“Etke Anij Ejjab Ukōt Mour e Aō?,” Liaona, Jān. 2024.
Rūm̧m̧an Ded ro
Etke Anij Ejjab Ukōt Mour e Aō?
Ke m̧are eo aō eaar jino nana, iaar jeļā kōn kajoor eo an anemkwoj.
Ke eaar 23 aō iiō, iaar liāp ilo tampeļ n̄an em̧m̧aan eo eto aō etōnak kake. Iban meļo̧kļo̧k raan eo elem̧ōņōņō ilo aolepen mour eo aō.
Ak aolep men ko iaar aolep iien kōtmeni n̄an mour eo aō raar jino oktak ilo juon jekjek enana. Ļeo pāleeō eaar jino kōmetak eō ilo ānbwin im kōļmenļo̧kjen.
Iaar en̄jake pok im metak. Ijjab meļeļe etke tiljek eo aō ekar jab kōm̧m̧an oktak ilo m̧are eo aō. Em̧ōj aō kar jerbale juon mijen, kar kōjparok bujen ko aō, ļoori kien ko, im kar jerbal āinwōt juon rijerbal in tampeļ. Ak jekdo̧o̧n ewi jon̄an aō kar kajjieon̄ in epaakļo̧k Jisōs Kraist, m̧are eo aō ekar wōt nana ļo̧k.
Ilo aō reilikļo̧k, iaar kile bwe men̄e iaar lukkuun jar kake n̄e ij aikuj m̧areik ļeo pāleeō im wōr tōmak ke kom̧ro naaj mijaļ būrabōļōm̧ ko, iaar kōjekdo̧o̧n kōkaļļe ko raorōk n̄an būrabōļōm̧ ko me raar waļo̧k tok ālik ilo m̧are eo am̧ro.
Pukot Uwaak ko
Ālkin ļalem iiō in ajimakeke im metak ilo ānbwin, jemjerā eo aō ippān Jemedwōj Ilan̄ im Jisōs Kraist ekar kōmetak. Kōtmene ko aō n̄an mour eo aō raar jeepepļo̧k im jorrāān.
Ikar en̄jake an rub būruwō.
Ke ej alikkar ke ļeo pāleeō ejjab kōņaan oktak, iaar jino kajjitōk ippān Anij bwe en kōtļo̧k eō jān jekjek eo aō ak n̄an kwaļo̧k n̄an eō iaļ eo ejim̧we n̄an bōke. Ak ke uwaak ko iaar aikuji raar jab itok, iaar jino jekpen ņae Jemedwōj Ilan̄ bwe ej kōm̧m̧an menin aō en̄taan.
Iaar etal wōt n̄an jar im kōjparok bujen ko aō, ak būruwō eaar obrak kōn illu kōn ejjeļo̧k tōl.
Innām juon raan iaar kile bwe ikar bōk uwaak eo n̄an jekjek eo aō—Iaar aikuj kōjerbal anemkwoj eo aō n̄an jerbale im ukōt jekjek ko aō. Im iaar jeļā ta kāālet eo em̧m̧antata n̄an eō n̄an katōprak kōttōpar eo aō n̄an jepļaakļo̧k n̄an ippān Jemedwōj Ilan̄.
Āliktata iaar kāālet n̄an wōnm̧aanļo̧k wōt: iaar kōnono ippān ļeo pāleeō, im ekar kabwilōn̄lōn̄, kom̧ro kar kōjemļo̧k pād eo am̧ro ilo meļeļe.
Kajoor n̄an Kāālet
En̄jake in epen ekar jipan̄ eō jeļā kōn kajoor im aorōk eo an menin letok eo an anemkwoj Anij ekar letok.
Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, ekar kwaļo̧k: “Relikļo̧k, jemaron̄ lo ta oktak eo eļap jet iaan kāālet ko ad kar kōm̧m̧an ilo mour ko ad. Jej kōm̧m̧ani kālet im jokālet ko eļan̄n̄e jej kalimjōk men ko reoktak im ļōmņake ijo renaaj tōl ie ļo̧k. Ilo kōm̧m̧ane, jenaaj ļoor kapilōk eo an Būreejtōn Russell M. Nelson n̄an jino juon kōļmenļo̧kjeņ. N̄an kōj, jem̧ļo̧k eo ej ilo iaļen bujen eo ilo tampeļ n̄an mour indeeo, menin letok eo eļaptata an Anij.”1
Iaar kile bwe Jemedwōj Ilan̄ eban bōk kuņaan ilo anemkwoj eo an jabdewōt—Eaar kōtļo̧k bwe in make kōm̧m̧ane kāālet eo aō n̄an m̧areiki ļeo pāleeō. Eaar jab bar kipel ļeo pāleeō bwe en oktak, men̄e iaar kōjparok bujen ko aō, kōnke juon m̧are indeeo eaar bōk jikin ilo kōņaan an jetōb im kanniōk jān jim̧or armej ro ilo aer ļoor Jisōs Kraist.
N̄e jej ioon apan̄ ko, jej maron̄ kōjerbal anemkwoj eo ad n̄an ukōt erreim̧aanļo̧k ko ad, m̧willid, im em̧ool kōj make. En̄in ej menin letok eo ekwojarjar an anemkwoj. Jemedwōj Ilan̄ ekōņaan bwe jen kappukot E im Jetōb innām lōke kōj make n̄an kōm̧m̧ane kāālet eo em̧m̧an n̄an mour ko ad.
Oktakļo̧k n̄an Rilo̧mo̧o̧r eo
Ilo jinoin iaar kōtmene bwe in mour im wōnm̧aanļo̧k wōt jān m̧are eo aō ekōmetak, ak kōm̧akūt in ekar rum̧wij im pen. Jen kein jipan̄ ko, ron̄jake ennaan ko an rikanaan ro, riiti jeje ko rekwojarjar, jar, im en̄jake iakwe im jipan̄ jān ro m̧ōtta im baam̧le eo, ij en̄jake kōjatdikdik n̄an em̧m̧anļo̧k ilju im jekļaj. Ilo aō kōjerbal anemkwoj eo aō n̄an pukot kōmour, iaar reim̧aanļo̧k n̄an juon mour me ekitbuuj jeo̧rļo̧k bōd im jem̧jerā eo em̧m̧an ippān ro jet, ekoba Rilo̧mo̧o̧r.
Ilo an ļapļo̧k meļeļe n̄an kōjerbal anemkwoj eo ilo mour eo aō, illu eo aō ņae Anij eaar oktak n̄an meļeļe, im jemjerā eo aō Ippān eaar maron̄ kōmouri.
En̄in ej tarlep in gospel eo—kōm̧m̧ani kāālet ko ad n̄an itok n̄an Kraist, mour kake kapilōk ko jān rikanaan ro ro rej rōjan̄ kōj n̄an kōjerbal anemkwoj eo ad n̄an lōke Irooj, im juon mour eo aiboojoj, obrak kōn tōmak.
Āinwōt an Sister Camille N. Johnson, Būreejtōn eo Eutiej an Doulul eo an Kōrā ro kar kwaļo̧k: “Pedped in katak eo eim̧we kōn anemkwoj in kālet, em̧ool, ej kōtļo̧k kōn n̄an je bwebwenato eo ad make. Ak Jisōs Kraist ej pojak im jutak n̄an kōjerbal kōj āinwōt jet kein jerbal ko rekwojarjar n̄an jin̄n̄aik eļan̄n̄e ewōr [ad] tōmak n̄an kōtļo̧k bwe En, eļan̄n̄e [jenaaj] kōtļo̧k bwe En rijeje kōn bwebwenato in mour eo [ad].2
Kōjem̧ļo̧k m̧are eo aō ekar juon iaan en̄jake ko rōkōmetaktata iaar ioone. Ak iaar jeļā bwe n̄e jej ioon apan̄ ko jab jeļā kaki ilo mour in, jemaron̄ pukot tōl an jetōb n̄an kōm̧m̧ani kāālet ko me ej iuunm̧aanļo̧k kōj ilo iaļen bujen in. N̄an ļoor Jemedwōj Ilan̄ im Jisōs Kraist, jemaron̄ aolep iien bōk kōjatdikdik ilo men ko rem̧m̧an n̄an itok im Aer kallim̧ur kōn kōjeraam̧m̧an in aenōm̧m̧m̧an im lan̄lōn̄.
Rijeje eo ej jokwe ilo Chile.