“Imminene kōn juon Soap Opera: Elmen aō Kōtļo̧k an Anij Anjo̧,” Liaona, M̧aaj. 2024.
Imminene kōn juon Soap Opera: Elmen aō Kōtļo̧k an Anij Anjo̧
Ke iaar bōjrak alooj pijain soap opera, ij en̄jake an Jetōb Kwojarjar im̧we mour eo aō.
Kōmeļeļe ko jān Benedetta Vialli / Salzman International
Kāālet Jisōs Kraist ebōktok kajoor eļap, “im o, ewi jon̄an ad naaj aikuji kajoor eo An ilo raan ko rej pād im̧aan.”1 Laļ in ad epād ilo eļap pok. Rikapo eo eļapļo̧k an im̧we elōn̄ iaan ro nejin Anij. Jab kwojarjar eaiboojoj, im kapo ko rej kōm̧ad kōj im bōkļo̧k kōj jān ta eo ej bōk kōj n̄an epaakļo̧k Irooj.
N̄an anjo̧ ioon menin, jej aikuj in niknik kāālet Jisōs Kraist ilo mour ko ad im joļo̧k men ko rej kakkure jetōb eo. Moronai ekar kapilōk kōj, “Kom̧in jeļāļo̧kjeņ ilo raan ko in ami mālejjon̄; utūkļo̧k jān kom̧ aolep ettoonon” (Mormon 9:28) im kūr kōj aolep, “Itok n̄an Kraist, im weeppān ilo E, im kaarmejjete kom̧ make jān aolep men ko rejjab em̧m̧an; … im iakwe Anij kōn aolep am̧ maron̄, ļōmņak im kajoor” (Moronai 10:32).
Elmen ad maron̄ joļo̧k men ko an laļin im kōn eļapļo̧k ļōmnakin itok n̄an Kraist? Kajjojo iaad eoktak an kōm̧m̧an ilo jekjek in. Kajjojo iaad emaron̄ kōtļo̧k men ko me rej dāpij kōj liktak jān en̄jaake tarlepen im̧we an Jetōb Kwojarjar. Jej aikuji kajoor in Pinmuur eo an Rilo̧mo̧o̧r n̄an kōm̧m̧āne menin, im ej ijjino ilo ad kōjerbal anemkwoj in kāālet eo n̄an kāālet E.
Ikideelel eo n̄an Uwaanļo̧k
Ke iaar juon senior ilo high school, ikar pād ilo juon cheerleading tiim. Kajjojo raan in ekkatak, leddik ro ilo cheerleading tiim eo aō rekar kōnaan kōn ta nana eo an soap opera ilo an waļo̧k ilo tipi. Ijjan̄in kar alooje im kar jeļā bwe ekar kwaļo̧k men ko renana. Ijoke, iaar en̄jake aō jenoļo̧k aolep raan ilo iien ekkatak ko ilo an leddik ro lukkuun m̧ōņōņō in kōnono kōn pija eo. Jetōb ekar unoojdikdik tok n̄an eō n̄an jab alooje, ak iaar kōņaan wōt bwe in pād ilo bwebwenato eo aer, kōn menin iaar jino alooje.
Āinwōt ekar jab lukkuun nana ippa. Ikar ļōmņak eban kar jelet eō. Iaar jeļā bwe iban kōm̧m̧ani men ko renana me iaar lo an armej ro kōm̧m̧ani. Iaar po im kar alooje pija eo aolep raan. Ke Iaar etal n̄an Brigham Young University, iaar karōk jikejuuļ in kūlaaj ko aō bwe in maron̄ alooj aolep raan. Ijjan̄in kar mijji juon pija.
Ikar m̧are im ekar wōr juon neju nin̄nin̄. Iaar kakikiiki aolep raan ilo iien pija eo bwe in maron̄ alooje.
Ilo an iiō ko eļļā, Jetōb eaar unoojdikdik n̄an eō elōn̄ alen bwe ij aikuj bōjrak alooje pija eo. Ak ikar m̧akoko. Ikar lukkuun bōk kuņaō ippān armej ro im mour ko aer. Ekar iien aō kakkije, im iaar alooj wōt. Ikar jeļā bwe ekar jab kōmetak eō.
Juon Kūr
Jon̄oulratimjuon iiō ālkin high school, iaar alooje wōt pija eo aolep raan. Ilo kweilo̧k eo eļap, Sister Sheri L. Dew, kar Rikakpilōklōk eo Kein Karuo ilo Būreejtōnji eo Eutiej an Doulul an Kōrā ro, ekar kōnono kōn juļo̧k men ko an laļin im men ko rejjab kwojarjar. Innām ekar ba, “ij kūr kajjojo iaad n̄an kwaļo̧k diktata juon men jemaron̄ kōm̧m̧ane n̄an diwōj jān laļin n̄an epaakeļo̧k Kraist.”2
Ke ej kwaļo̧k kūr eo, iaar en̄jake juon jetōb ekabwilōn̄lōn̄, im iaar ron̄ naan kein ilo kōļmenļo̧kjeņ eo aō, “En bōjrak am̧ alooje pija en kiiō!” Ekar lukkuun kajoor; ekar kōm̧weiir eō. Iaar jeļā ilo iien eo wōt ke ijjāmin bar kowaan im̧we rot in. Iaar en̄jake n̄an jāmin bar alooje pija eo. Iaar kile bwe ejjeļo̧k juon iaan armej ro ilo pija eo eaar kōm̧m̧an jim̧we ak erreo. Iaar bōktok men ko renana n̄an mour eo aō aolep raan. Iaar kallim̧ur n̄an Irooj, iien eo wōt ilo ijo, ke ijjamin bar alooj.
