“Naan ko Rem̧ool,” Liaona, M̧aaj. 2024.
Pija ko an Tōmak
Naan ko Rem̧ool
Ekar lōn̄ aō kajjitōk, ak ļeo nej ippa im Kabun̄ in raar jipan̄ eō lo uwaak ko.
Pija ko litok jān rijeje eo
Rūttoļo̧k ilo juon m̧atin jab Kūrjin ilo Taiwan, iaar jab juon armej in kabun̄. Ikar jab tōmak ilo Anij, ak ikar jab jeļā kōn Jisōs Kraist. Kabun̄ eo aō ekar jerbal eo aō im boub ko an mour in rekar barāinwōt. Ekoba kadōk im kōbaatat. Ikar barāinwōt juon eo eļap an daak kope im ti. En̄in ej aolepen mōttan imminene eo am̧.
Ikar jino iaio̧ ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata kōn wōt ļeo nej ippa im baam̧le eo an. Chase ekar juon riAmedka. Ekar rūttoļo̧k ilo Kabun̄ in im kar jerbale juon mijen, ak ekar jab niknik ilo iien eo. Ijoke, ļaddik eo nejin erūttotata, ekar keppopo n̄an jerbale juon mijen, im Chase ekar rie kāālet eo an.
Ilo tōrein COVID-19 kar kilōk, kōm kar kobaļo̧k ilo kweilo̧k in kwojkwoj eo ilo m̧weo imōn jinen im jemen Chase, alooje kadiwōjļo̧k ko jān m̧ōnjar ko aer. Ke ej jem̧ļo̧k katak ko, ļaddik ro ruo nejin Chase raar kōjeraam̧m̧an im leto-letak pilawā eo im dān
Elōn̄ bwijin aō kajjitōk. Ļeo nej ippa ekar uwaaki juon ilo̧k juon ilo kijenmej. Wōn eo kar Jisōs? Ta kar en̄jake in ilo būruwō kajjojo iien n̄e jej kuk ippān doon ilo kweilo̧k ko an kabun̄ in? Menin eaar juon en̄jakeeo ijjan̄in kar en̄jake m̧oktaļo̧k. Ta eo pilawā im dān eo rej jutak kake? Etke dānnin kōmjaaļaļ ekar toor ke ij bōk kwojkwoj eo? Ta aenōm̧m̧an eo ikar en̄jaake?
Juon jota ikar lo juon website ilo kajin eo aō me ekar kōmeļeļeik wōn eo Jisōs im ekar kwaļo̧k kōn mour eo an. Raan eo tok juon, iaar ba n̄an kōrā eo jinen ļeo nej ippa ke imeļeļe wōn eo Jisōs im bwe ij tōmak ilo E.
Juon Jabōt bisop eo ekar itok n̄an m̧weo kōnke ļaddik eo erūtto tata nejin Chase eaar tin kapit ļaddik eo jatin bwe en juon pris. Ke ļaddik eo erūtto nejin ej likūt pā ko pein ioon bōran ļaddik eo jatin, ekar jab bōjrak aō jan̄. Iaar lukkuun en̄jake m̧ōņōņō ilo būruō, eaar jab bōjrak aō dānnin kōmjaaļaļ. Tokālik, ļeo nej ippa eaar ba ke iaar en̄jake Jetōb Kwojarjar im bar e.
Iaar lo iakwe eo an ļeo nej ippa n̄an kabun̄ in an ekar ro̧o̧l n̄an e. Ijoke, iaar jeļā bwe aolep men ko iaar en̄jake raar ekkeijel ippān Anij im raar jet men rem̧ool. Iaar en̄jake iakwe eo ijjan̄in kar en̄jake m̧oktaļo̧k.
