Jāņōļ eo Ejim̧we

Jān Raúl Fabrizio García, Baja California, Mexico

Ijjab meļeļe etke baiļat eo ejebwābwe eaar jab kennanik tok kōm.

Pija

baļuun jidikdik eo ippān air traffic control tower eo itulikin

Kōmeļeļe jen Roger Motzkusart

Juon rālep ilo iien internship eo aō āinwōt juon rilolorjake air traffic ilo airport eo ilo Tijuana, Mexico, kom̧ro rikaki eo aō ekar lo juon tab in kōdo̧ ej itok jen lo̧jet ekar kalbubuik airport eo im jimettanin jikin eo. Ealikkar, ijoke, eaar dik iien n̄an an baļuun ko jok im kelak.

Tokālik, kōm kar loe ilo radar eo Cessna 172 ej itok jān turōk, ej ketok ilo an kōjerbal visual flight rules (VFR). Ilo VFR eo, baiļat ro rej make pukot kilen bwe ren loe ijo rej jibadōkļo̧k.

Ak enana bwe, baiļat eo eaar jebwābwe jen tab in kōdo̧ eo. Eaar keto-ketak ilo eria eo, eaar kajjieon̄ in pukōt kilen make n̄an tōpar airport eo, ak kōn an nana epen an loe. Iaar kajjitōk ippān rikatakin eo ta eo kom̧ro maron̄ kōm̧m̧ane n̄an jipan̄ e.

“Ej aikuj kōjerbal airband jāņōļ eo an tawōr bwe en ennaan ippād,” eaar uwaak. “Ijelo̧kin, jeban maron̄ kōm̧m̧an jabdewōt n̄an e.”

Ijjab meļeļe etke baiļat eo eaar jab kennanik tok kōm. Elōn̄ ke an kar radio eo nejin jorrāān? Ekar ke en̄jake bwe emaron̄ pukōt kilen an etal jen jorrāān in?

Minit tok ālik. Āliktata, baiļat eo eaar ennaantok ilo jāņōļ eo an tawōr eo. Kōn ainikien inepata, eaar kajjitōk jipan̄. Ekar m̧ōkaj am̧ro leļo̧k n̄an e tōl n̄an an jok ilo airport eo. Ej aikuj ron̄jake kōmeļeļe ko am̧ro im kein kōmeļeļe in ekkeke ko an.

Jejjo̧ minit tokālik baļuun eo eaar jāde jān tab in kōdo̧ eo im kar jok im ekar letok n̄an kōm m̧ōņōņō.

Ke ij ro̧o̧l n̄an kapijuknen, iaar ļōmņak kōn ta eo baiļat eo eaar ioone. Kūrtok kōm ilo airband frequency eo ejim̧we ekar kōm̧m̧an oktak ikōtaan bōk jipan̄ ak keto-ketak bajjōk—ak juon men enana en kar waļo̧k.

Āinwōt baiļat in, iaar jino jebwābwe ilo iien “tab in marok eo” (1 Nipai 8:23). N̄e ij aikuji tōl eo an Anij, Ej kijenmej ilo kōttar n̄an ron̄ ainikiō.

Āinwōt aō maron̄ loe an baļuun eo jebwābwe ilo radar eo, Jemedwōj Ilan̄ ej lo kōj im apan̄ ko ad. Ij kam̧m̧oolol kōn An letok n̄an kōj tōl. Ej letok jipan̄ ilo jar, jeje ko rekwojarjar, rikanaan ro remour, im menin letok eo an Jetōb Kwojarjar. E enaaj tōl kōj jān kauwōtata ilo ānbwin im jetōb n̄e jej pād ilo jāņōļ eo ejim̧we, kajjitōk tōl, im n̄an ron̄jake Ainikien.