“Rilo̧mo̧o̧r an Aolep, juon Gospel n̄an Aolep,” Liaona, M̧aaj. 2024.
Rilo̧mo̧o̧r an Aolep, juon Gospel n̄an Aolep
Gospel eo, Pinmuur, im Jerkakpeje eo an Jisōs Kraist ej kōjeraam̧m̧an aolep ro nejin Anij.
Kraist im ļeo e akā, jān J. Kirk Richards, ban maron̄ kape
Gospel eo em̧ōj an bar jepļaaktok an Jisōs Kraist ej, jinoin, kiiō, im indeeo, unjen m̧ōņōņō eo indeeo, aenōm̧m̧an eo em̧ool, im lan̄lōn̄ eo n̄an aolep ilo raan kein āliktata. Kōjeraam̧m̧an ko me rej itok jān gospel in im jān jouj eo ejjeļo̧k jon̄an an Kraist ejjab meļeļein n̄an jejjo wōt ro rekar kālet er, iien ko etto ak ilo raan kein.
Jekdo̧o̧n ewi jon̄an likjab ko jej maron̄ en̄jaki, n̄an kōjekdo̧o̧n jerawiwi ko me rej kōjepel kōj jān E ilo jidik iien, ad Rilo̧mo̧o̧r ej jiron̄ kōj bwe “E ej erļo̧ke Pein n̄an [kōj] aolepān raan eo” (Jekab 6:4), kūr kōj aolep n̄an itok n̄an E n̄an en̄jake iakwe eo An.
Kōjeraam̧m̧an ko an Gospel n̄an Aolep ro Ioon Laļin
Gospel eo an Jisōs Kraist em̧ōj an “kar jepļaaktok ilo raan kein āliktata n̄an tōpar … aikuj ko an aolep laļ, kajin, lo, im armej ro ioon laļin.”1 Gospel in ej n̄an aolep laļ, armej im m̧anit “aolep rej āinwōt juon n̄an Anij” (2 Nipai 26:33).2 Bok in Mormon ej jutak āinwōt juon kein kam̧ool eo ekabwilōn̄lōn̄ kōn m̧ool in.
Lo̧o̧k in ej kam̧ool bwe Kraist ej keememej aolep laļ (lale 2 Nipai 29:7) im enaaj kwaļo̧k “E make n̄an aolep ro rej lōke E, … [im jerbali] mennin bwilōn̄ ko rekajoor, kakōļļe ko, im kabwilōn̄lōn̄ ko, ilubwiljin ro nejin armej” (2 Nipai 26:13). Ilubwiljin mennin kabwilōn̄lōn̄ kein, kakōļļe ko, im kabwilōn̄lōn̄ ko ej ajedeed eo an gospel in. Kōn menin, jej jilkinļo̧k mijenede ro ipeļaakin laļin n̄an kam̧ool kōn nuuj eo em̧m̧an. Jej barāinwōt kwaļo̧k gospel eo n̄an ro ipeļaakid. N̄an lukkuun kōjerbal priesthood kii ko em̧ōj aer jepļaaktok n̄an ro remour im ro remej me tarlep in gospel in enaaj jerbal n̄an aolep ļaddik im leddik ro nejin jined im jemād ilan̄—m̧okta, kiiō, ak jekļaj.
Men eo eaorōk ilo gospel in—ennaan eo eaorōk an aolep rikanaan im rijilōk me kar kūr n̄an jerbal—ej bwe Jisōs ej Rikraist eo im bwe eaar itok n̄an kōjeraam̧m̧an aolep. Āinwōt membōr ro ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, jej kwaļo̧k bwe en̄taan in pinmuur eo An ej n̄an aolep armej.
Aikuj eo bwe en wōr juon Pinmuur eo Em̧ool im Ekwojarjar Indeeo
Ilo aō ito-itak ilo peļaakin laļin, ij kōm̧m̧an intōrpiu ippān membōr ro an Kabun̄ in. Ikar im̧we ke ij ron̄ wāween aer en̄jake kōjeraam̧m̧an ko an Pinmuur eo an Jisōs Kraist ilo mour ko aer, men̄e rej kwaļo̧k jerawiwi ko aer. Ewi jon̄an an em̧m̧an menin bwe Pinmuur eo An en karreoik kōj en aolep iien pād n̄an kōj aolep!
“Emennin aikuj bwe pinmuur eo en kar kōm̧m̧an,” Amulek ekar kwaļo̧k, “n̄e jab aolep armej reaikuj lukkuun jako.” Jen kar aolep “wōtļo̧k im … jebwābwe, … ijello̧kun wōt n̄e kōn pinmuur eo,” emennin aikuj “bwe en wōr katok indeeo.” Bwe “ejjāmin maron̄ wōr jabdewōt edikļo̧k jipan̄ jān pinmuur eo ejjeļo̧k jem̧ļo̧kin eo enaaj bwe n̄an jero̧wiwi ko an laļ” (Alma 34:9, 10, 12).
