“Bar Katōk Ine in Tōmak eo,” Liaona, M̧aaj. 2024.
Bar Katōk Ine in Tōmak eo
Katak ko jān ro raar ro̧o̧ltok n̄an tōmak in.
Ilo laļ me emakijkij an waļo̧k bwebwenato in tōmak ko rej mejkunļo̧k, iaļ eo n̄an bar ro̧o̧ltok n̄an tōmak in jet iien jejjab jeļā kake. Ak bwebwenato in bar oktak kein rej kwaļo̧k an būratōr ro im sister ro ilo gospel in kar anjo̧ ioon pere ko aer men̄e ālkin aer ilo̧k jān Kabun̄ in. Bwebwenato ko aer ej kwaļo̧k ta eo Alma ekar kwaļo̧ke kōn katōk ine eo. Alma ej kōmeļeļeik an juon tōmak jerbal me ejjab jipan̄ wōt kōkajoorļo̧k ro rej kōļapļo̧k aer tōmak ak ebarāinwōt jipan̄ ro ewōr aer kajjitōk im n̄ūrbōktak.
-
Juon, jej aikuj meļeļe bwe “tōmak ej jab n̄an bōk juon jeļāļo̧kjeņ eweeppān ” (Alma 32:21).
-
Innām jej “kōjerbal juon pilin̄ in tōmak” aaet em̧ool “kōņaan wōt tōmak” (eoon 27).
-
Jej katōk ine eo—naan in Anij—ilo būruwōd (lale eoon 28).
-
Ilo wāween in, jej ņa kōņin jetōbin okar ko ad kōn kijenmej n̄an bōk jipan̄ jen ro m̧ōttad ilo gospel in n̄an katōk juon ine ilo Kraist, “juon wōjke ej eddekļo̧k n̄an mour ejjeļo̧k jemļo̧kin” (eoon 41).
“Tōmak ej jab n̄an bōk juōn jeļāļo̧kjeņ eweppān kōn jabdewōt men, kōn menin eļan̄n̄e ewōr am̧ tōmak kwōj kōjatdikdik kōn men ko jab loi, ko rem̧ool” (Alma 32:21).
Alba Lucai Fonseca, juon membōr in Kabun̄ in jān Amedka, ekar lo kein katakin ko ilo online me eaar kōm̧m̧ane menin an ļōmņak kōn tōmak ko an, im eaar m̧ōkaj an jako tōmak eo an. Ilo jinoin, liin ekar jino m̧ōjņo̧ļo̧k tōmak eo an kōn pere, ak eaar jino bwebwenato ippān juon membōr eo ej kea im jeļā im kar jeļā bwe kōn an jab tōmak ekar bōklōn̄tak kajjitōk ko.
“Meļeļe eo aō kōn katak ko an gospel in im bwebwenatoin Kabun̄ in ekar jab men eo ikar ļōmņake,” liin ekar ba. “Ekōm̧m̧an bwe in ettā im kar jipan̄ eō kile bwe ej ļap wōt aō aikuj ekkatak im bwe tōmak eban kajju uwaaki aolep kajjitōk.” Alba eaar kile bwe men ko jet “raorōk an mour in—āinwōt baam̧le, jeļāļo̧kjeņ, jerbal—ekitbuuj men ko rekauwōtata, kaarmejete, men ko jab jeļā kaki, im ebōk kijejeto ilo mour in. Iaar ro̧o̧ltok n̄an Kabun̄ in im maron̄ kam̧ool bwe jerbale tōmak ebarāinwōt lukkuun aorōk ilo kain kijejeto rot in.
Būreejtōn Russell M. Nelson ekar kwaļo̧k, “Irooj ejjab aikuji juon tōmak ewāppen n̄an kōj bwe jen maron̄ bōk kajoor eo An ewāppen.” Aaet ad tōmak, e ej bar kalikkar, ebōk wōnmaanļo̧k kijejeto n̄an eddōkļo̧k.1 Ilo an pedped eo jinointata an Salt Lake Temple kar em̧m̧an an jerbal ium̧win elōn̄ iien, kiiō eaikuj kōkāāl, Būreejtōn Nelson ekar ba. Ilo tōre kein jej aikuj bar kapen pedped in jetōb ko ad make, “n̄an jutak ņae kauwōtata ko im kareel ko.”2 Ilo ad jet iien ioon men ko reppen āinwōt kar Alba, ikdeelel eo ad n̄an jet men remaron̄ tōlļo̧k kōj jān tōmak n̄an jab tōmak, kejool jerbal ko rekkar n̄an kajoorļo̧k im kapenļo̧k pedped in jetōb eo ad.
