Tōl ilo Kōjparok n̄an Ijo Jej Aikuj Pād ie

Jān Elder Benjamin M. Z. Tai

Jān Jiljilimjuonn̄oul eo

Rilo̧mo̧o̧r enaaj aolep iien jipan̄ kōj ilo iaļ in ad ilo wāween ko rekabwilōn̄lōn̄.

Ke eaar 12 aō iiō, baam̧le eo aō raar em̧m̧akūt jān meņāāņ in Hong Kong n̄an juon jikin em̧ōļo̧, wintōr ko jab jeļā kaki. Ālkin, kar karuwaineneik eō n̄an tallōn̄ to̧l ippān likao ro ilo ward eo aō.

Ilo raan in hike eo ammim, iaar kōņak nuknuk in māāņān āinwōt aō kar jeļā. Ke kōmij wanlōn̄ļo̧k ilo iaļen to̧l eo, iaar lukkuun m̧ōņōņō in lo sno ko rej wōtļo̧k n̄an laļ. Ikar lukkuun kōņaki nuknuk māāņān ko, ijoke, ekar pen aō etal ippān kurup eo. Iaar ba n̄an er ke ren etal wōt bwe inaaj kobaļo̧k ippān ro ij tōmak rekar ļoortok kōj.

Ke ij jino m̧ōkajļo̧k, juuj ko aō im nuknuk ko ad raar jino tutu im peiū, neeō, im meja raar jino mej. Eaar jino ļap an sno jon̄an ekōm̧m̧an bwe in jab lo iaļ eo. Ālkin jejjo̧ iien n̄an pukote, ikar lo bwe iaar jabwābwe, make iaō, im jab jeļā n̄e ro jet rejeļā ke ijabwābwe.

Ilo iaļen mour in, jenaaj en̄jake jab pojak, jebwābwe, ak jako. Jemaron̄ jebwābwe jen iaļ eo ej pād im̧aad. Emaron̄ in āinwōt n̄e eļak ļapļo̧k ad kajjieon̄ wōnm̧anļo̧k, jej ettoļo̧k ļak wōt. Inepata emaron̄ waļo̧k, im kapo n̄an ebbweer ej jino kareel.

Ilo m̧ool, Rilo̧mo̧o̧r Jisōs Kraist ewōr an kajoor n̄an tōl kōj, kotak kōj n̄e jej tūbbok (lale Sam Ko 37:23–24), im letok n̄an kōj kakkije (lale Matu 11:28), kōmour (lale Aiseia 53:5; Alma 15:8; Katak im Bujen Ko 42:48), lōke (lale Katak im Bujen Ko 121:45), im aenōm̧m̧an (lale Mosaia 4:3; Alma 38:8; Katak im Bujen Ko 19:23). “Kepaaktok Eō,” ekar Ba, “im Inaaj kepaakwaj kom̧; niknik kappukot Eō im kom̧ naaj lo Eō” (Katak im Bujen Ko 88:63). Emaron̄ jab alikkar iaļ eo aolep iien, ak jemaron̄ ļoor Rilo̧mo̧o̧r kōn tōmak bwe iaļ eo ad enaaj jem̧ļo̧k ilo aiboojoj n̄an anjo̧ kōnke E enaaj tōl kōj ilo kōjparok n̄an ijo jej aikuji pād ie.

Jemaron̄ aolep iien reilo̧k n̄an Jisōs Kraist kōnke Jisōs Kraist ej “iaļ eo, m̧ool eo, im mour eo” (Jon 14:6).

Iaļ eo Ad Ejim̧we

Ilo ad ekkatak kōn Bok in Mormon iiō in, jaar ļoor Liai im baam̧le eo an ilo iaļ eo aer ļo̧k n̄an āneen kallim̧ur. Ļōmņak ta eo baam̧le eo an Liai rekar nikniki ilo iaļ eo aer:

pere ilo tōmak n̄an ļoor rikanaan ro
kwaļo̧k ejja aenōm̧m̧an ko n̄an juon āne jem̧aden eo jab jeļā kake
ito-itak ilo jab jeļā jemļo̧kin, ettoļo̧kin, ak aetokan
Kwole, būrom̧ōj, nan̄inmej, im mej
jerbal ko reppen, jet iien ilo ejjeļo̧k meļeļe un ko n̄an er ak elmen n̄an kadedeļo̧kki.
kakkije, rum̧wij, ebweer, im inepata
jekjek ko reppen n̄an kōkaajririik baam̧le ko.