Rikanaan Jekab ekar bar kwaļo̧k bwe kōnke “mej eaar itok ioon aolep armej, … eaikuj wōr kajoor in jerkakpeje” n̄an bōkļo̧k kōj n̄an im̧aan mejen Anij (2 Nipai 9:6).
Jim̧or jerawiwi im mej raikuj anjo̧. En̄in kar mijen eo an Rilo̧mo̧o̧r, eo Eaar peran ilo an kadedeļo̧k n̄an aolep ajiri ro nejin Anij.
Gethsemane, jān J. Kirk Richards, maron̄ jab kape
En̄taan eo an Ad Rilo̧mo̧o̧r
Ilo bon̄en eo An āliktata ilo mour in, Jisōs Kraist eaar deļo̧n̄eļo̧k Jikin Kallib Gethsemane. Ijeņ, Eaar bukwelōlō ilubwiljin wōjke olive ko im jino leļo̧k an metak eļap bwe kwe im n̄a maron̄ jeļā.
Ijeņ, Eaar jino bōk ioon E Make jerawiwi ko an laļ. Eaar en̄jake aolep metak, rub bōro, im būrom̧ōj, im Eaar en̄taani aolep metak im en̄taan bwe kwe, n̄a, im aolep armej ro raar im rej mour ak naaj mour. En̄in en̄taan eo eļap im kwojarjar “E [eaar kōm̧m̧an], … eo eļaptata jān aolep, n̄an wūdiddid kōnke metak eo, im n̄an bōtōktōk ilo aolepān Ānbwinnū” (Katak im Bujen Ko 19:18). E wōt eaar kōm̧m̧ane menin.
Ejjeļo̧k bar men em̧m̧anļo̧k
N̄an kōļļāik wōnāān jerawiwi.
E wōt emaron̄ kōpeļļo̧k aor eo
an lan̄ im kōdeļo̧n̄ kōj.3
Innām kar bōkļo̧k Jisōs n̄an Calvary, im ekar juon iien ekabūrom̧ōjm̧ōj ilo bwebwenatoin laļin, E ekar debwāāl. Ejjeļo̧k juon ekar bōk An mour jān E. Āinwōt E Emake Wōt Nejin Anij, E ewōr an kajoor ioon mej ilo ānbwin. E emaron̄ kar jar n̄an Jemān, im taujin enjeļ ro ren kar itok im jipan̄ en̄taan ko An n̄an kwaļo̧k An kajoor ioon men otemjeļo̧k. “A ekōjkan an kam̧ool Jeje ko,” Jisōs ekar kajjitōk ilo An liakeļo̧k, “bwe ren kōm̧anm̧an āindein?” (Matu 26:54).
An iakwe eweeppān n̄an Jemān—im iakwe eweeppān n̄an kōj—Jisōs eaar kōņaan leļo̧k An mour n̄an kadedeļo̧k en̄taan in pinmuur eo An ekwojarjar indeeo, eo enaaj kiiō im n̄an indeeo.
Anjo̧ eo an Ad Rilo̧mo̧o̧r
Jisōs eaar jiron̄ Rijilōk ro An n̄an wōnm̧aanļo̧k kōn jerbal eo An ālkin An mej. Elmen aer kōm̧m̧ane? Jet iaaer raar rieo̧nōd wōt, ejjeļo̧k juon iaer eaar bōk kaminene ilo im̧ōn kweilo̧k ko n̄an kwaļo̧k. Ilo iien eo, Kabun̄ eo an Kraist eaar pojak in jako. Ijoke Rijilōk ro raar lo kajoor n̄an bōk kūr ko aer im ejelet bwebwenato eo an laļin.
Ta eo eaar kōm̧m̧an bwe kajoor en itok jen m̧ōjņo̧? Ritōl kabun̄ im rimāletlet ro an Frederic Farrar raar ba: “Ewōr juon, im juon wōt emaron̄ uwaake—jerkakpeje jān mej. Aolepen menin ekar itok wōt jen kajoor in jerkakpeje eo an Kraist.”4 Āinwōt rikam̧ool ro an Irooj eo ekar jerkakpeje, Rijilōk ro raar jeļā ke ejjeļo̧k men emaron̄ kōbōjrak jerbal in jen an wōnmaanļo̧k. Kam̧ool eo aer ekar juon unjen rejetak n̄an rie kajoor eo āinwōt kar Kabun̄ eo m̧okta.