Ro rej ekkatak kōn bwebwenato ko an ro rej ro̧o̧ļtok n̄an tōmak emōj aer loe bwe ejipan̄ n̄an ļale ļo̧k tōmak āinwōt juon ial aitok, im ebōk elōn̄ bun̄ten ne ko.3 Jemaron̄ jino kōn jidik tōmak āinwōt juon ajri, ak ilo bar jet kōmeļeļe ej āinwōt ajri aer tōmak ej jelm̧ae kajjitōk ko im n̄ūrbōktak ko. Ilo ad jab ketak tōmak maron̄ kar emman an jerbal āinwōt juon pedped in jetōb, kiiō jej aikuj em̧m̧akūt jen tōmak eo epidodo an aepokpok n̄an krūtto ļo̧ tōmak bwe en maron̄ in jutak ņae apan̄ ko an ilju im jekļaj.4 Kowaane tōmak eo emaron̄ in pidodo, āinwōt juon men eo ej doorļo̧k, ijoke eļap jineekjej eo etetal ilo iaļ an ro rej jepļaak ļo̧k n̄an ippān Anij im ņa kōņin ine in tōmak eo aer.
Apan̄ ko kōn tōmak eaar jino ippān Samuel Hoglund jen Sweden ilo iien eo eaar wōr an uwaan baam̧le eo kajjitōk. Eaar etale juon alen an “uwaake juon kajjitōk n̄an wōt an iioon juon bar kajitōk.” ļein ekar kōmeļeļeiki. “Iaar jino pere tōmak eo aō n̄an kajjitōk eo juon, ak iaar kile menin im aikuj eo aō n̄an kwaļo̧k kar jeļā ko aō.” Ijelo̧kin an kajjieon̄ in uwaaki kajjitōk ko reddik, Samuel eaar ļōmņak n̄an ekkatak kōn kajjitōk ko raorōk—ko raorōk n̄an juon pedped epen ilo Jisōs Kraist. Kōn jipan̄ ilo jar im ekkatak jeje ko rekwojarjar, kappok ko an Samuel, āinwōt Alba, ekar katakin e ewi jon̄an eo epād ippān n̄an ekkatak me ekar bōktok n̄an e eļap ļo̧k tōmak. “En̄jake eo ekar kōkajoorļo̧k tōmak eo aō,” ļeo ekar ba, “im ekar bar katakin eō bwe ta eo kwoj lukkuun kappukote kom̧ naaj loe.”
“Eļan̄n̄e kom̧ naaj ruj im ļujur ami, em̧ool n̄an juon mālejjon̄i naan ko aō, im kōjerbal juon pilin̄ in tōmak, aaet, em̧ool eļan̄n̄e kom̧ maron̄ kōņaan wōt tōmak, kōtļo̧k bwe kōņaan in ej jerbal ilo kom̧.” (Alma 32:27).
“Kōjerbal tōmak emaron̄ pen” Būreejtōn Nelson ekar ba. “Ilo jet iien, jemaron̄ in kōļmenļo̧kjeņ eļan̄n̄e jemaron̄ kōļapļo̧k tōmak bwe jen bōk kōjeraam̧m̧an ko me jej lukkuun aikuji.”5 Men̄e kōmmani jerbal ko reddik, ej jino kōn “kōjerbal juon pilin̄ in tōmak,” emaron̄ “jerbal ilo kwe” im jino juon bar ļotak ilo jetōb.
