“Juon Māj ilo Wūntō eo,” Liaona, M̧aj. 2024.
Ainikien Armej ro Rekwojarjar ilo Raan Ko Āliktata
Juon Māj ilo Wūntō eo
Ikar ļōmņak eo ituru ekakitōtō, ak iaar lo bwe ekar aikuji juon m̧ōttan.
Pija ko litok jān rijeje eo
Ekkā aō lo ejja māj eo wōt ej reitok jān wūntō in juon abatmen. Ikar ļōmņak ippa make, “Ekaburom̧ōjm̧ōj ke ke juon emaron̄ emakijkij an reitok jān wūntō eo an, ekajeti m̧akūtkūt ko an ro rituruer?”
Innām juon raan ikar ļōmņak bwe in aikuj etal im kajjitōk n̄e imaron̄ jipan̄. Iaar pepe in bōkļo̧k jidik pilawā eo iaar kōmate ļo̧k ippa.
Pilawā in ekar kapidodoik būruwōn eo rituru erūtto. Liin eaar dānnin kōmjaaļaļ ilo an ba n̄an eō kōn an ajimakeke. Ejjeļo̧k juon eaar loļo̧k e im ejjeļo̧k juon eaar kūrļo̧k e, jekdoon ajri ro make nejin. Kōn pā ko rowuddidid, eaar kōmōrāik dānnin kōmjaaļaļ ko jen turin mejān.
Eaar bōk kitwōn im ba, “Ewi jon̄an an em̧m̧an n̄an etal jen mour in. Ijjab ekajete jabdewōt ilo aō reilo̧k jen wūntō eo aō. Ij baj lale wōt an ajri ro ikkure im men ko jet rej waļo̧k ilo meļan iaat eo.”
Kōmeļeļe jān Alex Nabaum
Aolep iien, kōm̧ro ej kennaan kōn gospel in. Kar jinoin liin ekar m̧akoko kōnke ļeo ippān ekar jerbal āinwōt juon rijerbal ilo bar juon kabun̄. Ak ke ej ļapļo̧k wōt am̧ro kōnono, liin ej jino ļapļo̧k wōt an kar bwilōn̄ kōn m̧ool ko iaar kwaļo̧ki kōn Jisōs Kraist im kōn gospel eo An em̧ōj an bar jepļaaktok.
Eaar ba, “em̧m̧an bwe epād ippād ejja Jisōs in wōt!” “Jenaaj lo doon ilo lan̄?”
“Aaet,” iaar uwaak, “jenaaj pād ijeņ ippān doon—jibwe pein doon.”
Jān iien eo, kom̧ro kar m̧ōttā ilo elōn̄ iiō ko, m̧ae iien eo liin ekar ilo̧k jen mour in.
Kiiō ij kōņaan ļōmņak kōn eo kar iturū an reitok jen wūntō eo an jen lan̄, lali tok m̧akūtkūt ko am̧ im kōtmāne bwe ebwe iakwe ippād n̄an doon.