“Men ko Aō Raorōktata,” Liaona, Jān. 2024.
Ainikien ko an Armej ro Rekwojarjar ilo Raan Ko Āliktata
Men ko Aō Raorōktata
Katen wōt n̄e juon iaan Armej ro Rekwojarjar ilo Raan Ko Āliktata eaar tōlļo̧k n̄an aō peptaij im juon mour ekāāl ilo gospel in an Jisōs Kraist.
Kōmeļeļe jān Ben Simonsen
Jerbal eo aō āinwōt juon chef ej mour eo aō. Iaar ito-itak ilo laļin kōmat ilo wōteļ ko reļļap im ilo tima in jambo ko. Iaar pād ilo juon tiim in rikōmat ro rōm̧akde me raar wiini elōn̄ jiāe ko ipeļaakin laļin.
Juon iien, iaar pād ettoļo̧k jān kapijuknen ium̧win jilu iiō. Emakijkij an jinō call e tok eō kōn dānin kōmjaaļaļ im bwe in ro̧o̧lļo̧k.
Juon raan ilo Milan, Italy, ijo iaar bajjōk jerbal ie āinwōt juon rikōmat ilo juon wōteļ, iaar ioon mijenede ro rej jerbal aolep raan ilo juon jikin tireen eobrak kōn armej. Raar ba n̄an eō kōn Kabun̄ eo an Jisōs Kraist im Armej ro Rekwojarjar ilo Raan Ko Āliktata im kar kwaļo̧k jidik kōn pedped in gospel eo. Iaar m̧ōņōņō kōn ta eo raar katakin eō kōn baam̧le.
Mijenede ro raar letok n̄an eō juon kape in Bok in Mormon im kar kajjitōk bwe in jar kake. Raar bar letok n̄an eō juon bok jidikdik in kōmeļeļe ko kōn kilen jar.
Iaar ro̧o̧l n̄an wōteļ eo aō kōn m̧ōņōņō, deļo̧n̄ ilo ruum̧ eo aō, jar, im jino riit. Toon wōt aō riiti Bok in Mormon, toon wōt aō ikdeelel in riit. Ako ilo būromōj eo ej bwe, jikin jerbal eo ekōm̧m̧an bwe in jab bar lo mijenede ro. Ke ej jemļo̧k jerbal bajjōk eo aō ilo wōteļ eo, iaar ro̧o̧l n̄an kapijuknen eo ilo Bari, ijo iaar jino kōmat n̄an bar juon wōteļ.
Juon raan ilo rejtōren eo ilo wōteļ eo, bar juon rikōmat, kōn un ko ejjeļo̧k meļeļeier, eaar kajjieon̄ in jerāik jet iaan waitress ro ijo. Ekar illu kōnke riajeej ro, me rej Armej ro Rekwojarjar ilo Raan Ko Āliktata, raar m̧akoko in etal ippān.
Keememej mijenede ro iaar ioon er ilo Milan, iaar ba n̄an rikōmat eo ke ewōr an waitress ro jimwe n̄an jab uaake.
“Bwe, kwe bar Mormon?” ekar kajjitōk.
Kōnke em̧m̧an ippān katak in katak ko mijenede ro raar katakin eō im kōnke iaar en̄jake n̄an jojomare waitress ro, iaar uwaak, “aaet.”
Tōre eo tok juon ke rikōmat eo ej lo waitress ro, ej ba n̄an er ke iij bar juon Armej ro Rekwojarjar ilo Raan Ko Āliktata. Raar kanooj m̧ōņōņō. N̄e kōmij aiin doon n̄an m̧ōn̄ā in rālep, raar jino kajjitōk kajjitōk ko kōn Kabun̄ in ilo Milan. Iaar ba n̄an er kōn jikin eo im ke iaar ioon mijenede ro ijo. Ke ekar itok m̧ōn̄ā in rālep ko kijimean, iaar jibwe tok juon kab in wain jen tābōļ eo.
“Ta ņe kwoj kōm̧m̧ane idaak wain?” juon iaan waitress ro ekar kajjitōk.
“Elōn̄ ke jorrāān?” Iaar ba.
“Kwoj ke jar wōt?” juon iaer ekar kajjitōk.
“Ilo wāween rot?” Iaar ba.
“Elmen am̧ kar nuknuk eo am̧ ilo raan eo kwaar peptaij?” raar kajjitōk.
“Ijjab keememej,” ikar ba n̄an er. “Ekar juon wōt allōn̄ detta.”
Raar lukkuun illu kōnke rej ļōmņak ij kōm̧m̧an kōjak kōn er. Iaar ba n̄an er ke ijjab. Iaar kwaļo̧k ke ijjab juom membōr in Kabun̄ in, ak iaar ba n̄an er ke em̧m̧an ippa Bok in Mormon im pedped in gospel eo ikar katak kaki. Im iaar kajjitōk elmen bwe in jeļā eļapļo̧k kōn kabun̄ eo aer.
Waitress ro raar kwaļo̧k kajjieō n̄an mijenede ro. Raar jab lukkuun tōmak ke iaar kam̧ōj katak ko im kar peptaij.
Pija in baam̧le eo an rijeje eo
Jen wōt peptaij eo aō, mour eo aō ekar oktak. Iaar jeļā bwe koban likūt juon ne n̄an laļin im ne eo juon neem̧ n̄an gospel in. Iaar jeļā bwe jerbal ejjab men eo eaorōk ilo mour in. Iaar jeļā bwe Irooj im baam̧le eo aō rej itok im̧aantata. Āliktata, iaar meļeļe kōn en̄jake eo an jinō kōn aō jako, im iaar kajjitōk ippān bwe en jeo̧rļo̧k aō bōd.
Iaar kabōjrak aō ito-itak n̄an laļin, iaar m̧are ilo Bern Switzerland Temple eo, jino juon baam̧le, im kar bōk juon jerbal in kōmat ilo juon aujpitōļ ijo ij jokwe ie, ijo iaar kōjerbal aolep talōn ko aō n̄an jipan̄ kōmour armej ro renan̄inmej. Kiiō ij eddoin jikin jipan̄ (human resources) eo ilo aujpitōļ. Jerbal ilo ijo ij jokwe ie ej letok n̄an eō iien n̄an wūjlepļo̧k n̄an baam̧le eo aō im kūr ko aō ilo Kabun̄ in.
Jān raan eo iaar peptaij im kar bōk menin letok kwojarjar eo aō ruo iiō ālkin peptaij eo aō, ekar em̧m̧an ippa kwojarjar eo an tampeļ im jerbal eo ijo. Ke jema eaar mej emān iiō tokālik, iaar inepata. Eaar aō rijojomar. Kam̧m̧oolol kōn gospel eo an Jisōs Kraist, ijeļā bwe ej mour.
Ke iaar deļo̧n̄e celestial ruum̧ eo ālkin kōm̧m̧ani jerbal ko kōn jema, iaar en̄jake an pād ijo. Ilo iien eo, iaar jeļā bwe jema em̧ōj an bōk gospel eo im iakwe eo an Irooj n̄an ro Nejin.
Kōj Armej ro Rekwojarjar ilo Raan Ko Āliktata ewōr ippād kōjeraam̧m̧an eo n̄an jeļā m̧ool eo an gospel in. Ij kam̧m̧oolol kōn an kar ukot mour e aō. Gospel in ej ijo iaar lo m̧ōņōņō eo em̧ool. Gospel in im baam̧le eo aō rej men ko aō raorōktata.