Ālkin ļōmņak kōn kake ilo jetōb ilo iiō in college eo an, Amanda Freebairn jān United States ekar bōk juon bun̄tōn edik kōn jar, eo me eaar kōm̧m̧an bwe en ļoor im̧we n̄an etal n̄an meļan tampeļ eo. Eaar ba, “en̄jaake Jetōb eo ijeņ ekar kōkāāl aō tōmak,” liin ej ba Ro̧o̧ltok n̄an kabun̄ in im bōk juon kūr n̄an katakin Būraimere ekar kam̧wilaļļo̧k tōmak eo an, im liin eaar kōjeparoke bun̄ten ko me ekar bōk n̄an e n̄an lukkuun atbokwoj gospel in. Ilo wāween in, Amanda eaar loe, “iaar lo uwaak ko n̄an kajjitōk ko me iaar lukkuun aikuji.”
Ilo juon iien, Dan Ellsworth, bar jān United States, ekar jab lukkuun jeļā n̄e ekar wōr juon an tōmak n̄an kōjerbal. An ijino im ejedwawa n̄an jikuuļ im kepaak n̄an bwebwenato ko ilo Kallim̧ur M̧okta ekar ka mōjņo an tōmak ilo Baibōļ kar jelet tōmak eo an ilo aolepān jeje ko rekwojarjar. Ak Dan ekar etal wōt n̄an jar im kar pepe n̄an bar lale ium̧win jiljino allōn̄ kōn juon pepe n̄an jar, jitlo̧k, im jerbal ilo Kabun̄ in. Ilo tōre in, ļein eaar kajjitōk ippān leddik ro nejin redik n̄an bar jar kōn tōmak eo an jemeer.
Ālkin jidik iien, Dan eaar jino bōk jetōbin en̄jake ko n̄an lo uwaak ko n̄an jet iaan kajjitōk ko me eaar abūņōņō kaki. Juon raan, ke ej pād ilo ļaibrare eo, eaar en̄jake im̧we bwe en etal n̄an jikin bok ko im bōk juon. Ilowaan, eaar lo juon naan eļap an jipan̄ kōn jum̧ae n̄an bok eo me eaar kōm̧m̧an bwe en wōr an kajjitōk kōn Baibōļ eo. Ilo en̄jake in eaar jab uwaake aolep kajjitōk, eaar katakin Dan jet katak ko raorōk: “Juon, iaar aikuj in ettā kōn ewi jon̄an aō lukkun kōņaan jeļā kōn n̄a make. Im ruo, wāween ko jet n̄an pukot m̧ool eo, kōn jet un, rej waļo̧k: im̧we ko an jetōb, men ko rem̧m̧an rej waļo̧k jen leen Jetōb, im ļōmņak im meļeļe ko raorōk, aolepeer raar kwaļo̧k jeļā eo ekajoor im tōmak eo iaar bōk m̧okta.”
N̄an Zac Marshall jān England, juon bun̄ten eo epidodo in alooje juon pija in ekkatak kōn Bok in Mormon ekar kōpeļļo̧k kōļmenļo̧kjeņ eo an n̄an m̧ool eo bwe bok in emaron̄ m̧ool. “Iaar riiti menin m̧okta ilo iien an baam̧le eo ekkatak jeje ko rekwojarjar im iien ko aō make ilo ejjeļo̧k kōttōpar,” ļeo eaar ba. “Ak eaar bōjrak aō niknik ilo Kabun̄ in āinwōt juon kar jodikdik, kōn menin in m̧ool eo iaar loe ilo pija eo ekar kōm̧m̧an menin aō riiti Bok in Mormon bar juon alen.” Ālkin etale naan ko an Anij, Zac ekar jino bōk jikin pere kōn tōmak. Kiiō Eaar ba, “Kabun̄ eo ikar loe jinoin epen ak kiiō ij loe ejja wāween eo Jisōs ekar ba, ‘m̧ool enaaj kōm̧anm̧an anemkwōjami’ [Jon 8:32].”
“Eļan̄n̄e kom̧ij jab kōjparok wōjke eo, im jab ļōmņak kōn kōņin, lo ejjāmin naaj le okran” (Alma 32:38).
