“Kwoj Uwaan,” Liaona, M̧aj. 2024.
Rūm̧m̧an Ded ro
Kwoj Uwaan
Jemaron̄ lo ad uwaanļo̧k ilo ad ejaake juon jem̧jerā eo ewōr meļeļein ippān Jemedwōj Ilan̄ im Jisōs Kraist.
Kōmeļeļe jān Glory in Degrees, jān Annie Henrie Nader
Kajjojo iaad jaar ļotak tok kōn juon aikuj n̄an uwaanļo̧k. Jej lukkuun uwaanļo̧k baam̧le ko ad, ro m̧ōttad, rijerbal ro mōttad, ward ko, im armej ro jet ilo mour ko ad. Būruwōd ej kōņaan kein ilan̄ kōn juon aikuj eo n̄an uwaanļo̧k.
Kwe im n̄a jekar—im jej wōt—m̧ōttan juon baam̧le indeeo ippān Jemedwōj Ilan̄, m̧okta jen ad itok n̄an laļin. Jeje ko rekwojarjar rej kōmeļeļeik kōj āinwōt “ruwamāejet im ri ito-itak ioon laļ” (Hibru 11:13; Katak im Bujen Ko 45:13). N̄an likūt m̧weo m̧ōd ilan̄ im itok n̄an juon laļ eo eobrak kōn pok, ajimakeke, im būrom̧ōj, jemaron̄ en̄jake āinwōt riatajinemjen, on̄ kōn m̧weo im̧ōd indeeo im jemjerā ko.
Eļan̄n̄e kwaar on̄ jidik kōn m̧weo m̧ōd ilan̄, bōlen kōnke lukkuun m̧weo im̧ōd im paoktokid rej ekkeijelļo̧k ippān Jemedwōj Ilan̄ im Rilo̧mo̧o̧r, Jisōs Kraist. En̄in unin an lukkuun aorōk n̄an bōk juon ekkeijeļ eo em̧wilaļ Ippāer. N̄e jej ekkeijeļ Ippāer kōn bujen jem̧jerā ko ad, jenaaj lo juon uwaan ļo̧k eo em̧ool me jetōb ko ad rej kōņaan.
Bujen Jem̧jerā eo Ad ippān Anij
Kōm̧m̧an ko ad im ļōmņak ko ad rej pedped ioon jemjerā ko jej kaorōki. Menin em̧ool kōn bujen jem̧jerā eo ad ippān Jemedwōj Ilan̄ im Rilo̧mo̧o̧r.
N̄e jej kaorōk bujen jem̧jerā eo ad ippān Anij, aolep men rej oktak. Ijelo̧kin im̧we jen men ko an laļin, jej jino im̧we jān E im erom̧ eļapļo̧k āinwōt E. Mour ko ad renaaj jino wōr meļeļeier im kajoor ilo jetōb. Āliktata, “uwaanļo̧k” ej dipuk mour wabanban kōn ta eo jej ļōmņak meļeļein “uwaanļo̧k.”
N̄e bujen jem̧jerā eo ippān Anij ej itok m̧oktata, m̧ad ko an laļin renaaj jako im jenaaj lo m̧ool in aenōm̧m̧an eo an juon make im uwaanļo̧k. Ilo juon laļ eo ejjab emakijkij an letok men ko ejjeļo̧k wōnāer, Jemedwōj Ilan̄ eo ej iakwe ej erļo̧k bujen kōjeraam̧m̧an ko An jekdo̧o̧n armej rot kōj ilo laļ in (lale 2 Nephi 9:50–51).
Būreejtōn Russell M. Nelson ekar kwaļo̧k menin bwe “juon kain iakwe im tūriam̧okake ejenolo̧k ippān Anij, jej likūt laļ in indeeo. Anij ejjamin naaj kōjerwawaiki jemjerā eo An ippān ro me raar kipel kain jemjerā in Ippān. Ilo m̧ool, aolep ro me raar kōm̧m̧ane juon bujen ippān Anij ewōr aer maron̄ deļo̧n̄e juon kain iakwe im tūriam̧okake ejenolo̧k.”1
Jej pen n̄e ewōr juon ad jem̧jerā ippān Anij—aolep iien E ej pād ippād, ak jej aikuj kāālet n̄an pād Ippān. Im bwe kāālet eo ekwojarjar en jim̧or kajoor im anemkwoj! Kāālet in ej kanemkwoj kōj jān m̧ōņ ko rōriab eo kōn wōn kōj im kōn lokjak ko an laļin.
Im n̄e jej lo ad uwaanļo̧k ippān Jemedwōj Ilan̄, innām jemaron̄ reim̧aanļo̧k im lo ro jet āinwōt An loe. N̄e ij meļeļe An en̄jake kōn eō, em̧m̧anļo̧k aō meļeļe elmen An en̄jake kōn kwe, im am̧ maron̄ im ikdeelel n̄an tōpar im aiin ro jet n̄an erom̧ kajoorļo̧k.