“Iaar kūr n̄an Anij”
Tourist visa eo aō eaar jemļo̧k kitien im ij aikuj kar ro̧o̧l n̄an Taiwan. Ilo allōn̄ ko in aō make iaaō, iaar jab jeļā ta ikar en̄jaake. Ilo jidik iien, ikar obrak kōn ebweer im marok. En̄jaake kein raar lukkuun in eddodo rekar kōm̧m̧an menin aō ebweer. Iaar jab lukkuun jeļā kilen jar, ak iaar kūr n̄an Anij im ba n̄an E aolep men ko ikar en̄jaki im ļōmņaki. Juon en̄jake in aenōm̧m̧an ekar itok—ejja en̄jake eo wōt iaar en̄jake ke iaar pād ilo m̧ōnjar eo ilo kapijuknen eo am. Iaar jeļā bwe kar Jetōb Kwojarjar eo. Eaar kaenōm̧m̧an eō.
Ālkin menin, ļeo nej pāleeō eaar jilkintok mijenede ro n̄an katak ippa. Iaar jiron̄ er ke em̧ōj aō jeļā bwe gospel eo em̧ōj an jepļaaktok ej m̧ool im bwe imeļeļe ta en̄jake in Jetōb Kwojarjar. Ijoke ikar inepata bwe enaaj maron̄ lukkuun in pen aō joļo̧k jikka im daak kope im ti.
Iaar jino etal n̄an jar, riiti Bok in Mormon eo, im katak ippān sister mijenede ro jilu ak emān alen juon wiik. Ilo m̧ool, Jetōb Kwojarjar ekar jipan̄ n̄a bōjrak jen jikka im idaak kope im ti.
Eo m̧ōtta ekar jino lo oktak ko ilo n̄a aolep wiik. Iaar karuwaineneik lio̧ n̄an kobatok n̄an katak ko an mijenede. Ke eaar ron̄jake, eaar bar en̄jake Jetōb Kwojarjar im kar bōk juon naan in kam̧ool. Ke jorāān ko an COVID-19 rekar jino dikļo̧k, ļeo nej ippa, kiiō eniknik ilo Kabun̄ in, ekar maron̄ in itok n̄an Taiwan. Kom̧ro kar m̧are, im e ekar peptaiji eō. Ikar juon armej kāāl.
Sister Weiling Chen Canfield (Winnie) ippān sister mijenede ro im ward membōr ro raar katakin im m̧ōttāik e. “Aolep wiik kōmij bwebwenato im jerbal ippān doon ilo kūr eo aō ekāāl ilo Kabun̄ in ilo Doulul eo an Kōrā ro,” ekar ba.
Ro m̧ōtta ilo jikin jerbal ko, ekoba jet rijerbal in pāān̄ ko im m̧ōn wia ko, raar ba rej lo aō oktakļo̧k im m̧ōņōņōļo̧k. Iaar karuwaineneik er n̄an peptaij eo aō, im raar itok. Ālikin wōt, raar ba n̄an eō ke raar en̄jake juon men eo rejjan̄in kar en̄jake m̧o̧ktaļo̧k.
Iaar jab mijak in ba n̄an ro jet ta eo ijeļā im en̄jake kōn Jisōs Kraist—bwe ta eo ijeļā ej m̧ool. Ijeļā bwe naan in kam̧ool eo aō ekajoor. Ro jet raar jeļā kajjieō ilo aolepen mour eo aō rej lo menin. Aer kautiej tōmak eo aō ekar kōbōjrak aer kōbaatat im idaak ilo awa in jerbal im kōjota ko. En̄in juon men eo ejenoļo̧k ilo imminene ilo jikin jerbal eo am̧.
Sister Canfield ippān Jin Hua, juon eo etto mōttāik ekar itok limoin ilo Kabun̄ in itok wōt jen bwebwenato in oktak eo an Sister Canfield.
Ijjab mijak in kōtļo̧k bwe ro jet ren loe, ron̄, im en̄jake naan in kam̧ool eo aō. Ij tōmak bwe elōn̄ armej ro me rejjab jeļā kilen pukot Anij im Jisōs Kraist naaj en̄jake ejja men ko wōt iaar en̄jake n̄e rej ron̄ naan ko rem̧ool. Aolep iien ij poojak n̄an kwaļo̧k naan ko me raar ukōt mour eo aō.