Ilo an kōnono kōn bun̄ten ko reddik n̄an ņa kōnin tōmak, jej aikuj bar kile wāween ko ilo ad ļōmņak in pinej ad tōmak. Ilo ekkatak kōn bwebwenatoin tōmak an membōr ro an Kabun̄ in ilo laļ ko jet, Eric im Sarah d’Evegnée, rikaki ilo Brigham Young University–Idaho, raar kakeememej bwe “wāween ad ļōmņak emaron̄ in aorōk kōn ta eo jej ļōmņake.” N̄an waanjon̄ak, kōtmāne bwe nokon ko an kabun̄ enaaj jipan̄ inepata im apan̄ ko ad ilo mour rejjab m̧ool rej ejaake ta eo ejjab ekkar. Jisōs Kraist eaar kallim̧ur n̄an jab katajinemjeņ kōj ak kakkōļ bwe “ilo laļ kom̧ij en̄taan” (Jon 16:33). Ejjeļo̧k oktak, apan̄ ko an mour remaron̄, ekkar n̄an Sarah, “en nana ad lo gospel in. Jet iien abwin bōke ļōmņak eo n̄e men ko jej ioon rejjab lukkuun aōrōk.”
Rijeje im ribwebwenato Don Bradley jen United States ekar jelm̧ae kajjitōk ko kōn bwebwenatoin Kabun̄ in ilo juon tōre ke, ļein ekar ba, “ikar jab m̧ōņōņō im ekar wōr juon pere. Illu ippān jabdewōt emaron̄ jelet juon jem̧jerā, iaar luuji tōmak eo aō im jem̧jerā eo aō ippān Anij.” Iiō ko tokālik, Don ekar jino kōjātdikdik im kam̧m̧oolol kōn mour eo an make.
Eaar bar jino etale katak ko kōn jorrāān in kōmālij im joortoklik ko kōn ājmour an doulul in kabun̄ ko. “Iban kaarmejete katak ko,” Don ekar ba. “Jidik kōn jidik, iaar kile bwe iaar pinej jenkwan pere n̄an kōļmānļo̧kijen, im kōn eļap mwilin kōjatdikdik kōn mour, iaar bar bōk aō tōmak ilo Anij im Jisōs Kraist.” Don ekar ro̧o̧ltok n̄an jeļā eo ekar jeļā kake m̧okta me ekar tarpok kake, ak kiiō ejja kein katak ko wōt rekar tōl ļo̧k n̄an juon kam̧ool bwe Josep Smith ekar juon rikanaan an Anij.
“Eļan̄n̄e kom̧ naaj ņa kōņin naan eo, aaet, ņa kōņin wōjke eo ke ej jino eddek, … kom̧ naaj m̧adm̧ōd jinōkjej ko an tōmak eo ami, im ami niknik, im kijejeto” (Alma 32:41, 43).
Men̄e kōn juon kōņaan n̄an ekkatak naan ko an Anij im n̄an bōk kōjatdikdik, ro̧o̧l n̄an tōmak eo im pād ilo jikin jar emaron̄ in juon jerbal ekaamijak, ak menin inepata. Kijejeto ejjab wōt kōn kijenmej, peran, im ettā ak bar iakwe jen ro m̧ōttad im ro uwaan baam̧le eo. Bōk jipan̄ jen ro m̧ōttad ej ņa kōnin ine eo im kōm̧m̧an bwe okar eo en juļ jab m̧or ļo̧k.
Ke Leo Winegar jen United States ekar jinoin lo kajjitōk ko kōn bwebwenatoin Kabun̄ in, eaar ekkatak kōn aorōk eo jen ro m̧ōttan. Eaar ba, “naan in kam̧ool eo aō eaar m̧ōjņo̧,” ke eaar dipuk jidik iien “in ajimakeke im ebweer ke Iaar appan̄ ilo jar.” Juon raan Leo eaar en̄jake im̧we n̄an kūrļo̧k juon rikaki eo etijem̧ļo̧k ilo bwebwenatoin Kabun̄ in. Ekar jab baj wōt rōjan̄ Leo n̄an bar ļōmņake pere ko an ak ekar jino in erom eo m̧ōttan epaake tata. Jidik kōn jidik naan in kam̧ool eo an Leo ekar ro̧o̧ļtok kōn wōt jipan̄ eo an eo m̧ōttan Leo im iiō in ekkatak ko. Ilo iien eo, ļein ekar lo uwaak ko n̄an elōn̄ kajjitōk ko. “Ij lukkuun kam̧m̧oolol kōn aō Rilo̧mo̧o̧r Jisōs Kraist kōn an tōl tok eō,” eaar ba, “im kōn ro m̧ōttan ro rekar pinej jenkwan E.”
