“Ta eo Ikar Loe Ke Ikar Bōjrak jān Social Media,” Liaona, M̧aaj. 2024.
Ta eo Ikar Loe Ke Ikar Bōjrak jān Social Media
Kadikļo̧k aō kōjerbal social media ekar kōm̧m̧an bwe en ļapļo̧k aō iien ippān ajri ro nejū im kōkmanmanļo̧k jem̧jerā eo aō ippān Rilo̧mo̧o̧r.
Kōmeļeļe jān David Green
Ilowaan iiō ko remootļo̧k, iaar jeļā bwe Anij ekar im̧we eō bwe in bōjrak jen social media. Iaar jeļā bwe bōjrak jān social media ekar ļap n̄an n̄a, ak iaar bar jeļā bwe ikar lo m̧ōņōņō eo ijo ilo jukjukinpād eo. Ijaje kilen kōlaajraki men kein ruo; iaar jeļā wōt ke eaikuj wōr men ko roktak.
Iaar riiti juon bok me eaar kōm̧m̧an menin aō kōļmenļo̧kjeņ kōn kajjitōk in, “Ewi jon̄an eo em̧m̧an ilo social media n̄an kōjeraam̧m̧an jukjukinpād eo, ilo an ejjeļo̧k aolep nana?” N̄an n̄a, uwaak eo n̄an kajjitōk in emaron̄ 20 minit … juon allōn̄. Iaar kōm̧m̧ane juon kōttōpar bwe en tōprak menin, im kōn jipan̄ eo an Irooj, ekar pidodo ke iaar ļōmņake. Men eo ikar jab kōtmāne ej ewi jon̄an an oktak in naaj kōkajoorļo̧k jem̧jerā eo aō ippān aō Rilo̧mo̧o̧r. Eaar jino em̧m̧anļo̧k aō en̄jake iakwe eo an Rilo̧mo̧o̧r n̄an eō; eaar jino ļapļo̧k aō meļeļe kōn karōk eo An n̄an eō; im eaar alikkar ļo̧k aō lo aikuj ko an armej ro ipeļakū.
Jab Kōtļo̧k bwe Lōke eo Aō Make En Kwaļo̧k Aorōk eo Aō
Iaar aolep iien jeļā bwe n̄a nejin Anij im bwe E ej iakwe eō. Iaar en̄jake iakwe eo an Rilo̧mo̧o̧r ilo iien ko reppen ilo mour eo aō. Ak ekkā aō kōtļo̧k bwe social media en kōjekdo̧o̧n ta eo iaar loe n̄an ļōmņak kōn eō make. Jon̄an iaar kajjieon̄ in kwaļo̧k eō make bwe pija ilo social media ren jab jelet eō, ak ilo m̧ool rekar. Iaar kadikļo̧k aō iien ilo social media eo me ekar letok n̄an eō aenōm̧m̧an ilo ļōmņak im mejatoto eo ikar aikuji n̄an ron̄ an Rilo̧mo̧o̧r jiron̄ eō elmen An en̄jake kōn eō. Iaar jab jeļā ewi jon̄an aō kar miji Ainikien m̧ae iien eo iaar kōtļo̧k An pād ijo.
Iaar tōmak wōt ilo karōk in lo̧mo̧o̧r eo. Ijeļā bwe Jisōs Kraist ej unjen karōk in. Ak iaar bar jeļā bwe Jemedwōj Ilan̄ ewōr an karōk n̄an kōjwōj kajjojo armej. Larry M. Gibson, kar rikakpilōklōk eo ilo Būreejtōnji eo Eutiej an Doulul eo an Likao ro, ekar katakin, “Ijeļā bwe Jemedwōj Ilan̄ ej n̄ūrbōktak kōn kōj kajjojo armej im ewōr juon karōk n̄an kōj n̄an bōk mejen kajjik eo ad indeeo.”1
Iaar joļo̧k elōn̄ iien n̄an kajjieon̄ im pukote ta kōttōpar eo aō. Pād ilo social media ekar letok n̄an eō bwe in lo aolep men ko rem̧m̧an, men ko rem̧m̧an armej ro rej kōm̧m̧ani. Eaar ļap aō ekkatak jān armej rein, ak eļap iien aō kappukōt jān aō jerbal. Jen tōre eo iaar bōjrak jān social media, iaar en̄jake im̧we n̄an lukkuun jeļā ta eo Jemedwōj Ilan̄ ekōņaan bwe in kōm̧m̧ane. Elōn̄ iaan men kein raar kabwilōn̄lōn̄ im oktak jān ta eo iaar ļōmņake ren kar, ak raar kōm̧m̧an bwe mour eo aō en m̧weie im jeraam̧m̧an.
Rilo̧mo̧o̧r eaar itok bwe jen bōk mour im bwe jen maron̄ jeraam̧m̧an (lale Jon 10:10). Ij kam̧m̧oolol kōn im̧we ko me Jetōb Kwojarjar ej letok n̄an kōj n̄an jipan̄ kōj bōk eļapļo̧k kōjeraam̧m̧an an mour.
Mour ilōn̄inļo̧k Social Media
Rilo̧mo̧o̧r ekar lo armej ro me ro jet raar jab kile er. Em̧m̧an ippa riiti bwebwenato ko kōn jerbal in karejar eo An n̄an armej ro im katakin er kōn aorōk eo aer. Joļo̧k eļap iien ilo social media eaar bōbraek eō jān lukkuun lo armej ro ilo mour eo aō make, ekoba baam̧le eo aō. Iaar kile bwe n̄e ajri ro nejū ren kar jab lo en̄jake ke ij kile er, innām remaron̄ in epaak aer kappukot kam̧ōņōņō ko itulik n̄an ņa aorokier.
Iaar bwilōn̄ kōn iakwe eo aō n̄an ajri ro nejū ke ej ļapļo̧k aō pād ippāer. Ij iakwe eddo eo aō āinwōt juon m̧am̧a eļapļo̧k jen kar iiō eo ļo̧k. Iaar jino jeļā kajjien ro ritūru im jino bōk kuņaaō ilo jukjukinpād eo aō. Iien ko aō rem̧m̧an n̄an jerbal in jipan̄ ekar ļapļo̧k. Iaar ļōmņak bwe social media enaaj kar jipan̄ eō jeļā eļapļo̧k, ak ilo m̧ool ikar jab pād ilo juon jekjek eo ebwe n̄an lukkuun lo aikuj ko an ro ipeļaakū.
Kadikļo̧k aō kōjerbal social media ekar juon men edik im pidodo, ak ekar kōm̧m̧an bwe tōmak eo aō en ļapļo̧k n̄an kōkam̧anm̧anļo̧k jem̧jerā eo aō ippān aō Rilo̧mo̧o̧r. Ijeļā bwe Jemedwōj Ilan̄ ej iakwe kōj, ewōr juon an karōk n̄an kōj, im ewōr ro nejin ro rej kōņaan en̄jake im lo jen bar kōj.
Rijeje eo ej jokwe ilo New York, USA.