“Ennaan eo Aō jān Irooj,” Liaona, Jān. 2024.
Pija ko an Tōmak
Ennaan eo Aō jān Irooj
Iaar jeļā bwe kwaļo̧k jān Bok in Mormon ej juon wāween em̧m̧an n̄an bōk juon naan in kam̧ool jene.
Pija ko jān Leslie Nilsson
Ilo 1993, jilu raan ālikin aō em̧m̧akūtļo̧k n̄an Polokwane, ilo turōk tureaar in Africa, raar kaļļaļļaļ ilo kōjem eo aō. Ke iaar kōpeļļo̧ke, ijo eaar jutak ruo mijenede jān Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Iaar rūttotak āinwōt juon armej in ritōmak, im aolep iien baam̧le eo aō raar kakkōļ eō n̄an pād ettoļo̧k jān mijenede ro. Ak raar jouj im iaar m̧ōņōņō in kōnono kōn kabun̄, kōn menin iaar kōdelo̧n̄tok er.
Ālkin lotok in aer em̧m̧an, raar ba n̄an eō, “jemaron̄ ke lewaj n̄an eok juon Bok in Mormon?”
Iaar uwaak, “kōttar jidik.” “Ij ļōmņak ewōr juon aō.”
Ke ij kwaļo̧k kape eo aō n̄an er, raar bwilōn̄. Iaar ba bwe ilo bukwon eo aō ilo Cape Town jet iiō remootļo̧k, mijenede ro raar letok aō juon Bok in Mormon ilo juon iien kaalwōjwōj. Iaar bōke, im jen tōre eo n̄an kiiō ij riiti wōt peij ko.
Ālkin lotok eo aer, iaar bar kūrtok mijenede ro. Iaar ruttoļo̧k ilo bar juon kabun̄, ijoke, ijo eo ejjab lukkuun jema ekar rikaki ie. Ļōmņak eo n̄an bar peptaij ekar juon menin kapan̄pan̄ n̄an aō oktak. Mekarta, iaar jino kobaļo̧k ilo M̧ōnjar eo edik. Ālkin juon iiō im jimettan, branch būreejtōn eo eaar kūrļo̧k eō n̄an opiij eo an.
“Kōm Kōņaan bwe Kwon Bōk juon Naan in Kam̧ool”
“David, ikōņaan lewaj n̄an eok juon idajon̄jon̄,” branch būreejtōn eo eaar ba. “Kōm lukkuun kōņaan bwe kwon bōk juon naan in kam̧ool kōn Bok in Mormon. Ij en̄jake kwomaron̄ kōm̧m̧ane bwe n̄e inaaj kūr eok n̄an rikaki in Katak kōn Gospel. Kwoj rikaki in university, im kwojjab mijak in jutak m̧aan armej.
Rainin, rikaki raikuj membōr in Kabun̄ in.1 Ak kar m̧okta, branch būreejtōn eo ekar en̄jake im̧we n̄an kajjitōk ippa bwe in rikaki. Ij m̧ōņōņō kake.
Iaar ba “EM̧M̧AN.”
Aolep joteenin Jadede ij ekkatak katak eo ilo elaajrak eļap bwe in maron̄ meļeļe, jeļā, im keidi n̄an bwebwenato ko ilo Bok in Mormon im armej ro. N̄an eō, kwaļo̧k jān bok eo ej juon wāween eo em̧m̧an n̄an bōk juon naan in kam̧ool jene.
Juon Jabōt, ālkin juon iiō in aō katakin, mijen būreejtōn eo jān Pretoria eaar itok n̄an juon kweilo̧k im kar pād ilo kilaaj in Jabōt Jikuuļ eo aō.
“Kom̧m̧ool, Brother Baxter,” eaar ba ālkin. “Ekar juon katak em̧m̧an. Kwoj jān ia?”
Ke ij ba n̄an e jen Cape Town, eaar kajjitōk ward ta eo kwaar pād ie.
“Iaar jab pād ilo juon ward.”
“Ta meļeļein?” eaar ekajjitōk.
“Ij āinwōt juon eo kwoj ba riaelōn̄ ko?” Iaar ba. “Ijjab juon membōr in Kabun̄ in.”
Eaar ilbōk mejen im kar jibadōkļo̧k branch būreejtōn eo.
“Ewōr juon ejjab membōr ej kwaļo̧k kōn jeje ko rekwojarjar?” mijen būreejtōn eo eaar kajjitōk ippān.