Ilo iaļ eo, jej barāinwōt lo an kar Irooj aolep iien jipan̄ er. Eaar kakke aikuj

kanaan in tōl im revelesōn an juon make,
jeje ko rekwojarjar epād ie kōjeraam̧m̧an ko kar kallim̧ur im bujen ko,
rekoot in menmenbwij im menmenbwij an baam̧le,
kein jerbal ko rekāāl n̄an leļo̧k aikuj ko aer,
kōļapļo̧k tōrere ko aer n̄an nikniki men ko reppen,
jeļāļo̧kjeņ im katakin n̄an kadedeļo̧k jerbal ko rejjab alikkar.
Liaona eo (juon kein jerbal n̄an jipan̄ er ba kajjien iaļ eo aer), im
jokne im kōjparok n̄an baam̧le ko aer.

Āinwōt baam̧le eo an Liai, iaļ ko ad renaaj baj wōr wōt apan̄ ko im en̄taan ko. Rilo̧mo̧o̧r enaaj jipan̄ wōt kōj ilo wāween ko rekabwilōn̄lōn̄. Nipai ekar kwaļo̧k, “bwe iaļ eo ejim̧we ej n̄an tōmak ilo Kraist … kōn aolepān ami kajoor, ļōmņak, im maron̄, im kōn aolepān ami” (2 Nipai 25:29). Ilo ad kāālet tōmak ilo Jisōs Kraist, ettā n̄an bōk naan eo An, n̄an bōk peran n̄an jerbal, jenaaj lo m̧ōņōņō im kōjeraam̧m̧an ko reppen jej iooni. Ilo iaļ in, jemaron̄ bōk lōke bwe jen maron̄ kadedeļo̧k ta eo E ej kōņaan bwe jen kōm̧m̧ane (lale 1 Nipai 3:7).

Men kein ilaļ rej jet iaan wāween ko rellōn̄ Rilo̧mo̧o̧r enaaj jipan̄ kōj.

The Dawning of a Brighter Day, jān Simon Dewey

E ej Letok An Katak n̄an Kōj

Jisōs Kraist ejeļā “jem̧ļo̧kin eo jān jinoin” (Ebream 2:8). E ekar bar “kwaļo̧k ial eo im tōl ial eo.”¹ An katak, jeļā kake ilo jeje ko rekwojarjar āinwōt katak an Kraist, ej iaļ eo jej aikuj aolep ļoore n̄an ļo̧mo̧o̧ren im mour.

Jej aikuj kōjerbal tōmak ilo Jisōs Kraist, emakijkij ukweļo̧k, peptaij, bōk menin letok eo an Jetōb Kwojarjar, delo̧n̄e bujen ko, im kajjieon̄ ijo em̧m̧antata ilo kōj n̄an niknik. N̄an ukōtļo̧k, kar kallim̧uri kōj kōn jeo̧rļo̧k bōd, kōjatdikdik, im mour indeeo. (Lale 2 Nipai 31:2–20.)

Ilo juon laļ eo eoktak iaļ ko an, katak eo an Kraist ej letok tōl eo ealikkar bwe jen maron̄ ļoore n̄an kōm̧m̧an bwe kōmin jibadōkļo̧k iaļ eo ejim̧we (lale 2 Nipai 31:21).

Ej bōktok n̄an Kōj Aeņōm̧m̧an

Kōn en̄taan in pinmuur eo An, Rilo̧mo̧o̧r ejeļā ta lukkuun en̄jake in ajimakeke im atajinemjen. E ebar jeļā elmen an letok n̄an kōj aenōm̧m̧an. E eaar ba, “En jab pok būruemi” (Jon 14:1) im “I jāmin likūt kom̧ atajinemjen: I naaj iwōj n̄an kom̧” (Jon 14:18).

Rilo̧mo̧o̧r ekar kallim̧ur kōn menin letok eo Rikaenōm̧m̧an, eo ej Jetōb Kwojarjar, n̄an ro rej tōmak ilo E. Rikaenōm̧m̧an eo, Jisōs ekar ba, “enaaj katakin kom̧ men otemjej, im kakeememej men otemjej n̄an kom̧” (Jon 14:26).

E eaar Letok n̄an Kōj Naan in Māletlet

Kōn Jepļaaktok eo an gospel eo an Jisōs Kraist ilo tōre in ad, Irooj eaar letok n̄an kōj jeje ko etto im raan kein, eo epād ie naan ko an Anij. Nipai ekar kwaļo̧k bwe “jabdewōt eo enaaj kar eo̧ron̄ naan in Anij, im naaj jirok likatōttōt ilo e… renaaj jamin jako” (1 Nipai 15:24).

