“3 Pedped in Katak ko n̄an Kōjerbal Technology im Media,” Liaona, M̧aaj. 2024.
3 Pedped in Katak ko n̄an Kōjerbal Technology im Media
Ilo an technology ko em̧m̧anļo̧k, bun̄ten kein n̄an media renaaj jipan̄ kōj wōnm̧aanļo̧k ilo jeļā.
Technology ej oktak aolep iien . Im kajojo wāween ko technology ededeļo̧k an bōktok wāween ko rekāāl im pedejaake media. Jikin print eo emōj an lukkuun oktak wōn emaron̄ deļon̄i naan ko kar jeiki. Radio im tv emōj aer oktak im ukōt kilen ad leto-letak nuuj im meļeļe ko, im kam̧ōņōņō ko. Intōrnet emōj an ukōt elōn̄ men ko kobban jej maron̄ deļon̄e im wōn emaron̄ kar ejaake menin. Social media em̧ōj an ukōt ad maron̄ n̄an kappukōt, kōnono ippān im ekkeijel ippān armej ro. Ilo an ļapļo̧k māletlet, jej ioon kajjitōk ko rōkāāl.
Technology ko rekāāl rejjab aolep em̧m̧an ak nana. Ijoke, āinwōt juon kūlaaj in lale me jej lale jerbal ko im n̄ūrbōktak ko rekāāl. Ilo ad kajjieon̄ in āinwōt Kraist, ad kōjerbal technology im media remaron̄ bōktok n̄an mour ko ad ta eo eaorōk.
Juon Pedped in Ekkatak Epojak in Waļo̧k
Aaet, ejjeļo̧k juon laajrak in tōl n̄an kōjerbal aolep kāālet jej kōm̧m̧ani kōn technology im media. Ijoke, jemaron̄ ekkatak pedped ko n̄an jipan̄ tōl kōj ilo ad kōm̧m̧ani kāālet ko. Elder Dieter F. Uchdorf jān Doulul eo an Jon̄oulruo Rijilōk ro ekar katakin: “Pedped in katak ko rej indeeo im indeeo. Kien ko ak jerbal eo an pedped in katak em̧m̧anļo̧k aer jerbal ilo jet jikin ak jab ilo jikin ko jet. Ta eo ej kakobaik kōj ej Jisōs Kraist im m̧ool ko indeeo ko Ekar kwaļo̧k, men̄e emālij aer jerbal kajojo iien im ilo aolep m̧anit.”1
Ļoor pedped in katak ko pedped wōt ioon m̧ool ko an gospel in renaaj jipan̄ kōj pād wōt ilo iaļen bujen in. Jetōb enaaj tōl kōj ilo ad kajjieon̄ in kōm̧m̧ani kāālet ko rem̧m̧an pedped ioon pedped in katak ko. Kōn menin ta pedped in katak ko remaron̄ tōļ kāālet ko ad kōn technology im media?
1. Imaron̄ kōjerbal anemkwoj in kāālet eo aō n̄an kōm̧m̧ani kāālet ko n̄an kōjerbal technology. Ejjab kōjjerbal eō.
Jet iien technology emaron̄ jepool mour eo am̧. Eaorōk n̄an keememej bwe kwomaron̄ kōm̧m̧ani kāālet ko n̄an kōjerbal technology. Ejjab kōjerbal eok. Kwomaron̄ kāālet n̄an kōjerbal technology im media n̄an kadedeļo̧k ta eo em̧m̧an im n̄an kappukot men ko re“wānōk, karbōb, ak em̧m̧an ekkōnono kake ak nebare” (Laajrak in Tōmak Ko 1:13).
Irooj ekar ba, “N̄a, Irooj, Ippa ewōr juon jerbal eļap n̄an kwe n̄an kōm̧m̧ane” (Katak im Bujen Ko 112:6). Ļōmņak elmen am̧ maron̄ kōjerbal technology n̄an katōprak jerbal eo eaorōk im “kanooj m̧ōņōņō in poub kōn tokjān” (Katak im Bujen Ko 58:27). Kwomaron̄ kōjerbal technology ilo jikin jerbal eo am̧. Kwomaron̄ kōjerbale n̄an lale kein kalimomo ko. Emaron̄ jipan̄ eok ekkeijel ippān ro jet. Im emaron̄ jipan̄ eok ekkatak, eddōkļo̧k, n̄an kadedeļo̧k jerbal eo an Irooj. Ijoke, jerbal ko jet emaron̄ kapopo, jab ekkar, ak kauwōtata. Ijelo̧kin kōtļo̧k an technology kōjerbal eok, kōjerbal jeļāļo̧kjeņ im tōl eo an Jetōb n̄an kōm̧m̧ani kāālet ko bwe kwon kōjerbali.