“N̄e ro m̧ōttad ak baam̧le … rej etal jān Kabun̄ in, wōnmaanļok im iakwe wōt er,” Būreejtōn Nelson eaar rōjan̄. “Ejjab am̧ pepe n̄an ekajete kāālet eo an ro jet eļapļo̧k jān am̧ maron̄ kenana kōn am̧ pād wōt im tiljek.”22
Kōn wōt mijak kōn naan ekōm̧m̧an bwe Letitia Rule, juon membōr in England, en etal jen gospel in ium̧win 20 iiō ko. Eaar emakijkij an kōņaan ro̧o̧l, ijoke eaar “mijak in deļo̧n̄ ilo kōjem eo, kar en̄jake ba ņae im āinwōt n̄e iaar jab mour jim̧we.” Juon wōt kar nan̄inmej ekar nana tam̧m̧win-an mour ekar leļo̧k n̄an e juon peran n̄an kōmmane bun̄ten eo epen. Membōr ro raar ioon e kōn karuwainene im iakwe, jipan̄ e liin n̄an an bar bōk kuņaan ilo gospel in.
“Kalbwini naan eo ilo būruōmi, ke ej jino n̄an juļ em̧ool āindein ņa kōņin kōn tōmak eo ami. Im lo, enaaj erom juon wōjke, im jebarļo̧k ilo kom̧ n̄an mour eo ejjeļo̧k jem̧ļo̧kin” (Alma 33:23).
Ke Alma ej kōjem̧ļo̧k an kwaļo̧k, eaar kalikkar bwe jerbal in kijejeto n̄an ņa kōņin ine eo elukuun in aorōk, rejjab baj ine wōt. Ijo̧ke, jej kalbwini ine eo em̧ool ilo ad “jino tōmak ilo Nejin Anij, bwe Enaaj itok n̄an lo̧mo̧o̧ren armej ro An, im bwe Enaaj en̄taan im mej n̄an pinmuur kōn jero̧wiwi ko aer” (Alma 33:22).
Michael Auras jān Germany ekar jeļā katak ko raorōk kōn gospel in ālkin an kar jebwābwe āinwōt juon jodikdik. “Ekanooj lōn̄ men ko rem̧m̧an im jem̧jerā ko rej waļo̧k ilo gospel in, ijoke tōmak wōt ilo Jisōs Kraist enaaj jipan̄ naan in kam̧ool ko ad.” ļein eaar ba. “Eaar jako am̧ro jema kajoor ilo tōmak eo am̧ro ilo jidik iien kōn kajjitōk ko ak kar bar ro̧o̧ltok ke pedped in tōmak eo am̧ro ilo Jisōs Kraist ekar ilōn̄ in jabdewōt men.”
Rilo̧mo̧o̧r eo ej jāmin epaake eok jān n̄e kwoj jelm̧ae ak tallōn̄e juon toļ kōn tōmak.”7 Jisōs Make eaar kallim̧ur, “Ij pād ippemi iien otemjej, n̄an jem̧ļo̧kōn laļ” (Matu 28:20). E enaaj etetal ippād, iakwe kōj “kōn juon yokwe indeeo” (Jeremaia 31:3), im letok n̄an kōj elōn̄ļo̧k (lale Jon 10:10). Ro renaaj kalbwini ine in renaaj lo bwe tōmak eo aer edik emaron̄ ilo Rilo̧mo̧o̧r, erom “juon wōjke, jebarļo̧k ilo kom̧ n̄an mour eo ejjeļo̧k jem̧ļo̧kin” (Alma 33:23).
Rijeje eo ej jokwe ilo Utah, USA.