Riiti naan ko an Anij kajjojo raan ej bōktok kōjparok n̄an tōlļo̧k kōj n̄an en̄jake iakwe eo an Anij aolep iien. An naan ej lamp n̄an neō (lale Sam Ko 119:105) im “enaaj jiron̄ [kōj] aolep men ko [jej] aikuj kōm̧m̧an” (2 Nipai 32:3).

E ej tōl Kōj kōn ro Rikarejaraņ—Rikanaan ro im Rijilōk ro

Jisōs Kraist eaar kūr rikanaan ro im rijilōk ro n̄an jipan̄ kōj. Aer naan in kapilōk im katak rej n̄an kōj im n̄an tōre in ad. Kwoj ke jebwābwe ak jako ilo iaļ in am̧, kwomaron̄ lo jipan̄ n̄an kōļmenļo̧kjeņ kōn kajjitōk kein jilu:

Elmen an Irooj kar kepooj eō kōn naan ko an rikanaan ro im rijilōk ro kōn apan̄ ko ij iooni?
Ta ko rikanaan ro im rijilōk ro rej ba bwe in kōm̧m̧ane rainin n̄an kōppopo n̄an apan̄ ko repād im̧aan?
Ta eo ij kōm̧m̧ane kiiō n̄an jerbal kake kanaan in?

N̄an ļōmņak kōn kajjitōk kein, jemaron̄ kile aorōkin tōl eo an rikanaan ro im rijilōk ro. Emaron̄ em̧m̧anļo̧k ad ron̄ aenikien Irooj im jeļā wāween An jipan̄ kōj. Ilo ad kāālet, jemaron̄ ron̄jake rikanaan ro im rijilōk ro n̄an bōk tōl, kōjeraam̧m̧an, im kōjparok ilo iaļ in me ej tōlļo̧k n̄an ippān Jemedwōj Ilan̄ im Nejin, Jisōs Kraist.

Elder Tai ilo Sierra Nevada ilo California emaron̄ 1988. Bwebwenato in ekar bōk jikin ilo Toļ Baden Poweel ilo San Gabriel Mountains ilo Califonia ilo 1984.

Pija ko litok jān rijeje eo

Tōmak eo n̄an Bun̄ M̧aanļo̧k

Jebwābwe, m̧ōļo, im ajimakeke ioon toļ ko rōm̧ōļo elōn̄ iiō ko remootļo̧k, iaar jino ebweer. Jab jeļā ta n̄an kōm̧m̧an, iaar bukwelōlō ioon sno ko im jino jar n̄an Jema Ilan̄ kōn jipan̄. Iaar kwaļo̧k wāween eo aō im mijak n̄an E im akweļap bwe en oņake im lo̧mo̧o̧ren eō.

Ke ej m̧ōj aō jar, sno eaar jino wōtļo̧k ipeļaakū, im jino aiboojoj, aeļorļor eaar kobrak wōjke ko. Aelorlor in eaar jako ļo̧k ke ij ron̄ aenikien jen mar ko. Ruo ļaddik raar jādetok. Em̧ōj aer kar tōpar, im ijelo̧kin ļoor iaļ eo, raar pepe in wanlaļļo̧k ilo toļ eo. Ilo aolepān jikin ko, raar jikāāt tok n̄an ijo ikar pād ie!

Ke rej kajjitōk ippa ta eo ij kōm̧m̧ane ijo, iaar ba n̄an er ke ikar jebwābwe. Raar kūrļo̧k eō bwe in kobaļo̧k ippāer, im kōm kar jikāāt laļļo̧k itōrerein wōt iaļ eo ilo toļ eo. Em̧ool kōm kar bar ippān doon ippān aolepen kurup eo am.

Ilo ad bun̄m̧aanļo̧k ilo iaļ in ad kōn tōmak, wujlepļo̧k, im niknik, jemaron̄ kile wāween an Rilo̧mo̧o̧r etetal ippād im niknik jipan̄ kōj. Jisōs Kraist ej iaļ eo, im m̧ool eo, im mour eo. Kōm̧m̧an bwe ad tōmak ilo E en bōktok aenōm̧m̧an n̄an ļōmņak ko ad im m̧ōņōņō ilo iaļ in ad.