2. N̄e ij kōjerbal anemkwoj in kāālet eo aō n̄an ļōmņak m̧aanļo̧k, em̧m̧an aō en̄jake n̄an kōm̧m̧ani kāālet ko rem̧m̧an.
Bōlen ewōr am̧ imminene ke kwaar kōm̧m̧ane juon kāālet kōn technology me ejjab jim̧we. Emaron̄ kitbuuj media ilo am̧ kōjerbale ak joļo̧k iien ilo jet m̧akūtkūt ko. Ijelo̧kin an bōd am̧ kōjerbale, ej menin aorōk n̄an kōjerbale ilo jejjet. N̄e kwoj ļōmņak m̧aanļo̧k, enaaj em̧m̧anļo̧k n̄an am̧ kōm̧m̧ani kāālet ko kwonaaj eļan̄n̄e aolep kāālet ko am̧ kōm̧m̧ani ilo iien eo. Kwomaron̄ ejaaki unin tōl ko am make rekkar n̄an jon̄ak ko an gospel in n̄an jipan̄ eok kōm̧m̧ani kāālet ko rem̧m̧an.
Eļan̄n̄e ebōd am kōjerbale ak ļap jen jon̄an kōjerbale media, bōk peran n̄an kajjieon̄ in oktak. N̄an waanjon̄ak, n̄e jekjek in pija ko rejjab im̧we ak letok en̄jake ko rem̧m̧an, kōm̧anm̧anļo̧k m̧wilim̧. N̄e kwoj kōjerbal technology n̄an pedejaake pija akō bōk kunaam ilo m̧wil ko kwoj jeļā rejjab em̧m̧an, bōk peran n̄an oktak—im bōk kijenmej ippam̧ make ilo am kajjieon̄ in kōm̧m̧ani oktak ko. Ļōmņak kōn jet imminene ko kwomaron̄ kōm̧m̧ani n̄an kōmman oktak. N̄an waanjon̄ak, n̄e kwoj loe ke epen n̄an kōm̧m̧ani kāālet ko rem̧m̧an ilo iien ko, kwomaron̄ karōk iien ko me kwonaaj kōjerbal technology im iien ko kwojjab maron̄i.
Ejjeļo̧k oktak, n̄e kwoj kōjerbal technology n̄an kōkajoor eok make, ekkeijel ippān ro jet, im kadedeļo̧k jerbal eo an Irooj, im kwoj en̄jake Jetōb, kōm̧m̧ani wōt men kein. Toon wōt am̧ m̧ool n̄an kwe make kōn kāālet ko am̧, am̧ tōmak ilo Irooj emaron̄ jipan̄ eok kōjerbal anemkwoj in kāālet eo am̧ ilo wāween ko me rej tōlļo̧k eok n̄an en̄jake em̧m̧anļo̧k n̄an kōm̧m̧ani kāālet ko rem̧m̧antata.
3. Imaron̄ kōjerbal anemkwoj in kāālet n̄an bōjrak jāni.
Kwomaron̄ en̄jake bwe kajjitōk ko kōn technology im media rej wōnmaanļo̧k. Ewi jon̄an lukkuun ļap? Ij ke aikuj kōļapļo̧k ak kadikļo̧k aō kōjerbal media im technology? Ij ke jeļā kilen kōjerbal iien ko aō? Jab kajjieon̄ kōtļo̧k bwe ļōmņak ko ren kainepataik eok. Keememej bwe ej EM̧M̧AN wōt n̄an bōjrak im kakkije jidik jān media. Bōjrak jidik emaron̄ kāālet n̄an kōm̧m̧ani m̧akūtkūt ko ijelo̧kin kalimjōk screen eo ilo jejjo awa ak bōlen jab kōjerbal technology ko, āinwōt social media, n̄an juon iien eo eaitok.
Technology ej letok kōjeraam̧m̧an ko reļļap n̄an jipan̄ kōj pād wōt im ekkeijel ippān ro jet, āinwōt, kōnke kōj jemaron̄ in ekkeijel ilo jabdewōt iien ko ejjab meļeļein bwe jej aikuj in ekkeijel ilo jabdewōt iien. Irooj ej kakeememej kōj, “ikōn̄ wōt im jeļā ke N̄a Anij” (Katak im Bujen Ko 101:16). Lukkuun lale bwe kwon bōk am̧ iien n̄an ekkeijel Ippān wōt E .
Kwon Māletlet
Ilo an technology jerbal wōt, jenaaj ioon elōn̄ kāālet ko. Ijelo̧kin reilo̧k bwe Kabun̄ in en kōm̧m̧ani kakien ko im elaajrak ko, jemaron̄ oktakļo̧k n̄an Jemedwōj Ilan̄, Rilo̧mo̧o̧r, jeje ko rekwojarjar, im naan ko an rikanaan ro raan kein kōn pedped in katak ko n̄an jipan̄ tōl kāālet ko ad. Jetōb enaaj jipan̄ kōj jeļā n̄e kāālet ko ad rejim̧we. Naan ko an Jekab rekkar n̄an tōre in ad ilo an kar jinoin katakin er: “O kom̧in mālōtlōt; ta Imaron̄ ba eļapļo̧k?” (Jekab 6:12).