“Ekwe, enana ke an kar kōm̧m̧ane?”
“Jaab.”
“Ekar ke kaim̧we?”
“Aaet.”
“Ekar ke kwaļo̧k katak ko rem̧ool?
“Aaet.”
Raar kōtļo̧k aō waanmaanļo̧k im katakin. Jejjo̧ iiō tokālik, iaar loļo̧k baam̧le eo aō ilo Cape Town ilo iien Kūrijm̧ōj. Ke iaar pād ijo, jinō ekar ba n̄an eō ke ej tin etal jen m̧ōnjar eo an ālkin an eo ejjab lukkuun jema kar mej. Ilo iien eo, Irooj eaar jipan̄ eō en̄jake jabdewōt likjab ko aō kōn wōt aō ettā n̄an jino im kabun̄ eo iaar rūttoļo̧k ie.
Ke iaar ro̧o̧l n̄an m̧weo, iaar kūrļo̧k branch būreejtōn eo.
“Ikōņaan peptaij ilju,” iaar ba n̄an e
“David, kwoj m̧ool?”
“Aaet,” Iaar ba “Iaar bōk juon ennaan jān Irooj.”
“Ewōr juon Men Ippa Ij Lewaj n̄an Eok”
Ke iaar ba n̄an eo lukkuun jema ke em̧ōj aō erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata, ikar jab meļeļe etke ekar ikōn̄.
“In kwaļo̧k n̄an eok jidik bwebwenato,” eaar ba
Jema, eo eaar jab kōnono n̄an n̄a kōn kabun̄, kar ba n̄an eō ke eaar juon ļaddik em̧m̧an ded, eaar kobaļo̧k ilo Cumorah Ward ilo Cape Town. Eaar pād ilo tiim in ikkure basketball eo an ward eo. Eaar m̧ōttāik jejjo armej ro jān Armej ro Rekwojarjar ilo Raan Ko Āliktata. Juon iaan ro m̧ōttan ekar juon mijenede me, ālkin mijen eo an, ekar mej ilo ilo Vietnam.
N̄e en kar jab jako eo m̧ōttan jema, ij ļōmņak en kar kobatok ilo Kabun̄ in. Mour eo an en kar juon bwebwenato eo eoktak. Iiō ko tokālik, eaar dāpij kautiej eo an n̄an Armej ro Rekwojarjar ilo Raan Ko Āliktata. Eaar jab make bōk kuņaan ilo jabdewōt kabun̄, ak eaar lukkuun rie kāālet eo aō n̄an kobatok ilo Kabun̄ in.
Jejjo̧ allōn̄ ālkin mej eo an eo ejjab lukkuun jema, iaar ba n̄an jinō kōn peptaij eo aō. Ekar jab juon iien em̧m̧an. Mekarta, ke iaar etal n̄an Netherland n̄an loļo̧k ro uwaan baam̧le in Dutch ilo jait eo an jinō, iaar kwaļo̧k bwebwenato in oktak eo aō n̄an er. Ej iien eo iaar jeļā kōn an bar baam̧ļe eo ekkeijeltok n̄an Kabun̄ in.
Ilo iien loļo̧k eo aō, eo wūllepa eaar jibadōktok eō. “Ewōr juon men ippa n̄an lewaj n̄an kwe,” eaar ba. Eaar letok n̄an eō jinoin Bok in Mormon ilo kajin Dutch, kar jeje ilo 1890.
“An baam̧le eo ad jem̧aan,” eaar ba. “Ikōņaan bwe kwon bōke.”
Ekkeijel kein ruo an baam̧le in n̄an Kabun̄ in eaar lukkuun kaenōm̧m̧an eō. Rainin, ij kaorōk Bok in Mormon in ilo kajin Dutch. Ej kakeememej eō kōn mijenede ro jinoin raar lotok eō. Ej kakeememej eō kōn aorōkin katak ko ilo Bok in Mormon kōn oktak eo aō. Ej kakeememej eō kōn kautiej eo an jema kōn Kabun̄ in im bwe jet iaan ro jibu im jim̧m̧aō raar bōk gospel in em̧ōj an kar jepļaaktok.
Ej bar kakeememej eō bwe em̧ool Bok in Mormon ewōr ie kajoor n̄an karreel jim̧or “riJu im riAelōn̄ ko bwe Jisōs ej RiKraist, Anij Indeeo, Ej kwaļo̧k E n̄an laļ ko otemjeļo̧k.”2