“Armej Raar Jepool Eō ak Iaar Ajimakeke Wōt,” Liaona, M̧aaj. 2024.
Rūm̧m̧an Ded ro
Armej Raar Jepool Eō ak Iaar Ajimakeke Wōt
Ke iaar pād ettoļo̧k jān kapijuknen, ekkeijel eo aō n̄an lan̄ ekar jipan̄ eō anjo̧ ioon ajimakeke.
Kwojeļā en̄jake in n̄e armej rej jepool eok ak kwoj ajimakeke wōt?
Jen iien eo iaar likūt kapijuknen eo aō ilo Uganda im em̧m̧akūt tok n̄an Dubai ikijeen jerbal, eaar emakijkij aō en̄jake ajimakeke. Ilo ijo jikū, armej ro rej iak-iakweik doon ilo iaļ ko. Jaar jeļā kajjien doon. Jaar aolep jipan̄ doon. Elōn̄ ro m̧ōtta im baam̧le me rej jen kabun̄ in aō.
Ak ejjab āinwōt in ijin. Iaar jokwe ilo juon m̧anit eo ellukkuun oktak, ilo juon jikin ekillep ijo armej ro rej boub ilo jikin jerbal ko. Im men̄e ikar kobaļo̧k ilo ward eo aō im kajjieon̄ in jeļā kajjien rūm̧m̧an ded ro jet im ward membōr ro, boub in jikejuuļ in jikin jerbal ko ad ekōm̧m̧an bwe en pen n̄an lo doon jen awa ko ruo jej joļo̧ke ilo jar kajjojo wiik.
Dubai ej juon jikin ekilep im aiboojoj, im ij m̧ōņōņō bwe ipād ijin. Ak emaron̄ in kam̧ōkm̧ōk, eļaptata n̄e kwoj en̄jake ajimakeke. Armej ro elōn̄ m̧weier im āinwōt elukkuun po ļōmen mour ko aer. Ijoke, ilo aō mour ilubwiljin elōn̄ men ko rem̧m̧an im em̧ ko raiboojoj, jet iien ij ļōmņak:
Ta eo ij kōm̧m̧ane ilo mour eo aō? Ejim̧we ke jikin in n̄an n̄a?
Bar Kappukot Uwaan
Elder D. Todd Christofferson jān Doulul eo an Jon̄oulruo Rijilōk ro ekar kōmeļeļeiki bwe “juon en̄jake in kobatok eaorōk ilo ānwiniid, ilo kōmālij, im barāinwōt jetōb.”1 Ikar jab kile ewi jon̄an an aorōk n̄an kobatok m̧ae iien ikar jab lukkuun en̄jake—ejjab ilo m̧ōnjar im ejjab jabdewōt jikin, em̧ool.
Elmen aō pukote kiiō, ettoļo̧k jān aolep ro Ij iakwe?
Aolep iien, ij kile bwe “Jisōs Kraist ej unjen n̄an kobatok.”2
Ij on̄ kōn ro m̧ōtta im baam̧le eo aō, iaar lo ke ijjan̄in kar etal ettoļo̧k jān aolep ilo mour e aō ke iaar em̧m̧akūt—Ej pād wōt ippa juon Rilo̧mo̧o̧r im juon Jemedwōj Ilan̄ eo ej iakwe eo ej aolep iien kōņaan wōt ekkeijeļo̧k tok ippa.
Kōn menin iaar jino kōm̧m̧ane ta eo ij maron̄ n̄an ekkeijel wōt Ippāer aolep raan. Iaar jino ron̄jake n̄an Itok, Ļoor Eō katak podcast ko n̄e ij etal im ettōr. Iaar likūt headphone eo aō ilo jikin jerbal im kar ron̄jake jeje ko rekwojarjar n̄e ededeļo̧k jerbal ko aō.
Men eo eaorōktata, iaar jeļā juon menin letok ekabwilōn̄lōn̄ eo ej n̄an jar n̄an Jemedwōj Ilan̄. Emakijkij aō kōnono Ippān im ļapļo̧k aō ļōmņak kake jen kar m̧okta. N̄e ij ajimakeke, ij jar n̄an en̄jake An ineem̧m̧an. N̄e ij jeje email im kajjieon̄ in kijenmej ippān rijerbal ro aō, ij jar im kajjitōk An jipan̄.
Em̧m̧an ippa ta eo Būreejtōn Thomas S. Monson (1927–2018) ekar ba kōn jar: “n̄an ro … rej ioon apan̄ ko im men ko reppen reļļap im reddik, jar ej letok jetōbin kajoor; ej juon passport n̄an aenōm̧m̧an. Jar ej wūn eo n̄an ad pukot Jemedwōj Ilan̄, eo ej iakwe kōj. Kōnono n̄an E ilo jar innām ron̄jaki uwaak ko. Kabwilōlōn̄ ko rej waļo̧k ilo jar.”3
N̄an kōm̧m̧an iien n̄an Er ilo mour eo aō, eļaptata ilo m̧ool in jar, iaar jino loe bwe men̄e ikar jab jepooļ jen armej ro aō im m̧anit eo aō make, ij maron̄ wōt jepooļ kōn Jetōb n̄an en̄jake iakwe eo an Anij.
Jej maron̄ Aolep Iien Ekkeijeļ
Men ko rej eppen wōt, ak ewōr aō kōjatdikdik kōn ilju im jekļaj. Im Ikar jino tōmak ta eo Brother Milton Camargo, Rikakpilōklōk eo Kein Kajuon ilo Būreejtōnji eo Eutiej an Jabōt Jikuuļ, ekar kwaļo̧k, “Irooj Jisōs Kraist ej emour rainin. E emaron̄ pād, ilo mour ko ad kajjojo raan. E ej uwaak eo n̄an būrabōļōm̧ ko ad, ak jej aikuj kotak mejeed im mije wōt E.”4
Jet iien ij ajimakeke, ak ijeļā bwe inaaj iien otemjej, aolep iien maron̄ jar n̄an Jemedwōj Ilan̄ n̄an bōk Pinmuur eo an Jisōs Kraist.
Jutak ak bukwelōlō, ajimakeke ak ilo juon kurup, ij maron̄ jar.
Ij maron̄ Jar n̄an Jemedwōj Ilan̄.
Ij maron̄ leļo̧k kam̧m̧oolol.
Ij maron̄ kajjitōk kōn tōl im kōjparok.
Im kōn aō bujen ekkeijel, ijeļā bwe ij, juon leddik ejitenbōro nejin juon Jemedwōj Ilan̄ ej iakwe, inaaj aolep iien kobatok n̄an Ippān. Kōn An tōl, ij maron̄ en̄jake lōke bwe ij pād ilo jikin eo ejim̧we, kōm̧m̧ane ta eo E ekōņaan bwe in kōm̧m̧ane.