Leļo̧k eo Ad Em̧m̧antata

Jān Dean Cooper, Washington, D.C., USA

N̄e jej aje juon tampeļ, jej ba n̄an Irooj, “En̄in lewaj eo am. Ej em̧m̧an eo ilo ad maron̄ kōm̧m̧ane.”

Emaron̄ ruo wiik m̧okta jen aje eo an Washington D.C. Temple ilo O̧kwōj 2022, booj eo aō im n̄a kar jeļā bwe juon iaan European hornbeam wōjke eo ļo̧k n̄an tampeļ eo eaar nana an mour. Ekar mej bōlōk ko ie im jino mej raan.

Āinwōt juon rijerbal in meļan tampeļ eo, eaar nana aō mour bwe meļan tampeļ in eaiboojoj ekar pojak ijelo̧kin wōt men dikdik in. Wōjke eo ej pād iturin jikin dān eo epake jikin deļo̧n̄tok eo n̄an tampeļ eo.

Ewōr wut rem̧m̧an aer mour rej ekkat epaak, im kōm kar kōnono n̄e ekkar n̄an jāniji wut eo em̧m̧an an eddōk n̄an eo ejjab em̧m̧an an eddōk. Ak m̧okta kōmij aikuj rube jikin etetal eo im kōm̧akūt ujooj ko im kein utdikdik eo im ļain in jarom̧ ko rej ettōr ilo eria eo. Mijak eo aō eļaptata n̄e kōm̧ naaj kōm̧akūt wōjke eo enana an eddōk, im likūt wōjke eo ej bōk jikin, im ban wōr iien n̄an kōm̧m̧ane aolepen men ko ilo peļaakin wōjke eo bwe en em̧m̧an n̄an aje eo.

Ke ij ba n̄an kōrā eo karejera, Carolyn, ke kōmij aikuj kōm̧akūt wōjke eo, eaar uwaak: “M̧wijitļo̧k wōt ra ko renana, im inaaj kajjitōk ippān kōrā ro m̧ōtta ipeļaakin bukwon in bwe ren jar kake. Meļan tampeļ ko rej an Irooj. Enaaj kōmour wōjke ņe.”

Ewōr juon an Carolyn kurup in ro m̧ōtta ej ņaetaer kōrā ro rej ekkatak itok, ļoor eō—membōr in Kabun̄ in eo rekijor kar jokwe ilo ejja ward eo wōt. Raar ekkatak kōn Itok, Ļoor Eō ippān doon m̧ae iien aolep raar em̧m̧akūt n̄an bar bukwon, ak raar ennaan wōt ippān doon. N̄e jar ej menin aikuj, rej kōjjeļāik doon.

Ālkin an Carolyn ba n̄an er kōn wōjke eo enana an mour, raar ba n̄an ajri ro nejier im ro jet uwaan baam̧le ko. Carolyn eaar jab jeļā ewōr jete rekar jar kōn wōjke eo, ak eaar wōr an tōmak bwe Jemedwōj Ilan̄ enaaj eo̧ron̄ jar ko aer

Ilowan wōt jejjo̧ raan, wōjke eo eaar jebar bōlōkin, im jino errākrak raan. “Ejim̧we em̧m̧anļo̧k an mour,” Carolyn eaar ba. Eaar jilkinļo̧k pijain wōjke eo n̄an kōrā ro m̧ōttan, ba n̄an er, “lale an Irooj kar uwaake kōj!”

Ikar jeļā bwe armej ro raar jar kōn wōjke in, kōn menin ikar jab bwilōn̄. Ijeļā bwe Būreejtōn Russell M. Nelson enaaj kōjeraam̧m̧an tampeļ eo im peļaakin tampeļ eo ilo jar in aje eo an. Wōjke in enaaj EM̧M̧AN.

Kōm kar kam̧m̧oolol bwe Irooj ekar kaorōk menin leļo̧k eo im tōmak eo am.