“Niknik Kappukōt im Kom̧ Naaj Loe,” Liaona, Jān. 2024.
Niknik Kappukōt im Kom̧ Naaj Loe
Irooj eaar kwaļo̧k elmen ad maron̄ pukōt m̧ool eo n̄an tōl mour ko ad.
Ke kōrā eo ippa, Regina, im n̄a kar ro̧o̧lļo̧k n̄an Brazil ālkin jerbal ilo Angola Luanda Mission jān 2016 n̄an 2019, ekar wōr juon am̧ pepe eaorōk. Kom̧ro kar wia kake m̧weo m̧ōm m̧okta jān mijen eo am̧ro. Juon iiō ālkin amim jepļaak n̄an kapijuknen, kom̧ro kar kāālet n̄an wiaiki ak rene juon em̧. Elmen am̧ro naaj kāālet ta eo ejim̧we n̄an kom̧ro?
Kain pepe rot in ej juon iaan jerbal ko rellōn̄, m̧akūtkūt ko, im inepata ko aolep raan an mour in me rej waļo̧k n̄an kōj aolep. Jet iien, remaron̄ kōm̧ad kōj jān kōjeraam̧m̧an im iien ko rem̧m̧an me gospel in an Jisōs Kraist em̧ōj an jepļaaktok ej letok n̄an kōj. Ilo elōn̄ wujlepļo̧k im eddo, emaron̄ in pen n̄an jeļā n̄e em̧ool ak ia eo jej etal ie. Emaron̄ kōm̧m̧an bwe jen en̄jake inepata im eddodo.
Kam̧m̧oolol, bwe Jemedwōj Ilan̄ eaar jab kōtļo̧k kōj bwe jen maron̄ pukot ta eo em̧ool ak ta eo jej aikuj kōm̧m̧ane.
Unjen M̧ool Otemjeļo̧k
M̧okta jān an etal jen laļin, ad Rilo̧mo̧o̧r, Jisōs Kraist, ekkar kallim̧uri rijilōk ro An bwe Jemed enaaj jilkintok juon Rikaenōm̧m̧an, ak Jetōb Kwojarjar, n̄an kōjeraam̧m̧an er. Rikaenōm̧m̧an eo, Jisōs ekar ba, “enaaj katakin kom̧ men otemjej, im kakeememej men otemjej n̄an kom̧” (Jon 14:26).
Jerbal eo an Jetōb Kwojarjar ej n̄an kwaļo̧k m̧ool eo (lale Jon 16:13). Jemedwōj Ilan̄ ej unjen n̄an kwaļo̧k m̧ool otemjeļo̧k, men̄e ej itok jān rikanaan ro, rilolo ro, im ribōk revelesōn ro ak n̄an kōj kajjojo armej jān Jetōb Kwojarjar. Ilo ad kajjieon̄ bōk jemjerā eo an Jetōb Kwojarjar, Jemedwōj Ilan̄ enaaj tōl kōj men̄e ilo iien ko reppen.
Kajjitōk, Kappukot, im Kaļļaļļaļ
Kōnke Jemedwōj Ilan̄ ekōņaan im̧we, katakin, kwaļo̧k, im kalōk kōj, kar kajjitōk ippād n̄an “kajjitōk, im naaj lewōj n̄an kom̧, kappukot, im kom̧ naaj lo, kaļļaļļaļ, im naaj kapeļļo̧k n̄an kom̧” (Matu 7:7; bar lale Luk 11:9; 3 Nipai 14:7).
Ke Nipai eaar ron̄ naan ko an jemān, Liai, kōn ettōņak eo an Liai kōn wōjke in mour, Nipai eaar ba ekar “barāinwōt kanooj kōņaan bwe in lo, im ron̄, im jeļā men kein, kōn kajoor in Jetōb Kwojarjar, eo ej men in leļo̧k an Anij n̄an aolep ro rej niknik kappukot E” (1 Nipai 10:17).
Kappukot m̧ool eo ebōk kijenmej. N̄e jej niknik, jej kajjieon̄ aolep iien, lukkuun kōttōpar, im kijerjer in jeļā m̧ool eo im ankilaan Irooj n̄an mour ko ad. Niknik n̄an kappukot m̧ool eo ilo Irooj ej kepaakļo̧k kōj n̄an E ilo aolepen mour ko ad.