Kōmeļeļe ko an Nauvoo Temple ilo tulo̧kin aļ, jān Max D. Weaver
Bujen ko Rej Kōpeļļo̧k Kōjeraam̧m̧an ko
Jemedwōj Ilan̄ im Jisōs Kraist rej ikdeelel bwe jen kōm̧m̧ani bujen ko Ippāer bwe Ren maron̄ kōjeraam̧m̧an kōj ilo elōn̄ wāween ko jej aikuji im ukōt kōj ilo wāween ko me renaaj kōm̧m̧an bwe jen jepļaakļo̧k n̄an im̧aan Mejāer.
Ij kōņaan karuwaineneik kom̧ n̄an etal emakijkij āinwōt am maron̄ n̄an m̧weo im̧ōn Irooj. Ilo aō kallim̧ur n̄an etal emakijkij, ij bōk jipan̄ an laļ, im ļōmņak ko aō im paoktokū rej kajoorļo̧k.
N̄an kōjparok bujen ko ad, jej bōk kajoor eo an priesthood me ej kōpeļļo̧k kōjeraam̧m̧an ko an Pinmuur eo an Rilo̧mo̧o̧r ilo mour ko ad. Kōjeraam̧m̧an ko ekoba kōmour, tōl, kōjparok, jipan̄, kōkajoor, aenōm̧m̧an, reim̧aanļo̧k, im lan̄lōn̄. Jemedwōn̄ Ilan̄ ej kōņaan kōjeraam̧m̧an kōj kōn aolep men kein kōn bujen jem̧jerā eo ad.
Eļan̄n̄e kwojjan̄in bōk kōjeraam̧m̧an ko an tampeļ, ij karuwaineneik kom̧ n̄an ekkatak kōjeraam̧m̧an ko an tampeļ, kajoor eo an priesthood, bujen ko, im ta eo Anij ekōņaan n̄an kwe. Jab kōttar n̄an bōk An jipan̄, kajoor, im jipan̄ ilo iakwe.
Būreejtōn Nelson ekar ba:
“Ij akweļap ippemi n̄an jab kōttar m̧ae iien m̧are n̄an bōk menin letok kwojarjar eo ilo m̧weo im̧ōn Irooj. Jino kiiō n̄an ekkatak im en̄jake ta meļeļein kōņak nuknuk in tariņae kōn kajoor an priesthood eo.
“N̄an kom̧ kajjojo ro rekar kōm̧m̧an bujen ko an tampeļ, ij akweļap ippemi n̄an kappukot—jar im jokkun wōt juon—n̄an meļeļe bujen ko an tampeļ im kain̄i ko. Kōjem ko ilo jetōb renaaj peļļo̧k. Kwonaaj ekkatak wāween kōjepel rōn̄ōl eo ikōtaan lan̄ im laļ, ewi wāween n̄an kajjitōk n̄an enjeļ an Anij pād ippem̧, im ewi wāween an em̧m̧anļo̧k am̧ bōk tōl jān lan̄. Kijejeto ko am̧ retiljek n̄an kōm̧m̧an āindein renaaj kapenļo̧k im kōkajoorļo̧k pedped eo am̧ ilo jetōb.”2
Uwaanļo̧k ilo Ukweļo̧k
Ukweļo̧k emakijkij ej bar juon wāween em̧m̧an im ekajoor n̄an epaake wōt Jemedwōj Ilan̄ im Jisōs Kraist. Ekkā an bōd ad tōmak bwe n̄e elōn̄ alen ad ukweļo̧k, innām jej ettoļo̧k jān Er. Ak eo juon em̧ool!
Ukweļo̧k ejjab kattoļo̧k eok jān Er—ej kepaaktok eok n̄an Er!
Kwomaron̄ lo eļapļo̧k uwaan im juon jem̧jerā eo em̧wilaļļo̧k Ippāer kōn kijejeto ko am̧ n̄an oktak n̄an Er n̄an jipan̄ im n̄an bōk jeo̧rļo̧k bōd.
Kajojo iaad wōj jemaron̄ en̄jake ad ettoļo̧k jen wānōk jen ta eo jaar kōņaan, ak ijjab ļōmņak Jemedwōj Ilan̄ ej inepata kōn menin āinwōt An kōņaan kōn kōņaan eo ad im kijejeto ko n̄an bar kajjieon̄. E ej iakwe kōj, E ejeļā ia eo jej jipadekļo̧k, im E enaaj m̧ōņōņō in tōl kōj ilo iaļ in.
