“Jouj im Kōjparok Mour eo an Jinō,” Liaona, M̧aaj. 2024.
Ainikien Armej ro Rekwojarjar ilo Raan Ko Āliktata
Jouj im Kōjparok Mour eo an Jinō
Ikar mijak n̄e jinō enaaj aikuj m̧wijm̧wij in keppeļļo̧k menono, ijoke juon rūkaki in Būraimere eo ewujlepļo̧k ekar katakin eō kōn jar.
Christi Gerlach im jinen
Pija ko litok jān rijeje eo
Ke eaar 10 aō iiō, jinō ekar wōr an nan̄inmej in menono. Liin ekar joļo̧k elōn̄ wiik ko ilo aujpitōl n̄an kate kōn mour eo an.
Ilo iien in, Būraimere rūkaki eo aō, Sister Ellen Johnson, eaar itok im lotok eō ilo m̧weo im̧ō juon katten ilo juon wiik. Ij kab kobaļo̧k ilo Būraimere im ebwe jidik meļeļe kōn gospel in. Kajjojo wiik Sister Johnson ej kwaļo̧k naan in kam̧ool eo an n̄an eō im kōnono kōn jar. Eaar katakin eō bwe n̄e inaaj jar, Jemedwōj Ilan̄ enaaj uwaak.
Ālkin jejjo̧ wiik, ājmour eo an m̧am̧a ekar nanaļo̧k. Liin ekar jorrāān juon iaan valve ko ilo menono eo an kar aikuj kōm̧m̧ani. Taktō eo an ekar ba bwe liin emaron̄ mej n̄e eban m̧wijm̧wij menono. Iien ko an rem̧m̧an bwe en maron̄ mour, rej 50/50.
M̧wijm̧wij in keppeļļo̧k menono ekar kāāl im kauwōtata ilo 1960 ko. Rim̧wijm̧wij ro rekar errā n̄an m̧wijit m̧am̧a innām kōppeļļo̧k jen ubōn n̄an dilepen innām kōjenoļo̧k di kat ko n̄an tōpar menono eo an. Elōn̄ rinan̄inmej ro rekar jab mour jen m̧wijm̧wij in. Ikar inepata im mijak bwe jinō emaron̄ kar mej.
Baba aolep iien ej pād jerbal ak pād ilo aujpitōl ippān M̧am̧a. Leddik eo jeiū, Pam, ej lale kom̧ro brother eo aō. Ilo bon̄, iaar en̄jake ajimakeke im mijak, ijoke Iaar ļōmņak kōn ta eo Sister Johnson ekar katakin eō kake kōn jar. Emakijkij aō bukwelōlō ilo jikin kiki eo aō im jan̄, akweļap n̄an Jemedwōj Ilan̄ bwe en kōjparok mour eo an jinō.
Ilo juon iien jan̄ im jar, juon aenōm̧m̧an ekajoor eaar itok ioō im eaar bōjrak aō jan̄. Iaar en̄jake bwe aolep men renaaj em̧m̧an. Iaar jeļā bwe jinō enaaj mour n̄an lo aō rūttoļo̧k im bwe ijjab aikuj inepata. Iaar jab ron̄ juon ainikien ak juon visōn, ak iaar bōk, juon en̄jake in aenōm̧m̧an. Iaar jab pere. Jemedwōj Ilan̄ eaar uwaake aō jar, im ikar jeļā menin.
Kōmeļeļe jān Alex Nabaum
M̧am̧a eaar mour jen m̧wijm̧wij eo. Liin ekar m̧ōjņo̧ im nan̄inmej ilo aolepen mour eo an, ak Jemedwōj Ilan̄ eaar uwaaki jar ko aō im kōjparok mour eo an. Liin eaar mour n̄an lo aō rūttoļo̧k, m̧are, im wōr neju ajri.
Iiō ko tokālik, ke Būreejtōn Russell M. Nelson eaar erom̧ juon Rijilōk, jinō ekar jiron̄ eō ke ekar rim̧wijm̧wij menono eo me ekar kōjparok mour eo an. Ikar je ļo̧k juon leta in kam̧m̧oolol n̄an e. Ke ekar bar jeje tok, eaar kam̧m̧oolol eō kōn leta eo aō im kar kile jipan̄ eo an Anij ilo jerbal eo an.