Ainikien Armej ro Rekwojarjar ilo Raan Ko Āliktata

Juon Tūriam̧o 25 Iiō Tokālik

Jān Mike Collins, California, USA

Ij kam̧m̧oolol Anij bwe eaar kōjerbal juon leta eo ban meļo̧kļo̧ke bwe en kōjerbal An tūriam̧o eļap.

Pija ko litok jān rijeje eo

Ke iaar rūkaki n̄an jemenere in jibbon̄tata ilo Eureka, California, USA, iaar kajjitōk ippān rijikuuļ ro aō n̄an ļōmņak kōn er make 10 iiō ilju im jekļaj. Innām iaar kajjitōk ippāer n̄an je juon leta kōn naan in kam̧ool eo aer kōn gospel in im kōn ta ko jet rekōņaan kwaļo̧ki n̄an er make n̄e rōrūtto. Iaar ba n̄an er ke inaaj meeļi leta ko 10 iiō jen iien eo.

Iien ko rekar ellāļo̧k im Ikar jab maron̄ meeļi leta ko. Juon raan 25 iiō tokālik, leddik eo neju Heidi ekar lo leta ko im kar kajjitōk kaki. Ālikin aō kōmeļeļeiki ta eo iaar karōke, eaar lale atōreej ko an rijikuuļ ro kar nejū ilo an kōjerbal social media.

Kōmeļeļe jān Alex Nabaum

Ālkin an meeļi leta ko, kōm̧ro kar bōk jet uwaak ko rem̧m̧an. Juon iaan kar rijikuuļ ro nejū ekar je:

“Ikōņaan bwe jem̧ōm̧ en jeļā bwe ej kab loi leta kein kōn juon un. Leddik eo nejū 18 an iiō ekar m̧ōjņo̧ ilo naan in kam̧ool eo an im ekar en̄jake bwe n̄an erom̧ juon ‘leddik in Armej ro Rekwojarjar ilo Raan Ko Āliktata ewānōk’ ejjab n̄an e. Liin ekar jab kwaļo̧k en̄jake in an n̄an kōm. Ekar pen.”

Rijikuuļ eo kar aō, ekar inepata kōn men ko leddik eo nejin ekar je ilo blog eo an, ekar ba:

“Ijeļā ij aikuj kennaan ippān kake. Āinwōt ilo aolep iien, n̄e kom̧ro ej bwebwenato, emejān illu im inepata, im liin eban ba jabdewōt. Iaar leļo̧k leta eo aō n̄an e im ba Ikōņaan bwe en riiti.

“Iaar lo an riiti im bar riiti pārokōrāāp eo jinoin elōn̄ alen. Iaar jeiki bwe iaar jab jeļā n̄e eaar wōr aō juon naan in kam̧ool, n̄an erom̧ juon Armej ro Rekwojarjar ilo Raan Ko Āliktata rōwānōk ekar ļap ak bōlen jab n̄an n̄a.

“Leddik eo neju ekar jino jan̄. Iaar kōņaan bwe en jeļā bwe ij lukkuun meļeļe apan̄ ko an. Liin eban kar tōmak n̄e eban kar leta in! Jet iaan kapan̄pan̄ ko an raar dikļo̧k, im iaar lukkuun en̄jake bwe iien eo an leta in ekar juon menin tūriam̧o. N̄e in kar bōk 10 iiō remootļo̧k, imaron̄ kar joļo̧ke ak jerwane! Jouj kam̧m̧oolol babajemam an kōm̧m̧an bwe kōmin je leta ko im ilo an kar meļo̧kļo̧k ia eo ekar likūt ie ium̧win elōn̄ iiō kein! Ejjab jide.”

Jemedwōj Ilan̄ eo ej iakwe ej lale aolep An sip, im ilo iien eo An ekabwilōn̄lōn̄, E emaron̄ jerbali menin tūriam̧o ko im menin bwilōn̄ ko ilo kōj kajjojo n̄an bōktok ro raar bar etetal tok n̄an oror in.