“E Dua na iTalanoa ni Rawa-Ka ni Daukaulotu: 60 na Yabaki ena Kena Caka,” Liaona, Jiulai 2024.

E Dua na iTalanoa ni Rawa-Ka ni Daukaulotu: 60 Yna Yabaki ena Kena Caka

Mai vei Christy Monson

Sa dua na ka rekitaki dina vei au me’u rogoca ni a qai vuataka na vuana e dua na sorenikau ni kosipeli ka tei ena vica vata na yabaki sa oti.

iVakatakilakila

sorenikau ena qele kei na dua na kau sa tubu tiko kei na vuana

Droini mai vei Carolyn Vibbert

Au dau taleitaka tu ga na Vunau kei na Veiyalayalati 18:10: “Sa ka talei ena mata ni Kalou na yalo ni tamata.” Ka so na gauna e dau taura e vuqa vei keda na cakacaka vata ena wasei ni ivakadinadina me kau mai kina na yalo vua na iVakabula (raica na 2 Korinica 13:1).

Au a vakananumi ena vakasama totoka oqo ni cakacaka vakadaukaulotu cokovata ena gauna au a ciqoma kina e dua na imeli ena dua na siga. E dua na tacida ka kaya ni luvena tagane na peresitedi ni kaulotu mai Wichita, Kansas, a vakataroga se o au beka na wati Robert Monson. A tomana o koya ka kaya ni a vaqarai Elder Monson tiko ka a veiqaravi ena Tabana ni Kaulotu na Central States ena 1959. Oqori na watiqu.

A tukuna vei au me baleta e rua na cauravou daukaulotu ka rau a vakauqeti wale tikoga oqo me rau curu ki na dua na valelevu. Erau a tukituki ena imatai ni katuba ka kunea sara e dua na marama qase ka sureti rau me rau lesu tale mai ena siga ka tarava. Erau a lokuca sara e dua na gauna.

Ni rau sa lesu tale mai ki na iloku oya, rau qai kila kina ni o sisita qase oqo a dua toka nona ivola‑e‑tolu makawa (iVola i Momani, Vunau kei na Veiyalayalati, kei na Mataniciva Talei) ka rau a solia vua na daukaulotu ena 1959. A sa wilika vakavuqa o koya ka kila ni sa dina na ivakavuvuli e tiko kina. A sega ga ni lewena o koya na Lotu ena gauna oya baleta ni sega ni vinakata o watina me lako i lotu se papitaiso. Se qai takali wale toka ga oqo na watina, ka a masuta voli o koya me kunei rau tale na daukaulotu. A volai toka ena nona ivola‑e‑tolu na yacadrau na daukaulotu mai na 1959: o Robert Monson kei Granade Curran, na watiqu kei na nona itokani.

Ena loma ni vica na macawa ka tarava, a vulica kina na marama oqo na yavu ni veivakabulai kei na veivakalougatataki ni valetabu. A sa takali yani na luvena tagane ni sa yabaki 22, ka a marautaka sara na nona rawa ni na duavata tale kei koya. Ni rau sureti koya na daukaulotu me papitaiso, a ciqoma ena reki na nodrau veisureti.

Rau sa mai takali ruarua na watiqu kei na nona itokani, o Elder Curran, ia au rawa ni raitayaloyalotaka ni rau a tiko ena papitaiso totoka oqo mai na daku ni ilati.

Ni a tukuna vei au na luvei peresitedi ni kaulotu na italanoa oya, a vakananuma vei au ni iVakabula e sega ni dau guilecava e dua vei keda. Sa dau tiko vata kei keda o Koya kevaka eda vakatarai Koya ki na noda bula. Na Veiyalayalati Vou e talanoataki Sakiusa, ka a kabata e dua na vunikau me raica na iVakabula (raica na Luke 19:1–10). Ena vunikau oya, a kunei Sakiusa kina na iVakabula, ka a kerea me laki vakayakavi ena nona itikotiko. Sa vakakina, ni a masu e dua na sisita qase ka waraki rau voli na daukaulotu me rau tukituki ena nona katuba, ka rau a qai cakava vakakina. E kilai keda kece sara na iVakabula. “Ni sa lako mai na Luve ni tamata me vakasaqara ka vakabula na ka sa yali” (Luke 19:10).

E rua na veisa daukaulotu—dua ena sivia na 60 na yabaki sa oti qai dua wale tikoga qo—a kauta mai na sisita oqo vei Jisu Karisito ka vaqaqacotaka kina na nodra dui ivakadinadina ka kune reki vua na Turaga. Au yalomalumalumu ni rawa me’u mai sarava na italanoa oqo, ka vakila na nodra reki na vakaitavi kina ni ra kauta mai na sisita oqo vua na iVakabula (raica na Vunau kei na Veiyalayalati 18:15).

E vakaitikotiko o koya e vola oqo e Utah, Amerika.