Kile m̧ōjņo̧ ko im bōd ko ad ebōk m̧ōjno̧, ak kōn ukweļo̧k, jej karuwaineneik Jemedwōj Ilan̄ bwe en epaak tok m̧ōjno̧ eo m̧ōttan ilo kōj. Menin ej kōtļo̧k An erlo̧ke An iakwe eļap n̄an kōj im letok kōmour, jeo̧rļo̧k bōd, im aenōm̧m̧an eo jej aikuji. Ilo ekkeijel in ippān Anij ej bwe jen kōļapļo̧k lōke im pukot peran im uwaanļo̧k eo em̧ool.
Kōm̧anm̧an Eo, jān Annie Henrie Nader
Pukot Errem̧anļo̧k eo Eutiejļo̧k
Errem̧aanļo̧k eo ad emaron̄ jerbal n̄an ad uwaanļo̧k ilo Kabun̄ eo an Irooj. Jemaron̄ kāālet erreim̧aanļo̧k eo bwe jerbal ko ad make ren maron̄ jipan̄ ward eo ad, Doulul eo an Kōrā ro, ak doulul eo an elder ro n̄an jino juon jikin iakwe n̄an uwaanļo̧k. Kappukot n̄an jipan̄ ro jet uwaanļo̧k ej kōļapļo̧k meļeļe eo ad make n̄an uwaanļo̧k.
Kōnke kwoj juon ajri nejin Anij, kwoj uwaanļo̧k—jekdo̧o̧n elmen an ro jet lo eok ak elmen am̧ make lo eok. Karōk in m̧ōņōņō eo an Jemed ej meļeļein n̄an kwe, im ewōr am̧ juon jerbal eaorōk n̄an kōm̧m̧ane. Kajjojo iami ewōr juon an maron̄ n̄an jerbali im uwaanļo̧k aelōn̄ in kiin̄ eo an Anij, jekdo̧o̧n armej rot, jeļāļo̧kjeņ, ak itulikin pelaakūm.
Juon kōlmenļo̧kjeņ ekkā an itok n̄an kōļmenļo̧kjeņ eo aō kōn naan in “rūm̧m̧an ded ro,” “rūtto ro rejjan̄in m̧are,” im “rūtto ro rejjan̄in m̧are” rejjab lukkuun kwaļo̧k wōn kwe. Rej baj jet naan ko me rej jipan̄ kōmeļeļeik iiō ko im armej, ak rejjab lukkuun kōmeļeļeik paoktok eo em̧ool indeeo an juon, kōttōpar, im maron̄.
Ļābōļ ko ak keidi emaron̄ kōmman jon̄an wāween ad lo kōj make im aorōk eo ad im maron̄ ilo aelōn̄ in kiin̄ eo an Anij. Ilo m̧ool ej bwe kwoj membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata. Kwaar kōm̧m̧an bujen ko ippān Anij. Kwaar bōk kajoor in priesthood eo An. Kwoj juon membōr in Doulul eo an Kōrā ro ak doulul eo an elder ro. Kwoj juon āinwōt an Būreejtōn Nelson kar kwaļo̧k, juon ajri nejin Anij, juon ajri in bujen, im juon rikaļooraņ Jisōs Kraist. En̄in ej lukkuun kwe eo eaorōktata, im bwe enaaj “tōlļo̧k eok n̄an mour indeeo ilo laļ eo an selestial an Anij.”3
Gospel eo em̧ōj an jepļaaktok kōn juon rūm̧m̧an ded–juon rikanaan edik—Josep Smith. En̄in ej juon ļōmņak ekajoor n̄an kōļmānļo̧kjen. Jemedwōj Ilan̄ im Jisōs Kraist raar lōke Rikanaan eo im ro m̧ōttan ilo tōre in n̄an kōjepļaaktok Kabun̄ in. Anij ej bar lōke eok n̄an m̧ōttan jerbal in eļap ilo raan kein āliktata.
Eļan̄n̄e kwoj kōņaan jeļā wōn eo kwe im n̄e ewōr tokjem̧ im aorōk, kajjitōk ippān Jemedwōj Ilan̄. E enaaj aolep iien jiron̄ eok m̧ool eo kōn kwe. E enaaj jipan̄ eok lo kwe make āinwōt An lo eok—kōn maron̄ im iakwe eo eļap. E emaron̄ tōl eok n̄an eddo ko reļļap n̄an eddōkļo̧k eo kwoj kōtmāne!
Kōm̧m̧an bwe kōj aolep en lōn̄ mej ko n̄an loe kajjojo iaad im kōj make, en jab mejen tōre in ak armej ak kōn ta eo emaron̄ kom̧m̧an im kobaik armej n̄an kōjparok bujen ko, ro rikaļooraņ Jisōs Kraist, ro m̧ōttad, būratōr im sister, im ļaddik ro im leddik ro nejin Anij. Im kōn aolep jerbal im jem̧jerā indeeo, jenaaj lo aiboojoj im m̧ool in uwaanļo̧k eo.