wāween eo n̄an en̄jake kōjatdikdik, aenōm̧m̧an, im tōmak kōn jekļaj eo ad ej kalimjōk wōt Jisōs Kraist (lale Hilamōn 8:14–15; Jon 3:14–17).
Aolep iien ij lam̧ōj n̄an n̄a make n̄e ij kōm̧m̧an bōd. Kōnke ij lukkuun kajjieon̄ in katak kake n̄an tōmak Jemedwōj Ilan̄ im Jisōs Kraist, ijeļā aolep iien imaron̄ pedped ilo Er n̄an jeo̧rļo̧k bōd, eddōkļo̧k, im kōmour ilo iien kein reppen. Ijeļā bwe n̄e ij reilo̧k n̄an Er ilo jar, ekkatak Itok, Ļoor Eō, joļo̧k iien ilo tampeļ, im kakūrm̧ool kūr eo aō, ij en̄jake m̧ōņōņō im juon eo ekāāl.
Ilo aō kappukot Er, ij lo ta eo gospel in an Jisōs Kraist ej ba: juon jikin kone ej letok n̄an kōj aenōm̧m̧an, jokne, im kōmour jān jedpānit ko an laļin.
Elder Jeffrey R. Holland jān Doulul eo an Jon̄oulruo Rijilōk ro ekar kam̧ool: “‘Juon kōjatdikdik eo emeram,’ ļotak kōn iakwe eo an Anij im n̄an aolep armej—en̄in ej ta eo kōmij kōņaan jen kom̧. … Mour kōn kōjatdikdik in emeram enaaj unoojdikdik waj bwe Anij ej iakwe eok, bwe Kraist ej ami Rijojomar, bwe gospel in ej m̧ool. An meram enaaj kakeememej eok bwe ilo gospel in aolep iien ewōr–aolep raan, aolep awa–juon iien kāāl, juon mour kāāl, juon iiō kāāl. Ej juon men ekabwilōn̄lōn̄! Ej juon menin letok! Im kōnke Kraist ej menin letok, men eo em̧m̧antata ilo mour in ej ad n̄e jenaaj dāpij wōt tōmak eo im kajjieon̄ wōt im kōjatdikdik wōt.”3
Bun̄m̧aanļo̧k n̄an Jisōs Kraist
Ro rūm̧m̧an ded rej bōktok eļap oktak, ilo men ko jab jeļā kaki, im, aaet, men ko jab kōtmeni ilo tōre in. Ak gospel eo an Jisōs Kraist ej aolep iien m̧ool eo im jim̧we eo. Im kallim̧ur ko An im Jemedwōj Ilan̄ rej m̧ool ilo ad pād wōt ilo iaļen bujen in. Laļ in emaron̄ kōm̧m̧an bwe en pen ilo tōre in n̄an mije wōt E. Ak n̄an bōk jabdewōt ne m̧aanļo̧k ej bōkļo̧k kōj n̄an E ilo tōprak. N̄e jej bun̄m̧aanļo̧k n̄an Kraist, jeban jōbwābwe–jej bun̄m̧aanļo̧k kōn kōjatdikdik, aenōm̧m̧an, im lan̄lōn̄.
Rijeje eo ej jokwe ilo Manchester, England.