Rikanaan Josep Smith eaar jeļā m̧oktaļo̧k ilo mour eo an bwe juon iaan wāween eo ekkar n̄an pukot m̧ool eo ej n̄an niknik kappukot uwaak ko n̄an kajjitōk ko (lale Josep Smith—Bwebwenato 1:10, 18). Jemaron̄ kajjitōk kajjitōk kein ilo ad pukot m̧ool eo. Uwaak ko rej kwaļo̧k juon jon̄ok jemaron̄ ļoore n̄an jeļā m̧ool eo.
Wōn Ro Jej Pukot er kōn M̧ool in?
Ilo jemļo̧kin ļo̧k Bok in Mormon, rikanaan Moronai ej karuwaineneik aolep n̄an kajjitōk ippān Anij kōn lukkuun kōttōpar im tōmak ilo Kraist, “eļan̄n̄e men kein rej jab m̧ool.” Moronai ej kam̧ool bwe Anij “enaaj kwaļo̧k m̧ool eo an [Bok in Mormon] n̄an kom̧, jān kajoor eo an Jetōb Kwojarjar. Im jān kajoor eo an Jetōb Kwōjarjar kom̧ maron̄ jeļā m̧ool eo an men ko otemjeļo̧k” (Moronai 10:4–5).
Anij, Jemed Indeeo, eaar ejake juon imminene im juon iaļ bwe ro Nejin ren maron̄ kajjitōk kōn E (lale Jemes 1:5) n̄an epaakļo̧k E aolep raan, aolep awa—em̧ool aolep iien. Wāween eo epidodotata ej ilo jar.
Katak ko an Alma n̄an ļeo nejin Hilamōn ej jerbal n̄an kōj: “Kūr n̄an Irooj ilo aolep kōm̧m̧an ko am̧.” Ilo “aolep kōm̧m̧an ko am̧ … im jabdewōt ijo kwōj etal ie … , kōtļo̧k aolep am̧ ļōmņak bwe ren n̄an Irooj; aaet, kōtļo̧k bwe iakwe ko an buruōm̧ ren pād ioon Irooj indeeo” (Alma 37:36). Alma eaar bar kwaļo̧k, “Pepe ippān Irooj ilo aolep kōm̧m̧an ko am̧, im Enaaj tōl eok n̄an aenōm̧m̧an.” (Alma 37:37). Jejjab aikuj juon iien ejjejet ak jikin n̄an jar. Men̄e jeban aolep iien maron̄ in jar eļaaj, jemaron̄ jar aolep iien ilo būruwōd (lale Alma 34:27).
Uwaak ko jej būki n̄an jar ko ad remaron̄ jab aolep iien kōn ta eo jej kōtmene. Jet iien, emaron̄ oktak jān ankilaad. Jar ko ad remaron̄ aetok kitieer n̄an bōk uwaak eo jej kōtmene. Jet iien remaron̄ itok ilo ejeļo̧k keroro. Jemedwōj Ilan̄ ej ļōmņak kōn aikuj ko ad. Uwaak ko An renaaj em̧m̧an aolep iien n̄an kōj. Jej aikuj bun̄m̧aanļo̧k kōn tōmak ilo Jisōs Kraist. (Lale Luk 11:9–13.)1
Ad Rilo̧mo̧o̧r im Ripinmuur eaar kwaļo̧k bwe jeban tōpar Jemedwōj Ilan̄ n̄e eban E. Jisōs eaar ba, “N̄a iaļ, im m̧ool, im mour.” “Ejjeļo̧k armej ej itok n̄an Jema, eļan̄n̄e jab kōn Eō” (Jon 14:6). Menin ej joļo̧k men ko jet, ak jabdewōt kapan̄pan̄, ilo ad kōnono ippān Anij. En̄in ej unin an aolep jar, katak, naan in kam̧ool, kūlaaj, im ko jet rellōn̄ jej kōm̧m̧ani—ilo m̧ōnjar in, ilo m̧weo ippān baam̧le ko ad, ak ippād make—rej kōm̧m̧an ilo etan Jisōs Kraist.
Ej Aikuj Ewi Wāween M̧wilid?
N̄an pukōt m̧ool eo, jej aikuj lukkuun kōttōpar n̄an bōk tōmak. N̄e jej ettā im kūr ioon Jemedwōj Ilan̄, jej kōtļo̧k kōj make n̄an jerbal ekkar n̄an uwaak ko jej būki im kōļapļo̧k ad maron̄ n̄an kōm̧m̧ane.
