Ua sili atu nei lo’u iloa. Matuā’i sili atu lava!

Na soifua mai Peter Burt i le 1949 i Napier, Niu Sila, ma na ola a’e i le nuu e lata ane o Gisborne. Sa nā o le 14 tausaga—ma o se tamaitiiti aoga i le Aoga Maualuga i Lytton—ina ua afāina lona aiga i se maliu tigā: na maliu le tamā o Peter ina ua paū a’o valiina lō latou fale.

“O le maliu ai o lo’u tama i se tausaga talavou faapena sa avea ma se tulaga matuai faanoanoa lava,” sa ia ta’ua ai. O mea na sili ai ona loto momoia le aafiaga ona, o le ola ae o se tasi e lē talitonu i le Atua, sa leai sona malamalama i se olaga pe a mavae lenei olaga. I ni tausaga mulimuli ane, sa fesoasoani savali a Elder Neal A. Maxwell i le Konafesi Aoao ia Peter e malamalama ai i le loloto o lona faavauvau i lena taimi. “A aunoa ma le toetu,”na sii mai ai e Elder Maxwell, “e leai se faamoemoe mulimuli, e aumaia ai le faavauvau lata mai.”

I le aunoa ma se malamalama i le Atua ma Lana fuafuaga mo i tatou, na manatua e Peter, “O lo’u talitonuga o le olaga sa faapea, ‘ai , ma inu ma fiafia, auā o taeao tatou tē oti ai.’ E faafetai ai, ua sili atu lo’u iloa nei, matuā’i sili atu lava!”

Sa aoga Peter i le Iunivesite o Vitoria i Uelegitone, ma ina ia lagolagoina lana aoga, sa faigaluega ai o ia i aso malolo i lona aiga i le Kamupani a le Gisborne Refrigerating. O iina na ia feiloai ai i se alii faigaluega o se Kerisiano faamaoni. “Sa ese o ia mai isi tagata faigaluega na matou galulue,” o le tala lea a Peter. “Sa tumau lava o ia i lona talitonuga i se tagata maoae mamana. Na ou fiafia i ai ma na ou faatauina ai se Tusi Paia ma amata ona faitauina.”

O upu o le Tusi Paia na aafia tele ai Peter—na ia iloa e moni lea tusi—ae sa o’o mai ai le tele o fesili e le’i taliina. “Sa ou sailia moni lava se isi malamalama,” o le tala lea a Peter. Ae, sa le’i manao o ia e auai i se isi lotu.

Na maua e Peteru lona faailoga tikeri ona faaipoipo lea iā Frances Mary Costello i le 1970. Na siitia atu le ulugalii i Aukilani ina ia maua ai e Peter se tipiloma mai le Ardmore Teacher’s College. E le’i leva ona siitia mai ae o’o atu ni faifeau tala’i se toalua iā te ia mai le Ekalesia a Iesu Keriso o le Au Paia o Aso e Gata Ai. “Na ou malie e feiloa’i ma i lāua auā na foliga mai o i laua o ni tagata lelei,” na manatua ai e Peter, “ae sa ou lē fiafia i le lā lotu.” Peitai, ina ua tuua e faifeautalai ni kopi o le Tusi a Mamona mo ia ma Frances, na lā faitauina. “O lena lava agaga na o’o mai ia i maua a’o o’u faitauina le Tusi Paia,” o le tala lea a Peter. “Sa ma iloaina loa e moni.

“Ina ua foi mai faifeautalai, na ma fai atu, ‘Ia, ma te talitonu e moni le Tusi [a Mamona]. O le ā le ma mea ā fai nei?’ O le ala lena na oo ai ina ma papatiso.”

Na avea le ulugālii ma ni tagata toaaga talu ina auai i le Ekalesiai le 1972, “ma oka se matagofie o le faigamalaga!” o le tala lea a Peter. O “tagata onosai, agalelei ma alōlōfa” i le Uarota a Papakura o le Siteki a Aukilani i Saute, na fesoasoani ia i la’ua e faamasani i o lā olaga fou o ni Au Paia o Aso e Gata Ai, ma ina ua lā toe foi atu i Gisborne i le faaiuga o le tausaga lena, na lā auai i le Paranesi lona 2 a Gisborne i le Poverty Bay District.

I le 1976, i le 27 o tausaga o Peter, na avea si ma peresitene o le paranesi. Ina ua avea le itū ma siteki, na ia amata i se valaauga e 9-tausaga i le au peresitene o le siteki, ona avea lea ma peresitene o le siteki i le toe itiiti atoa le 10 tausaga. I lena taimi, sa la faafeiloaia ai ma lona faletua, o Frances, ni atalii se toalima i lo la aiga ma sa faamanuiaina e tausia i latou i totonu o le talalelei. I le 1985, na filifili ai e Peter se isi auala faigaluega—na ia faaaluina le isi 24 tausaga o se tausi lagomeli seia o’o i lona litaea i le 2009.

“O se tasi o faatumutūmuga o lo matou auai i le Ekalesia o lā ma filifiliga e auauna atu faamisiona,” ua fai mai ai Peter. Na valaauina i le Aai o Quezon i le Misiona i Saute Filipaina, na auina atu i la’ua i le motu o Mindoro. “O se aafiaga ofoofogia, lea o le ā ma manatua pea, ae maise mo le faatuatua ma le lotomaualalo o tagata īīna.”

Ina ua lā toe foi atu i Niu Sila, na faatau atu e le au Burt lo lā fale i Gisborne ma nonofo i se taavale veni mo se tausaga ae le’i nonofo tumau i Taupō, ona o se taulaga manaia ma e ogātotonu i le mea o lo’o i ai le lā fanau tama ma o latou aiga. Na auauna atu Peter o se peresitene o le korama a toeaina o le Uarota a Taupō seia o’o i le Konafesi a le Siteki a Rotorua i le ogātotonu o le-2023, ina ua valaaulia o ia o se peteriaka.

I le toe tepa i tua, ua iloa ai e Peter le aao o le Atua o loo taitaiina o ia agai i le talalelei a Iesu Keriso ma se olaga na te le’i mafaufauina. “Ua ou iloa nei o le Agaga Paia na molimau mai ia te a’u i le upumoni.”

I le avea ai ma se peteriaka faatoā valaaulia, e tatalo faatauānau o ia ina ia mafai ona ia fesoasoani i isi tagata ia latou maua foi lena lava taitaiga mamana e ala i faamanuiaga faapitoa ma patino mai lo tatou Tamā Faalēlagi alofa.

“O le a ou faia le measili e faataunuu ai [lenei valaauga] ma le faaaloalo ma le tiute tauave ua faamoemoeina mai e le Alii iā te a’u . . . O se avanoa tele ma faamamaluina. Toetoe lava ā lofitūina a’u e le tiutetauave . . . ae e i ai lo’u faatuatua e talitonu ai o lē ua valaauina e le Alii, Na te faaagavaaina.”