Ekar jab pidodo! Jon̄oulratimjuon iiō in imminene im ekar lukkuun in pen n̄an joļo̧k. Kiiō e m̧ande im ej poojakin jino pija eo. Iaar etetal iturin rim̧oot in TV eo. Ikar kōņaan kōjo̧ TV eo. Iaar keememej kallim̧ur eo aō n̄an Irooj ke iban bar alooj. Ikar etal jene.
Innām iaar ļōmņak kōn armej eo em̧m̧antata ippa im kar ļōmņake ta eo enaaj waļo̧k n̄an e im bar ro̧o̧l n̄an remote eo. Iaar jeļā iaar aikuji jipan̄ eo an Anij, kōn menin iaar bukwelōlō im jar kōn kajoor n̄an jab alooj. Iaar ļōmņak kōn kallim̧ur eo aō n̄an Jemedwōj Ilan̄, im iaar diwōj jān ruum̧ eo. Iaar kāālet n̄an ļoor im̧we ko iaar būki jān Jetōb Kwojarjar im n̄an kōjparok kallim̧ur eo aō.
Menin kar āliji kajjojo raan ilo wiik eo im ko tokālik. Aolep raan, ij bukwelōlō im akweļap kōn kajoor n̄an jab alooj, im aolep raan iaar kāālet Jisōs Kraist im kar etal jen pija eo ejjab em̧m̧an alooje. Iaar bōk kajoor n̄an anjo̧ kōn kajoor eo Rilomo̧o̧r eaar letok kōn Pinmuur eo An.
Ālkin jet iien n̄an kōm̧m̧ane menin, kabwilōn̄lōn̄ ekar waļo̧k. Eaar lukkuun jako aō kōņaan alooje pija eo, ālkin alooje ium̧win 19 iiō. Eaar kanooj in kar kabwilōn̄lōn̄! Eaar lukkuun bar jako aō alooje aolep kajjitōk ilo pija eo ikar kijon̄ alooje, kōn menin ikar lukkuun bōjrak.
Jeļā eo aō eaar jino penļo̧k, im iaar kile ta kar nana eo. Ilo m̧ool iaar kōņaan kōjekdoon jabdewōt m̧wil nana (lale 1 Tessalonika 5:22). Iaar jab kōņaan ļak wōt n̄an jidik.
Juon Kōjeraam̧m̧an Ekanooj Kabwilōn̄lōn̄
Ak men eo ekanooj kabwilōn̄lōn̄ me ekar waļo̧k me ikar en̄jake ej im̧we eo an Jetōb Kwojarjar ilo mour eo aō ilōn̄in jabdewōt men ikar en̄jaake m̧oktaļo̧k. Mour in jetōb eo aō eaar eddōkļo̧k ilo kabwilōn̄lōn̄! Ilo aolepān iiō eo iaar ļōmņak iaar m̧ōņōņō kōn jem̧jerā eo an Jetōb Kwojarjar, ak iaar en̄jake wōt jidik in ta eo iaar maron̄ kar en̄jake. Iaar kile bwe alooje pija eo eaar aolep iien jelet eō. Iaar joļo̧k elōn̄ iiō ko n̄an bōk juon jem̧jerā eo ekajoor ippān Anij. Ke iaar kōjerbal anemkwoj in kāālet eo aō n̄an joļo̧k men ko rejjab em̧m̧an, men ko an laļin, Jetōb eaar ro̧o̧ltok n̄an eō ilo juon jon̄ak eo eļap, im ta oktak eo ekabwilōn̄lōn̄ eaar kōmman bwe mour eo aō en kajoorļo̧k, aenōm̧m̧an, im tōl eō.
Jej lukkuun jino dāpiji men ko ejjeļo̧k aorōkier—men ko me rej kiil kōjem in kōjeraam̧m̧an ko me Anij ekōņaan litok n̄an mour ko ad. Etke jej ukōt kajoor, kōtļo̧k im̧we eo an Jetōb n̄an limo ak bun̄bun̄? Bōlen alooj pija ejjab juon men eļap ak bōd eļap, ak ekkōtļo̧k eō n̄an bōk Jetōb Kwojarjar eļap wūjlep ļo̧k mour eo aō im kadikļo̧k aō eddōkļo̧k ilo mour in jetōb.
Ij lukkuun kam̧m̧oolol bwe Irooj ekar jab ebbweer jān eō ak kar ba wōt bwe in joļo̧k men ko rejjab kwojarjar bwe En kobrak mour eo aō n̄an im̧we ko An.
Rijeje eo ej jokwe ilo Utah, USA.