Kajjitōk kōn bōro em̧ool ej kōm̧akūt kōj n̄an kōm̧m̧ani men ko Jemedwōj Ilan̄ ekōņaan bwe jen kōm̧m̧ani, ejjab ta eo jej kōņaan kōm̧m̧ane. Ealikkar ad kwaļo̧k n̄an Jemedwōj Ilan̄ ad lōke ilo E n̄e jej “ettā, ineem̧m̧an, ettā bōro, kem̧m̧aanwa, obrak kōn iakwe, m̧ōņōņō in ajeļo̧k e n̄an aolep men ko Irooj ej lo ekkar n̄an kaddoik ņa [iood]” (Mosaia 3:19). Kōn m̧wiļ kein, jej meļeļe n̄an lōke bwe aolep iien Jemedwōj Ilan̄ enaaj kōm̧m̧ane ta eo em̧m̧antata n̄an kōj.
Pija jān Lee Michael Ragsdale
Elmen an Uwaak ko Itok?
N̄an ļōmņake n̄an waiki ak reene juon em̧, kōra eo ippa im n̄an ekar jar, kōļmenļo̧kjeņ, im kōnono kake. Ilo m̧ool, juon en̄jake eaar itok n̄an ļōmņak ko am̧ im būruōm̧ bwe kōmij jab aikuj in waik juon em̧. Kom̧ro kar ļoor tōmak eo ekkar n̄an uwaak eo kom̧ro kar bōke, kar jab jeļā ta eo enaaj waļo̧k n̄an mour ko amro.
Emaron̄ 18 allōn̄ tok ālik, ilo Eprōļ 2022, iaar kūr āinwōt juon Ritōl Eutiej Jiljilimjuonn̄oul. Ālkin Eprōļ 2022 kweilo̧k eo eļap, ekar wōr wōt jilu wiik in em̧akūt n̄an Brazil n̄an jerbal eo ammim jinoin. Jokwe ilo juon m̧ōn reen ilo tōre eo ekar kōm̧m̧an bwe en pidodo diwōjļo̧k. Rainin, Regina im n̄a ealikkar n̄an loe bwe Irooj eaar tōl kōm ilo kāālet eo am̧.
Nipai eaar bar bōke ekkar n̄an ikdeleel eo an. Kōn niknik kappukōt m̧ool eo im tōmak im lōke bwe Jemedwōj Ilan̄ enaaj kwaļo̧k m̧ool eo n̄an e, Nipai ekar jeraam̧m̧an n̄an lo men ko jemān eaar loi. Eaar lo wōjke in mour eo, eo ej pinej jenkwan iakwe eo an Anij—iakwe eo me “elukkuun ļap kōttōpar jān men ko otemjej” im “menin kam̧ōņōņō tata n̄an jetōb” (1 Nipai 11: 22, 23).
Kōn Jetōb Kwojarjar, Jemedwōj Ilan̄ ej kwaļo̧k m̧ool eo me ej pād n̄an aolep ro Nejin. Irooj eaar kwaļo̧k n̄an Rikanaan Josep Smith bwe Jetōb Kwojarjar emaron̄ kōnono n̄an ļōmņak ko ad im būruwōd (lale Katak im Bujen Ko 8:2), “jiktok … ilo en̄jake ko [ad]” (Katak im Bujen Ko 128:1), kōm̧m̧an bwe en “māāņāņ [ilowaad]” (Katak im Bujen Ko 9:8), koobrak ad kōn m̧ōņōņō, kōmeramļo̧k ad ļōmņak, ak kōnono aenōm̧m̧an n̄an buruōd (lale Katak im Bujen Ko 11:13; 6:14–15, 22–23).
Ij kam̧ool bwe m̧ool ko an Anij rej joļo̧k pere im mijak n̄an kōkajoorļo̧k naan in kam̧ool ko ad. Ippān Nipai, ij kwaļo̧k, “Bwe eo ej niknik ilo pukot naaj lo” (1 Nipai 10:19). Anij enaaj kwaļo̧k m̧ool eo n̄e jej niknik kappukote “jinōkjeej n̄an ro rej kappukot E” (Hibru 11:6). Im E enaaj kōm̧m̧an āindein bwe enaaj ejjeļo̧k pere bwe Pein ej tōl mour ko ad.