Ilo Ijtō jijen in, āinwōt juon An rikam̧ool kar kapiti, ij kwaļo̧k bwe ilo jibbon̄ in Jabōt eo moktata eaiboojoj, Irooj Jisōs Kraist eaar jerkak jān mej n̄an kōkajoor kōj im rubwe to ko an mej n̄an aolep armej. Jisōs Kraist emour! Kōn E, mej ejjab jem̧ļo̧k eo ad. Jerkakpeje ej menin letok eo an Kraist ejjeļo̧k wōneān n̄an aolep.
Kraist im Meri ilo Lōb, jān Joseph Brickey
Itok n̄an Kraist
Gospel in im Pinmuur eo an Jisōs Kraist rej n̄an aolep—ej n̄an, aolep. Wāween eo wōt jej en̄jake lukkuun likiio in kōjeraam̧m̧an in pinmuur in en̄taan eo an Rilo̧mo̧o̧r ej ilo an juon make bōk kūr eo An: “Itok n̄an Ippa” (Matu 11:28).
Jej itok n̄an Kraist ilo ad kōjerbal tōmak ilo E im ukweļo̧k. Jej itok n̄an E ilo ad kar peptaij ilo Etan im bōk menin letok eo an Jetōb Kwojarjar. Jej itok n̄an E ilo ad kōjparok kien ko, bōk kain̄i ko, kōjparok bujen ko, mour kaki en̄jake ko ilo tampeļ, im mour juon kain mour an rijilōk ro an Kraist rej mour kake.
Ilo iien ko, kwonaaj ioon ebweer im inepata. Būruom̧ emaron̄ rub kōn kwe make ak kōn juon eo kwoj iakwe. Kwomaron̄ eddodo kōn jerawiwi ko an ro jet. Bōd ko kwaar kōm̧m̧ani—bōlen bōd ko reļļap—emaron̄ kōm̧m̧an am mijak bwe aenōm̧m̧an im m̧ōņōņō em̧ōj aer ilo̧k jen eok n̄an indeeo. Ilo iien ko, keememej bwe Rilo̧mo̧o̧r ejjab wōt ļōn̄aj eddodo ko an jerawiwi ak eaar bar “en̄taan kōn metak ko im kaen̄tanaan ko otemjeļo̧k” (Alma 7:11), ekoba ko am̧! Kōn wōt ta eo E eaar dipuki kōn kwe, E ejeļā kilen jipan̄ eok ilo am̧ bōk karuwainene eo oktak in mour eo An: “Itok n̄an ippa.”
Aolep Rej Ruwainene
Jisōs Kraist eaar kalikkare bwe aolep ro nejin Jemedwōj Ilan̄ rej aolep juon wōt n̄an bōk kōjeraam̧m̧an ko ilo gospel im Pinmuur eo An. E eaar kakeememej kōj aolep bwe “aolep armej reutiej aolep ejjeļo̧k kalijekļo̧k, im ejjeļo̧k kabbōjrake” (2 Nipai 26:28).
“E ej kūrtok er aolep n̄an itok n̄an Ippān im bōk leen em̧m̧an eo An; im E ejjeļo̧k Ej kabbōjrak e jān an itok Ippān, kilmeej im mouj, rilokjak im rianemkwōj, m̧aan im kōrā” (2 Nipai 26:33).
“E ej kūrtok er aolep”—meļeļein kōj aolep! Jejjab aikuj jon̄e im keidi kōj make ak n̄an ro jet. Jejjab aikuj likūt jabdewōt menin kapan̄pan̄ n̄an iakwe eo an Rilo̧mo̧o̧r ak ļōmņak ko me kōj ak ro jet n̄an An tōpari. Āinwōt aō kar ba m̧oktaļo̧k, “Ejjab pidodo n̄an [jabdewōt bwe kwon maron̄ wanlaļļo̧k jān ilaļ in meram in Pinmuur eo an Kraist ej rom̧aak.”5
Ijoke, āinwōt an Sister Holland im n̄a kar kwaļo̧k jejjo̧ allōn̄ m̧okta jen an jako, kom̧ro kar kean̄ n̄an “bōk iakwe em̧ool, eo ej iakwe em̧ool” (2 Nipai 26:30).6 En̄in ej iakwe eo an Rilo̧mo̧o̧r n̄an kōj, bwe “E ej jab kōm̧m̧an jabdewōt eļan̄n̄e e jab n̄an jeraam̧m̧an eo an laļ, bwe E ej iakwe laļ, em̧ool jon̄an Eaar likūt mour eo An make bwe en maron̄ bōktok aolep armej n̄an e” (2 Nipai 26:24).
Ij kam̧ool bwe gospel in im Pinmuur eo an Jisōs Kraist rej n̄an aolep armej. Ij jar bwe kwonaaj lan̄lōn̄ n̄an bōk kōjeraam̧m̧an ko E ej bōktok.